13
ཐར༌ཅུག༌ཁན༌ སམ༌སོན༌ སྐྱེས༌།
13:1-25
1 ཡང༌སྐྱར༌ ཨིས༌ར༌ཨེལ༌པ༌གུན༌ནི༌ དཀོན༌མཆོག༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌། ཏེ༌བོའེ༌ཕིའ༌ ཡ༌ཝའེ༌ ཁོང༌གུན༌ ཕི༌ལིས༌ཏི༌པ༌གུན༌ནི༌ ལག༌ག༌ སྟད༌ད༌ ཛདས༌, ཁོང༌གུན༌ནི༌ ཨིས༌ར༌ཨེལ༌པ༌གུན༌ནི༌ཀ༌ ལོ༌ 40 ཝང༌ སྲུལ༌ཏེ༌ ཁོང༌གུན༌ལ༌ ནགས༌ སྟནས༌།
2 ཏེ༌ཏུས༌ལ༌ ཟོ༌རཧ༌ གྲོང༌ཁྱེར༌རི༌ དཱན༌ནི༌ མི༌སྡེ༌ནེ༌ མ༌ནོ༌འཧ༌ ཟེར༌ཁན༌ མི༌ཞིག༌ ཡོད༌པིན༌། ཁོའེ༌ ན༌མའ༌ ཕྲུ༌གུ༌ ཇོར༌ མ༌ཐུབ༌པ༌ ཁོང༌གུན༌ལ༌ ཕྲུ༌གུ༌ མེད༌པིན༌།
3 མ༌ནོ༌འཧའེ༌ ན༌མའ༌ ཡ༌ཝའེ༌ ཕོ༌ཉ༌ ཇལ༌ཏེ༌ མོལས༌, “ཁོ༌རང༌ང༌ ཕྲུ༌གུ༌ ཇོར༌ མ༌ཐུབ༌བ༌ ཨིན༌ནོག༌ ཨིན༌ནའང༌ ཏ༌ ཁྱོ༌རང༌ སྐྱེ༌ཅེས༌མ༌ གྱུར༌ཏེ༌ ཁོ༌རང༌ང༌ བུ༌ཚ༌ཞིག༌ ཇོར༌ཨིན༌།
4 ཏ༌ ནང༌སྟག༌ ཅོས༌ཏེ༌ ཁྱོ༌རང༌ རྒུན༌ དང༌ ཞན༌ ར༌རོས༌ཤེས༌ ཆང༌གུན༌ ཐུང༌ མ༌གོས༌ ཡང༌ རྩང༌མ༌ མན༌ཁན༌ནི༌ ཟན༌ ཟའ༌ མ༌གོས༌།
5 ཁྱོ༌རང༌ སྐྱེ༌ཅེས༌མ༌ གྱུར༌ཏེ༌ ཁྱོ༌རང༌ང༌ བུ༌ཚ༌ཞིག༌ ཇོར༌ཨིན༌། ཁོའེ༌ སྲ༌ མ༌ནེ༌ མ༌ བྲག༌ ཅིའ༌ཟེར༌ན༌ ཁོ༌ ན༌ཟི༌རཱའིགྲ༌ ཡང༌ན༌ ཁོ༌ སྐྱེས༌པ༌ནེ༌ ཕར༌ལ༌ དཀོན༌མཆོག༌གི༌ ཕིའ༌ ལྡམས༌ཁན༌ ཡང༌ ཁོའེ༌ ཨིས༌ར༌ཨེལ༌པ༌གུན༌ ཕི༌ལིས༌ཏི༌པ༌གུན༌ནི༌ ཀ༌ནེ༌ ཐར༌ཅུག༌ཨིན༌།”
6 ཏེ༌ནེ༌ བུ༌མོ༌ ཁོ༌རང༌ངི༌ མག༌པ༌ ཡོད༌ས༌ སོང༌ཏེ༌ ཟེརས༌, “ང༌ ཡོད༌ས༌ དཀོན༌མཆོག༌གི༌ མི༌ཞིག༌ སྐྱོདས༌། ཁོང༌ དཀོན༌མཆོག༌གི༌ ཕོ༌ཉ༌ ཙོགས༌, ཁྱུད༌ཅན༌ ཇིགས༌པོ༌ ཐོང༌དུག༌པིན༌། ངའེ༌ ཁོང༌ང༌ ཀ༌ནེ༌ སྐྱོད༌པིན༌ ཟེར༌ཏེ༌ མ༌ ཏྲིས༌པིན༌ ཡང༌ ཁོང༌ངི༌ ཁོ༌རང༌ངི༌ ཚན༌ ཤད༌ད༌ མ༌ ཛདས༌།
7 ཨིན༌ནའང༌ ཁོང༌ངི༌ ང༌ མོལ༌ལ༌རག༌, ‘ཁྱོ༌རང༌ སྐྱེ༌ཅེས༌མ༌ གྱུར༌ཏེ༌ ཁྱོ༌རང༌ང༌ བུ༌ཚ༌ཞིག༌ ཇོར༌ཨིན༌། ཁྱོ༌རང༌ རྒུན༌ དང༌ ཞན༌ ར༌རོས༌ཤེས༌ ཆང༌གུན༌ ཐུང༌ མ༌གོས༌ ཡང༌ རྩང༌མ༌ མན༌ཁན༌ནི༌ ཟན༌ ཟའ༌ མ༌གོས༌ ཅིའ༌ཟེར༌ན༌ ཁོ༌ ན༌ཟི༌རཱའིགྲ༌ ཡང༌ན༌ སྐྱེས༌པ༌ནེ༌ ཤི༌ཤི༌ ཚག༌པ༌ དཀོན༌མཆོག༌གི༌ ཕིའ༌ ལྡམས༌ཁན༌ ཨིན༌ནོག༌།’ ”
8 ཏེ༌ནེ༌ མ༌ནོ༌འཧའེ༌ ཡ༌ཝའ༌ མོས༌ལམ༌ ཞུས༌, “ཡ༌ཝ༌ལེ༌ ཇུ༌ཇུ༌ ང༌ཞའ༌ ཇོར༌ཅེས༌ཅན༌ནི༌ བུ༌ཚ༌ ལྡན༌ཅུག༌ཅེས༌སི༌ སྐོར༌ལ༌ ལབ༌ཞ༌ སལ༌ཅེས༌ལ༌ ཉེ༌རང༌ངི༌ ཀལ༌ལ༌ ཛད༌ཁན༌ནི༌ དཀོན༌མཆོག༌གི༌ མི༌བོ༌ ཡང༌སྐྱར༌ ལམ༌ཅུག༌ག༌ ཛད༌ལེ༌།”
9 དཀོན༌མཆོག༌གི༌ མ༌ནོ༌འཧའེ༌ མོས༌ལམ༌མ༌ ལན༌སལས༌ ཡང༌ ཁོའེ༌ ན༌མ༌ ཞིང༌ངི༌ཀ༌ ཡོད༌ ཟ༌ནེ༌ དཀོན༌མཆོག༌གི༌ ཕོ༌ཉ༌ ཡང༌སྐྱར༌ ཇལ༌ ཨིན༌ནའང༌ ཁོའེ༌ མག༌པ༌ མ༌ནོ༌འཧ༌ ཁོ༌ ཉམ༌པོ༌ མེད༌པིན༌།
10 ཁོ༌ གྱོགས༌པ༌ སོང༌ཏེ༌ ཁོ༌རང༌ངི༌ མག༌པ༌ ཟེརས༌, “ཞག༌ ཁ༌ཅིག༌གི༌ སྔུན༌ལ༌ ངའ༌ ཐོང༌ཁན༌ནི༌ མི༌བོ༌ ཡང༌སྐྱར༌ སྐྱོད༌ཏེ༌ དུག༌།”
11 མ༌ནོ༌འཧ༌ ཁོ༌རང༌ངི༌ ན༌མ༌ ཉམ༌པོ༌ བང༌ ཏངས༌ཏེ༌ སོང༌ ཡང༌ ཏྲིས༌, “ངའེ༌ ན༌མ༌ ཞལ༌ཏ༌ སལ༌ཁན༌ནི༌ མི༌བོ༌ ཉེ༌རང༌ ཨིན༌ན༌?”
ཁོང༌ངི༌ ལན༌སལས༌, “ང༌ ཨིན༌།”
12 ཏེ༌ནེ༌ མ༌ནོ༌འཧའེ༌ ཁོང༌ང༌ ཏྲིས༌, “ཉེ༌རང༌ངི༌ མོལ༌ཁན༌བོ༌ དྲན༌དྲའ༌ གྲུབ༌བ༌ཅིག༌, མི༌ཚེའེ༌ ཕུད༌ཅེས༌ དང༌ ལས༌ ཅོ༌ཅེས༌སི༌ ནང༌ང༌ ཁོའེ༌ ཀ༌ཟུག༌ ཁྲིམས༌ ཁའ༌ ཉན༌གོས༌?”
13 ཡ༌ཝའེ༌ ཕོ༌ཉའེ༌ ལན༌སལས༌, “ངའེ༌ ཁྱོ༌རང༌ངི༌ ན༌མའ༌ ལབ༌ཞ༌ ཏང༌ཁན༌གུན༌ ཅོ༌ ཅུག༌ཅེས༌ ཏན༌ཏན༌ ཅོས༌།
14 ཁོ༌ རྒྱུན༌ ཡ༌ བ༌ཤོ༌ ཟ༌མ༌གོས༌, རྒུན༌ དང༌ ཞན༌ ར༌རོས༌ཤེས༌ ཆང༌གུན༌ ཐུང༌ མ༌གོས༌ ཡང༌ རྩང༌མ༌ མན༌ཁན༌ནི༌ ཟན༌ ཟའ༌ མ༌གོས༌། ངའེ༌ ལབ༌ཞ༌ ཏང༌ཁན༌ ཚང༌མ༌ ཁོའེ༌ ཅོ༌གོས༌།”
15 ཏེ༌ནེ༌ མ༌ནོ༌འཧའེ༌ ཡ༌ཝའེ༌ ཕོ༌ཉའ༌ ཟེརས༌, “ཇུ༌ཇུ༌ ང༌ཞའེ༌ ར༌མ༌ ཆུ༌ངུན༌ནི༌ ཤ༌ སྐོལ༌ཏེ༌ ཁྱོང༌ཁྱོང༌ ཚོག༌པ༌ ཉེ༌རང༌ འི༌ཀ༌ ཞུགས༌།”
16 ཡ༌ཝའེ༌ ཕོ༌ཉའེ༌ ལན༌སལས༌, “ང༌ དུག༌ཨིན༌། ཨིན༌ནའང༌ ཁྱོ༌རང༌ངི༌ ཁྱོང༌ཁན༌ནི༌ ཁར༌ཇི༌ ངའེ༌ མི༌ཟ༌། ཏེ༌སང༌ཏ༌ ཁྱོ༌རང༌ངི༌ མེའ༌ སྲག༌ཅེས༌སི༌ ཆོད༌པ༌ གྲལ༌གྲིག༌ ཅོས༌ཏེ༌ ཡ༌ཝའ༌ ཕུལ༌ཉན༌ཅེས༌ ཨིན༌ནོག༌།” ༼ཁོང༌ ཡ༌ཝའེ༌ ཕོ༌ཉ༌ ཨིན༌ཁན༌བོ༌ མ༌ནོ༌འཧ༌ ངོ༌ མ༌ཤེས༌།༽
17 ཏེ༌ནེ༌ ཁོའེ༌ ཕོ༌ཉ༌ ཏྲིས༌, “ཉེ༌རང༌ངི༌ ཚན༌ལ༌ ཅི༌ ཞུ༌ཅེན༌? ཅིའ༌ཟེར༌ན༌ ཉེ༌རང༌ངི༌ མོལ༌ཁན༌བོ༌ གྲུབ༌བ༌ཅིག༌ ང༌ཞའེ༌ ཉེ༌རང༌ང༌ རྩི༌ཝ༌ ཕུལ༌ ཉན༌ཨིན༌།”
18 ཡ༌ཝའེ༌ ཕོ༌ཉའེ༌ ལན༌སལས༌, “ཁྱོ༌རང༌ངི༌ ངའེ༌ མིང༌ ཅིའ༌ ཏྲིས༌ཏེ༌ ཨིན༌? ངའེ༌ མིང༌ངི༌ ཏོན༌ ཁྱོ༌རང༌གུན༌ལ༌ ཧ༌གོ༌ མི༌ ཐུབ༌།”
19 ཏེ༌ནེ༌ མ༌ནོ༌འཧའེ༌ ར༌མ༌ ཆུ༌ངུན༌ དང༌ གྲུ༌ ཁྱོངས༌ ཡང༌ ཕོ༌ལོངས༌སི༌ཀ༌ མེའ༌ སྲགས༌ཏེ༌ ཡ༌ཝའ༌ ཆོད༌པ༌ ཕུལས༌། མ༌ནོ༌འཧ༌ དང༌ ཁོའེ༌ ན༌མ༌ ལྟས༌ཏེ༌ ཡོད༌ ཟ༌ནེ༌ ཡ༌ཝའེ༌ ཕོ༌ཉའེ༌ ཧ༌ལས༌ཤེས༌སི༌ ཆག༌ལས༌ ཛདས༌།
20 ཏེ༌ ཆོད༌ཁྲི༌ ཀ༌ནེ༌ མེ༌ལྗབ༌ བིངས༌ཏེ༌ ཀེན༌ལ༌ ཆ༌ ཟ༌ནེ༌ ཡ༌ཝའེ༌ ཕོ༌ཉ༌ ཏེ༌ མེའེ༌ ནང༌ང༌ ནམ༌ཁའ༌ སྐྱོདས༌། མ༌ནོ༌འཧ༌ དང༌ ཁོའེ༌ ན༌མའེ༌ ཏེ༌བོ༌ ཐོང༌ང༌ཅིག༌ རྩི༌ཝ༌ དང༌ ཇིགས༌སི༌ ནང༌ང༌ སའེ༌ཀ༌ གྱེལ༌ཏེ༌ ཆག༌ཕུལས༌།
21 ཡ༌ཝའེ༌ ཕོ༌ཉ༌ ཏེ༌ མེའེ༌ ནང༌ང༌ ནམ༌ཁའ༌ སྐྱོད༌ཏེ༌ ཡང༌སྐྱར༌ མ༌ཐོང༌ པ༌སང༌ མ༌ནོ༌འཧ༌ ཁོང༌ ཡ༌ཝ༌ ཞུགས༌ཁན༌བོ༌ ཧ༌གོ༌།
22 ཡང༌ ཁོའེ༌ ཁོ༌རང༌ངི༌ ན༌མ༌ ཟེརས༌, “ང༌དང༌གུན༌ ཤིའ༌ནོག༌ ཅིའ༌ཟེར༌ན༌ ང༌དང༌ངི༌ དཀོན༌མཆོག༌ ཇལ༌ཏེ༌ ཨིན༌ནོག༌།”
23 ཨིན༌ནའང༌ ཁོའེ༌ ན༌མའེ༌ ཟེརས༌, “ཀལ༌ཏེས༌ ཡ༌ཝའེ༌ ང༌དང༌གུན༌ སད༌ད༌ ཛད༌ཅེས༌ ཨིན༌པིན༌ན༌, ཁོང༌ངི༌ ང༌དང༌ངི༌ མེའ༌ སྲག༌ཁན༌ དང༌ གྲུའི༌ ཆོད༌པ༌ མ༌ ནམས༌ས༌ ཡོད༌གྲོ༌ ཡང༌ ཁོང༌ངི༌ ང༌དང༌ང༌ འི༌ ཚང༌མ༌ སྟན༌ན༌ ཡང༌ མོལ༌ལ༌ ཛད༌ཏེ༌ མེད༌གྲོ༌།”
24 ཁོའ༌ བུ༌ཚ༌ ཞིག༌ ཇོར༌ ཡང༌ ཁོའེ༌ མིང༌ང༌ སམ༌སོན༌ ཏགས༌། བུ༌ཚ༌བོ༌ ལྡན༌ཨིན༌ སོང༌ ཡང༌ ཡ༌ཝའེ༌ ཁོའ༌ ཅིན༌ལབས༌ སལས༌།
25 ཟོ༌རཧ༌ དང༌ ཨེཤ༌ཏ༌འོལ༌ གྲོང༌ཁྱེར༌གུན༌ནི༌ པར༌ལ༌ ཡོད༌ཁན༌ མ༌ཧ༌ནེཧ༌ དཱན༌ ནས༌སའེ༌ ནང༌ང༌ ཁོ༌ དུག༌ ཟ༌ནེ༌ ཡ༌ཝའེ༌ ཐུག༌ཉིད༌དི༌ ཁོའེ༌ ནང༌ང༌ ཆག༌ལས༌ ཛད༌ཅེས༌ གོ༌ཟུག༌།