4
ཨིས༌ར༌ཨེལ༌པ༌གུན༌ ཐར༌ཅུག༌ཁན༌ དྲེབ༌རཧ༌།
4:1-24
1 ཨི༌ཧུད༌ ཤི༌ཏེ༌ སྟིང༌ནེ༌ ཨིས༌ར༌ཨེལ༌པ༌གུན༌ནི༌ ཡང༌སྐྱར༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌།
2 ཏེ༌ནེ༌ ཡ༌ཝའེ༌ ཁོང༌གུན༌ ཀེ༌ནན༌པ༌ ཧ༌ཟོར༌རི༌ གྱལ༌པོ༌ ཡ༌བིན༌ནི༌ ལག༌ག༌ སྟདས༌། སི༌སེ༌ར༌ ཡ༌བིན༌ནི༌ མག༌མི༌ མག༌སྤོན༌ ཨིན༌པིན༌, ཁོ༌ ཧ༌རོ༌ཤེཐ༌ ཧག༌གོ༌ཡིམ༌མི༌ ནང༌ང༌ དུག༌གད༌པིན༌།
3 སི༌སེ༌རའེ༌ ལག༌ག༌ ལྕགས༌སི༌ རྟ༌རེལ༌ 900 ཡོད༌པིན༌ ཡང༌ ཁོའེ༌ ཨིས༌ར༌ཨེལ༌པ༌གུན༌ནི༌ཀ༌ ལོ༌ ཉི༌ཤུ༌ སྙིང༌རྗེ༌ མེད༌པ༌ ཝང༌སྲུལ༌པ༌ ཁོང༌གུན༌ནི༌ ཡ༌ཝ༌ དཀོན༌མཆོག༌ག༌ རོགས༌ ཛད༌ཅེས༌ལ༌ མོས༌ལམ༌ ཞུས༌།
4 ཏེ༌ཏུས༌ལ༌ ལཔ༌པི༌དོཐ༌དི༌ ན༌མ༌ དྲེབ༌རཧ༌ དཀོན༌མཆོག༌གི༌ ལོན༌ ཁྱོང༌ཁན༌ ལུང༌སྟོན༌མ༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ ཨིན༌པིན༌།
5 ཁོའེ༌ ཨེཕ༌ར༌ཡིམ༌མི༌ རི༌ཡུལ༌ ར༌མཧ༌ དང༌ བེ༌ཐེལ༌ལི༌ པར༌ལ༌ ཡོད༌ཁན༌ ཁ༌སོར༌རི༌ ལྕང༌མ༌ ཀ༌བོའ༌ དྲེབ༌རཧའེ༌ ལྕང༌མའང༌ ཟེར༌རད༌པིན༌ ཏེ༌བོའེ༌ ཡོག༌ག༌ དུགས༌ཏེ༌ ཨིས༌ར༌ཨེལ༌པ༌ ཛིང༌མོ༌ ཏངས༌ཏེ༌ ཁོའེ༌ཀ༌ ཡོང༌ཁན༌གུན༌ལ༌ ཐག༌ཅད༌ ཏང༌ངད༌པིན༌།
6 ཞག༌ཤིག༌ དྲེབ༌རཧའེ༌ ནཕ༌ཐལ༌ལིའི༌ ས༌ཀྱད༌ ཀེ༌དེཤ༌ཤི༌ ནང༌ང༌ དུག༌ཁན༌ ཨ༌བི༌ནོ༌འམ༌མི༌ བུ༌ཚ༌ བ༌རག༌ བོད༌ཏེ༌ ཁྱོངས༌ ཡང༌ ཁོའེ༌ ཟེརས༌, “ཨིས༌ར༌ཨེལ༌པ༌གུན༌ནི༌ དཀོན༌མཆོག༌ ཡ༌ཝའེ༌ ཁྱོ༌རང༌ང༌ བཀའ༌ སལས༌, ‘ནཕ༌ཐལ༌ལི༌ དང༌ ཟེ༌བུ༌ལོན༌ སྡེ༌ནེ༌ མག༌མི༌ སྟོང༌ རྕུ༌ ཁྲིད༌ཏེ༌ ཏྲ༌བོར༌རི༌ རི༌ཀ༌ སོང༌།
7 ངའེ༌ ཡ༌བིན༌ནི༌ མག༌སྤོན༌ སི༌སེ༌ར༌, རྟ༌རེལ༌ དང༌ མག༌མི༌ གུན༌ ཁྲིད༌ཏེ༌ ཀི༌ཤོན༌ནི༌ ལྩངས༌པོའེ༌ཀ༌ ཡོང༌ཅུག༌ཨིན༌ ཡང༌ ངའེ༌ ཁོང༌ ཚང༌མ༌ ཁྱོ༌རང༌ངི༌ ལག༌ག༌ ཏང༌ཨིན༌།’ ”
8 བ༌རག༌གི༌ དྲེབ༌རཧ༌ ཟེརས༌, “ཉེ༌རང༌ ང༌ ཉམ༌པོ༌ སྐྱོད༌ཏེ༌ མ༌ནེ༌ ངའ༌ མི༌ཆ༌།”
9 དྲེབ༌རཧའེ༌ ལན༌ཏངས༌, “ཏན༌ཏན༌ ང༌ ཁྱོ༌རང༌ ཉམ༌པོ༌ ཆེན༌ ཨིན༌ནའང༌ ཁྱོ༌རང༌ངི༌ ཏེ༌ཟུག༌ ཟེར༌ཏེ༌ ཡ༌ཝའེ༌ཀ༌ ཨིད༌ཤེས༌ མ༌ཅོས༌ པ༌སང༌ འི༌ གྱལ༌ཁའེ༌ རྩི༌ཝ༌ ཁྱོ༌རང༌ང༌ མི༌ཐོབ༌ ཅིའ༌ཟེར༌ན༌ ཡ༌ཝའེ༌ སི༌སེ༌ར༌ བུ༌མོ༌ ཞིག༌གི༌ ལག༌ག༌ སྟད༌ད༌ ཛད༌ཨིན༌།” ཏེ༌ནེ༌ དྲེབ༌རཧ༌ བ༌རག༌ ཉམ༌པོ༌ ཀེ༌དེཤ༌ལ༌ སོང༌།
10 ཀ༌དེཤ༌སི༌ ནང༌ང༌ བ༌རག༌གི༌ ཟེ༌བུ༌ལོན༌ དང༌ ནཕ༌ཐལ༌ལི༌ སྡེ༌གུན༌ བོད༌ཏེ༌ ཁྱོངས༌ ཡང༌ མག༌མི༌ སྟོང༌ རྕུ༌ ཁོ༌ ཉམ༌པོ༌ སོང༌། དྲེབ༌རཧའང༌ ཁོ༌ ཉམ༌པོ༌ ཡོད༌པིན༌།
11 ཏ༌ མོ༌ཟེས༌སི༌ ན༌མའེ༌ མིང༌བོ༌ ཧོ༌བབ༌བི༌ མིར༌གྱུད༌ ཀེན༌པ༌ ཧེ༌བེར༌ ཁོ༌རང༌ངི༌ མི༌སྡེ༌ ཕྲོ༌ནེ༌ བེ༌ཏེ༌ ཀེ༌དེཤ༌ཤི༌ ཉེ༌མོའ༌ ཟའ༌ནན༌ནིམ༌མི༌ ཨོག༌ ལྕང༌མའེ༌ དུན༌ལ༌ ཀུར༌ ཙུགས༌ཏེ༌ དུགས༌།
12 ཨ༌བི༌ནོ༌འམ༌མི༌ བུ༌ཚ༌ བ༌རག༌ རི༌ ཏྲ༌བོར༌ལ༌ ཆའ༌ཁན༌བོ༌ སི༌སེ༌རའ༌ ཚོར༌ར༌ཅིག༌,
13 ཁོའེ༌ ཁོ༌རང༌ངི༌ ལྕགས༌སི༌ རྟ༌རེལ༌ 900 དང༌ མག༌མི༌ ཚང༌མ༌ ཛོམ༌ཅུགས༌ཏེ༌ ཧ༌རོ༌ཤེཐ༌ ཧག༌གོ༌ཡིམ༌ ནེ༌ ཀི༌ཤོན༌ནི༌ ལྩངས༌པོ༌ ཆོགས༌ལ༌ སོང༌།
14 ཏེ༌ནེ༌ དྲེབ༌རཧའེ༌ བ༌རག༌ག༌ ཟེརས༌, “གྲལ༌གྲིག༌ ཅོས༌། དི༌རིང༌ འིན༌ན༌ ཞག༌ག༌, ཡ༌ཝའེ༌ ཁྱོ༌ཞ༌གུན༌ནི༌ ལག༌ག༌ སི༌སེ༌རའེ༌ མག༌མི༌ ཚང༌མ༌ སྟད༌ད༌ ཛད༌ཨིན༌ ཅིའ༌ཟེར༌ན༌ ཡ༌ཝ༌ སྔུན༌ལ༌ སྐྱོད༌ཏེ༌ ཁྱོ༌ཞའེ༌ ཕིའ༌ ལམ༌ གྲལ༌གྲིག༌ ཛད༌ཨིན༌།” ཏེ༌ནེ༌ བ༌རག༌ ཁོ༌རང༌ངི༌ མག༌མི༌ སྟོང༌ རྕུ༌ ཉམ༌པོ༌ ཏྲ༌བོར༌རི༌ ནེ༌ ཐུར༌ལ༌ མག༌ ཏང༌ང༌ སོང༌།
15 བ༌རག༌གི༌ སྤུང༌གོལ༌ ཅོའ༌ཅིག༌ ཡ༌ཝའེ༌ སི༌སེ༌ར༌, ཁོའེ༌ རྟ༌རེལ༌ སྲུལ༌ཁན༌ དང༌ མག༌མི༌ ཚང༌མའེ༌ ནང༌ང༌ ཐེ༌ཚོམས༌ དང༌ ཇིགས༌ནང༌ སྐྱེ༌ཅུག༌ག༌ ཛདས༌། སི༌སེ༌ར༌ ཁོ༌རང༌ངི༌ རྟ༌རེལ༌ལི༌ ནང༌ནེ༌ བབས༌ཏེ༌ ཤོར༌།
16 ཏེ༌ནེ༌ བ༌རག༌གི༌ གྲ༌འོའེ༌ རྟ༌རེལ༌གུན༌ དང༌ ཞན༌ མག༌མི༌གུན༌ལ༌ ཧ༌རོ༌ཤེཐ༌ ཧག༌གོ༌ཡིམ༌ ཚོག༌པ༌ ཏེད༌ཏེ༌ ཁྱེརས༌ ཡང༌ སི༌སེ༌རའེ༌ མག༌མི༌ ཚང༌མ༌ སདས༌, ཅིག༌གའང༌ སོན༌ཏེའ༌ མ༌བོརས༌།
17 སི༌སེ༌ར༌ ཀེན༌པ༌ ཧེ༌བེར༌རི༌ ན༌མ༌ ཡ༌འེལ༌ལི༌ ཀུར༌ ཡོད༌ས༌ ཤོར༌ཏེ༌ སོང༌ ཅིའ༌ཟེར༌ན༌ ཧ༌ཟོར༌རི༌ གྱལ༌པོ༌ ཡ༌བིན༌ ཉམ༌པོ༌ ཧེ༌བེར༌རི༌ ནང༌ཚངས༌སི༌ བྲེལ༌ ཉེ༌མོ༌ ཡོད༌པིན༌།
18 ཡ༌འེལ༌ སི༌སེ༌ར༌ ཐུག༌ག༌ལ༌ བིང༌ཏེ༌ ཁོའ༌ ཟེརས༌, “ཀུར༌རི༌ ནང༌ང༌ སྐྱོད༌ སྤོན༌བོ༌ལེ༌, ནང༌ཀུག༌ག༌ སྐྱོད༌, ཇིགས༌ས༌ མ༌ཛད༌།” ཏེ༌ནེ༌ ཁོ༌ ཀུར༌རི༌ ནང༌ང༌ ཡོངས༌ ཡང༌ བུ༌མོའེ༌ ཁོའེ༌ཀ༌ ཙ༌ཟར༌ཤིག༌ ཀབས༌།
19 སི༌སེ༌རའེ༌ ཟེརས༌, “ང༌ སྐོམས༌ས༌ རག༌, ཇུ༌ཇུ༌ ཐུང༌ཅེས༌ལ༌ ཆུ༌ཞིག༌ སལ༌།” ཏེ༌ནེ༌ བུ༌མོའེ༌ ཁོའ༌ འོ༌མ༌ གྱངས༌ཁན༌ནི༌ ཀོའེ༌ སྒི༌གུ༌ ཕེས༌ཏེ༌ འོ༌མ༌ ལུགས༌ ཡང༌ ཐུང༌ང༌ ཏངས༌ཏེ༌ སྟིང༌ནེ༌ ཡང༌སྐྱར༌ ཁོའ༌ ཙ༌ཟར༌ ཀབས༌།
20 ཁོའེ༌ ཏེ༌ བུ༌མོའ༌ ཟེརས༌, “ཀུར༌རི༌ སྒོའེ༌ དུན༌ལ༌ ལངས༌ཏེ༌ དུག༌, ཀལ༌ཏེས༌ སུ༌ཞིག༌ ཡོངས༌ཏེ༌ ཁྱོ༌རང༌ང༌ ‘ཀུར༌རི༌ ནང༌ང༌ སུ༌ ཡོད༌?’ ཟེར༌ཏེ༌ ཏྲི༌ན༌ ‘སུའང༌ མེད༌’ ཟེར༌།”
21 སི༌སེ༌ར༌ མ༌སྲན༌ཏྲེ༌ ངལ༌ཏེ༌ ཡོད༌ པ༌སང༌ ཉིད༌ལ༌ སོང༌, ཏེན༌ན༌ ཏུས༌ ཀུར༌རི༌ པུར༌ཆ༌ དང༌ ཐོའ༌ ཁུར༌ཏེ༌ ཡ༌འེལ༌ ཀུ༌ལེའ༌ སོང༌ཏེ༌ ཁོའེ༌ ཐོད༌པའེ༌ ལྡོ༌ནེ༌ པུར༌ཆ༌ གྱབས༌པ༌ འ༌ངོ༌ ཆོགས༌ལ༌ བིང༌ཏེ༌ སའེ༌ ནང༌ང༌ ཟུག༌ ཡང༌ ཁོ༌ ཤི༌།
22 བ༌རག༌ སི༌སེ༌ར༌ ཙལ༌ཨིན༌ ཡོང༌ང༌ཅིག༌ ཡ༌འེལ༌ ཁོའ༌ ཐུག༌ག༌ལ༌ བིང༌ཏེ༌ ཟེརས༌, “སྐྱོད༌ ངའེ༌ ཉེ༌རང༌ངི༌ ཙལ༌ཁན༌ནི༌ མི༌བོ༌ སྟན༌ཨིན༌།” ཏེ༌ནེ༌ ཁོ༌ བུ༌མོ༌ ཉམ༌པོ༌ ཀུར༌རི༌ ནང༌ང༌ སོང༌ ཡང༌ སི༌སེ༌རའེ༌ ཐོད༌པའེ༌ ལྡོ༌ནེ༌ ཀུར༌རི༌ པུར༌ཆ༌ ཟུགས༌ཏེ༌ ཁོ༌ ཤི༌ཁན༌བོ༌ ཐོང༌།
23 ཏེ༌ ཞག༌ག༌ ཨིས༌ར༌ཨེལ༌པ༌གུན༌ནི༌ དུན༌ལ༌ དཀོན༌མཆོག༌གི༌ ཀེ༌ནན༌པ༌ གྱལ༌པོ༌ ཡ༌བིན༌ལ༌ ཕམ༌ཀལ༌ལ༌ ཛདས༌།
24 ཡང༌ གྱལ༌པོ༌ ཡ༌བིན༌ནི༌ གྱབ༌གལ༌ལ༌ ཨིས༌ར༌ཨེལ༌པ༌གུན༌ ཤེད༌ཅན༌ གྱུར༌ཨིན༌ སོང༌ ནམ༌ཚག༌པ༌ ཁོང༌གུན༌ནི༌ གྱལ༌པོ༌ དང༌ ཁོའེ༌ མི༌ ཚང༌མ༌ སད༌ཏེ༌ མེད༌ཁན༌ མ༌ཅོས༌།