5
དྲེབ༌རཧའེ༌ སྟོད༌པའེ༌ ལུ༌།
5:1-31
1 ཏེན༌ན༌ ཞག༌ག༌ དྲེབ༌རཧ༌ དང༌ ཨ༌བི༌ནོ༌འམ༌མི༌ བུ༌ཚ༌ བ༌རག༌གི༌ འི༌ སྟོད༌པའེ༌ ལུ༌ ཏངས༌,
2 “ཡ༌ཝའ༌ སྟོད༌པ༌ ཕུལ༌ལད༌།
ཨིས༌ར༌ཨེལ༌པའེ༌ གོ༌ཁྲིད༌གུན༌ནི༌ ཁག༌ ཀལ༌ཁན༌བོ༌ ཅོའ༌ཅིག༌
མི༌གུན༌ ཐད༌པོ༌ ཉམ༌པོ༌ ཁོང༌གུན༌ནི༌ གྱབ༌ནེ༌ གྲུལས༌,
3 གྱལ༌པོ༌གུན༌ ཉོན༌ཤིག༌, ཝང༌སྲུལ༌ཁན༌གུན༌ ནང༌སྟག༌ ཏོང༌ཤིག༌,
ངའེ༌ ཡ༌ཝའེ༌ ཕིའ༌ ལུ༌ ཏང༌ངད༌, ངའེ༌ ཡ༌ཝའ༌ ལུ༌ཡངས༌ ཕུལ༌ལད༌,
ཁོང༌ ཨིས༌ར༌ཨེལ༌པ༌གུན༌ནི༌ དཀོན༌མཆོག༌ ཞུགས༌ཏེ༌ ཨིན༌།
4 ཡ༌ཝ༌ལེ༌ ཉེ༌རང༌ སེ༌འིར༌ནེ༌ བིངས༌ཏེ༌
ཨི༌དོམ༌མི༌ ཡུལ༌ཇོངས༌ རྒལ༌ཏེ༌ སྐྱོད༌ད༌ཅིག༌
ཇིག༌རྟེན༌ དར༌ ཡང༌ ནམ༌ཁའེ༌ ཆུ༌ ལུགས༌
སྲིན༌གུན༌ནི༌ ནང༌ནེ༌ ཆར༌པ༌ བབས༌།
5 རི༌ སི༌ནཱའི༌ ཙོགས༌ལ༌,
ཡ༌ཝ༌ ཉེ༌རང༌ངི༌ རི༌གུན༌ སྲུག༌ག༌ ཛདས༌།
ང༌ཞའ༌ ཨིས༌ར༌ཨེལ༌པའེ༌ ཡ༌ཝ༌ དཀོན༌མཆོག༌,
ཉེ༌རང༌ངི༌ རི༌གུན༌ སྐུལ༌ལ༌ ཛདས༌།
6 ཨ༌ནཐ༌ཐི༌ བུ༌ཚ༌ ཤམ༌གར༌ དང༌ ཡ༌འེལ༌ གུན༌ནི༌ ཝང༌སྲུལ༌ལི༌ ཏུས༌,
མི༌གུན༌ དང༌ ཚོང༌པ༌གུན༌ གྱ༌ལམ༌གུན༌ནེ༌ གྲུལ༌ཅེས༌ ཇིགས༌ནང༌ཅན༌ ཡོད༌པ༌,
ཁོང༌གུན༌ གྱབ༌ལམ༌ ཀགས༌པོ༌གུན༌ནེ༌ གྲུལ༌གོས༌།
7 ཨིས༌ར༌ཨེལ༌པ༌གུན༌ནི༌ གྲོང༌སེབ༌བི༌ ནང༌ང༌ དུག༌ཅེས༌ ཕངས༌།
ནམ༌ ཚག༌པ༌ ང༌, དྲེབ༌རཧ༌ ཁོང༌གུན༌ནི༌ ཨ༌མ༌ ཙོགས༌ལ༌
ཨིས༌ར༌ཨེལ༌པ༌གུན༌ནི༌ གོ༌ཁྲིད༌ གྱུར༌ཏེ༌ ཁོང༌གུན༌ སྐྱོབ༌ མ༌སྐྱོབས༌།
8 ཨིས༌ར༌ཨེལ༌པ༌གུན༌ནི༌ སོ༌མ༌ ལྷ༌ལྷ༌མོ༌གུན༌ ལྡམ༌མ༌ཅིག༌,
གྱལ༌སའེ༌ གྱས༌སྒོ༌ གུན༌ནི༌ཀ༌ མག༌ ལེབ༌,
ཡང༌ ཨིས༌ར༌ཨེལ༌ལི༌ མག༌མི༌ སྟོང༌ ཞིབ༌ཅུའི༌ ལག༌ག༌,
དུང༌ ཡ༌ ཀྲང༌ང༌ཀབ༌ཅེས༌ མག༌ཆ༌ ཅིག༌གའང༌ མེད༌པིན༌།
9 ངའེ༌ སྙིང༌ ཨིས༌ར༌ཨེལ༌ལི༌ མག༌སྤོན༌གུན༌ ཉམ༌པོ༌ ཡོད༌
ཀ༌གུན༌ ཐད༌པོ༌ ཉམ༌པོ༌ མག༌གི༌ ནང༌ང༌ ནོལ༌ལ༌ ཡོངས༌།
ཡ༌ཝའ༌ སྟོད༌པ༌ ཕུལ༌།
10 བུང༌བུ༌ ཀར༌པོའེ༌ཀ༌ གྱབ༌ཆ༌ ཀྲག༌པོ༌ སྟད༌ཏེ༌ ཞོན༌ཁན༌གུན༌,
ཡང༌ གྱ༌ལམ༌ནེ༌ གྲུལ༌ཁན༌གུན༌ ནང༌སྟག༌ ཏངས༌ཏེ༌
11 གྲོང༌ཁྱེར༌རི༌ ཆུ༌དོང༌ ཡོད༌ས༌ ཛོམས༌ཏེ༌ ལུ༌ ཏང༌ཁན༌གུན༌ལ༌ ཉོན༌ཤིག༌།
ཁོང༌གུན༌ནི༌ ཡ༌ཝའེ༌ ཀྲང༌པོ༌ ཆག༌ལས༌གུན༌ ཤད༌ཏེ༌ ཨིན༌ནོག༌
ནམ༌ ཁོང༌ངི༌ ཨིས༌ར༌ཨེལ༌པ༌ ནོལ༌ཁན༌ ཀྲག༌པོ༌གུན༌ལ༌ གྱལ༌ཁ༌ སལས༌།
ཏེ༌ནེ༌ ཡ༌ཝའེ༌ མི༌གུན༌ ཐུར༌ལ༌ གྱལ༌སའེ༌ གྱས༌སྒོ༌གུན༌ ཚོག༌པ༌ སོང༌།
12 ལོངས༌, དྲེབ༌རཧ༌, ལོངས༌; ལངས༌ཏེ༌ ལུ༌ ཏོང༌།
ལོངས༌ བ༌རག༌, ཨ༌བི༌ནོ༌འམ༌མི༌ བུ༌ཚ༌ ལངས༌ཏེ༌ གྲ༌འོ༌ ཚང༌མ༌ ཟུམས༌ཏེ༌ ཁྱོང༌།
13 ཏེ༌ནེ༌ མག༌གི༌ ནང༌ང༌ སོན༌ཏེའ༌ ལུས༌ཁན༌གུན༌ ཐུར༌ལ༌
ཁོང༌གུན༌ སྐྱོབ༌ཁན༌ནི༌ གོ༌ཁྲིད༌གུན༌ ཉམ༌པོ༌ ཡོངས༌།
ཡ༌ཝའེ༌ མི༌གུན༌ ཁོང༌ངི༌ ཕིའ༌ ཀྲག༌པོ༌ ནོལ༌ཁན༌གུན༌ནི༌ གྱབ༌གལ༌ལ༌ ནོལ༌ལ༌ ཡོངས༌།
14 ཏུས༌ཤིག༌ག༌ ཨ༌མ༌ལིཀ༌པ༌གུན༌ནི༌ ཨིན༌ཁན༌ ས༌ཀྱད༌ ཨེཕ༌ར༌ཡིམ༌ནེ༌ ཁ༌ཅིག༌ ཡོངས༌
ཁོང༌གུན༌ནི༌ སྟིང༌རང༌ནེ༌ བེན༌ཡཱ༌མིན༌པ༌གུན༌ནའང༌ ཡོངས༌།
མ༌ཀིར༌རི༌ནེ༌ མག༌སྤོན༌གུན༌ ཡོངས༌།
ཟེ༌བུ༌ལོན༌ནི༌ སྡེ༌ནེ༌ ཆག༌བེར༌ ཡོད༌ཁན༌ མག༌སྤོན༌གུན༌ ཡོངས༌།
15 ཨིས༌ས༌ཁར༌ སྡེའེ༌ འུ༌སྐྱོང༌གུན༌, ང༌ དང༌ བ༌རག༌ ཉམ༌པོ༌ ཡོད༌པིན༌།
ཁོང༌གུན༌ བ༌རག༌གི༌ གྱབ༌ནེ༌ ལུང༌པའེ༌ ནང༌ང༌ གྱུགས༌ཏེ༌ སོང༌,
ཨིན༌ནའང༌ རུ༌བེན༌ནི༌ མི༌སྡེ༌ ང༌ཞའ༌ ཉམ༌པོ༌ ཡོང༌ཅེས༌ལ༌ ཐེ༌ཚོམས༌ ཅོས༌།
16 ཁྱོ༌ཞའ༌ ལུག༌ར༌ ཡོད༌ས༌ ཅི༌ཕིའ༌ དུགས༌པིན༌?
ཅི༌ ལུག༌རྫི༌གུན༌ནི༌ ལུག༌གུན༌ ཀག༌ག༌ལ༌ བོད༌ཁན༌བོ༌ ཉན༌ན༌ དུགས༌པིན༌ན༌?
རུ༌བེན༌ནི༌ མི༌སྡེ༌ ང༌ཞའ༌ ཉམ༌པོ༌ ཡོང༌ཅེས༌ལ༌ ཐེ༌ཚོམས༌ ཅོས༌།
17 གི༌ལེད༌པ༌གུན༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ དུགས༌།
ཡང༌ གྲེན༌ནི༌ མི༌སྡེ༌ ཁོ༌རང༌གུན༌ནི༌ གྲུ༌ཟིང༌གུན༌ནི༌ དུན༌ལ༌ དུགས༌།
ཨ༌ཤེར༌ མི༌སྡེ༌ ཚོའེ༌ ཐའ༌མ༌ ཡོད༌ཁན༌ ཁོ༌རང༌གུན༌ནི༌ ཁང༌པའེ༌ ནང༌ནེ༌ མ༌བིངས༌།
18 ཨིན༌ནའང༌ ཟེ༌བུ༌ལོན༌ མི༌སྡེ༌ ཁོང༌གུན༌ནི༌ སྲོག༌ ཇིགས༌པའེ༌ ནང༌ང༌ ཏངས༌ཏེ༌ ནོལ༌ལ༌ ཡོངས༌།
ནཕ༌ཐལ༌ལི༌ མི༌སྡེའང༌ ཏེན༌ན༌ ཙོགས༌ ཅོས༌།
19 ཏའ༌ནག༌གི༌ ནང༌ང༌ མེ༌གིད༌དོའེ༌ ཆུ༌མིག༌གི༌ ཉེ༌མོའ༌
ཀེ༌ནན༌པ༌ གྱལ༌པོ༌གུན༌ མག༌ཏང༌ང༌ ཡོངས༌
ཨིན༌ནའང༌ ཁོང༌གུན༌ལ༌ མུལ༌ ཡ༌ ནོར༌ ཅོམས༌ཁན༌ ཅའང༌ ཁྱེར༌ མ༌ཉན༌།
20 ནམ༌ཁའེ༌ སྐར༌མ༌གུན༌ནི༌ ནོལས༌,
རང༌ ལམ༌མི༌ ནང༌ང༌ གྲུལ༌ཁན༌ སྐར༌མ༌གུན༌ནི༌ སི༌སེ༌རའེ༌ གྱབ༌གལ༌ལ༌ ནོལས༌།
21 ཀི༌ཤོན༌ནི༌ ལྩངས༌པོའེ༌ ཁོང༌གུན༌ ཁུར༌ཏེ༌ ཁྱེརས༌,
སྔུན༌མའེ༌ ཏུས༌སི༌ ཁྱུད༌ཅན༌ ལྩངས༌པོ༌ ཀི༌ཤོན༌།
ནོལ༌ ངའེ༌ སེམས༌, སེམས༌ཤུགས༌ ཉམ༌པོ༌ ནོལ༌།
22 ཏེ༌ནེ༌ སི༌སེ༌རའེ༌ རྟ༌གུན༌ནི༌ རྐང༌པའེ༌ སྐད༌དི༌ ས༌ཀྱད༌ སྐུལས༌།
རྟ༌ ཀྲག༌པོའེ༌ མག༌མི༌གུན༌ གྱུགས༌ཏེ༌ ཡོངས༌།
23 ཡ༌ཝའེ༌ ཕོ༌ཉའེ༌ མོལས༌, ‘མེ༌རོཟ༌པ༌གུན༌ལ༌ ངན༌ ཕོག༌ཤིག༌།
ཁོང༌གུན༌ལ༌ ངན༌ རྩོག༌པོ༌ ཕོག༌ཤིག༌
ཅིའ༌ཟེར༌ན༌ ཁོང༌གུན༌ ཡ༌ཝའ༌ རོགས༌ ཅོའ༌ལ༌ མ༌ཡོངས༌
ཀེ༌ནན༌པ༌ མག༌མི༌ ཀྲག༌པོ༌གུན༌ལ༌ ནོལ༌ལ༌ མ༌ཡོངས༌།’
24 ཚང༌མའེ༌ སང༌ ཅིན༌ལབས༌ཅན༌ བུ༌མོ༌,
ཀེ༌ནན༌པ༌ ཧེ༌བེར༌རི༌ ན༌མ༌ ཡ༌འེལ༌ ཨིན༌།
ཀུར༌རི༌ ནང༌ང༌ དུག༌ཁན༌ནི༌ བུ༌མོ༌གུན༌ནི༌ ཕྲོ༌ནེ༌
ཁོ༌ ཚང༌མའེ༌ སང༌ ཅིན༌ལབས༌ཅན༌ ཨིན༌།
25 སི༌སེ༌རའེ༌ ཆུ༌ ཏོང༌ ཟེརས༌ ཨིན༌ནའང༌ ཁོའེ༌ འོ༌མ༌ ཏངས༌,
སྐུ༌ཁྲགས༌གུན༌ལ༌ ཏང༌ཅེས༌སི༌ ཕོ༌ཀྲོའེ༌ ནང༌ང༌ བུ༌མོའེ༌ ཁོའ༌ ཞོ༌ ཁྱོངས༌།
26 བུ༌མོའེ༌ ལག༌པ༌ ཡོ༌མའེ༌ ནང༌ང༌ ཀུར༌རི༌ པུར༌ཆ༌
ཡང༌ ཡས༌པའེ༌ ནང༌ང༌ ལག༌ཤེས༌པའེ༌ ཐོའ༌ ཁུརས༌།
ཁོའེ༌ སི༌སེ༌རའེ༌ གོ༌ ཅགས༌,
ཁོའེ༌ སི༌སེ༌རའེ༌ ཐོད༌པའེ༌ ལྡོ༌ནེ༌ པུར༌ཆ༌ གྱབས༌ཏེ༌ ཁོ༌ སདས༌།
27 སི༌སེ༌ར༌ ཏེ༌ བུ༌མོའེ༌ རྐང༌པའེ༌ཀ༌ བུད༌,
ཁོའེ༌ རྐང༌པའེ༌ཀ༌ གྱེལ༌ཏེ༌ ཤི༌,
གྱེལ༌སའེ༌ ཏེན༌ན༌ ནས༌སའེ༌ཀ༌ ཁོ༌ ཤི༌།
28 སི༌སེ༌རའེ༌ ཨ༌མའེ༌ ཀར༌ཁུང༌ནེ༌ ལྟེན༌
ཁོ༌ ལོགས༌ཏེ༌ ཡོང༌ཅེས༌ལ༌ སྲུངས༌ཏེ༌ ཟེརས༌,
‘ཁོའེ༌ རྟ༌རེལ༌ ལེབ༌ཅེས༌ལ༌ འི༌ཟམ༌ ཏུས༌རིང༌མོ༌ ཅིའ༌ གོར༌?
ཁོའེ༌ རྟ༌རེལ༌ལི༌ སྐད༌ ང༌ ཅིའ༌ ཚོར༌ར༌ མ༌ནོག༌?’
29 ཁོའེ༌ ཞབ༌ཤི༌ བུ༌མོ༌གུན༌ནི༌ ཕྲོ༌ནེ༌ ཤེས༌རབས༌ཅན༌བོའེ༌ ལན༌ཏངས༌,
ཏན༌ཏན༌ ཁོའེ༌ འི༌ སྤེ༌ར༌གུན༌ ལྡབས༌ཏེ༌ ཁོ༌རང༌ང༌ སེམས༌སོ༌ ཏང༌དུག༌།
30 ‘ཁོང༌གུན༌ནི༌ ཅོམས༌ཁན༌ནི༌ ནོར༌གུན༌ བགོ༌ཨིན༌ ཡོད༌གྲོ༌,
མག༌མི༌ རེ༌རེའ༌ བུ༌མོ༌ ཅིག༌ ཡ༌ ཉིས༌།
སི༌སེ༌རའེ༌ ཕིའ༌ ཚོན༌དོག༌ཅན༌ དང༌ ཚེམ༌སྲུལ༌ ཏང༌ཁན༌ནི༌ ཀོས༌ལག༌གུན༌,
ངའེ༌ ཕིའང༌ ཚེམ༌སྲུལ༌ ཏང༌ཁན༌ནི༌ ཀོས༌ ཁྱོང༌ཨིན༌།
ཏེ༌ ཚང༌མ༌ ཅོམས༌ཁན༌ནི༌ ནོར༌གུན༌ ཨིན༌ནོག༌།
31 ཡ༌ཝ༌ལེ༌, ཉེ༌རང༌ངི༌ གྲ༌འོ༌ ཚང༌མ༌ སི༌སེ༌ར༌ ཙོགས༌ལ༌ ཤི༌ཤིག༌།
ཨིན༌ནའང༌ ཉེ༌རང༌ང༌ ཅམས༌པ༌ ཅོ༌ཁན༌གུན༌ ཤེད༌ཅན༌ གྱུར༌ཏེ༌
ཉི༌མ༌ ཙོགས༌ལ༌ ཤར༌ཤིག༌།”
ཏེ༌ནེ༌ ཏེ༌ ནས༌སའེ༌ ནང༌ང༌ ལོ༌ 40 ཞི༌དེ༌ ལུས༌།