19
ལི༌ཝི༌པ༌ དང༌ ཁོའེ༌ ཚེ༌ཡོག༌ ན༌མ༌།
19:1- 30
1 ཏེ༌ ཏུས༌ ཨིས༌ར༌ཨེལ༌ལི༌ ནང༌ང༌ གྱལ༌པོ༌ མེད༌པིན༌།
ཏ༌ ཨེཕ༌ར༌ཡིམ༌མི༌ རི༌ཡུལ༌ལི༌ གམ༌ཡུལ༌ལི༌ ནང༌ང༌ དུག༌ཁན༌ ལི༌ཝི༌པ༌ མི༌ཞིག༌གི༌ ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌ནེ༌ ཚེ༌ཡོག༌ ན༌མ༌ ཁྱོངས༌།
2 ཨིན༌ནའང༌ ཏེ༌ བུ༌མོའ༌ ཁོའེ༌ཀ༌ སྲོ༌ ཡོངས༌པ༌ ཁོ༌ ཕངས༌ཏེ༌ བེད༌ལེ༌ཧེམ༌མ༌ ཁོ༌རང༌ངི༌ ཨ༌བའེ༌ ཁང༌པ༌ ལོགས༌ཏེ༌ སོང༌། ཁོ༌ ཏེ༌རུ༌ དུགས༌ཏེ༌ ཟླ༌ཝ༌ ཞི༌ སོང༌
3 ཏེ༌ནེ༌ ཁོའེ༌ མག༌པ༌ ཁོའ༌ ཧ༌གོ༌ཅུགས༌ཏེ༌ ལོགས༌ཏེ༌ ཁྱོང༌ང༌ བེད༌ལེ༌ཧེམ༌མ༌ སོང༌། ཁོ༌ ཉམ༌པོ༌ ཡོག༌པོ༌ དང༌ བུང༌བུ༌ ཉིས༌ ཡོད༌པིན༌། བུ༌མོའེ༌ ཁོ༌ ཁོ༌རང༌ངི༌ ཨ༌བའེ༌ ཁང༌པའེ༌ ནང༌ང༌ ཁྲིད༌ཏེ༌ ཁྱེརས༌ ཡང༌ ཁོ༌ ཐོང༌ང༌ཅིག༌ ཨ༌བའེ༌ མ༌ཐད༌པོ༌ ཉམ༌པོ༌ ཁོའ༌ གའ༌སུས༌ ཞུས༌།
4 ཁོའེ༌ ན༌མའེ༌ ཨ༌བའེ༌ ཁོའ༌ ཞག༌ ཁ༌ཅིག༌ དུགས༌ཅེས༌ལ༌ ཟེར༌པ༌ ཁོ༌ ཨ༌བ༌ ཉམ༌པོ༌ ཟའ༌ཨིན༌, ཐུང༌ཨིན༌ ཏེ༌རུ༌ ཉིད༌ལོགས༌ཏེ༌ ཞག༌མ༌ སུམ༌ དུགས༌།
5 ཞག༌ ཞི༌པའེ༌ ཞག༌ག༌ ཁོང༌གུན༌ ང༌མོ༌ནེ༌ ལངས༌ ཡང༌ ལོགས༌ཏེ༌ ཆ༌ཅེས༌ལ༌ གྲལ༌གྲིག༌ ཅོས༌, ཨིན༌ནའང༌ ཨ༌བའེ༌ ཁོ༌རང༌ངི༌ བུ༌མོའེ༌ མག༌པ༌ ཟེརས༌, “ཟན༌ ཟོས༌ཏེ༌ ཀྲོད༌པ༌ བྲངས༌ ཅུག༌ཏེ༌ སོང༌།”
6 ཏེ༌ནེ༌ ཁོང༌ ཉིས༌ཀོ༌ ཟའ༌ཅེས༌ དང༌ ཐུང༌ཅེས༌ལ༌ སའེ༌ཀ༌ དུགས༌། བུ༌མོའེ༌ ཨ༌བའེ༌ ཟེརས༌, “དི༌རིང༌ ཚན༌བོ༌ དུག༌ཏེ༌ སྐྱིད༌པོ༌ ཅོའ༌ ཛད༌།”
7 ཡང༌ ཁོ༌ ཆ༌ཅེས༌ལ༌ ལངས༌ས༌ཅིག༌ ཁོའེ༌ ན༌མའེ༌ ཨ༌བའེ༌ ཁོའ༌ དུག༌ཅེས༌ལ༌ རང༌གྱལ༌ ཏངས༌པ༌ ཁོ༌ ཏེ༌ ཚན༌བོ༌ ཏེ༌རུ༌ དུགས༌།
8 ཞག༌ ལྔ༌པའི༌ ཞག༌ག༌ ང༌མོ༌ནེ༌ ཁོ༌ ཆ༌ཅེས༌ལ༌ ལངས༌ས༌ཅིག༌ བུ༌མོའེ༌ ཨ༌བའེ༌ ཟེརས༌, “ཟན༌ ཟོས༌ཏེ༌ ཀྲོད༌པ༌ བྲངས༌ ཅུག༌ཏེ༌ ཉིང༌གུང༌ ཚོག༌པ༌ སྲུང༌།” ཁོང༌ ཉིས༌ཀོ༌ དུགས༌ཏེ༌ ཟོས༌།
9 ཏེ༌ནེ༌ ཁོ༌ ཁོ༌རང༌ངི༌ ཚེ༌ཡོག༌ ན༌མ༌ དང༌ ཡོག༌པོ༌ ཉམ༌པོ༌ ཆ༌ཅེས༌ལ༌ ལངས༌ས༌ཅིག༌ ཁོའེ༌ ན༌མའེ༌ ཨ༌བའེ༌ ཁོའ༌ ཟེརས༌, “ལྟོས༌སའང༌ ཕི༌ཏོག༌ ཆ༌ ཚར༌ཏོག༌, ཚན༌བོ༌ འི༌རུ༌ དུག༌། ཉི༌མ༌ བུད༌ ཚར༌ཀྱིས༌ དུག༌, དུགས༌ཏེ༌ སྐྱིད༌པོ༌ ཅོས༌། ཐོ༌རེ༌ ང༌མོ༌ནེ༌ ལངས༌ཏེ༌ ཁྱོ༌རང༌ ཁང༌པ༌ ལོགས༌ཏེ༌ སོང༌།”
10 ཨིན༌ནའང༌ ཡང༌ ཚན༌ཞིག༌ དུག༌ཉིན༌ མེད༌པ༌ ཁོ༌ ཁོ༌རང༌ངི༌ གྱབ༌ཆ༌ སྟད༌ཁན༌ནི༌ བུང༌བུ༌ ཉིས༌ཀོ༌ དང༌ ན༌མ༌ ཁྲིད༌ཏེ༌ ཡེ༌བས༌ ཡང༌ན༌ ཡེ༌རུ༌ཤ༌ལེམ༌ ཆོགས༌ལ༌ བིངས༌།
11 ཁོང༌གུན༌ ཡེ༌བས༌སི༌ གྱལ༌སའེ༌ ཉེ༌མོའ༌ ལེབ༌བ༌ཅིག༌ མུན༌གྲིག༌ ཆ༌ཀྱིས༌ ཡོད༌པིན༌། ཡོག༌པོའེ༌ ཁོ༌རང༌ངི༌ སྤོན༌བོའ༌ ཟེརས༌, “སྐྱོད༌, ཡེ༌བས༌པའེ༌ གྱལ༌སའེ༌ ནང༌ང༌ ཚན༌བོ༌ དུག༌ཨིན༌།”
12 སྤོན༌བོའེ༌ ལན༌ཏངས༌, “མན༌ ཨིས༌ར༌ཨེལ༌པ༌ མན༌ཁན༌ ཞན༌མི༌གུན༌ནི༌ གྱལ༌སའེ༌ ནང༌ང༌ ང༌དང༌ མི༌ དུག༌། ང༌དང༌གུན༌ གི༌བེའཧ༌ ནང༌ང༌ དུག༌ག༌ ཆེན༌།
13 ཡོང༌, ང༌དང༌གུན༌ གི༌བེའཧ༌ ཡ༌ ར༌མཧ༌ ལེབ༌ཅེས༌སི༌ རྩོན༌གྲུས༌ ཅོ༌ཨིན༌ ཡང༌ ཏེ༌ ཉིས༌ཀོའེ༌ ནང༌ནེ༌ ཅིག༌པོའེ༌ ནང༌ང༌ ང༌དང༌ངི༌ ཚན༌བོ༌ པུད༌ཨིན༌།”
14 ཏེ༌ནེ༌ ཁོང༌གུན༌ སོང༌ ཡང༌ ཁོང༌གུན༌ བེན༌ཡཱ༌མིན༌པ༌གུན༌ དུག༌སའེ༌ གི༌བེའཧ༌ ཉེ༌མོའ༌ ལེབ༌བ༌ཅིག༌ ཉི༌མ༌ སྐྱོད༌།
15 ཏེ༌རུ༌ ཚན༌བོ༌ དུག༌ཅེས༌ལ༌ ཁོང༌གུན༌ གྱལ༌སའེ༌ སྐྱིལ༌ལ༌ ཡོད༌ཁན༌ ཁྲོམས༌སི༌ ནང༌ང༌ སོང༌ཏེ༌ དུགས༌། ཨིན༌ནའང༌ སུ༌ཞིག༌གིའང༌ ཁོང༌གུན༌ ཁོ༌རང༌ངི༌ ཁང༌པའེ༌ ནང༌ང༌ ཚན༌བོ༌ དུག༌ཅེས༌ལ༌ མ༌ཁྱེརས༌།
16 ཏེན༌ན༌ ཕི༌ཏོག༌ ཨེཕ༌ར༌ཡིམ༌མི༌ རི༌ཡུལ༌པ༌ གི༌བེའཧ༌ ནང༌ང༌ དུག༌ཁན༌ མི༌རྒད༌པོ༌ ཞིག༌ ཞིང༌ངི༌ཀ༌ ལས༌ ཅོས༌ཏེ༌ ལོགས༌ཏེ༌ ཡོང༌ངད༌པིན༌།
17 ཁོའ༌ གྱལ༌སའེ༌ སྐྱིལ༌ལ༌ ཁྲོམས༌སི༌ ནང༌ང༌ བེས༌པ༌ རིག༌ ཐོང༌ང༌ཅིག༌ ཁོའེ༌ ཁོང༌གུན༌ལ༌ ཏྲིས༌, “ཁྱོ༌ཞའ༌ ཀ༌རུ༌ ཆ༌ཅེན༌ ཡང༌ ཀ༌ནེ༌ ཡོངས༌པིན༌?”
18 བུ༌ཚའེ༌ ལན༌ཏངས༌, “ང༌ཞ༌གུན༌ ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌ནེ༌ ཡོངས༌པིན༌ ཡང༌ ཨེཕ༌ར༌ཡིམ༌ རི༌ཡུལ༌ལི༌ གམ༌ཡུལ༌ལ༌ ཆ༌ཅེས༌ ཨིན༌ ཀ༌རུ༌ ང༌ དུག༌གད༌། ཡང༌ ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌མ༌ སོང༌པིན༌ ཡང༌ དག༌ས༌ ང༌ ཡ༌ཝ༌ ཅོལ༌སའེ༌ ནས༌ས༌ ཆ༌ཅེས༌ ཨིན༌། ཨིན༌ནའང༌ སུ༌ཞིག༌གིའང༌ ང༌ ཁོ༌རང༌གུན༌ནི༌ ཁང༌པའེ༌ ནང༌ང༌ མ༌ཁྱེརས༌།
19 ང༌ཞའེ༌ ལག༌ག༌ ང༌ཞའ༌ རང༌ངི༌ བུང༌བུའི༌ ཕིའ༌ ཕུག༌མ༌ དང༌ རྩའ༌ ཡང༌ ང༌རང༌, བུ༌མོ༌ དང༌ ངའེ༌ ཡོག༌པོའེ༌ ཕིའ༌ ཏ༌གི༌ དང༌ རྒུན༌ཆང༌ ཡོད༌། ང༌ཞ༌གུན༌ལ༌ ཅའང༌ སྒོས༌དོམ༌ མེད༌།”
20 མི༌རྒད༌པོའེ༌ ཟེརས༌, “ཉེ༌ཞའ༌ ངའེ༌ ཁང༌པའེ༌ ནང༌ང༌ གའ༌སུས༌ ཞུའད༌། ཉེ༌ཞའ༌ སྒོས༌དོམ༌ ཡོད༌ཁན༌གུན༌ ངའེ༌ ཏང༌ཨིན༌, གྱལ༌སའེ༌ ཁྲོམས༌སི༌ ནང༌ང༌ ཚན༌ ཕུད༌ད༌ མ༌ཛད༌།”
21 ཏེ༌ནེ༌ ཁོའེ༌ ཁོང༌གུན༌ ཁོ༌རང༌ངི༌ ཁང༌པ༌ ཁྱེརས༌ ཡང༌ བུང༌བུ༌གུན༌ལ༌ རྩའ༌ ཏངས༌། ཁོང༌རང༌གུན༌ནི༌ རྐང༌པ༌ ཁྲུས༌ཏེ༌ སྟིང༌ནེ༌ ཁོང༌གུན༌ནི༌ ཟན༌ ཟོས༌ ཡང༌ ཐུངས༌།
22 ཁོང༌གུན༌ནི༌ ཟེན༌ ཐུང༌ཨིན༌ སྐྱིད༌པོ༌ ཅོ༌ ཟ༌ནེ༌ གྱལ༌སའེ༌ བུ༌ཚ༌ ངན༌པ༌གུན༌ནི༌ ཁང༌པའ༌ སྐོར༌ཏེ༌ སྒོ༌ སྲན༌ཏྲེ༌ རྡུང༌ཨིན༌ ཁང༌པའེ༌ དག༌པོ༌ མི༌རྒད༌པོ༌བོའ༌ ཀུ༌ཅོ༌ ཏངས༌ཏེ༌ ཟེརས༌, “ཁྱོ༌རང༌ངི༌ ཁང༌པའ༌ ཁྱོང༌ཁན༌ བེས༌པ༌ བུ༌ཚ༌ ཉམ༌པོ༌ ང༌ཞའ༌ ལུས༌བྲེལ༌ ཅོ༌ཉན༌ཅེས༌ལ༌ ཁོ༌ ཕི༌ལོག༌ག༌ ཕིངས༌ཏེ༌ ཁྱོང༌།”
23 ཁང༌པའེ༌ དག༌པོ༌བོ༌ ཕི༌ལོག༌ག༌ སོང༌ཏེ༌ ཁོང༌གུན༌ལ༌ ཟེརས༌, “མན༌, ངའེ༌ ཛ༌འོ༌གུན༌ འི༌ཟུག༌ ངན༌པ༌ ལས༌ མ༌ཅོ༌ཤིག༌། ཁོ༌ ངའེ༌ གྲོན༌པོ༌ ཨིན༌ནོག༌, ཇུ༌ཇུ༌ ཏེ༌ཟུག༌ ཁྲེལ༌མེད༌དི༌ ལས༌ མ༌ཅོ༌ཤིག༌།
24 ལྟོས༌, བུ༌ཚ༌ ལག༌པ༌ མ༌ཐུག༌ཁན༌ ངའེ༌ བུ༌མོ༌ དང༌ ཁོའེ༌ ཚེ༌ཡོག༌ ན༌མ༌ འི༌ཀ༌ནེ༌, ངའེ༌ ཁོང༌གུན༌ ཕི༌ལོག༌ག༌ ཕིངས༌ཏེ༌ ཁྱོང༌ཨིན༌ ཡང༌ ཁོང༌གུན༌ ཉམ༌པོ༌ ཁྱོ༌ཞའེ༌ ཅི༌ ཅོ༌ཨིན༌ སམ༌ནའང༌ ཅོས༌ ཨིན༌ནའང༌ འི༌ བུ༌ཚ༌ ཉམ༌པོ༌ ཏེ༌ཟུག༌ ཁྲེལ༌མེད༌དི༌ ལས༌ མ༌ཅོ༌།”
25 ཁོང༌གུན༌ནི༌ ཁོའེ༌ ཟེར༌ཁན༌བོའ༌ མ༌ཉནས༌། ཏེ༌ནེ༌ ལི༌ཝི༌པ༌བོའེ༌ ཁོ༌རང༌ངི༌ ཚེ༌ཡོག༌ ན༌མ༌ ཁོང༌གུན༌ ཡོད༌ས༌ ཕི༌ལོག༌ག༌ ཕིངས༌ཏངས༌ ཡང༌ ཁོང༌གུན༌ནི༌ ཚན༌ གང༌པོ༌ བུ༌མོ༌ ཉམ༌པོ༌ ལུས༌བྲེལ༌ དང༌ ངན༌པ༌ ཅོས༌ཏེ༌ ནམ༌ལངས༌ལ༌ ཁོ༌ ཆ༌ཅུགས༌།
26 བུ༌མོ༌ ཁོའེ༌ སྤོན༌བོ༌ དུག༌སའེ༌ ཁང༌པ༌ ལོགས༌ཏེ༌ སོང༌ ཨིན༌ནའང༌ སྒོའེ༌ཀ༌ གྱེལ༌པ༌ ཏེ༌ཀ༌ ཉི༌མ༌ ཤར༌ཤར༌ ཚག༌པ༌ ལུས༌།
27 ང༌མོ༌ ཁོའེ༌ སྤོན༌བོ༌ ལངས༌ཏེ༌ ཁང༌པའ༌ ཆ༌ཅེས༌ལ༌ སྒོ༌ ཕེའ༌ཅིག༌ ཁོའ༌ ཁོ༌རང༌ངི༌ ཚེ༌ཡོག༌ ན༌མ༌ སྒོ༌ཐེམས༌སི༌ཀ༌ ལག༌པ༌ ཐམས༌ཏེ༌ གྱེལ༌ཏེ༌ ཡོད༌ཁན༌བོ༌ ཐོང༌།
28 ཁོའེ༌ བུ༌མོའ༌ ཟེརས༌, “ལོངས༌, ང༌དང༌ ཆེན༌།” ཨིན༌ནའང༌ ལན༌ མ༌ཐོབ༌པ༌ ཁོའེ༌ བུ༌མོའེ༌ རོ༌ ཁོ༌རང༌ངི༌ བུང༌བུའི༌ཀ༌ ཀལ༌ཏེ༌ ཁང༌པ༌ སོང༌།
29 ཁང༌པ༌ ལེབ༌བ༌ཅིག༌ ཁོའེ༌ ཁོ༌རང༌ངི༌ ཚེ༌ཡོག༌ ན༌མའེ༌ རོ༌ ཀྲི༌ ཉམ༌པོ༌ ཏུམ༌པ༌ རྕུག༌ཉིས༌སི༌ ནང༌ང༌ ཅདས༌ ཡང༌ ཨིས༌ར༌ཨེལ༌པའེ༌ མི༌སྡེ༌ རེ༌རེའ༌ ཀལས༌།
30 ཏེ༌བོ༌ ཐོང༌ཁན༌ ཚང༌མའེ༌ ཟེརས༌, “ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ བིངས༌ཏེ༌ ཡོངས༌པ༌ནེ༌ དག༌ས༌ ཚོག༌པ༌ འི༌ ཙོགས༌ཤིག༌ མ༌ནེ༌ མ༌ཐོང༌ ཡ༌ མ༌ཚོར༌། འི༌བོའེ༌ སྐོར༌ལ༌ སམ༌བ༌ སྲན༌ཏྲེ༌ ཏངས༌ཏེ༌ ཐག༌ཅོད༌ཤིག༌ ང༌དང༌གུན༌ནི༌ ཅི༌ ཅོ༌གོས༌?”