3
ཀེ༌ནན༌ནི༌ ནང༌ང༌ ལུས༌ཁན༌ནི༌ གྱལ༌ཁམས༌གུན༌།
3:1-6
1 ཀེ༌ནན༌ནི༌ ནང༌ང༌ མག༌གི༌ ཐོང༌ངོམས༌ མ༌ཆའ༌ཁན༌ ཨིས༌ར༌ཨེལ༌པ༌གུན༌ལ༌ ཚོད༌ ལྟ༌ཅེས༌ལ༌ འི༌ གྱལ༌ཁམས༌གུན༌ ཡ༌ཝའེ༌ ཏེ༌ ནས༌སའེ༌ ནང༌ང༌ བོར༌ར༌ ཛདས༌།
2 མག༌གི༌ ཐོང༌ངོམས༌ མེད༌ཁན༌ ཨིས༌ར༌ཨེལ༌ལི༌ པུར༌གྱུད༌གུན༌ལ༌ མག༌གི༌ ནང༌ང༌ ནོལ༌ཅེས༌ ལབ༌ཅེས༌ལ༌ ཁོང༌ངི༌ ཏེ༌བོ༌ ཅོའ༌ ཛདས༌།
3 ཏེ༌ གྱལ༌ཁམས༌གུན༌ ཕི༌ལིས༌ཏི༌ ནང༌ང༌ ཝང༌སྲུལ༌ཁན༌ རྔ༌, ཀེ༌ནན༌པ༌ ཚང༌མ༌, སི༌དོན༌པ༌ ཚང༌མ༌ ཡང༌ བའལ༌ ཧེར༌མོན༌ རི༌ནེ༌ ལེ༌བོ༌ ཧ༌མཐ༌ ཚག༌པ༌ ལེ༌བ༌ནོན༌ རི༌གུན༌ནི༌ཀ༌ དུག༌ཁན༌ནི༌ ཧིཝ༌པ༌ ཚང༌མ༌ ཨིན༌པིན༌།
4 ཏེ༌ མི༌གུན༌ ཨིས༌ར༌ཨེལ༌པ༌གུན༌ལ༌ ཚོད༌ ལྟ༌ཅེས༌ ཡང༌ན༌ ཡ༌ཝའེ༌ ཁོང༌གུན༌ནི༌ ཕ༌མེས༌པོ༌གུན༌ལ༌ མོ༌ཟེས༌ གྱུད༌ཏེ༌ སལ༌ཁན༌ བཀའ༌གུན༌ལ༌ ཁའ༌ ཉན༌དུག༌ག༌ མི༌དུག༌ ལྟ༌ཅེས༌ལ༌ བོར༌ར༌ ཛད༌ཏེ༌ ཨིན༌པིན༌།
5 ཨིས༌ར༌ཨེལ༌པ༌གུན༌ ཀེ༌ནན༌པ༌, ཧེད༌པ༌, ཨ༌མོར༌པ༌, པེ༌རིཟ༌པ༌, ཧིཝ༌པ༌, དང༌ ཡེ༌བས༌པ༌ གུན༌ནི༌ ཕྲོའ༌ དུགས༌ཏེ༌
6 ཨིས༌ར༌ཨེལ༌པའེ༌ བུ༌ཚ༌གུན༌ནི༌ ཁོང༌གུན༌ནི༌ བུ༌མོ༌གུན༌ ཉམ༌པོ༌ བག༌སྟོན༌ ཅོས༌ ཡང༌ ཨིས༌ར༌ཨེལ༌པ༌ བུ༌མོ༌གུན༌ ཁོང༌གུན༌ནི༌ བུ༌ཚ༌གུན༌ལ༌ བག༌མའ༌ ཏངས༌ མ༌ཚད༌ ཨིས༌ར༌ཨེལ༌པ༌གུན༌ནི༌ ཁོང༌གུན༌ནི༌ ལྷ༌ལྷ༌མོ༌གུན༌ལ༌ ཅོལས༌།
ཨིས༌ར༌ཨེལ༌པ༌གུན༌ ཐར༌ཅུག༌ཁན༌ ཨོཐ༌ནི༌འེལ༌།
3:7-11
7 ཨིས༌ར༌ཨེལ༌པ༌གུན༌ནི༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌། ཁོང༌གུན༌ནི༌ ཁོ༌རང༌གུན༌ནི༌ དཀོན༌མཆོག༌ ཡ༌ཝ༌ རྗེད༌ཏེ༌ བའལ༌ དང༌ ཨ༌ཤེ༌རཧའེ༌ སྐུན༌དྲ༌གུན༌ལ༌ ཅོལས༌།
8 ཏེ༌ནེ༌ ཡ༌ཝའ༌ ཨིས༌ར༌ཨེལ༌པ༌གུན༌ནི༌ཀ༌ ཐུགས༌སྲོའེ༌ སྲན༌ཏྲེ༌ སྐྱོད༌ པ༌སང༌ ཁོང༌ངི༌ ཁོང༌གུན༌ ཨ༌རམ༌ ན༌ཧ༌རཱ༌འིམ༌མི༌ གྱལ༌པོ༌ ཀུ༌ཤན༌ རི༌ཤ༌ཐཱ༌འིམ༌མི༌ ལག༌ག༌ སྟད༌ད༌ ཛདས༌ ཡང༌ ཁོང༌གུན༌ ཏེ༌ གྱལ༌པོའེ༌ ང༌ཡོག༌ག༌ ལོ༌ རྒྱད༌ ལུས༌།
9 ཨིན༌ནའང༌ ཨིས༌ར༌ཨེལ༌པ༌གུན༌ནི༌ ཡ༌ཝ༌ དཀོན༌མཆོག༌ག༌ རོགས༌ ཛད༌ཅེས༌ལ༌ མོས༌ལམ༌ ཞུས༌པ༌ ཁོང༌ངི༌ ཀེ༌ལེབ༌བི༌ ནོ༌ ཀེ༌ནཟ༌ཟི༌ བུ༌ཚ༌ ཨོཐ༌ནི༌འེལ༌ ཐར༌ཅུག༌ཁན༌བོ༌ ལམ༌ཅུག༌ག༌ ཛད༌ཏེ༌ ཁོང༌གུན༌ སྐྱོབ༌བ༌ ཛདས༌།
10 ཡ༌ཝའེ༌ ཐུག༌ཉིད༌ ཨོཐ༌ནི༌འེལ༌ལི༌ ནང༌ང༌ སྐྱོད༌ཏེ༌ ཁོ༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ གྱུར༌ཏེ༌ མག༌ ཏང༌ང༌ སོང༌། ཡ༌ཝའེ༌ ཨ༌རམ༌མི༌ གྱལ༌པོ༌ ཀུ༌ཤན༌ རི༌ཤ༌ཐཱ༌འིམ༌ ཨོཐ༌ནི༌འེལ༌ལི༌ ལག༌ག༌ སལས༌ ཡང༌ ཁོའ༌ གྱལ༌ཁ༌ ཐོབ༌།
11 ཏེ༌ནེ༌ ཀེ༌ནཟ༌ཟི༌ བུ༌ཚ༌ ཨོཐ༌ནི༌འེལ༌ ཤི༌ཤི༌ ཚག༌པ༌ ཏེ༌ ནས༌སའེ༌ ནང༌ང༌ ལོ༌ 40 ཞི༌དེ༌ ལུས༌།
ཨིས༌ར༌ཨེལ༌པ༌གུན༌ ཐར༌ཅུག༌ཁན༌ ཨི༌ཧུད༌།
3:12-30
12 ཨིས༌ར༌ཨེལ༌པ༌གུན༌ནི༌ ཡང༌སྐྱར༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌ ཡང༌ ཁོང༌གུན༌ནི༌ ངན༌པ༌ ཅོ༌ཅེས༌པའེ༌ ཡ༌ཝའེ༌ མོ༌འབ༌བི༌ གྱལ༌པོ༌ ཨེག༌ལོན༌ལ༌ ཁོང༌གུན༌ནི༌ཀ༌ ཝང༌སྲུལ༌ ཅུགས༌།
13 ཨེག༌ལོན༌ནི༌ ཨེམ༌མོན༌པ༌ དང༌ ཨ༌མ༌ལིཀ༌པ༌ གུན༌ནི༌ རོགས༌ ཉམ༌པོ༌ ཨིས༌ར༌ཨེལ༌པ༌གུན༌ལ༌ ནོལ༌ཏེ༌ ཁ༌སོར༌རི༌ ལྕང༌མའེ༌ གྱལ༌ས༌ ཡང༌ན༌ ཡེ༌རི༌ཀོ༌ ང༌ཡོག༌ག༌ ལེནས༌།
14 ཡང༌ ཁོང༌གུན༌ མོ༌འབ༌བི༌ གྱལ༌པོ༌ ཨེག༌ལོན༌ནི༌ ཝང༌སྲུལ༌ལི༌ ཡོག༌ག༌ ལོ༌ 18 ལུས༌།
15 ཡང༌སྐྱར༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ རོགས༌ ཛད༌ཅེས༌ལ༌ མོས༌ལམ༌ ཞུས༌པ༌ ཡ༌ཝའེ༌ ཁོང༌གུན༌ སྐྱོབ༌ཅེས༌སི༌ ཕིའ༌ བེན༌ཡཱ༌མིན༌ནི༌ སྡེ༌ནེ༌ ལག༌པ༌ ཡོ༌མ༌ ཀོལ༌ཁན༌ གེ༌རཱ༌རི༌ བུ༌ཚ༌ ཨི༌ཧུད༌ ཐར༌ཅུག༌ཁན༌བོ༌ ལྡམ༌མ༌ ཛདས༌། ཨིས༌ར༌ཨེལ༌པ༌གུན༌ནི༌ ཁོ༌ མོ༌འབ༌བི༌ གྱལ༌པོ༌ ཨེག༌ལོན༌ནི༌ཀ༌ ཁྲལ༌ལི༌ པེ༌ནེ༌ ཀལ༌ཏེ༌ ལམ༌ཅུགས༌།
16 ཨི༌ཧུད༌དི༌ མི༌ཀྲར༌ ཕེད༌ ཟམ༌ཤིག༌ རིང༌མོ༌ ཟུར༌ ཉིས༌ཅན༌ནི༌ ར༌འི༌ ཅོས༌ཏེ༌ ཏེ༌བོ༌ ཀོས༌ལག༌གི༌ ནང༌ཀུག༌ག༌ ཁོང༌རང༌ངི༌ རྐང༌པ༌ ཡས༌པའེ༌ ཤལ༌དིག༌གི༌ཀ༌ ཏགས༌།
17 ཁོའེ༌ མོ༌འབ༌བི༌ གྱལ༌པོ༌ ཨེག༌ལོན༌ལ༌ ཁྲལ༌ལི༌ པེ༌ནེ༌ ཕུལས༌, མོ༌འབ༌བི༌ གྱལ༌པོ༌ མ༌ རོམ༌པོ༌ ཡོད༌པིན༌།
18 ཁྲལ༌ལི༌ པེ༌ནེ༌ ཕུལ༌ ཚར༌ཏེ༌ སྟིང༌ནེ༌ ཨི༌ཧུད༌ དང༌ པེ༌ནེ༌ ཁུར༌ཁན༌ནི༌ ཞན༌ མི༌གུན༌ ལོགས༌ཏེ༌ སོང༌།
19 ཨིན༌ནའང༌ གིལ༌གལ༌ལི༌ ཉེ༌མོའ༌ ཡོད༌ཁན༌ རྡོའེ༌ སྐུན༌དྲའེ༌ཀ༌ ལེབ༌བ༌ཅིག༌ ཨི༌ཧུད༌ ཨེག༌ལོན༌ ཡོད༌ས༌ ཅིག༌པོ༌ ལོགས༌ཏེ༌ ཡོངས༌ ཡང༌ ཁོའ༌ ཟེརས༌, “གྱལ༌པོ༌, ངའ༌ ཉེ༌རང༌ངི༌ ཕིའ༌ སང༌ཝའེ༌ ལོན༌ཞིག༌ ཡོད༌།”
གྱལ༌པོའེ༌ ཁོ༌རང༌ངི༌ ཞབ༌ཤི༌གུན༌ལ༌ བཀའ༌ ཏངས༌ཏེ༌ ཟེརས༌, "ཕི༌ལོག༌ག༌ སོང༌" ཡང༌ ཁོང༌གུན༌ སོང༌།
20 ཏེ༌ནེ༌ ཡར༌ ཏུས༌སི༌ ཁར༌རི༌ ཁེ༌ཐོག༌གི༌ ནང༌ང༌ གྱལ༌པོ༌ ཨེག༌ལོན༌ ཅིག༌པོ༌ ཡོད༌ས༌ ཨི༌ཧུད༌ ཁོའེ༌ ཉེ༌མོའ༌ སོང༌ཏེ༌ “ངའ༌ ཉེ༌རང༌ངི༌ ཕིའ༌ དཀོན༌མཆོག༌གི༌ ཆོགས༌ནེ༌ ལོན༌ཞིག༌ ཡོད༌” ཟེར༌ར༌ཅིག༌ གྱལ༌པོ༌ ཁོ༌རང༌ངི༌ ཁྲིས༌སི༌ ཀ༌ནེ༌ ལངས༌།
21 ཏེན༌ན༌མལ༌ལ༌ ཨི༌ཧུད༌དི༌ ལག༌པ༌ ཡོ༌མ༌ ཉམ༌པོ༌ ཁོ༌རང༌ངི༌ རྐང༌པ༌ ཡས༌པའེ༌ ཤལ༌དིག༌གི༌ཀ༌ ཏགས༌ཏེ༌ ཡོད༌ཁན༌ནི༌ ར༌འི༌བོ༌ ཕིངས༌ཏེ༌ གྱལ༌པོའེ༌ གྲོད༌པའེ༌ ནང༌ང༌ ཙུགས༌།
22 ལུང༌ ཐེས༌ཏེ༌ ར༌འི༌ གང༌པོ༌ གྱལ༌པོའེ༌ ཚིལ༌ལི༌ ནང༌ང༌ ནུབ༌ཏེ༌ ར༌འི༌ གོ༌ གྱབ༌ནེ༌ བིང༌, ཨི༌ཧུད༌དི༌ ར༌འི༌ མ༌ ཕིངས༌ ཡང༌ གྱལ༌པོའེ༌ གྱུ༌མ༌ ཆད༌ཏེ༌ ཏེ༌ ནང༌ང༌ ཡོད༌ཁན༌གུན༌ ཕི༌ལོག༌ག༌ བིང༌།
23 ཏེ༌ནེ༌ ཨི༌ཧུད༌དི༌ ཁེ༌ཐོག༌གི༌ ནང༌ངི༌ སྒོ༌གུན༌ སྲན༌ཏྲེ༌ ཅུགས༌ཏེ༌ ཁོ༌ ཡབས༌སི༌ ཀ༌ནེ༌ བིང༌ཏེ༌ ཤོར༌།
24 ཨི༌ཧུད༌ ཤོར༌ཏེ༌ སྟིང༌ནེ༌ གྱལ༌པོའེ༌ ཞབ༌ཤི༌གུན༌ ཡོངས༌ ཡང༌ ཁེ༌ཐོག༌གི༌ ནང༌ངི༌ སྒོ༌གུན༌ ཅུགས༌ཁན༌བོ༌ ཐོང༌ང༌ཅིག༌ ཁོང༌གུན༌ནི༌ གྱལ༌པོ༌ དེ༌ཆོད༌དི༌ ནང༌ང༌ ཡོད༌ཏེ༌ ཨིན༌ནོག༌ སམ༌།
25 ཁོང༌གུན༌ ངལ༌ངལ༌ སྲུངས༌ཏེ༌ དུགས༌ཏེའང༌ གྱལ༌པོ༌ བིངས༌ཏེ༌ མ༌ཡོངས༌། ཏེ༌ནེ༌ ཁོང༌གུན༌ནི༌ ཀུ༌ལིག༌ ཁྱོངས༌ཏེ༌ སྒོ༌གུན༌ ཕེའ༌ཅིག༌ ཁོང༌གུན༌ནི༌ ཁོ༌རང༌གུན༌ནི༌ སྤོན༌བོ༌ སའེ༌ཀ༌ གྱེལ༌ཏེ༌ ཤི༌ཁན༌བོ༌ ཐོང༌།
26 ཞབ༌ཤི༌གུན༌ སྲུངས༌ཏེ༌ ཡོད༌ ཟ༌ནེ༌ ཨི༌ཧུད༌ ཤོར༌ ཡང༌ རྡོའེ༌ སྐུན༌དྲ༌གུན༌ནི༌ དུན༌ནེ༌ སོང༌ཏེ༌ སེའི༌རཧ༌ ཆོགས༌ལ༌ ཤོར༌།
27 ཨི༌ཧུད༌ ཨེཕ༌ར༌ཡིམ༌མི༌ རི༌ཡུལ༌ སེའི༌རཧ༌ ལེབ༌བ༌ཅིག༌ ཁོའེ༌ ཏུང༌ ཕུས༌ ཡང༌ གོ༌ཁྲིད༌ ཅོས༌ཏེ༌ ཨིས༌ར༌ཨེལ༌པ༌གུན༌ ཐུར༌ལ༌ ཡོར༌དཱན༌ ལྩངས༌པོ༌ ཆོགས༌ལ༌ ཁྱེརས༌།
28 ཨི༌ཧུད༌དི༌ ཟེརས༌, “ངའེ༌ སྟིང༌རང༌ནེ༌ ཡོང༌ཤིག༌ ཅིའ༌ཟེར༌ན༌ ཡ༌ཝའེ༌ ང༌དང༌ངི༌ གྲ༌འོ༌ མོ༌འབ༌པ༌གུན༌ ང༌དང༌ངི༌ ལག༌ག༌ སལ༌ལ༌ ཛད༌ཏེ༌ ཨིན༌ནོག༌།” ཏེ༌བོའེ༌ཕིའ༌ ཁོང༌གུན༌ ཁོའེ༌ སྟིང༌རང༌ནེ༌ སོང༌ ཡང༌ ཡོར༌དཱན༌ ལྩངས༌པོ༌ རྒལ༌ ཉན༌སའེ༌ ནས༌ས༌ ཏེལ༌མོ༌, མོ༌འབ༌བ༌ ཆ༌སའེ༌ ལམ༌གུན༌ ང༌ཡོག༌ག༌ ཁྱོངས༌ ཡང༌ མོ༌འབ༌པ༌ ཅིག༌གའང༌ ལྩངས༌པོ༌ གལ༌ཏེ༌ ཡོང༌ མ༌ ཅུགས༌།
29 ཏེ༌ ཞག༌ག༌ ཁོང༌གུན༌ནི༌ མོ༌འབ༌པ༌ མག༌མི༌ ཀྲག༌པོ༌ དང༌ ཤེད༌ཅན༌ སྟོང༌ རྕུ༌ ཟམ༌ཤིག༌ སདས༌, སུ༌ཅིག༌གའང༌ ཤོར༌ཏེ༌ ཆ༌ མ༌ཅུགས༌།
30 ཏེན༌ན༌ ཞག༌ག༌ ཨིས༌ར༌ཨེལ༌པ༌གུན༌ནི༌ མོ༌འབ༌ ང༌ཡོག༌ག༌ ཁྱོངས༌ ཡང༌ ཏེ༌ ནས༌སའེ༌ ནང༌ང༌ ལོ༌ 80 ཞི༌དེ༌ ལུས༌།
ཨིས༌ར༌ཨེལ༌པ༌གུན༌ ཐར༌ཅུག༌ཁན༌ ཤམ༌གར༌།
3:31
31 ཨི༌ཧུད༌དི༌ སྟིང༌ནེ༌ ཨ༌ནཐ༌ཐི༌ བུ༌ཚ༌ ཤམ༌གར༌རིའང༌ ཨིས༌ར༌ཨེལ༌པ༌གུན༌ ཐར༌ཅུགས༌། ཁོའེ༌ སེམས༌ཅན༌ལ༌ ལམ༌ སྟན༌ན༌ ཀོལ༌ཁན༌ནི༌ བེར༌ཀ༌ ཉམ༌པོ༌ ཕི༌ལིས༌ཏི༌པ༌ 600 སད༌ཏེ༌ ཨིན༌པིན༌།