8
གི༌དི༌འོན༌ནི༌ ཟེ༌བཧ༌ དང༌ ཟལ༌མུན༌ན༌ ཉིས༌ཀོ༌ སདས༌།
8:1-27
1 ཏེ༌ནེ༌ ཨེཕ༌ར༌ཡིམ༌པ༌གུན༌ནི༌ གི༌དི༌འོན༌ལ༌ ཏྲིས༌, “ཉེ༌རང༌ངི༌ ང༌ཞའ༌ ཉམ༌པོ༌ ཏེ༌ཟུག༌ ཅིའ༌ ཅོས༌པིན༌? མི༌དིའན༌པ༌གུན༌ལ༌ ནོལ༌ལ༌ ཆ༌ ཟ༌ནེ༌ ཉེ༌རང༌ངི༌ ང༌ཞ༌གུན༌ལ༌ ཅིའ༌ མ༌བོད༌པིན༌?” ཁོང༌གུན༌ནི༌ སྲོ༌ ཉམ༌པོ༌ གི༌དི༌འོན༌ལ༌ སྐྱོན༌རྗོད༌ སྲན༌ཏྲེ༌ ཅོས༌།
2 ཨིན༌ནའང༌ གི༌དི༌འོན༌ནི༌ ལན༌ཏངས༌, “ཁྱོ༌ཞ༌གུན༌ནི༌ ཅོ༌ཁན༌བོ༌ ཉམ༌པོ༌ ལྡུར༌ན༌ ངའེ༌ ཅའང༌ མ༌ཅོའ༌ ཨིན༌ནོག༌། ང༌ཞའ༌ ཨ༌བིའེ༌ཟེར༌པ༌གུན༌ནི༌ སྟོན༌ཐོག༌ གང༌པོ༌ རྔ༌ཁན༌བོའེ༌ སང༌ ཁྱོ༌ཞའ༌ ཨེཕ༌ར༌ཡིམ༌པ༌གུན༌ནི༌ ལུས༌ཁན༌ནི༌ སྟོན༌ཐོག༌ ལྡུམ༌ཁན༌བོ༌ མང༌ང༌ རིན༌ཅན༌ མ༌ནོག༌ག༌?
3 དཀོན༌མཆོག༌གི༌ ཨོ༌རེབ༌ དང༌ ཟེའེབ༌ མི༌དིའན༌པ༌ མག༌སྤོན༌གུན༌ ཁྱོ༌ཞའེ༌ ལག༌ག༌ སལས༌། ཁྱོ༌ཞ༌གུན༌ནི༌ ཅོ༌ཁན༌བོ༌ ཉམ༌པོ༌ ལྡུར༌ན༌, ངའེ༌ ཅའང༌ མ༌ཅོའ༌ ཨིན༌ནོག༌།” ཏེ༌བོ༌ ཚོར༌ར༌ཅིག༌ ཨེཕ༌ར༌ཡིམ༌པ༌གུན༌ནི༌ སྲོ༌ ཞུ༌ཏེ༌ མེད༌ཁན༌ སོང༌།
4 གི༌དི༌འོན༌ དང༌ ཁོའེ༌ མི༌ 300 ངལ༌ཏེ༌ ཡོད༌ནའང༌ ཡོར༌དཱན༌ ལྩངས༌པོ༌ རྒལ༌ཏེ༌ གྲ༌འོ༌གུན༌ལ༌ ཏེད༌ཏེ༌ ཁྱེརས༌།
5 ཁོང༌གུན༌ སུ༌ཀོད༌ལ༌ ལེབ༌བ༌ཅིག༌ གི༌དི༌འོན༌ནི༌ གྲོང༌ཁྱེར༌པ༌གུན༌ལ༌ ཟེརས༌, “ཇུ༌ཇུ༌ ངའེ༌ མི༌གུན༌ལ༌ ཟའ༌ཅེས༌ལ༌ ཟན༌ སལ༌, ཁོང༌གུན༌ མ༌སྲན༌ཏྲེ༌ ངལ༌ཏེ༌ ཡོད༌། ང༌ཞའེ༌ མི༌དིའན༌པའེ༌ གྱལ༌པོ༌ ཟེ༌བཧ༌ དང༌ ཟལ༌མུན༌ན༌ གུན༌ལ༌ ཏེད༌ཏེ༌ ཁྱེར༌ཅེས༌ཨིན༌།”
6 ཨིན༌ནའང༌ སུ༌ཀོད༌དི༌ སྤོན༌བོ༌གུན༌ནི༌ ལན༌ཏངས༌, “ང༌ཞའེ༌ ཁྱོ༌རང༌ངི༌ མག༌མི༌གུན༌ལ༌ ཟའ༌ཅེས༌ལ༌ ཟན༌ ཏང༌ཅེས༌, ཅི༌ ཁྱོ༌རང༌ངི༌ ཟེ༌བཧ༌ དང༌ ཟལ༌མུན༌ན༌ ཟུམས༌ཏེ༌ ཁྱོངས༌པིན༌ན༌?”
7 ཏེ༌ནེ༌ གི༌དི༌འོན༌ནི༌ ཟེརས༌, “ཡ༌ཝའེ༌ ང༌ཞའ༌ ཟེ༌བཧ༌ དང༌ ཟལ༌མུན༌ནའེ༌ཀ༌ གྱལ༌ཁ༌ སལ༌ལ༌ཅིག༌ ང༌ཞའ༌ ལོགས༌ཏེ༌ ཡོང༌ཏེ༌ ཁྱོ༌ཞའ༌ ཤ༌རྗེན༌ ཅོས༌ཏེ༌ ཐང༌ངི༌ ཚེར༌མང༌ དང༌ སེ༌ཡའ༌ མེན༌ཏོག༌གི༌ སྐང༌ ཉམ༌པོ༌ ཆད༌པ༌ ཏང༌ཨིན༌།”
8 ཏེ༌ཀ༌ནེ༌ གི༌དི༌འོན༌ ཀེན༌ལ༌ པེ༌ནིལ༌ལ༌ སོང༌ ཡང༌ ཁོང༌གུན༌ལའང༌ ཟའ༌ཅེས༌ལ༌ ཟན༌ ཏོང༌ ཟེརས༌། ཁོང༌གུན༌ནིའང༌ སུ༌ཀོད༌པ༌གུན༌ ཙོགས༌ ལན༌ཏངས༌།
9 ཁོའེ༌ པེ༌ནིལ༌པ༌གུན༌ལ༌ ཟེརས༌, “གྱལ༌ཁ༌ ཐོབ༌ཏེ༌ སྟིང༌ནེ༌ ང༌ ཡོངས༌ཏེ༌ འི༌ པི༌འུ༌ ཁྲེས༌ཏོར༌ ཅོ༌ཨིན༌།”
10 ཏ༌ ཤར༌ ཆོགས༌སི༌ མག༌མི༌ 1,20,000 ཤི༌, ཨིན༌ནའང༌ མ༌ཤིའ༌ ལུས༌ཁན༌ 15,000 ཀཪ༌ཀོར༌ གྲོང༌ཁྱེར༌རི༌ ནང༌ང༌ ཟེ༌བཧ༌ དང༌ ཟལ༌མུན༌ན༌ ཉམ༌པོ༌ ཡོད༌པིན༌།
11 ནོ༌བཧ༌ དང༌ ཡོག༌བེ༌ཧཧ༌ གྲོང༌སེབ༌གུན༌ནི༌ ཤར༌ཆོགས༌, རེ༌བོ༌ ཁུར༌ཁན༌གུན༌ གྲུལ༌སའེ༌ ལམ༌ནེ༌ གི༌དི༌འོན༌ སོང༌ ཡང༌ ཧུན༌མེད༌ལ༌ མི༌དིའན༌པའེ༌ མག༌མི༌གུན༌ནི༌ཀ༌ སྤུང༌གོལ༌ ཅོས༌ཏེ༌ ཁོང༌གུན༌ ཧ༌ལས༌ཤུགས༌།
12 མི༌དིའན༌པའེ༌ གྱལ༌པོ༌ ཟེ༌བཧ༌ དང༌ ཟལ༌མུན༌ན༌ གུན༌ ཤོར༌ཏེ༌ སོང༌ ཨིན༌ནའང༌ གི༌དི༌འོན༌ནི༌ ཁོང༌གུན༌ལ༌ ཏེད༌ཏེ༌ ཁྱེརས༌ ཡང༌ ཁོང༌གུན༌ ཟུམས༌། ཏེ༌ནེ༌ མག༌མི༌ ཚང༌མའེ༌ ནང༌ང༌ ཇིགས༌ནང༌ སྐྱེས༌ཏེ༌ ཧན༌གྲང༌ སོང༌།
13 གི༌དི༌འོན༌ ཧེ༌རེས༌སི༌ ལ༌ གྱུད༌ཏེ༌ ལོགས༌ཏེ༌ ཡོངས༌།
14 ཏེ༌རུ༌ ཁོའེ༌ སུ༌ཀོད༌པ༌ ཞུ༌ནུ༌ ཞིག༌ ཟུམས༌ཏེ༌ གྲོང༌ཁྱེར༌རི༌ སྤོན༌བོ༌ དང༌ འུ༌སྐྱོང༌ 77 ནི༌ མིང༌གུན༌ བྲི༌ཅུགས༌།
15 ཏེ༌ནེ༌ གི༌དི༌འོན༌ སོང༌ཏེ༌ སུ༌ཀོད༌པ༌གུན༌ལ༌ ཟེརས༌, “ཟེ༌བཧ༌ དང༌ ཟལ༌མུན༌ན༌ འི༌ཀ༌ནེ༌, ངའ༌ མ༌བེབས༌ ཅོས༌ཏེ༌ ཁྱོ༌རང༌གུན༌ནི༌ ཟེརས༌, ‘ང༌ཞའེ༌ ཁྱོ༌རང༌ངི༌ ངལ༌ཏེ༌ ཡོད༌ཁན༌ མག༌མི༌གུན༌ལ༌ ཟའ༌ཅེས༌ ཅིའ༌ ཏང༌ཨིན༌, ཅི༌ ཁྱོ༌རང༌ངི༌ ཟེ༌བཧ༌ དང༌ ཟལ༌མུན༌ན༌ ཟུམས༌ཏེ༌ ཁྱོངས༌པིན༌ན༌?’ ”
16 གི༌དི༌འོན༌ནི༌ གྲོང༌ཁྱེར༌རི༌ འུ༌སྐྱོང༌ དང༌ སྤོན༌བོ༌ གུན༌ ཁྱེརས༌ ཡང༌ ཁོང༌གུན༌ལ༌ ཐང༌སྟོང༌ངི༌ ཚེར༌མངས༌ དང༌ སེ༌ཡའ༌ མེན༌ཏོག༌གི༌ སྐང༌ ཉམ༌པོ༌ ཆད༌པ༌ ཏངས༌།
17 ཁོའེ༌ པེ༌ནིལ༌ལི༌ པི༌འུའང༌ ཤིགས༌ཏེ༌ གྲོང༌ཁྱེར༌རི༌ ནང༌ང༌ དུག༌ཁན༌ནི༌ བུ༌ཚ༌ ཚང༌མ༌ སདས༌།
18 ཏེ༌ནེ༌ གི༌དི༌འོན༌ནི༌ ཟེ༌བཧ༌ དང༌ ཟལ༌མུན༌ན༌ ཏྲིས༌, “ཏྲ༌བོར༌རི༌ ནང༌ང༌ ཀ༌ཟུག༌ མི༌རིག༌ ཁྱོ༌རང༌གུན༌ནི༌ སད༌པིན༌?”
ཁོང༌གུན༌ནི༌ ལན༌ཏངས༌, “ཉེ༌རང༌ ཙོགས༌ མི༌ རིག༌། ཁོང༌ ཚང༌མ༌ གྱལ༌པོའེ༌ བུ༌ཚ༌ ཙོགས༌ ཐོང༌ དུག༌པིན༌།”
19 གི༌དི༌འོན༌ནི༌ ལན༌ཏངས༌, “ཁོང༌གུན༌ ངའེ༌ སྤུན༌ལ༌, ངའེ༌ ཨ༌མའེ༌ བུ༌ཚ༌གུན༌ ཨིན༌པིན༌། ཡ༌ཝ༌ སོན༌པོའེ༌ ཚན༌ནི༌ ནང༌ང༌ ཀལ༌ཏེས༌ ཁྱོ༌རང༌གུན༌ནི༌ ཁོང༌གུན༌ མ༌སད༌པིན༌ན༌ ངའེ༌ ཁྱོ༌རང༌གུན༌ མ༌སད༌ད༌ ཡོད༌གྲོ༌།”
20 གི༌དི༌འོན༌ནི༌ ཁོ༌རང༌ངི༌ བུ༌ཚ༌ ཆེ༌ཤོག༌ ཡེ༌ཐེར༌ ཆོགས༌ལ༌ ལྟས༌ཏེ༌ ཟེརས༌, “ཁོང༌གུན༌ སོད༌” ཨིན༌ནའང༌ ཡེ༌ཐེར༌ ཞུ༌ནུ༌ཞིག༌ ཨིན༌ཅེས༌པའེ༌ ཁོ༌ ཇིགས༌ཏེ༌ ཁོ༌རང༌ངི༌ ར༌འི༌ མ༌ ཕིངས༌།
21 ཏེ༌ནེ༌ ཟེ༌བཧ༌ དང༌ ཟལ༌མུན༌ནའེ༌ གི༌དི༌འོན༌ལ༌ ཟེརས༌, “བུ༌ཚའེ༌ ལས༌པོ༌ ཕྲུ༌གུ༌ཞིག༌ག༌ ཅིའ༌ སྟད༌དད༌? ལོངས༌། ཁྱོ༌རང༌ རང༌ངི༌ ང༌ཞའ༌ སོད༌།” ཏེ༌ནེ༌ གི༌དི༌འོན༌ནི༌ ཁོང༌ ཉིས༌ཀོ༌ སདས༌ ཡང༌ ཁོང༌ངི༌ རྔ༌བོང༌གུན༌ནི༌ ཇིང༌བའེ༌ཀ༌ ཏགས༌ཏེ༌ ཡོད༌ཁན༌ནི༌ སེར༌རི༌ གྱན༌ཆ༌གུན༌ པུད༌ཏེ༌ ཁྱེརས༌།
22 ཏེ༌ནེ༌ ཨིས༌ར༌ཨེལ༌པ༌གུན༌ནི༌ གི༌དི༌འོན༌ལ༌ ཟེརས༌, “ང༌ཞའེ༌ སྤོན༌བོ༌ གྱུར༌། ཉེ༌རང༌, ཉེ༌རང༌ངི༌ བུ༌ཚ༌ དང༌ ཚ༌འོ༌ གུན༌ནི༌ ང༌ཞ༌གུན༌ནི༌ཀ༌ ཝང༌སྲུལ༌ གོས༌ ཅིའ༌ཟེར༌ན༌ ཉེ༌རང༌ངི༌ ང༌ཞའ༌ མི༌དིའན༌པ༌གུན༌ནི༌ ཀ༌ནེ༌ སྐྱོབས༌ཏེ༌ ཨིན༌ནོག༌།”
23 ཨིན༌ནའང༌ གི༌དི༌འོན༌ནི༌ ལན༌ཏངས༌, “ང༌ དང༌ ངའེ༌ བུ༌ཚ༌གུན༌ནི༌ ཁྱོ༌ཞའེ༌ཀ༌ ཝང༌ མི༌སྲུལ༌། ཡ༌ཝའེ༌ ཁྱོ༌ཞ༌གུན༌ནི༌ཀ༌ ཝང༌སྲུལ༌ཨིན༌།
24 ཨིན༌ནའང༌ ངའ༌ ཞུ༌ཝ༌ཞིག༌ ཡོད༌, ཁྱོ༌ཞའ༌ རེ༌རེའེ༌ ཅོམས༌ཁན༌ནི༌ གྱུ༌ནོར༌ ཁྱོ༌ཞའེ༌ ཁག༌གི༌ ནང༌ནེ༌ ངའ༌ ནམ༌ཅོག༌གི༌ ཨ༌ལི༌ ཅིག༌ ཏོང༌།” ༼མི༌དིའན༌པ༌གུན༌ ཨིཤ༌མ༌ཨེལ༌ལི༌ གྱུད༌ནེ༌ ཨིན༌ཅེས༌པའེ༌ སེར༌རི༌ ནམ༌ཅོག༌གི༌ ཨ༌ལི༌ ཏག༌གད༌པིན༌།༽
25 ཁོང༌གུན༌ནི༌ ལན༌ཏངས༌, “ཐད༌པོ༌ ཉམ༌པོ༌ ཏང༌ཨིན༌།” ཁོང༌གུན༌ནི༌ རས༌ཤིག༌ ཏིངས༌ ཡང༌ མི༌ རེ༌རེའེ༌ ཅོམས༌ཁན༌ནི༌ གྱུ༌ནོར༌ ཁོ༌རང༌གུན༌ནི༌ ཁག༌གི༌ ནང༌ནེ༌ སེར༌རི༌ ནམ༌ཅོག༌གི༌ ཨ༌ལི༌ ཅིག༌ ཕངས༌།
26 ལྡུམས༌ཁན༌ནི༌ སེར༌རི༌ ནམ༌ཅོག༌གི༌ ཨ༌ལི༌ ལྕིད༌པོ༌ ཀི༌ལོ༌ 19.5 ཡོད༌པིན༌། ཏེ༌བོའེ༌ ནང༌ང༌ མི༌དིའན༌ནི༌ གྱལ༌པོ༌གུན༌ནི༌ གྱན༌ཆ༌ དང༌ ཀོས༌ལག༌ ཡང༌ ཁོང༌ངི༌ རྔ༌བོང༌གུན༌ནི༌ ཀ༌ནེ༌ པུད༌ཏེ༌ ཁྱོང༌ཁན༌ནི༌ གྱན༌ཆ༌གུན༌ མ༌ཐེའ༌ ཨིན༌ནོག༌།
27 གི༌དི༌འོན༌ནི༌ ཏེ༌ སེར༌ ཉམ༌པོ༌ ཏམ༌པ༌ ཨེ༌ཕོད༌ ཡང༌ན༌ སྟུད༌ཏུང༌ ཞིག༌ ཅོས༌ཏེ༌ ཁོ༌རང༌ངི༌ གྲོང༌ཁྱེར༌ ཨོཕ༌རཧ༌ ནང༌ང༌ བོརས༌། ཨིས༌ར༌ཨེལ༌པ༌ ཚང༌མའེ༌ ཏེ༌བོའ༌ ཅོལ༌ཅེས༌ གོ༌ཟུག༌ ཡང༌ གི༌དི༌འོན༌ དང༌ ཁོའེ༌ ནང༌ཚ ངས༌ ཚང༌མའང༌ ཡ༌ཝ༌ དཀོན༌མཆོག༌ག༌ མ༌ཅོལ༌ལ༌ ཏེ༌བོའ༌ ཅོལ༌ཅེས༌སི༌ ནང༌ང༌ ཁད༌།
གི༌དི༌འོན༌ ཤི༌།
8:28-35
28 ཏེན༌ན༌ ཟུག༌གི༌ ཨིས༌ར༌ཨེལ༌པ༌གུན༌ནི༌ མི༌དིའན༌པ༌གུན༌ ང༌ཡོག༌ག༌ ཁྱོངས༌། མི༌དིའན༌པ༌གུན༌ ཤེད༌ཅན༌ གྱུར༌ཏེ༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ མ༌ནེ༌ ནོལ༌ མ༌ཐུབ༌། གི༌དི༌འོན༌ སོན༌ཏེའ༌ ཡོད༌ཏུས༌ ལོ༌ 40 ཏེ༌ ནས༌སའེ༌ ནང༌ང༌ ཞི༌དེ༌ ལུས༌།
29 ཡོ༌འཤ༌ཤི༌ བུ༌ཚ༌ གི༌དི༌འོན༌ ལོགས༌ཏེ༌ ཁང༌པ༌ མི༌ཚེ༌ པུད༌ད༌ སོང༌།
30 ཁོ༌ བུ༌ཚ༌ རྡུན༌ཅུའི༌ ཨ༌བ༌ གྱུར༌ ཅིའ༌ཟེར༌ན༌ ཁོའ༌ ན༌མ༌ མང༌པོ༌ ཡོད༌པིན༌།
31 ཤེ༌ཀེམ༌མི༌ ནང༌ང༌ ཁོའེ༌ ཚེ༌ཡོག༌ ན༌མའ༌ བུ༌ཚ༌ཞིག༌ སྐྱེས༌ ཀ༌བོའེ༌ མིང༌ང༌ ཁོའེ༌ ཨ༌བི༌མེ༌ལེག༌ ཏགས༌།
32 གི༌དི༌འོན༌ རྒད༌པོ༌ སོང༌ཏེ༌ ཤི༌ ཡང༌ ཁོའེ༌ སྤུར༌ ཨོཕ༌རཧ༌ ནང༌ང༌ ཨ༌བིའེ༌ཟེར༌རི༌ གྱུད༌ཟིན༌ ཡོ༌འཤ༌ ཁོ༌རང༌ངི༌ ཨ༌བའེ༌ སྤུར༌ཁང༌ངི༌ ནང༌ང༌ སུབས༌།
33 གི༌དི༌འོན༌ ཤི༌ཏེ༌, ཏུས༌ མང༌པོ༌ མ༌ཆ༌ ཨིས༌ར༌ཨེལ༌པ༌གུན༌ནི༌ བའལ༌ ཟེར༌ཁན༌ནི༌ སྐུན༌དྲ༌གུན༌ལ༌ ཅོལ༌ཅེས༌ གོ༌ཟུག༌། ཁོང༌གུན༌ནི༌ བའལ༌ བེ༌རིཐ༌ ལྷ༌ ཅོས༌ཏེ༌
34 ཆོགས༌ ཚང༌མ༌ནེ༌ ཡོང༌ཁན༌ནི༌ གྲ༌འོ༌གུན༌ནི༌ ཀ༌ནེ༌ སྐྱོབ༌བ༌ ཛད༌ཁན༌ནི༌ ཁོ༌རང༌གུན༌ནི༌ དཀོན༌མཆོག༌ ཡ༌ཝ༌ རྗེདས༌།
35 ཁོང༌གུན༌ནི༌ ཡེ༌རུབ༌བའལ༌ ཡང༌ན༌ གི༌དི༌འོན༌ནི༌, ཁོང༌གུན༌ནི༌ ཕིའ༌ ཟང༌པོ༌ ལས༌ ཅོ༌ཁན༌ ཚང༌མ༌ རྗེད༌ཏེ༌ ཁོའེ༌ ནང༌ཚངས༌ལ༌ ཆོགས༌སྐྱོར༌ མ༌ཅོས༌།