གྱལ༌པོའེ༌ ཝང༌སྲུལ༌ལི༌ སང༌ སྔུན༌ལ༌ སྐྱོབ༌ཁན༌ གོ༌ཁྲིད༌གུན༌།
གྱལ༌པོའེ༌ ཝང༌སྲུལ༌ལི༌ སང༌ སྔུན༌ལ༌ སྐྱོབ༌ཁན༌ནི༌ གོ༌ཁྲིད༌གུན༌ སྐོར༌།
འི༌ སྤེ༌ཆ༌ སུའི༌ བྲིས༌ཏེ༌ ཨིན༌ གྱུས༌ མེད༌ཏེ༌ ཨིན༌ནོག༌, ཨིན༌ནའང༌ ཨིབ༌རི༌པའེ༌ ཆོས༌སི༌ ནང༌ང༌ ཁས༌པ༌གུན༌ནི འི༌ སྤེ༌ཆ༌ ས༌མུ༌འེལ༌ལི༌ བྲིས༌ཁན༌བོ༌ ཨིད༌ཤེས༌ ཅོའ༌ནོག༌། འི༌ སྤེ༌ཆ༌ སིལ༌ལ༌ཅིག༌ འི༌བོ༌ ས༌མུ༌འེལ༌ ཅིག༌པོའེ༌ མ༌ བྲིས༌ཁན༌བོ༌ སལ༌པོ༌ ཆ༌དུག༌།
འི༌ སྤེ༌ཆ༌ མང༌ཆེའ༌བོ༌ ས༌མུ༌འེལ༌ལི༌ ཨིན༌ནའང༌ གྱལ༌པོ༌ དཱ༌བིད༌དི༌ ཏུས༌ལ༌ ཡོད༌ཁན༌ ལུང༌སྟོན༌པ༌ ན༌ཐན༌ དང༌ གཱད༌ ཉིས༌ཀོའེ༌ འི༌བོ༌ བྲི༌ཅེས༌ལ༌ རོགས༌ ཅོས༌ཏེ༌ ཨིན༌ནོག༌ སམ༌མ༌ནོག༌(1Ch 29:29)། བྱང༌ ཆོགས༌སི༌ གྱལ༌སྲིད༌ ཨིས༌ར༌ཨེལ༌, ཨ༌སི༌རི༌ཡཱ༌ ཟུམས༌ཏེ༌ ཁྱེར༌རི༌ ཏུས༌ལའང༌ ཁོང༌གུན༌ནི༌ སྡིག༌པའེ༌ ལས༌ ཅོ༌ཅེས༌གུན༌ མ༌ཕངས༌ བྲིས༌ཏེ༌ ཡོད༌ཁན༌བོའེ༌ ང༌དང༌ང༌ འི༌ སྤེ༌ཆའེ༌ ཁག༌ཞིག༌ ཏེན༌ན༌ ཏུས༌སི༌ ལུང༌སྟོན༌པ༌ ཞིག༌གི༌ བྲིས༌ཁན༌ནི༌ སྤང༌པོ༌ ཐོབ༌བ༌ནོག༌ (སྐྱོབ༌ཁན༌ནི༌ གོ༌ཁྲིད༌གུན༌ 18:30)། འི༌ སྤེ༌ཆ༌ སུའི༌ བྲིས༌ཏེ༌ ཨིན༌ནའང༌ ཅའང༌ ཁྱད༌ ཆ༌ཅེས༌ མེད༌ཏེ༌ ཨིན༌ནོག༌ ཅིའ༌ཟེར༌ན༌ འི༌ནང༌ང༌ ཡོད༌ཁན༌ ལབ༌ཞ༌གུན༌ གྱུད༌ཏེ༌ དཀོན༌མཆོག༌ འི༌བོ༌ བྲིའ༌ཛད༌ཅེས༌སི༌ ནང༌ང༌ ཐུས༌ཏེ༌ ཨིན༌ཁན༌ སལ༌པོ༌ ཧ༌གོའ༌ནོག༌།
འི༌ སྤེ༌ཆ༌ ཀ༌ལོའེ༌ ནང༌ང༌ བྲིས༌ ཏན༌ཏན༌ གྱུས༌མེད༌ཏེ༌ ཨིན༌ནོག༌ ཨིན༌ནའང༌ འི༌བོ༌ ཨིས༌ར༌ཨེལ༌ དང༌ ཡ༌ཧུ༌དཱའེ༌ གྱལ༌པོ༌གུན༌ནི༌ ཝང༌སྲུལ༌ལི༌ ཏུས༌ལ༌ ༼1,100-721BC༽ བྲིས༌ཁན༌ སྟན༌པོ༌ ཨིན༌ནོག༌ ཅིའ༌ཟེར༌ན༌ འི༌ནང༌ང༌ “ཏེ༌ཏུས༌ལ༌ ཨིས༌ར༌ཨེལ༌པ༌གུན༌ལ༌ གྱལ༌པོ༌ མེད༌པིན༌” བྲིས༌ཁན༌ནི༌ ཚིགས༌པོ༌ ཡང༌ནེ༌ ཨང༌ ལྡབས༌ཏེ༌ ཡོད༌ཏེ༌ ཨིན༌ནོག༌།
དཀོན༌མཆོག༌གི༌ མི༌གུན༌ནི༌ ཁོང༌ངི༌ བཀའ༌ དང༌ བཀའ༌རྒྱ༌གུན༌ ཁའ༌ཉན༌ཏེ༌ ཡ༌ཝ༌ ཅིག༌པོའ༌ ཅོལ༌ཅེས༌སི༌ ཁ༌ཆད༌པོ༌ རྗེད༌ན༌ ཁོང༌གུན༌ནི༌ཀ༌ ཅི༌ ཇུང༌ཨིན༌ ཏེ༌བོ༌ ཤད༌ཅེས༌ལ༌ འི༌ སྤེ༌ཆ༌ བྲིས༌ཏེ༌ ཨིན༌ནོག༌། དཀོན༌མཆོག༌གི༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌བི༌ པུར༌གྱུད༌གུན༌ལ༌ ཁོང༌གུན༌ ངལ༌ཚོས༌སེ༌ ཀེ༌ནན༌ནི༌ ས༌ཀྱད༌ སལ༌ཅེས༌སི༌ ཁ༌ཆད༌པོ༌ གྲུབ༌བ༌ཅིག༌ ཁོང༌གུན༌ནི༌ ཡ༌ཝ༌ དཀོན༌མཆོག༌གི༌ ཁའ༌ མ༌ཉན༌ན༌ ཏད༌པ༌ མེད༌ཁན༌ ཀེ༌ནན༌པ༌གུན༌ མེད༌ཁན༌ མ༌ཅོའ༌ ལྷ༌ལྷ༌མོ༌ གུན༌ལ༌ ཅོལ༌ཁན༌གུན༌ ཉམ༌པོ༌ དྲེས༌། ཨིས༌ར༌ཨེལ༌པ༌གུན༌ནི༌ ཁོང༌གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ཏེ༌ ཁོང༌གུན༌ནི༌ ཆོས༌ཁྲིམས༌གུན༌ ཅོ༌ཅེས༌ གོ༌ཟུག༌། ཏེ༌བོའེ༌ ཞས༌ཏེ༌ ཡ༌ཝའེ༌ ཁོང༌གུན༌ སྐྱོབ༌ཅེས༌སི༌ ཁ༌ཆད༌པོ༌ ཅག༌ག༌ ཛད༌ཏེ༌ ཁོང༌གུན༌ སྐྱོང༌ཅེས༌ལ༌ ཀེ༌ནན༌ནི༌ ནང༌ང༌ ཡོད༌ཁན༌ ཞན༌ གྱལ༌ཁམས༌གུན༌ནི༌ ལག༌ག༌ སྟད༌ཏེ༌ ཁོང༌གུན༌ལ༌ ནགས༌ དང༌ བར༌དོ༌ སྟན༌ཅུགས༌། ཨིན༌ནའང༌ དཀོན༌མཆོག༌གི༌ མི༌གུན༌ནི༌ གྱོད༌པ༌ ཅོས༌ཏེ༌ ཡང༌སྐྱར༌ ཁོང༌ང༌ ཅོལ༌ཏེ༌ ཁའ༌ ཉན༌ན༌ཅིག༌ ཡ༌ཝ༌ དཀོན༌མཆོག༌གི༌ སྐྱོབ༌ཁན༌ ལང༌ང༌ ཛད༌ཏེ༌ ཁོང༌གུན༌ གྲ༌འོ༌གུན༌ནི༌ ཀ༌ནེ༌ སྐྱོབ༌ ཅུགས༌།
འི༌ སྤེ༌ཆ༌ སིལ༌ལ༌ཅིག༌ དཀོན༌མཆོག༌གི༌ མི༌གུན༌, ཅིག༌ དང༌ ཅིག༌ག༌ དཀོན༌མཆོག༌གི༌ བཀའ༌ དང༌ བཀའ༌རྒྱ༌གུན༌ ཨིད༌ཏུ༌ སྐུལ༌ཅེས༌ལ༌ ཐར༌ཁྱེལ༌ མ༌ལུས༌ཁན༌བོ༌ སལ༌པོ༌ ཧ༌གོའ༌ནོག༌། དཀོན༌མཆོག༌གི༌ བཀའེ༌ ལབ༌ཞ༌ ཏང༌ཁན༌ ལི༌ཝི༌པ༌གུན༌ནའང༌ ཁོང༌ངི༌ ཁག༌པོ༌ རྗེད༌ཏེ༌ ཏད༌པ༌ མེད༌ཁན༌གུན༌ནི༌ ལྷ༌ལྷ༌མོ༌ གུན༌ལ༌ ཅོལས༌།
འི༌ སྤེ༌ཆའེ༌ ནང༌ང༌ མི༌རབས༌ ཚང༌མའེ༌ དཀོན༌མཆོག༌གི༌ མི༌གུན༌ལ༌ ཁོང༌ངི༌ སལ༌ཁན༌ནི༌ བཀའ༌ ནང༌ཞིན༌ ཁོང༌ང༌ ཅོལ༌ཅེས༌ ཡང༌ ཁོང༌ངི༌ བཀའ༌རྒྱ༌གུན༌ལ༌ སྟན༌པོ༌ ཐམས༌ཏེ༌ ལྷ༌ལྷ༌མོ༌གུན༌ལ༌ མ༌ཅོལ༌ལ༌ ཁོང༌ང༌ སྙིང༌ངི༌ ཐིལ༌ནེ༌ ཅམས༌པ༌ ཅོ༌ཅེས༌ལ༌ སྤང༌ ཕུད༌ད༌ ཛད༌ད༌ནོག༌།
1
ཨིས༌ར༌ཨེལ༌པ༌གུན༌ནི༌ ལུས༌ཁན༌ནི༌ ཀེ༌ནན༌པ༌གུན༌ལ༌ ནོལས༌།
1:1-36
1 ཡོ༌ཤུའ༌ ཀྲོངས༌ཏེ༌ སྟིང༌ནེ༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཏྲིའ༌ ཛདས༌, “ཀེ༌ནན༌པ༌གུན༌ལ༌ སྤུང༌གོལ༌ ཅོའ༌ལ༌ གོ༌མ༌ ཀ༌ སྡེའེ༌ མི༌གུན༌ ཆ༌ལེ༌?”
2 ཡ༌ཝའེ༌ ལན༌ སལས༌, “ཡ༌ཧུ༌དཱའེ༌ མི༌སྡེ༌ ཆ༌གོས༌ ཅིའ༌ཟེར༌ན༌ ངའེ༌ ཁོང༌གུན༌ནི༌ ལག༌ག༌ ཏེ༌ ས༌ཀྱད༌པོ༌ ཏངས༌ཏེ༌ ཨིན༌།”
3 ཏེ༌ནེ༌ ཡ༌ཧུ༌དཱ༌པ༌གུན༌ནི༌ ཁོང༌ངི༌ སྤུན༌ལ༌ སི༌མི༌འོན༌པ༌གུན༌ལ༌ ཟེརས༌, “ང༌ཞའ༌ སལ༌ཁན༌ནི༌ ས༌ཀྱད༌ ཀེན༌ལ༌ ཡོངས༌ཏེ༌ ཀེ༌ནན༌པ༌གུན༌ལ༌ ནོལ༌ཅེས༌ལ༌ ང༌ཞའ༌ རོགས༌ ཅོས༌, ཏེ༌ནེ༌ ང༌ཞེའང༌ ཁྱོ༌ཞའ༌ ཏེན༌ན༌ ཙོགས༌ལ༌ རོགས༌ ཅོ༌ཨིན༌།” ཏེ༌བོའེ༌ཕིའ༌ སི༌མི༌འོན༌པ༌གུན༌ ཡ༌ཧུ༌དཱ༌པ༌གུན༌ལ༌ རོགས༌ ཅོའ༌ ཡོངས༌།
4 ཡ༌ཧུ༌དཱ༌པ༌གུན༌ནི༌ སྤུང༌གོལ༌ ཅོའ༌ཅིག༌ ཡ༌ཝའེ༌ ཀེ༌ནན༌པ༌གུན༌ དང༌ པེ༌རིཟ༌པ༌གུན༌ ཁོང༌གུན༌ནི༌ ལག༌ག༌ སལས༌ ཡང༌ ཁོང༌གུན༌ནི༌ བེ༌ཟེག༌གི༌ གྲོང༌ཁྱེར༌རི༌ ནང༌ང༌ གྲ༌འོ༌ 10,000 སདས༌།
5 བེ༌ཟེག༌གི༌ ནང༌ང༌ ཡ༌ཧུ༌དཱ༌པ༌གུན༌ལ༌ གྱལ༌པོ༌ ཨ༌དོ༌ནི༌ བེ༌ཟེག༌ ཐོང༌ ཡང༌ ཁོ༌ དང༌ ཁོའེ༌ མག༌མི༌གུན༌ལ༌ ནོལ༌ཏེ༌ ཀེ༌ནན༌པ༌ དང༌ པེ༌རིཟ༌པ༌ གུན༌ལ༌ ཕམ༌ཀལས༌།
6 གྱལ༌པོ༌ ཨ༌དོ༌ནི༌ བེ༌ཟེག༌ ཤོར༌ ཨིན༌ནའང༌ ཁོང༌གུན༌ནི༌ ཁོའ༌ ཏེད༌ཏེ༌ ཁྱེར༌ཏེ༌ ཟུམས༌ ཡང༌ ཁོའེ༌ ལག༌པ༌ དང༌ རྐང༌པའེ༌ ཐེ༌བོ༌གུན༌ ཅདས༌།
7 ཨ༌དོ༌ནི༌ བེ༌ཟེག༌གི༌ ཟེརས༌, “ཏུས༌ཤིག༌ག༌ ངའེ༌ གྱལ༌པོ༌ 70 ལག༌པ༌ དང༌ རྐང༌པའེ༌ ཐེ༌བོ༌གུན༌ ཅད༌པིན༌ ཡང༌ ངའེ༌ ཅོག༌ཙེའེ༌ ཡོག༌ག༌ བུད༌ཁན༌གུན༌ ཁོང༌གུན༌ནི༌ ཟའད༌པིན༌། ཏ༌ དཀོན༌མཆོག༌གི༌ ངའེ༌ ཅོ༌ཁན༌བོའ༌ ལན༌སལ༌ཏེ༌ ཨིན༌ནོག༌།” ཡ༌ཧུ༌དཱ༌པ༌གུན༌ནི༌ ཁོ༌ ཡེ༌རུ༌ཤ༌ལེམ༌མ༌ ཁྲིད༌ཏེ༌ ཁྱེརས༌ ཡང༌ ཁོ༌ ཏེ༌རུ༌ ཤི༌།
8 ཡ༌ཧུ༌དཱ༌པ༌གུན༌ནི༌ ཡེ༌རུ༌ཤ༌ལེམ༌མི༌ཀའང༌ སྤུང༌གོལ༌ ཅོས༌ཏེ༌ ང༌ཡོག༌ག༌ ཁྱོངས༌། ཏེ༌ ནང༌ང༌ དུག༌ཁན༌ མི༌ཚང༌མ༌ སདས༌ ཡང༌ གྱལ༌སའ༌ མེ༌ ཏུགས༌།
9 ཏེ༌ སྟིང༌ནེ༌ ཁོང༌གུན༌ ཐུར༌ལ༌ རི༌ ཡུལ༌, ནེ༌གེཝ༌ དང༌ ནུབ༌ ཆོགས༌སི༌ ཕལ༌ཅན༌ ས༌ཀྱད༌དི༌ ནང༌ང༌ དུག༌ཁན༌ ཀེ༌ནན༌པ༌གུན༌ལ༌ ནོལ༌ལ༌ སོང༌།
10 ཏེ༌ནེ༌ ཡ༌ཧུ༌དཱ༌པ༌གུན༌ ཧེབ༌རོན༌ནི༌ ༼ཀ༌བོའ༌ ཀི༌རི༌འཐ༌ ཨར༌བ༌ ཟེར༌རད༌པིན༌༽ ཀེ༌ནན༌པ༌གུན༌ལ༌ ནོལ༌ལ༌ སོང༌ཏེ༌ ཤེ༌ཤཱའི༌, ཨ༌ཧི༌མན༌ དང༌ ཏལ༌མཱའི༌ པུར༌གྱུད༌གུན༌ལ༌ ཕམ༌ཀལས༌།
11 ཏེ༌ཀ༌ནེ༌ ཁོང༌གུན༌ དེ༌བིར༌རི༌ གྱལ༌སའེ༌ ནང༌ང༌ དུག༌ཁན༌གུན༌ལ༌ ནོལ༌ལ༌ སོང༌ ༼ཀ༌བོའ༌ ཀི༌རི༌འཐ༌ སེ༌ཕེར༌ ཟེར༌རད༌པིན༌༽།
12 ཀེ༌ལེབ༌བི༌ ཟེརས༌, “ཀི༌རི༌འཐ༌ སེ༌ཕེར༌ལ༌ སྤུང༌གོལ༌ ཅོས༌ཏེ༌ ང༌ཡོག༌ག༌ ཁྱོང༌ཁན༌ནི༌ མི༌བོའ༌ ངའེ༌ ང༌རང༌ངི༌ བུ༌མོ༌ ཨཀ༌སཧ༌ ན༌མ༌ ཏང༌ཨིན༌།”
13 ཀེ༌ལེབ༌བི༌ ནོ༌ ཀི༌ནཟ༌སི༌ བུ༌ཚ༌ ཨོཐ༌ནི༌འེལ༌ལི༌ ཏེ༌ ཡུལ༌བོ༌ ང༌ཡོག༌ག༌ ཁྱོངས༌། ཏེ༌བོའེ༌ཕིའ༌ ཀེ༌ལེབ༌བི༌ ཁོ༌རང༌ངི༌ བུ༌མོ༌ ཨཀ༌སཧ༌ ཁོའ༌ ན༌མ༌ ཏངས༌།
14 ན༌མ༌ ཅོས༌ཏེ༌ སྟིང༌ནེ༌ ཨོཐ༌ནི༌འེལ༌ལི༌ ཨཀ༌སཧ༌ ཁོའེ༌ ཨ༌བ༌ ཀེ༌ལེབ༌བ༌ ཞིང༌ ཏོང༌ ཟེར༌ ཅུགས༌། ཏེ༌ནེ༌ ཨཀ༌སཧ༌ ཁོ༌རང༌ངི༌ ཨ༌བའ༌ སྤེ༌ར༌ ཏང༌ང༌ སོང༌ ཡང༌ ཁོ༌ བུང༌བུའི༌ ཀ༌ནེ༌ བབ༌བ༌ཅིག༌ ཀེ༌ལེབ༌བི༌ ཏྲིས༌, “ངའེ༌ ཁྱོ༌རང༌ངི༌ ཕིའ༌ ཅི༌ ཅོ༌?”
15 ཁོའེ༌ ཟེརས༌, “ཉེ༌རང༌ངི༌ ནེ༌གེཝ༌ཝི༌ ས༌ཀྱད༌ ངའ༌ ཏངས༌ཏེ༌ ཨིན༌ནོག༌ ཏ༌ ཇུ༌ཇུ༌ ངའ༌ ཆུ༌མིག༌གི༌ ཆུའང༌ སལ༌ ལེ༌།” ཏེ༌ནེ༌ ཀེ༌ལེབ༌བི༌ ཁོའ༌ སྟག༌ཡོག༌ ཉིས༌ཀའེ༌ ཆུ༌མིག༌གུན༌ ཏངས༌།
16 ཡ༌ཧུ༌དཱ༌པ༌གུན༌ དང༌ མོ༌ཟེས༌སི༌ ན༌མའེ༌ ཨ༌བའེ༌ པུར༌གྱུད༌ ཀེན༌པ༌གུན༌ ཁ༌སོར༌རི༌ ལྕང༌མའེ༌ གྱལ༌ས༌ ཡེ༌རི༌ཀོ༌ནེ༌ བིང༌ཏེ༌ ནེ༌གེཝ༌ ཐང༌སྟོང༌ངི༌ ནང༌ང༌ ཨ༌རད༌དི༌ ཉེ༌མོའ༌ ཨ༌མ༌ལིཀ༌པ༌གུན༌ནི༌ ཕྲོའ༌ དུག༌ག༌ སོང༌།
17 ཏེ༌ནེ༌ ཡ༌ཧུ༌དཱ༌པ༌གུན༌ སི༌མི༌འོན༌པ༌གུན༌ ཉམ༌པོ༌ ཟེ༌ཕཐ༌ལ༌ དུག༌ཁན༌ནི༌ ཀེ༌ནན༌པ༌གུན༌ལ༌ ནོལ༌ལ༌ སོང༌ ཡང༌ ཏེ༌ གྱལ༌སའེ༌ ནང༌ང༌ དུག༌ཁན༌ ཚང༌མ༌ སདས༌། ཏེ༌བོའེ༌ཕིའ༌ ཏེ༌ གྱལ༌སའེ༌ མིང༌ང༌ ཧོར༌མཧ༌ ཏགས༌།
18 ཡ༌ཧུ༌དཱ༌པ༌གུན༌ནི༌ ག༌ཟ༌, ཨཤ༌ཀེ༌ལོན༌ དང༌ ཨེཀ༌རོན༌ནི༌ གྱལ༌ས༌གུན༌ དང༌ ཏེ༌ ཉེ༌ཁོར༌རི༌ ས༌ཀྱད༌གུན༌ ནའང༌ ང༌ཡོག༌ག༌ ཁྱོངས༌།
19 ཡ༌ཧུ༌དཱ༌པ༌གུན༌ ཉམ༌པོ༌ ཡ༌ཝའ༌ ཞུགས༌ཏེ༌ ཡོད༌པིན༌། ཁོང༌གུན༌ནི༌ རི༌ ཡུལ༌གུན༌ ཝང༌ངི༌ ཡོག༌ག༌ ཁྱོངས༌ ཨིན༌ནའང༌ སྤང༌ཐང༌ངི༌ ནང༌ང༌ དུག༌ཁན༌ནི༌ མི༌གུན༌ ཕིང༌ཅེས༌ལ༌ ཁྲངས༌པོ༌ མ༌ལུས༌ ཅིའ༌ཟེར༌ན༌ ཁོང༌གུན༌ནི༌ གྲ༌འོའེ༌ མག༌མི༌ ལག༌ག༌ ཚོན༌ཆ༌ གྱས༌པ༌ སྤེར༌ན༌ ལྕགས༌སི༌ རྟ༌རེལ༌གུན༌ ཡོད༌པིན༌།
20 མོ༌ཟེས༌སི༌ ཁ༌ཆད༌ ཅོ༌ཁན༌ ནང༌ཞིན༌ ཧེབ༌རོན༌ནི༌ གྱལ༌ས༌ ཀེ༌ལེབ༌བ༌ ཏངས༌ ཡང༌ ཁོའེ༌ ཏེ༌རུ༌ དུག༌ཁན༌ ཨ༌ནཀ༌ཀི༌ བུ༌ཚ༌ སུམ༌མི༌ པུར༌གྱུད༌གུན༌ ཕིངས༌ཏེ༌ ཏངས༌།
21 བེན༌ཡཱ༌མིན༌ནི༌ མི༌སྡེའེ༌ ཡེ༌རུ༌ཤ༌ལེམ༌མི༌ ནང༌ང༌ དུག༌ཁན༌ ཡེ༌བས༌པ༌གུན༌ ཕིངས༌ཏེ༌ མ༌ཏངས༌ པ༌སང༌ དི༌རིང༌ངའང༌ ཡེ༌བས༌པ༌གུན༌ ཡེ༌རུ༌ཤ༌ལེམ༌མི༌ ནང༌ང༌ བེན༌ཡཱ༌མིན༌པ༌གུན༌ ཉམ༌པོ༌ དུག༌ཨིན༌ ཨིན༌ནོག༌།
22 ཡོ༌སེབ༌བི༌ པུར༌གྱུད༌གུན༌ བེ༌ཐེལ༌ལི༌ གྱལ༌ས༌ སྤུང༌གོལ༌ ཅོ༌ཅེས༌ལ༌ སོང༌ ཡང༌ ཡ༌ཝའེ༌ ཁོང༌གུན༌ལ༌ རོགས༌ ཛདས༌།
23 བེ༌ཐེལ༌ གྱལ༌སའེ༌ ༼ཀ༌བོའ༌ ལུཟ༌ ཟེར༌རད༌པིན༌༽ སྲུང༌སྐྱོབ༌གུན༌ ཤེད༌ཅན༌ དུག༌ག༌ ཡ༌ འུ༌ཐུགས༌, ལྟའ༌ལ༌ ཁོང༌གུན༌ནི༌ མི༌ ཁ༌ཅིག༌ སང༌ཝའེ༌ ཐོག༌ནེ༌ ལམ༌ཅུག༌།
24 ལྟའ༌ ཆའ༌ཁན༌གུན༌ལ༌ མི༌ཞིག༌ གྱལ༌སའེ༌ ནང༌ནེ༌ བིངས༌ཏེ༌ ཡོང༌ང༌ ཐོང༌ ཡང༌ ཁོའ༌ ཟེརས༌, “གྱལ༌སའེ༌ ནང༌ང༌ སང༌ཝའེ༌ ཐོག༌ནེ༌ ཆ༌སའེ༌ ལམ༌ ང༌ཞའ༌ སྟན༌ན༌ ང༌ཞའེ༌ ཁྱོ༌རང༌ངི༌ སྲོག༌ སྐྱོབ༌ཨིན༌།”
25 ཏེ༌ནེ༌ ཁོའེ༌ ཁོང༌གུན༌ལ༌ གྱལ༌སའེ༌ ནང༌ཀུག༌ག༌ ཆ༌སའེ༌ ལམ༌ སྟནས༌ ཡང༌ ཡོ༌སེབ༌བི༌ པུར༌གྱུད༌གུན༌ནི༌ ཁོ༌ དང༌ ཁོའེ༌ ནང༌ཚང༌གུན༌ མ༌སྟོག༌ ཏེ༌ གྱལ༌སའེ༌ ཞན༌ མི༌ ཚང༌མ༌ སདས༌།
26 སྟིང༌ནེ༌ ཏེ༌ མི༌བོ༌ བིང༌ཏེ༌ ཧེད༌པ༌གུན༌ནི༌ ས༌ཀྱད༌ལ༌ དུག༌ག༌ སོང༌ ཡང༌ ཏེ༌རུ༌ ཁོའེ༌ གྱལ༌ས༌ ཞིག༌ རྩིགས༌ཏེ༌ ཏེ༌བོའེ༌ མིང༌ང༌ ལུཟ༌ ཏགས༌ ཀ༌བོ༌ དི༌རིང༌ངའང༌ ཟེར༌ར༌ནོག༌།
27 བེཐ༌ ཤན༌, ཏའ༌ནག༌, དོར༌, ཨིབ༌ལེ༌འམ༌, མེ༌གིད༌དོ༌ གྱལ༌ས༌གུན༌ ཡང༌ ཏེ༌གུན༌ནི༌ ཉེ༌ཁོར༌ལ༌ ཚུགས༌ཏེ༌ ཡོད༌ཁན༌ ཚང༌མ༌ མ༌ནས༌སའེ༌ མི༌སྡེ༌ ཕིངས༌ཏེ༌ མ༌ཏངས༌ ཅིའ༌ཟེར༌ན༌ ཀེ༌ནན༌པ༌གུན༌ བིང༌ཏེ༌ མ༌ཆའ༌ ཏེན༌ན༌ ནས༌སའེ༌ ནང༌ང༌ རངས༌ཏེ༌ དུགས༌།
28 ཨིས༌ར༌ཨེལ༌པ༌གུན༌ནི༌ ཀྲངས༌ཀ༌ གྱས༌ཏེ༌ སྟོབས༌ཅན༌ གྱུར༌ནའང༌ ཁོང༌གུན༌ནི༌ ཀེ༌ནན༌པ༌ ཚང༌མ༌ ཕིངས༌ཏེ༌ མ༌ཏང༌ང༌ ཁོང༌གུན༌ལ༌ ཝང༌ ཉམ༌པོ༌ ཚེ༌ ཡོག༌གི༌ ལས༌ ཅོ༌ཅུགས༌།
29 ཨེཕ༌ར༌ཡིམ༌ མི༌སྡེའེ༌ གེ༌ཟེར༌ གྱལ༌སའེ༌ ནང༌ང༌ དུག༌ཁན༌ ཀེ༌ནན༌པ༌གུན༌ ཕིངས༌ཏེ༌ མ༌ཏངས༌ ཏེ༌བོའེ༌ཕིའ༌ ཏེ༌རུ༌ ཀེ༌ནན༌པ༌གུན༌ ཁོང༌གུན༌ནི༌ ཕྲོའ༌ དུགས༌།
30 ཟེ༌བུ༌ལོན༌ མི༌སྡེའེ༌ ཀི༌ཀྲོན༌ དང༌ ན༌ཧ༌ལོལ༌ གྱལ༌སའེ༌ ནང༌ང༌ དུག༌ཁན༌གུན༌ ཕིངས༌ཏེ༌ མ༌ཏངས༌ པ༌སང༌ ཀེ༌ནན༌པ༌གུན༌ ཁོང༌གུན༌ནི༌ ཕྲོའ༌ དུག༌ཨིན༌ ཨིན༌ནོག༌། ཟེ༌བུ༌ལོན༌པ༌གུན༌ནི༌ ཁོང༌གུན༌ལ༌ ཝང༌ ཉམ༌པོ༌ ཚེ༌ ཡོག༌གི༌ ལས༌ ཅོ༌ཅུགས༌།
31 ཨཀ༌ཀོ༌, སི༌དོན༌, ཨཧ༌ལབ༌, ཨཀ༌ཟིབ༌, ཧེལ༌བཧ༌, ཨ༌ཕེཀ༌ དང༌ རེ༌ཧོབ༌ གྱལ༌ས༌གུན༌ནི༌ ནང༌ང༌ དུག༌ཁན༌གུན༌ ཨ༌ཤེར༌ མི༌སྡེ༌ ཕིངས༌ཏེ༌ མ༌ཏངས༌
32 མ༌ཚད༌ ཨ༌ཤེར༌པ༌གུན༌ ཏེ༌ ནས༌སའེ༌ ནང༌ང༌ ཝང༌སྲུལ༌ཁན༌ ཀེ༌ནན༌པ༌གུན༌ནི༌ ཕྲོའ༌ སོང༌ཏེ༌ དུགས༌། ཨ༌ཤེར༌པ༌གུན༌ནི༌ ཁོང༌གུན༌ ཕིངས༌ཏེ༌ མ༌ཏངས༌།
33 ཏེན༌ན༌ ཙོགས༌ལ༌ ནཕ༌ཐལ༌ལི༌ མི༌སྡེའེ༌ བེཐ༌ ཤེ༌མེཤ༌ ཡ༌ བེཐ༌ ཨ༌ནཐ༌ གྱལ༌སའེ༌ ནང༌ང༌ དུག༌ཁན༌གུན༌ ཕིངས༌ཏེ༌ མ༌ཏངས༌ མ༌ཚད༌ ཏེ༌ ས༌ཀྱད༌དི༌ ནང༌ང༌ ཝང༌སྲུལ༌ཁན༌ ཀེ༌ནན༌པ༌གུན༌ནི༌ ཕྲོའ༌ སོང༌ཏེ༌ དུགས༌། ནཕ༌ཐལ༌ལི༌པ༌གུན༌ནི༌ བེཐ༌ ཤེ༌མེཤ༌ ཡ༌ བེཐ༌ ཨ༌ནཐ༌ཐི༌ ནང༌ང༌ དུག༌ཁན༌གུན༌ལ༌ ཝང༌ ཉམ༌པོ༌ ཚེ༌ཡོག༌གི༌ ལས༌ ཅོ༌ཅུགས༌།
34 ཨ༌མོར༌པ༌གུན༌ནི༌ དཱན༌པ༌གུན༌ ཐང༌ངི༌ ནང༌ང༌ དུག༌ མ༌ཅུག༌ག༌ ཝང༌ ཉམ༌པོ༌ རི༌ཡུལ༌ ཆོགས༌ལ༌ བོརས༌།
35 ཨ༌མོར༌པ༌གུན༌ བིང༌ཏེ༌ མ༌ཆའ༌ ཧེ༌རེས༌སི༌ རི༌, ཨའི༌ཡ༌ལོན༌ དང༌ ཤའལ༌བིམ༌ གུན༌ནི༌ ནང༌ང༌ རངས༌ཏེ༌ དུགས༌ ཨིན༌ནའང༌ ཡོ༌སེབ༌བི༌ པུར༌གྱུད༌གུན༌ནི༌ ཀྲངས༌ཀ༌ གྱས༌ཏེ༌ ཤེད༌ཅན༌ གྱུར༌ར༌ཅིག༌ ཁོང༌གུན༌ནི༌ ཨ༌མོར༌པ༌གུན༌ལ༌ ཝང༌ ཉམ༌པོ༌ ཚེ༌ཡོག༌གི༌ ལས༌ ཅོ༌ཅུགས༌།
36 ཨ༌མོར༌པའེ༌ སན༌ཚམས༌ སྡིག༌པ༌རཱ༌ཙེ༌ ལ༌ནེ༌ ཏངས༌ཏེ༌ སེ༌ལ༌ ཡང༌ ཏེ༌སང༌ ཀེན༌ ཚག༌པ༌ ཨིན༌པིན༌།