6
1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཏ༌ ངའེ༌ གྱལ༌པོའ༌ ཅོ༌ཅེས༌ཅན༌གུན༌ ཁྱོ༌རང༌ངི༌ ཐོང༌ཨིན༌། ངའེ༌ ཤེད༌ དང༌ ཁྱུད༌དི༌ ཞས༌ཏེ༌ ཁོའེ༌ ཁོང༌གུན༌ ཆ༌ཅུག༌ཨིན༌། ཏེན༌ན༌ ཁྱུད༌ དང༌ ཤེད༌པོའེ༌ ཁོའེ༌ ཁོང༌གུན༌ འི༌ ས༌ཀྱད༌ནེ༌ ཕིངས༌ཏེ༌ ཏང༌ཨིན༌།”
2 དཀོན༌མཆོག༌གི༌ མོ༌ཟེས༌ལ༌ མོལས༌, “ང༌ ནི༌ ཡ༌ཝ༌ ཨིན༌།
3 ང༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌ གུན༌ལ༌ དཀོན༌མཆོག༌ ཀུན༌ཝང༌ངི༌ ཚུལ༌ལ༌ སྔོན༌ཅུགས༌ཏེ༌ ཨིན༌། ཨིན༌ནའང༌ ངའེ༌ ཁོང༌གུན༌ལ༌ ང༌ ‘ཡ༌ཝའེ༌’ མིང༌ངི༌ ནང༌ང༌ སྔོན༌ མ༌ཅུགས༌པིན༌།
4 ངའེ༌ ཀེ༌ནན༌ནི༌ ས༌ཆ༌ ཁོང༌གུན༌ལ༌ ཏང༌ཅེས༌སི༌ ཆད༌དོན༌བོ༌ ཅོས༌པིན༌ ཀ༌རུ༌ ཁོང༌གུན༌ ཞན༌ཡུལ༌ལི༌ མི༌ ཚུལ༌ལ༌ དུག༌གད༌པིན༌།
5 ངའེ༌ ཨི༌ཇིབ༌པ༌གུན༌ནི༌ ཚེ༌ཡོག༌, ཨིས༌ར༌ཨེལ༌པ༌གུན༌ནི༌ རྡུག༌ངལ༌ལི༌ སྐད༌གུན༌ནའང༌ ཚོར༌ ཡང༌ ངའ༌ ངའེ༌ ཆད༌དོན༌ ཅོ༌ཁན༌བོ༌ ཨིད༌ཏུ༌ ཡོངས༌།”
6 “ཏེ༌བོའེ༌ཕིའ༌ ཨིས༌ར༌ཨེལ༌པ༌གུན༌ལ༌ ཟེར༌, ‘ང༌ ཡ༌ཝ༌ ཨིན༌, ཡང༌ ངའེ༌ ཁྱོ༌ཞ༌གུན༌ ཨི༌ཇིབ༌པ༌གུན༌ནི༌ རྡུག༌ངལ༌ལི༌ ཡོག༌ནེ༌ ཕིངས༌ཏེ༌ ཁོང༌ངི༌ ཚེ༌ཡོག༌ནེ༌ ཐར༌ཅུག༌ཨིན༌། ངའེ༌ ཤེད༌ ཡང༌ ཁོང༌གུན༌ལ༌ ཆད༌པ༌ སྲན༌ཏྲེ༌ ཏང༌ཅེས༌ གྱུད༌ཏེ༌ ཁྱོ༌ཞ༌གུན༌ སྐྱོབ༌ཨིན༌།
7 ཁྱོ༌ཞ༌གུན༌ ང༌རང༌ངི༌ མི༌ ཡང༌ ང༌ ཁྱོ༌ཞ༌གུན༌ནི༌ དཀོན༌མཆོག༌ གྱུར༌ཨིན༌། ཏེ༌ནེ༌ ངའ༌, ཁྱོ༌ཞའ༌ ཨི༌ཇིབ༌པ༌གུན༌ནི༌ སྟན༌ཁན༌ནི༌ ནགས༌བར༌དོ༌ནེ༌ ཐར༌ཅུག༌ག༌ ཛད༌ཁན༌ནི༌ ཡ༌ཝ༌ ཁྱོ༌ཞའེ༌ དཀོན༌མཆོག༌ ཨིན༌ཁན༌ ཁྱོ༌ཞའ༌ ཧ༌གོ༌ཨིན༌།
8 ངའེ༌ ཁྱོ༌ཞ༌གུན༌ ཏེ༌ ས༌ཆའེ༌ ནང༌ང༌ ཁྱེར༌ཨིན༌ ཀ༌བོ༌ ངའེ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌བ༌ ཏང༌ཅེས༌སི༌ ནའ༌ ཁུར༌པིན༌། ཏེ༌བོ༌ ཏུས༌གྱུན༌ནི༌ ཕིའ༌ ཁྱོ༌ཞའེ༌ གྱུ༌ནོར༌ གྱུར༌ཨིན༌, ང༌ ཡ༌ཝ༌ ཨིན༌།’ ”
9 མོ༌ཟེས༌སི༌ ཡ༌ཝའེ༌ མོལ༌ཁན༌གུན༌ ཨིས༌ར༌ཨེལ༌པ༌གུན༌ལ༌ ཤདས༌ ཨིན༌ནའང༌ ཁོང༌གུན༌ནི༌ མ༌ཉནས༌ ཅིའ༌ཟེར༌ན༌ ནགས༌ སྲན༌ཏྲེ༌ སྟན༌ཅེས༌པོའེ༌ ཁོང༌གུན༌ནི༌ སེམ༌སྟོབས༌ ཆགས༌ཏེ༌ ཡོད༌པིན༌།
10 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌,
11 “ཨི༌ཇིབ༌བི༌ གྱལ༌པོ༌ ཡོད༌ས༌ སོང༌ཏེ༌ ཨིས༌ར༌ཨེལ༌པ༌གུན༌ ཁོའེ༌ ཡུལ༌ནེ༌ ཆ༌ཅུག༌ ཟེར༌།”
12 ཨིན༌ནའང༌ མོ༌ཟེས༌སི༌ ཡ༌ཝའ༌ ཟེརས༌, “ང༌རང༌ངི༌ མི༌གུན༌ནི༌ ངའེ༌ ཁའ༌ ཉན༌ན༌ མི༌དུག༌། ཏེ༌ནེ༌ ང༌ སྤེ༌ར༌ ཏང༌ཁན༌ གྱལ༌ལ༌ མན༌ པ༌སང༌ གྱལ༌པོའེ༌ ངའེ༌ ཁའ༌ ཅིའ༌ ཉན༌ཨིན༌?”
13 ཨིན༌ནའང༌ ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ བཀའ༌ སལ༌ཏེ༌ མོལས༌, “ཨིས༌ར༌ཨེལ༌པ༌གུན༌ དང༌ གྱལ༌པོའ༌ ངའེ༌ ཁྱོ༌ཞའ༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ ཕིང༌ཏེ༌ ཁྱེར༌ཅེས༌སི༌ ཁག༌ གལ༌ཁན༌བོ༌ ཤོད༌།”
མོ༌ཟེས༌ དང༌ ཨ༌རོན༌ནི༌ ཕ༌མེས༌པོ༌གུན༌།
6:14-30
14 འི༌གུན༌ མོ༌ཟེས༌ དང༌ ཨ༌རོན༌ནི༌ ཕ༌མེས༌པོ༌གུན༌ ཨིན༌ནོག༌:
ཨིས༌ར༌ཨེལ༌ལི༌ གོ༌བུ༌ བུ༌ཚ༌ རུ༌བེན༌ ནི༌ བུ༌ཚ༌གུན༌ ཧ༌ནོག༌, པ༌ལུ༌, ཧེཟ༌རོན༌ དང༌ ཀར༌མི༌ གུན༌ ཨིན༌། ཁོང༌གུན༌ནི༌ པུར༌གྱུད༌ རུ༌བེན༌ནི༌ མི༌སྡེ༌གུན༌ གྱུར༌།
15 སི༌མི༌འོན༌ནི༌ བུ༌ཚ༌གུན༌ ཡེ༌མའུལ༌, ཡ༌མིན༌, ཨོ༌ཧད༌, ཡ༌ཀིན༌, ཟོ༌ཧར༌ དང༌ ཤོལ༌, ཡང༌ ཤོལ༌ལི༌ ཨ༌མ༌ ཀེ༌ནན༌མ༌ ཨིན༌པིན༌། ཁོང༌གུན༌ནི༌ པུར༌གྱུད༌ སི༌མི༌འོན༌ནི༌ མི༌སྡེ༌གུན༌ གྱུར༌།
16 ཐོ༌ ཅོས༌ཏེ༌ ཡོད༌ཁན༌ ནང༌ཞིན༌ ལི༌ཝི༌ བུ༌ཚ༌གུན༌ གེར༌ཤོན༌, ཀོ༌ཧད༌ དང༌ མི༌ར༌རི༌ གུན༌ ཨིན༌པིན༌། ལི༌ཝི༌ ལོ༌ 137 ཚག༌པ༌ སོན༌ཏེའ༌ ལུས༌།
17 གེར༌ཤོན༌ནི༌ བུ༌ཚ༌གུན༌ ལིབ༌ནི༌ དང༌ ཤི༌མེའི༌ ཨིན༌ནོག༌། ཁོང༌གུན༌ འིན༌ན༌ མིང༌ ཡོད༌ཁན༌ནི༌ མི༌སྡེ༌གུན༌ནི༌ ཕ༌མེས༌པོ༌ ཨིན༌པིན༌།
18 ཀོ༌ཧད༌དི༌ བུ༌ཚ༌གུན༌ ཨམ༌རམ༌, ཨིཟ༌ཧར༌, ཧེབ༌རོན༌ དང༌ འུ༌ཟེལ༌ གུན༌ ཨིན༌ནོག༌། ཀོ༌ཧད༌ ལོ༌ 133 ཚག༌པ༌ སོན༌ཏེའ༌ ལུས༌།
19 མི༌ར༌རི༌ བུ༌ཚ༌གུན༌ མ༌ཧིལ༌ དང༌ མུ༌ཤི༌ ཨིན༌ནོག༌།
ཐོ༌ ནང༌ཞིན༌ ཁོང༌གུན༌ ལི༌ཝི༌ མི༌སྡེ༌གུན༌ ཨིན༌ནོག༌།
20 ཨམ༌རམ༌མི༌ ཁོ༌རང༌ངི༌ ཨ༌བའེ༌ སྲིང༌མོ༌ ཡོ༌ཤེ༌བེད༌ ཉམ༌པོ༌ ན༌མ༌ ཅོས༌ ཡང༌ ཏེ༌ བུ༌མོའ༌ ཨ༌རོན༌ དང༌ མོ༌ཟེས༌ བུ༌ཚ༌གུན༌ ཇོར༌། ཨམ༌རམ༌ ལོ༌ 137 ཚག༌པ༌ སོན༌ཏེའ༌ ལུས༌།
21 ཨིཟ༌ཧར༌རི༌ བུ༌ཚ༌གུན༌ ཀོ༌རཧ༌, ནི༌ཕེག༌ དང༌ ཟིཀ༌རི༌ གུན༌ ཨིན༌ནོག༌།
22 འུ༌ཟེལ༌ལི༌ བུ༌ཚ༌གུན༌ མི༌ཤེལ༌, ཨེལ༌ཟ༌ཕན༌ དང༌ སིཐ༌རི༌ གུན༌ ཨིན༌ནོག༌།
23 ཨ༌རོན༌ ནི༌ ཨམ༌མི༌ན༌དབ༌བི༌ བུ༌མོ༌ ན༌ཧ༌ཤོན༌ནི༌ སྲིང༌མོ༌ ཨིལ༌ཤི༌བ༌ ཉམ༌པོ༌ ན༌མ༌ ཅོས༌། ཁོའ༌ བུ༌ཚ༌ ཞི༌ སྐྱེས༌, ཁོང༌གུན༌ ན༌དབ༌, ཨ༌བི༌ཧུ༌, ཨེ༌ལི༌འ༌ཟར༌ དང༌ ཨི༌ཐ༌མར༌ གུན༌ ཨིན༌ནོག༌།
24 ཀོ༌རཧའེ༌ བུ༌ཚ༌གུན༌ ཨ༌སིར༌, ཨེལ༌ཀ༌ནཧ༌ དང༌ ཨ༌བི༌ཨ༌སབ༌ གུན༌ ཨིན༌། ཁོང༌གུན༌ནི༌ པུར༌གྱུད༌ ནི༌ ཀོ༌རཧའེ༌ མི༌སྡེ༌གུན༌ ཨིན༌ནོག༌།
25 ཨ༌རོན༌ནི༌ བུ༌ཚ༌ ཨེ༌ལི༌འ༌ཟར༌རི༌ པུ༌ཀྲེལ༌ལི༌ བུ༌མོ༌ ཉམ༌པོ༌ ན༌མ༌ ཅོས༌ ཡང༌ ཁོའ༌ བུ༌ཚ༌ ཕི༌ནི༌ཧས༌ སྐྱེས༌། མི༌སྡེ༌ ནང༌ཞིན༌ ཁོང༌གུན༌ ལི༌ཝི༌ ནང༌ཚངས༌གུན༌ནི༌ གོ༌སྐྱོང༌གུན༌ ཨིན༌ནོག༌།
26 ཁོང༌གུན༌ ཏེན༌ན༌ ཨ༌རོན༌ དང༌ མོ༌ཟེས༌ ཨིན༌ནོག༌ ཀ༌གུན༌ལ༌ ཡ༌ཝའེ༌ མོལས༌, “ཨིས༌ར༌ཨེལ༌པ༌གུན༌ ཁོང༌གུན༌ནི༌ སྡེ༌ ནང༌ཞིན༌ ཨི༌ཇིབ༌ནེ༌ ཕིངས༌ཏེ༌ ཁྱེར༌།”
27 ཁོང༌གུན༌, ཨི༌ཇིབ༌བི༌ གྱལ༌པོའ༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱེར༌ཅེས༌སི༌ སྐོར༌ལ༌ ཟེར༌ཁན༌ནི༌ ཏེན༌ན༌ མོ༌ཟེས༌ དང༌ ཨ༌རོན༌ ཨིན༌ནོག༌།
28 ཡ༌ཝའེ༌ མོ༌ཟེས༌ལ༌ ཨི༌ཇིབ༌བི༌ ས༌ཆའེ༌ ནང༌ང༌ ཞལ༌ཏ༌ སལ༌ ཟ༌ནེ༌
29 ཁོང༌ངི༌ ཁོའ༌ མོལས༌, “ང༌ ཡ༌ཝ༌ ཨིན༌། ངའེ༌ ཁྱོ༌རང༌ང༌ ཟེར༌ཁན༌ ཚང༌མ༌ ཨི༌ཇིབ༌བི༌ གྱལ༌པོའ༌ ཤོད༌།”
30 ཨིན༌ནའང༌ མོ༌ཟེས༌སི༌ ཡ༌ཝའ༌ ཟེརས༌, “ངའ༌ ཏེ༌བོ༌ ཅོ༌ཉན༌ཅེས༌ མེ༌རག༌། ང༌ སྤེ༌ར༌ གྱལ༌ལ༌ ཏང༌ མ༌ཉན༌ཁན༌ ཞིག༌ག༌ གྱལ༌པོའེ༌ ཅིའ༌ ཉན༌ཨིན༌?”