15
སམ༌སོན༌ནི༌ ཕི༌ལིས༌ཏི༌པ༌གུན༌ལ༌ ལན༌ཏངས༌།
15:1-20
1 སྟིང༌ནེ༌ ཀྲོའེ༌ རྔབ༌སའེ༌ ཏུས༌ལ༌ སམ༌སོན༌ནི༌ ལོ༌ ཆུ༌ངུན༌ ར༌མ༌ཞིག༌ ཁུར༌ཏེ༌ ཁོའ༌ ན༌མ༌ ཏྲི༌ཁན༌ནི༌ བུ༌མོའ༌ ཐུག༌ག༌ ཏིམ༌ནཧ༌ སོང༌། ཁོའེ༌ ཟེརས༌, “ང༌ ང༌རང༌ངི༌ ན༌མ༌ ཏྲི༌ཁན༌ནི༌ བུ༌མོའེ༌ ནང༌ང༌ ཆའད༌།” ཨིན༌ནའང༌ བུ༌མོའེ༌ ཨ༌བའེ༌ ཁོ༌ ཆ༌མ༌ཅུགས༌།
2 ཁོའེ༌ སམ༌སོན༌ལ༌ ཟེརས༌, “ངའེ༌ སམ༌, ཁྱོ༌རང༌ང༌ སྲོ༌ ཡོངས༌ཏེ༌ ཁོའ༌ ནཕ༌རད༌ ཅོའ༌ནོག༌། ཏེ༌བོའེ༌ཕིའ༌ ངའེ༌ ཁྱོ༌རང༌ངི༌ ཛ༌འོ༌ ཉེ༌མོ༌བོའ༌ ཁོ༌ ན༌མ༌ ཏངས༌པིན༌། ཨིན༌ནའང༌ ལྟོས༌སའང༌ ཁོའེ༌ ནོ༌མོ༌ ཁོའེ༌ སང༌ མང༌ང༌ ལྡེ༌མོ༌ དུག༌, ཁོ༌ ཉམ༌པོ༌ ན༌མ༌ ཅོས༌།”
3 སམ༌སོན༌ནི༌ ཟེརས༌, “ཏ༌ འི༌ལན༌, ངའ༌ ཁྱོ༌ཞའ༌ ཕི༌ལིས༌ཏི༌པ༌གུན༌ལ༌ ནོད༌པ༌ ཏང༌ཅེས༌ལ༌ ཏོན༌ཚན༌ ཡོད༌ཏེ༌ ཨིན༌ནོག༌།”
4 ཏེ༌ནེ༌ ཁོ༌ ཕི༌ལོག༌ག༌ སོང༌ ཡང༌ ཝ༌ཙེ༌ 300 ཟུམས༌ ཡང༌ ཆ༌ ཅོས༌ཏེ༌ ཏེ༌གུན༌ནི༌ ང༌མ༌ ལྡམས༌། ང༌མ༌གུན༌ནི༌ཀ༌ པམ༌བར༌ ཏགས༌ཏེ༌
5 མེ༌ ཏུགས༌། ཏེ༌ནེ༌ ཝ༌ཙེ༌གུན༌ ཕི༌ལིས༌ཏི༌པ༌གུན༌ནི༌ ཀྲོའེ༌ ཞིང༌གུན༌ནི༌ ནང༌ང༌ བང༌ཏངས༌པ༌ རྔས༌ཁན༌ དང༌ མ༌ རྔས༌ཁན༌ ཞིང༌ ཡང༌ རྒྱུན༌ དང༌ ཨོ༌ལིཝ༌ཝི༌ ཚས༌ ཚང༌མ༌ མེ༌ ཞེན༌ཏེ༌ མེད༌ཁན༌ སོང༌།”
6 ཕི༌ལིས༌ཏི༌པ༌གུན༌ནི༌ ཏྲིས༌, “འི༌བོ༌ སུའི༌ ཅོས༌?”
“ཏིམ༌ནཧ༌པ༌ སམ༌སོན༌ནི༌ ན༌མ༌ ཏྲི༌ཁན༌ནི༌ བུ༌མོའེ༌ ཨ༌བའེ༌ ཁོའེ༌ བུ༌མོ༌ སམ༌སོན༌ནི༌ ཛ༌འོ༌ ཉེ༌མོ༌བོའ༌ ན༌མའ༌ ཏངས༌ པ༌སང༌ ཁོའེ༌ ཅོས༌” ཟེར༌ཏེ༌ ཤདས༌།
ཏེ༌ནེ༌ ཕི༌ལིས༌ཏི༌པ༌གུན༌ སོང༌ཏེ༌ ཏེ༌ བུ༌མོ༌ དང༌ ཁོའེ༌ ཨ༌བ༌ མེའ༌ སྲགས༌ཏེ༌ སདས༌།
7 ཁོང༌གུན༌ནི༌ ཏེ༌ཟུག༌ ཅོས༌ པ༌སང༌ སམ༌སོན༌ནི༌ ཟེརས༌, “ཁྱོ༌རང༌གུན༌ནི༌ ཅོ༌ཁན༌བོའ༌ ལན༌ཏངས༌ཏེ༌ མ༌ནེ༌ ང༌ ངལ༌ མི༌ཚོ༌།”
8 ཏེ༌བོའེ༌ཕིའ༌ ཁོའེ༌ ཕི༌ལིས༌ཏི༌པ༌གུན༌ནི༌ཀ༌ སྤུང༌གོལ༌ ཅོས༌ཏེ༌ ཁོང༌ མང༌པོ༌ སྙིང༌རྗེ༌ མེད༌པ༌ སདས༌། ཏེ༌ནེ༌ ཁོ༌ སོང༌ཏེ༌ ཨེ༌ཏམ༌མི༌ རི༌ བྲག༌ཕུགས༌སི༌ ནང༌ང༌ དུགས༌།
9 ཕི༌ལིས༌ཏི༌པ༌གུན༌ ཀེན༌ལ༌ སོང༌ཏེ༌ ཡ༌ཧུ༌དཱའེ༌ ནང༌ང༌ ལེ༌ཧིའི༌ གྲོང༌ཁྱེར༌རི༌ ཉེ༌ཁོར༌ལ༌ ཀུར༌ ཙུགས༌ཏེ༌ དུགས༌།
10 ཡ༌ཧུ༌དཱ༌པ༌གུན༌ནི༌ ཁོང༌གུན༌ལ༌ ཏྲིས༌, “ཁྱོ༌ཞའ༌ ང༌ཞ༌གུན༌ནི༌ཀ༌ སྤུང༌གོལ༌ ཅོའ༌ལ༌ ཅིའ༌ ཡོངས༌ཏེ༌ ཨིན༌?”
ཕི༌ལིས༌ཏི༌པ༌གུན༌ནི༌ ལན༌ཏངས༌, “ང༌ཞ༌གུན༌ནི༌ སམ༌སོན༌ ཟུམས༌ཏེ༌ ཁོའེ༌ ང༌ཞའ༌ ཅོ༌ཁན༌ ཙོགས༌ ཁོའ༌ ཅོའ༌ལ༌ ཡོངས༌ཏེ༌ ཨིན༌།”
11 ཏེ༌ནེ༌ ཡ༌ཧུ༌དཱ༌པ༌ མི༌ སྟོང༌ སུམ༌ ཐུར༌ལ༌ ཨེ༌ཏམ༌མི༌ རི༌ བྲག༌ཕུགས༌སི༌ ནས༌ས༌ སོང༌ཏེ༌ སམ༌སོན༌ལ༌ ཟེརས༌, “ཕི༌ལིས༌ཏི༌པ༌གུན༌ནི༌ ང༌དང༌གུན༌ནི༌ཀ༌ ཝང༌སྲུལ༌ཅེས༌པོ༌ ཁྱོ༌རང༌ང༌ ཧ༌ མ༌གོའ༌ ཨིན༌ན༌? ཁྱོ༌རང༌ངི༌ ང༌ཞ༌གུན༌ལ༌ འི༌ཟུག༌ ཅིའ༌ ཅོས༌ཏེ༌ ཨིན༌?”
སམ༌སོན༌ནི༌ ལན༌ཏངས༌, “ཁོང༌གུན༌ནི༌ ངའ༌ ཅོས༌ཁན༌བོ༌ ཙོགས༌ ངའེ༌ ཁོང༌གུན༌ལ༌ ཅོས༌པིན༌།”
12 ཨིན༌ནའང༌ ཡ༌ཧུ༌དཱ༌པ༌གུན༌ནི༌ ཁོའ༌ ཟེརས༌, “ང༌ཞའ༌ འི༌རུ༌ ཁྱོ༌རང༌ ལྡམས༌ཏེ༌ ཕི༌ལིས༌ཏི༌པ༌གུན༌ནི༌ ལག༌ག༌ སྟད༌ད༌ལ༌ ཡོངས༌པིན༌།”
སམ༌སོན༌ནི༌ ཟེརས༌, “ཁྱོ༌ཞ༌རང༌ངི༌ ང༌ མི༌སད༌ ཟེར༌ཏེ༌ ནའ༌ ཁུར༌།”
13 ཁོང༌གུན༌ནི༌ ལན༌ཏངས༌, “ང༌ཞའེ༌ ཁྱོ༌རང༌ མི༌སད༌ ཨིན༌ནའང༌ ལྡམས༌ཏེ༌ ཕི༌ལིས༌ཏི༌པ༌གུན༌ནི༌ ལག༌ག༌ སྟད༌ཨིན༌།” ཏེ༌ནེ༌ ཁོང༌གུན༌ནི༌ ཁོ༌ ཐག༌པ༌ སོ༌མ༌ ཉིས༌ ཉམ༌པོ༌ ལྡམས༌ ཡང༌ ཁོ༌ བྲག༌ཕུགས༌ནེ༌ ཕིངས༌ཏེ༌ ཁྱེརས༌།
14 སམ༌སོན༌ ལེ༌ཧི༌ གྲོང༌ཁྱེར༌རི༌ ཉེ༌མོའ༌ ལེབ༌བ༌ཅིག༌ ཕི༌ལིས༌ཏི༌པ༌གུན༌ གྱལ༌ཁའ༌ ཐོབ༌ཁན༌ནི༌ ཀུ༌ཅོ༌ ཏང༌ཨིན༌ ཡོངས༌། ཨིན༌ནའང༌ ཡ༌ཝའེ༌ ཐུག༌ཉིད༌དི༌ ཤེད༌དི༌ གངས༌ཏེ༌ ཁོའེ༌ ལྡམས༌ཁན༌ནི༌ ཐག༌པ༌ སོ༌མ༌བོ༌ རུལ༌ཁན༌ནི༌ ཐག༌པ༌ ཉིང༌པ༌ ཙོགས༌ལ༌ ལ༌མོ༌ ཉམ༌པོ༌ ཅདས༌།
15 ཡང༌ ཁོའེ༌ ཉེ༌ཐུབ༌རང༌ ཤི༌ཁན༌ བུང༌བུའི༌ གྲམ༌པའེ༌ རུས༌པ༌ ཁུར༌ཏེ༌ ཕི༌ལིས༌ཏི༌པ༌ སྟོང༌ཅིག༌ སདས༌།
16 ཏེ༌ནེ༌ སམ༌སོན༌ནི༌ ཟེརས༌,
“བུང༌བུའི༌ གྲམ༌པའེ༌ རུས༌པ༌ ཉམ༌པོ༌
ངའེ༌ ཁོང༌གུན༌ནི༌ རོ༌གུན༌ སྤུངས༌པིན༌།
བུང༌བུའི༌ གྲམ༌པའེ༌ རུས༌པ༌ ཉམ༌པོ༌
ངའེ༌ མི༌ སྟོང༌ཅིག༌ སད༌པིན༌།”
17 ཏེ༌བོ༌ ཟེར༌ ཚར༌ཏེ༌ སྟིང༌ནེ༌ ཁོའེ༌ གྲམ༌པའེ༌ རུས༌པ༌བོ༌ ཐག༌རིང༌ང༌ ཕངས༌། ཏེ༌ ས༌ཀྱད༌པོའ༌ གྲམ༌པའེ༌ རུས༌པའེ༌ རི༌ ཟེར༌ཏེ༌ མིང༌ ཐོགས༌།
18 སམ༌སོན༌ མ༌སྲན༌ཏྲེ༌ སྐོམས༌ཏེ༌ ཡོད༌པ༌ ཁོའེ༌ ཡ༌ཝའ༌ ཞུས༌, “ཉེ༌རང༌ངི༌, ཉེ༌རང༌ངི༌ ཡོག༌པོའ༌ གྱལ༌ཁ༌ ཀྲག༌པོ༌ སལ༌ལ༌ ཛདས༌། ཏ༌ ང༌ སྐོམས༌ཏེ༌ ཤི༌ ཅུག༌ག༌ ཛད༌ཏེ༌ ཡ༌ཝའ༌ མ༌ཅོལ༌ཁན༌ འི༌ ཕི༌ལིས༌ཏི༌པ༌གུན༌ནི༌ ལག༌ག༌ ང༌ སལ༌ལ༌ ཛད༌ཅེས༌ ཨིན༌ན༌?”
19 ཏེ༌ནེ༌ དཀོན༌མཆོག༌གི༌ ལེ༌ཧི༌ ས༌ཀྱད༌ ཁོ༌ ཡོད༌སའེ༌ཀ༌ ཆུ༌ བིང༌ ཅུག༌ག༌ ཛདས༌། སམ༌སོན༌ ཆུ༌ ཐུངས༌ ཡང༌ ཁོའེ༌ ཟུགས༌པོའེ༌ ནང༌ང༌ ཡང༌སྐྱར༌ སྟོབས༌ སྐྱེས༌། ཏེ༌ནེ༌ ཁོའེ༌ ཏེ༌ ཆུ༌མིག༌པོའ༌ “བོད༌ཁན༌ནི༌ ཆུ༌མིག༌” ཟེར༌ཏེ༌ མིང༌ ཏགས༌ ཡང༌ ཏེ༌བོ༌ དག༌སའང༌ ལེ༌ཧི༌ ནང༌ང༌ ཡོད༌ཏེ༌ ཨིན༌ནོག༌།
20 སམ༌སོན༌ནི༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ ལོ༌ 20 ཅོས༌། ཏེ༌ཏུས༌ ཕི༌ལིས༌ཏི༌པ༌གུན༌ནི༌ ཏེ༌ ནས༌སའེ༌ ནང༌ང༌ ཝང༌སྲུལ༌ལད༌པིན༌།