20
ཨིས༌ར༌ཨེལ༌པ༌གུན༌ནི༌ བེན༌ཡཱ༌མིན༌པ༌གུན༌ལ༌ མག༌ ཏངས༌།
20:1- 48
1 ཏེ༌ནེ༌ བྱང༌ ཆོགས༌སི༌ གྱལ༌ས༌ དཱན༌ནེ༌ ཏངས༌ཏེ༌ ལྷོ༌ ཆོགས༌སི༌ གྱལ༌ས༌ བེར༌ཤེ༌བ༌ ཚོག༌པ༌ ཡང༌ ཤར༌ ཆོགས༌སི༌ གི༌ལེད༌དི༌ ཡུལ༌ཇོངས༌ནེ༌ ཨིས༌ར༌ཨེལ༌པ༌ ཚང༌མ༌ བིངས༌ ཡང༌ ཅིག༌གྲིལ༌ སོང༌ཏེ༌ མིཟ༌པཧའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཛོམས༌།
2 དཀོན༌མཆོག༌གི༌ མི༌གུན༌ ཛོམས༌ཏེ༌ ཡོད༌ས༌ ཨིས༌ར༌ཨེལ༌ལི༌ མི༌སྡེ༌ 11པོའེ༌ སྤོན༌བོ༌གུན༌ ཁོང༌རང༌གུན༌ནི༌ ནས༌སའེ༌ཀ༌ དུགས༌, ཏེ༌རུ༌ ར༌འི༌ ཁུར༌ཁན༌ མག༌མི༌ 400,000 ཡོད༌པིན༌།
3 ༼བེན༌ཡཱ༌མིན༌པ༌གུན༌ལ༌ ཞན༌ ཨིས༌ར༌ཨེལ༌པ༌གུན༌ ཀེན༌ལ༌ མིཟ༌པཧའ༌ སོང༌ཁན༌བོ༌ ཚོར༌།༽ ཨིས༌ར༌ཨེལ༌པ༌གུན༌ནི༌ ཟེརས༌, “འི༌ ནས༌ལུག༌ ངན༌པ༌བོ༌ ཀ༌ཟུག༌གི༌ ཇུང༌ ང༌ཞའ༌ ཤོད༌དའང?”
4 ཏེ༌ནེ༌ སད༌ཁན༌ནི༌ བུ༌མོའེ༌ མག༌པ༌ ལི༌ཝི༌པ༌བོའེ༌ ཁོང༌གུན༌ལ༌ ཟེརས༌, “ང༌ དང༌ ངའེ༌ ཚེ༌ཡོག༌ ན༌མ༌ ཉིས༌ཀོ༌ བེན༌ཡཱ༌མིན༌ནི༌ ཡུལ༌ཇོངས༌ གི༌བེའཧ༌ ནང༌ང༌ ཚན༌བོ༌ དུག༌ག༌ལ༌ སོང༌པིན༌།
5 ཚན༌ནི༌ ཏུས༌ལ༌ གི༌བེའཧ༌པ༌ བུ༌ཚ༌གུན༌ ཡོངས༌ཏེ༌ ང༌ཞའ༌ དུག༌སའེ༌ ཁང༌པ༌ ཐའ༌ སྐོརས༌། ང༌ སད༌ཅེས༌ ཅོས༌ ཡང༌ ཚན༌ གང༌པོ༌ ངའེ༌ ཚེ༌ཡོག༌ ན༌མ༌ ཝང༌ ཉམ༌པོ༌ ལུས༌བྲེལ༌ ཅོས༌པ༌ ཁོ༌ ཤི༌།
6 ཨིས༌ར༌ཨེལ༌ལི༌ ནང༌ང༌ ཏེ༌ཙོགས༌ ཁྲེལ༌མེད༌དི༌ ལས༌ ཅོ༌ཁན༌བོ༌ གྱུས༌ ཆ༌ཅེས༌ལ༌ ངའེ༌ ང༌རང༌ངི༌ ཚེ༌ཡོག༌ ན༌མའེ༌ རོ༌ ཁྱོངས༌ཏེ༌ ཏུམ༌པ༌ 12 ནང༌ང༌ ཅད༌ཏེ༌ ཁྱོ༌ཞའེ༌ མི༌སྡེ༌ རེ༌རེའ༌ ཀལ༌པིན༌།
7 ཏ༌ ཏེ༌བོའེ༌ སྐོར༌ལ༌ ཅི༌ ཅོ༌གོས༌ཤེས༌པོ༌ ཁྱོ༌ཞའ༌ ཨིས༌ར༌ཨེལ༌པ༌ ཚང༌མའེ༌ ཐག༌ཅོད༌།”
8 མི༌ ཚང༌མ༌ ཅིག༌གྲིལ༌ སོང༌ཏེ༌ ཟེརས༌, “ང༌དང༌ སུའང༌ ཁང༌པ༌ མི༌ཆ༌། ང༌དང༌ སུ༌ཞིག༌གའང༌ རང༌ངི༌ ཁང༌པ༌ ལོགས༌ཏེ༌ མི༌ཆ༌།
9 ཨིན༌ནའང༌ ཏ༌ གི༌བེའཧ༌པ༌གུན༌ལ༌ ང༌དང༌ངི༌ འི༌བོ༌ ཅོ༌ཨིན༌། ཏག༌རིལ༌ ཏངས༌ཏེ༌ བིང༌ཁན༌ ནང༌ཞིན༌ ང༌དང༌གུན༌ནི༌ ཁོང༌གུན༌ནི༌ཀ༌ སྤུང༌གོལ༌ ཅོ༌ཨིན༌།
10 ང༌དང༌གུན༌ནི༌ ཨིས༌ར༌ཨེལ༌པ༌ མག༌མི༌ ཚང༌མའེ༌ ནང༌ནེ༌ རྕུ༌ཁག༌པོ༌, ཁར༌ཇི༌ གྲལ༌གྲིག༌ ཅོ༌ཅེས༌ལ༌ སྐོས༌ཏེ༌ ཞན༌ ཚང༌མ༌, ཨིས༌ར༌ཨེལ༌ལི༌ ནང༌ང༌ ཏེ༌ཟུག༌ ཁྲེལ༌མེད༌དི༌ ལས༌ ཅོ༌ཅེས༌སི༌ ཕིའ༌ བེན༌ཡཱ༌མིན༌ ཡུལ༌ཇོངས༌སི༌ གི༌བེའཧ༌པ༌གུན༌ལ༌ འོས༌པ༌ ཨིན༌ཁན༌ནི༌ ཆད༌པ༌ ཏང༌ང༌ ཆེན༌།”
11 ཏེ༌ནེ༌ ཨིས༌ར༌ཨེལ༌པ༌ ཚང༌མ༌ ཛོམས༌ ཡང༌ ཏེ༌ གྱལ༌སའེ༌ གྱབ༌གལ༌ལ༌ ཅིག༌གྲིལ༌ སོང༌།
12 ཨིས༌ར༌ཨེལ༌ལི༌ མི༌སྡེ༌གུན༌ནི༌ བེན༌ཡཱ༌མིན༌ནི༌ མི༌སྡེའེ༌ གང༌པོའེ༌ ནང༌ང༌ མི༌གུན༌ ལམ༌ཅུགས༌ཏེ༌ ཏྲིས༌, “ཁྱོ༌ཞ༌གུན༌ནི༌ ཕྲོའ༌ མི༌ངན༌པ༌ ཁ༌ཅིག༌གི༌ ཁྲེལ༌མེད༌ ལས༌ ཅོས༌ཁན༌བོ༌ ཁྱོ༌ཞའ༌ གྱུས༌ ཡོད༌ད༌?
13 ཏ༌ གི༌བེའཧ༌པ༌ ཏེ༌ མི༌ངན༌གུན༌ ང༌ཞའེ༌ ལག༌ག༌ སྟོད༌ ཏེ༌ནེ༌ ང༌ཞ༌གུན༌ནི༌ ཁོང༌གུན༌ སད༌ཏེ༌ ཨིས༌ར༌ཨེལ༌ལི༌ ནང༌ང༌ ཅོ༌ཁན༌ནི༌ ངན༌པ༌ མེད༌ཁན༌ ཅོ༌ཨིན༌།”
ཨིན༌ནའང༌ ཁོང༌གུན༌ནི༌ ཟེར༌ཁན༌བོའ༌ བེན༌ཡཱ༌མིན༌པ༌གུན༌ནི༌ མ༌ཉེནས༌།
14 གྲོང༌ཁྱེར༌གུན༌ནེ༌ བེན༌ཡཱ༌མིན༌པ༌གུན༌ ཡོངས༌ཏེ༌ གི༌བེའཧ༌ ནང༌ང༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ནོལ༌ལ༌ལ༌ ཛོམས༌།
15 ཏེན༌ན༌ ཞག༌ག༌ བེན༌ཡཱ༌མིན༌པ༌གུན༌ནི༌ གྲོང༌ཁྱེར༌གུན༌ནེ༌ ར༌འི༌ སྲུལ༌ ཉན༌ཁན༌ མི༌ 26,000 མག༌མི༌ ནང༌ང༌ ཅུགས༌ ཀ༌གུན༌ གི༌བེའཧ༌ ནང༌ང༌ དུག༌ཁན༌ མག༌མི༌ གྱལ༌ཤོག༌ 700 གུན༌ནི༌ཀ༌ ནན༌མ༌ ཨིན༌པིན༌།
16 ཏེ༌ མག༌མི༌ ཚང༌མའེ༌ ཕྲོའ༌ ལག༌པ༌ ཡོ༌མ༌ ཀོལ༌ཁན༌ མག༌མི༌ 700 ཡོད༌པིན༌། ཁོང༌གུན༌ནི༌ སྲའེ༌ སྲལ༌ཉག༌ག༌ ཡུག༌དོ༌ ཏང༌ན༌ མ༌ཕོག༌ག༌ ལུས༌ས༌ མེད༌པིན༌།
17 བེན༌ཡཱ༌མིན༌པ༌གུན༌ མ༌ཐེའ༌ ཨིས༌ར༌ཨེལ༌པ༌གུན༌ལ༌ ར༌འི༌ ཁུར༌ཁན༌ ཐོང༌ངོམས༌ཅན༌ མག༌མི༌ 400,000 ཡོད༌པིན༌།
18 དཀོན༌མཆོག༌ག༌ ཅོལ༌སའེ༌ ནས༌ས༌ བེ༌ཐེལ༌ལ༌ སོང༌ཏེ༌ ཨིས༌ར༌ཨེལ༌པ༌གུན༌ནི༌ ཁོང༌ང༌ ཏྲིའ༌ཛདས༌, “བེན༌ཡཱ༌མིན༌པ༌གུན༌ལ༌ ནོལ༌ལ༌ ང༌ཞ༌གུན༌ནི༌ ནང༌ནེ༌ གོ༌མ༌ སུ༌ ཆ༌ལེ༌?”
ཡ༌ཝའེ༌ ལན༌སལས༌, “གོ༌མ༌ ཡ༌ཧུ༌དཱ༌པ༌གུན༌ ཆ༌གོས༌།”
19 ཐོ༌རེ༌ཟུག༌པོ༌ ང༌མོ༌ ཨིས༌ར༌ཨེལ༌པ༌གུན༌ སོང༌ཏེ༌ གི༌བེའཧ༌ ཉེ༌མོའ༌ ཀུར༌ ཙུགས༌ཏེ༌ དུགས༌།
20 ཨིས༌ར༌ཨེལ༌པ༌གུན༌ གི༌བེའཧ༌ སོང༌ཏེ༌ བེན༌ཡཱ༌མིན༌པ༌གུན༌ལ༌ མག༌ ཏང༌ཅེས༌ལ༌ གྲལ༌གྲིག༌ ཅོས༌ཏེ༌ རང༌རང༌ངི༌ ནས༌ས༌ ཐམས༌ཏེ༌ དུགས༌།
21 བེན༌ཡཱ༌མིན༌པ༌གུན༌ གྱལ༌ས༌ནེ༌ བིང༌ཏེ༌ ཡོངས༌ ཡང༌ ཏེན༌ན༌ ཞག༌ག༌ མག༌ཐང༌ངི༌ཀ༌ ཁོང༌གུན༌ནི༌ ཨིས༌ར༌ཨེལ༌པའེ༌ མག༌མི༌ 22,000 སདས༌།
22-23 ཏེ༌ནེ༌ ཨིས༌ར༌ཨེལ༌པ༌གུན༌ ཡ༌ཝ༌ ཅོལ༌སའེ༌ ནས༌ས༌ སོང༌ཏེ༌ ཕི༌ཏོག༌ ཚོག༌པ༌ ངུ༌ཨིན༌ རྡུག༌པོ༌ ཅོས༌ ཡང༌ ཁོང༌ང༌ ཏྲིའ༌ ཛདས༌, “ང༌ཞའ༌ ང༌ཞའེ༌ སྤུན༌ བེན༌ཡཱ༌མིན༌པ༌གུན༌ལ༌ མག༌ ཏང༌ང༌ ཡང༌སྐྱར༌ ཆ༌ལེ༌?”
ཡ༌ཝའེ༌ ལན༌སལས༌, “སོང༌, ཁོང༌གུན༌ལ༌ ནོལ༌ལ༌ ཡང༌སྐྱར༌ སོང༌།”
ཞག༌ ཉིས༌པའེ༌ ཞག༌ག༌ ཨིས༌ར༌ཨེལ༌པ༌གུན༌ནི༌ ཅིག༌ ཏང༌ ཅིག༌ག༌ སྤོས༌པ༌ ཏངས༌ཏེ༌ ཡང༌སྐྱར༌ ནོལ༌ཅེས༌ལ༌ རང༌རང༌ངི༌ ནས༌ས༌ ལེནས༌།
24 ཨིས༌ར༌ཨེལ༌པ༌གུན༌ ལན༌ ཉིས༌པ༌ བེན༌ཡཱ༌མིན༌པ༌གུན༌ནི༌ གྱབ༌གལ༌ལ༌ ནོལ༌ལ༌ བིང༌།
25 གི༌བེའཧ༌ ནེ༌ བིང༌ཏེ༌ བེན༌ཡཱ༌མིན༌པ༌གུན༌ ནོལ༌ལ༌ ཡོངས༌ ཡང༌ འི༌ ལན༌ ཁོང༌གུན༌ནི༌ ཨིས༌ར༌ཨེལ༌པ༌ ར༌འི༌ ཁུར༌ཁན༌ ཐོང༌ངོམས༌ཅན༌ མག༌མི༌ 18,000 སདས༌།
26 ཏེ༌ནེ༌ ཨིས༌ར༌ཨེལ༌པ༌ ཚང༌མ༌ བེ༌ཐེལ༌ལ༌ སོང༌ཏེ༌ ཡ༌ཝའེ༌ སྐུན༌དུན༌ལ༌ ངུས༌། ཏེ༌ ཞག༌ག༌ ཕི༌ཏོག༌ ཚོག༌པ༌ ཁོང༌གུན༌ ཉེ༌ནས༌ལ༌ དུགས༌ཏེ༌ མེའ༌ སྲག༌ཅེས༌སི༌ ཆོད༌པ༌ དང༌ ཞི༌དེ༌ ཐུན༌བྲེལ༌ལི༌ ཆོད༌པ༌ ཕུལས༌།
27 ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཏྲིའ༌ ཛདས༌, ༼ཏེ༌ ཏུས༌ལ༌ དཀོན༌མཆོག༌གི༌ ཆད༌དོན༌ནི༌ སྒམ༌བོ༌ བེ༌ཐེལ༌ལི༌ ནང༌ང༌ ཡོད༌པིན༌,
28 ཡང༌ ཨ༌རོན༌ནི༌ ཚ༌འོ༌ ཨེ༌ལི༌འ༌ཟར༌རི༌ བུ༌ཚ༌ ཕི༌ནི༌ཧས༌ བླ༌མ༌ ཨིན༌པིན༌༽ “ང༌ཞའ༌ ང༌ཞའེ༌ སྤུན༌ བེན༌ཡཱ༌མིན༌པ༌གུན༌ལ༌ ཡང༌སྐྱར༌ མག༌ ཏང༌ང༌ ཆ༌ ཡ༌ མ༌ཆ༌ ལེ༌?”
ཡ༌ཝའེ༌ ལན༌སལས༌, “སོང༌, ཐོ༌རེ༌ ཁོང༌གུན༌ ངའེ༌ ཁྱོ༌ཞའེ༌ ལག༌ག༌ སྟད༌ཨིན༌།”
29 ཨིས༌ར༌ཨེལ༌པ༌ མག༌མི༌ 10,000 སྤུང༌གོལ༌ ཅོ༌ཅེས༌ལ༌ གི༌བེའཧ༌ གྱལ༌སའེ༌ ཉེ༌ཁོར༌ལ༌ ཨིབས༌ཏེ༌ དུགས༌།
30 ཞག༌ སུམ༌པའེ༌ ཞག༌ག༌ ཨིས༌ར༌ཨེལ༌ལི༌ ཞན༌ མག༌མི༌གུན༌ བེན༌ཡཱ༌མིན༌པ༌གུན༌ལ༌ ནོལ༌ལ༌ སོང༌ཏེ༌ སྔུན༌ ཙོགས༌ལ༌ ནོལ༌ཅེས༌ལ༌ གྲལ༌གྲིག༌ ཅོས༌ཏེ༌ རང༌རང༌ངི༌ ནས༌ས༌ ཟུམས༌།
31 བེན༌ཡཱ༌མིན༌པ༌གུན༌ ནོལ༌ལ༌ བིང༌ཏེ༌ ཁོང༌གུན༌ལ༌ ཏེད༌ཏེ༌ ཁྱེར༌ པ༌སང༌ གྱལ༌ས༌ནེ༌ ཐག༌རིང༌ང༌ ལེབ༌། སྔུན༌ ཙོགས༌ལ༌ ཁོང༌གུན༌ནི༌ ཨིས༌ར༌ཨེལ༌པ༌ མང༌པོའ༌ མ༌སྐྱོན༌ ཅོས༌པ༌ ཧ༌ལམ༌ མི༌ 30 ཐང༌སྟོང༌ ཡང༌ བེ༌ཐེལ༌ དང༌ གི༌བེའཧ༌ ཆ༌སའེ༌ ལམ༌གུན༌ནི༌ཀ༌ ཤི༌།
32 བེན༌ཡཱ༌མིན༌པ༌གུན༌ནི༌ ཟེརས༌ “སྔུན༌ ཙོགས༌ལ༌ ང༌དང༌ངི༌ ཁོང༌གུན༌ལ༌ ཕམ༌ཀལ༌ཏེ༌ ཨིན༌ནོག༌” ཏེན༌ན༌ ཏུས༌ལ༌ ཨིས༌ར༌ཨེལ༌པ༌གུན༌ནི༌ ཟེརས༌, “ཁོང༌གུན༌ གྱལ༌ས༌ནེ༌ ཐག༌རིང༌ང༌ ལམ༌ ཆོགས༌ལ༌ ཁྱེར༌ཅེས༌སི༌ ཕིའ༌ ང༌དང༌གུན༌ ལོགས༌ཏེ༌ ཤོར༌ཨིན༌།”
33 ཨིས༌ར༌ཨེལ༌པ༌ ཚང༌མ༌ ཤོར༌ཏེ༌ བའལ༌ ཏ༌མར༌ལ༌ ལེབ༌བ༌ཅིག༌ ནོལ༌ཅེས༌ལ༌ རང༌རང༌ངི༌ ནས༌ས༌ ཐམས༌ཏེ༌ དུགས༌, ཏེ༌ནེ༌ གི༌བེའཧ༌ ནུབ༌ ཆོགས༌ལ༌ ཨིབས༌ཏེ༌ ཡོད༌ཁན༌ ཨིས༌ར༌ཨེལ༌པ༌གུན༌ བིང༌ ཡང༌ གྱུགས༌ཏེ༌ ནོལ༌ལ༌ ཡོངས༌།
34 ཨིས༌ར༌ཨེལ༌ལི༌ ནོལ༌ཁན༌ ཀྲག༌པོ༌ མག༌མི༌ 10,000 འི༌ གི༌བེའཧ༌པ༌གུན༌ལ༌ དུན༌ ཆོགས༌ནེ༌ སྤུང༌གོལ༌ ཅོས༌། མག༌ མ༌ སྲན༌ཏྲེ༌ སོང༌ ཡང༌ ཁོང༌ང༌ ཕམ༌ སྲན༌ཏྲེ༌ ཕོག༌ཅེས༌པོ༌ བེན༌ཡཱ༌མིན༌པ༌གུན༌ལ༌ ཧ༌ མ༌གོ༌།
35 ཡ༌ཝའེ༌ ཁོང༌གུན༌ལ༌ ཨིས༌ར༌ཨེལ༌པ༌གུན༌ནི༌ ཀ༌ནེ༌ ཕམ༌ཀལ༌ལ༌ ཛདས༌ ཡང༌ ཏེན༌ན༌ ཞག༌ག༌ ཁོང༌གུན༌ནི༌ རའི༌ ཀོལ༌ཁན༌ ཐོང༌ངོམས༌ཅན༌ བེན༌ཡཱ༌མིན༌པ༌ མག༌མི༌ 25,100 སདས༌།
36 ཏེ༌ནེ༌ ཁོང༌གུན༌ ཕམ༌ཁན༌བོ༌ བེན༌ཡཱ༌མིན༌པ༌གུན༌ནི༌ ཧ༌གོ༌།
ཨིས༌ར༌ཨེལ༌པའེ༌ ཞན༌ མག༌མི༌གུན༌ལ༌ གི༌བེའཧ༌ ཉེ༌ཁོར༌ལ༌ ཨིབས༌ཏེ༌ ཡོད༌ཁན༌ མག༌མི༌གུན༌ནི༌ ནང༌ང༌ ལོ༌ཁྱེལ༌ སྟན༌པོ༌ ཡོད༌ པ༌སང༌ བེན༌ཡཱ༌མིན༌པ༌གུན༌ལ༌ ནོལ༌ཅེས༌ ཕངས༌ཏེ༌ ཁོང༌གུན༌ ཤོར༌།
37 ཏེ༌ནེ༌ ཨིབས༌ཏེ༌ ཡོད༌ཁན༌ མག༌མི༌གུན༌ གྱུགས༌ཏེ༌ སོང༌ ཡང༌ གི༌བེའཧ༌པ༌གུན༌ནི༌ཀ༌ སྤུང༌གོལ༌ ཅོས༌ཏེ༌ གྱལ༌སའེ༌ ནང༌ང༌ ཡོད༌ཁན༌ ཚང༌མ༌ ར༌འི༌ ཉམ༌པོ༌ སདས༌།
38 ཏ༌ ཨིས༌ར༌ཨེལ༌པ༌ ཨིབས༌ཏེ༌ ཡོད༌ཁན༌གུན༌ནི༌ ཞན༌ མག༌མི༌གུན༌ལ༌ གྱལ༌སའེ༌ ནང༌ནེ༌ ཏུད༌པ༌ བིང༌ཨིན༌ ཐོང༌ང༌ཅིག༌ སྤུང༌གོལ༌ ཅོས༌ ཟེར༌ཏེ༌ ཡོད༌པིན༌།
39 ཏུད༌པ༌ བིང༌ཨིན༌ ཐོང༌ང༌ཅིག༌ ཨིས༌ར༌ཨེལ༌པ༌གུན༌ནི༌ ལོགས༌ཏེ༌ སྤུང༌གོལ༌ ཅོས༌།
བེན༌ཡཱ༌མིན༌པ༌གུན༌ནི༌ ཨིས༌ར༌ཨེལ༌པ༌ ཧ༌ལམ༌ 30 སདས༌ ཡང༌ ཟེརས༌, “སྔུན༌ ཙོགས༌ལ༌ ང༌དང༌ངི༌ ཁོང༌གུན༌ལ༌ ཕམ༌ཀལ༌ཏེ༌ ཨིན༌ནོག༌།”
40 ཨིན༌ནའང༌ བེན༌ཡཱ༌མིན༌པ༌གུན༌ནི༌ ལོགས༌ཏེ༌ ལྟའ༌ཅིག༌ ཁོང༌གུན༌ལ༌ གྱལ༌ས༌ གང༌པོའེ༌ ནང༌ནེ༌ ཏུད༌པ༌ ཀེན༌ལ༌ ནམ༌ཁའ༌ ཆེན༌ ཡོད༌ཁན༌བོའ༌ ཐོང༌།
41 ཏེ༌ནེ༌ ཨིས༌ར༌ཨེལ༌པ༌གུན༌ ཁོང༌གུན༌ལ༌ ནོལ༌ཅེས༌ལ༌ གྱབ༌ གྱུར༌ར༌ཅིག༌ བེན༌ཡཱ༌མིན༌པ༌གུན༌ལ༌ ཁོང༌གུན༌ནི༌ཀ༌ རྐྱེན༌ངན༌ ལེབ༌ཁན༌བོ༌ ཧ༌གོ༌ ཡང༌ ཁོང༌གུན༌ སྲན༌ཏྲེ༌ ཇིགས༌།
42 ཏེ༌བོའེ༌ཕིའ༌ ཁོང༌གུན༌ ཨིས༌ར༌ཨེལ༌པ༌གུན༌ནི༌ དུན༌ནེ༌ ཐང༌སྟོང༌ ཆོགས༌ལ༌ ཤོར༌ཅེས༌ ཅོས༌ ཨིན༌ནའང༌ ཁོང༌གུན༌ ཤོར༌ མ༌ཉན༌། ཡང༌ ཨིས༌ར༌ཨེལ༌པ༌ གྱལ༌སའེ༌ ནང༌ནེ༌ བིངས༌ཏེ༌ ཡོང༌ཁན༌གུན༌ནི༌ ཁོང༌གུན༌ སདས༌།
43 ཁོང༌གུན༌ནི༌ བེན༌ཡཱ༌མིན༌པ༌གུན༌ལ༌ སྐོརས༌ ཡང༌ གི༌བེའཧའེ༌ ཤར༌ ཆོགས༌སི༌ ནས༌ས༌ ཚག༌པ༌ ཏེད༌ཏེ༌ ཁྱེར༌ཏེ༌ ལ༌མོ༌ ཉམ༌པོ༌ ཁོང༌གུན༌ སདས༌།
44 བེན༌ཡཱ༌མིན༌པ༌ 18,000 ཤི༌, ཁོང༌ ཚང༌མ༌ སྤོས༌པ༌ ཉམ༌པོ༌ ནོལ༌ཁན༌ ཀྲག༌པོ༌ ཨིན༌པིན༌།
45 ལུས༌ཁན༌གུན༌ རིམ༌མོན༌ནི༌ བྲག༌ ཡོད༌ས༌ རི༌སྟོང༌ ཆོགས༌ལ༌ ཤོར༌, ཨིས༌ར༌ཨེལ༌པ༌གུན༌ནི༌ ལམ༌ནེ༌ ཤོར༌ཁན༌ མི༌ 5,000 སདས༌ ཡང༌ བེན༌ཡཱ༌མིན༌པ༌གུན༌ལ༌ གི༌དོམ༌ ཚོག༌པ༌ ཏེད༌ཏེ༌ ཁྱེར༌ཏེ༌ 2,000 སདས༌།
46 ཏེ༌ ཞག༌ག༌ བེན༌ཡཱ༌མིན༌པ༌ ར༌འི༌ སྲུལ༌ཁན༌ མག༌མི༌ 25,000 ཤི༌, ཁོང༌ ཚང༌མ༌ སྤོས༌པ༌ ཉམ༌པོ༌ ནོལ༌ཁན༌ ཀྲག༌པོ༌ ཨིན༌པིན༌།
47 ཨིན༌ནའང༌ བེན༌ཡཱ༌མིན༌པ༌ 600 རིམ༌མོན༌ནི༌ བྲག༌ ཡོད༌སའེ༌ ནས༌ས༌ ཤོར༌ ཡང༌ ཏེ༌རུ༌ ཟླ༌ཝ༌ ཞི༌ དུགས༌།
48 ཨིས༌ར༌ཨེལ༌པ༌གུན༌ བེན༌ཡཱ༌མིན༌ ཡུལ༌ཇོངས༌ལ༌ ལོགས༌ཏེ༌ སོང༌ ཡང༌ སེམས༌ཅན༌ ཐེས༌ཏེ༌ གྲོང༌ཁྱེར༌གུན༌ནི༌ ནང༌ང༌ ཡོད༌ཁན༌ ཚང༌མ༌ ར༌འི༌ ཉམ༌པོ༌ སདས༌ ཡང༌ ཅ༌ལག༌ ཚང༌མ༌ ཁྲེས༌ཏོར༌ ཅོས༌། ཁོང༌གུན༌ ཆའ༌ཁན༌ནི༌ གྲོང༌ཁྱེར༌ ཚང༌མ༌ ཁོང༌གུན༌ནི༌ མེའ༌ ཏུགས༌།