16
ཨེཕ༌ར༌ཡིམ༌ དང༌ ནུབ༌ ཆོགས༌སི༌ མ༌ནས༌ས༌ མི༌སྡེ༌གུན༌ལ༌ ཏང༌ཁན༌ནི༌ ས༌ཀྱད༌།
16:1-4
1 ཡོ༌སེབ༌བི༌ པུར༌གྱུད༌གུན༌ལ༌ ཏངས༌ཁན༌ནི༌ ས༌ཀྱད༌ ཡེ༌རི༌ཀོའེ༌ ཆུ༌མིག༌ ཤར༌ ཆོགས༌ ཡོར༌དཱན༌ ལྩངས༌པོ༌ ནེ༌ གོ༌ཟུགས༌ཏེ༌ ཐང༌སྟོང༌ གྱུད༌ཏེ༌ ཀེན༌ལ༌ བེ༌ཐེལ༌ལི༌ རི༌ཡུལ༌ ཡང༌
2 བེ༌ཐེལ༌ ༼ཡང༌ན༌ ལུས༌༽ ནེ༌ ཨ༌ཏ༌རོཐ༌དི༌ ནང༌ང༌ ཡོད༌ཁན༌ ཨར༌ཀ༌པའེ༌ ཡུལ༌ ཚོག༌པ༌།
3 ཏེ༌ཀ༌ནེ༌ ནུབ༌ ཆོགས༌ ཐུར༌ལ༌ ཡཕ༌ལེཀྲ༌པའེ༌ ཡུལ༌ཇོངས༌, ཏེ༌ནེ༌ ཡོག༌གི༌ བེཐ༌ ཧོ༌རོན༌ ཏང༌ གེ༌ཟེར༌ ཚོག༌པ༌ ཡང༌ མེ༌གྲི༌ཀྲེ༌རིའན༌ནི༌ ཚོའེ༌ཀ༌ ཚར༌རད༌པིན༌།
4 ཏེ༌བོ༌ ཡོ༌སེབ༌བི༌ པུར༌གྱུད༌ མ༌ནས༌ས༌ དང༌ ཨེཕ༌ར༌ཡིམ༌ མི༌སྡེ༌གུན༌ནི༌ ནོར༌སྐལ༌ ཨིན༌ནོག༌།
ཨེཕ༌ར༌ཡིམ༌ མི༌སྡེའ༌ ཏང༌ཁན༌ནི༌ ས༌ཀྱད༌།
16:5-10
5 འི༌གུན༌ ཨེཕ༌ར༌ཡིམ༌ སྡེའེ༌ མི༌རིགས༌གུན༌ལ༌ ཏང༌ཁན༌ནི༌ ས༌ཀྱད༌ ཨིན༌ནོག༌, ཁོང༌གུན༌ནི༌ སན༌ཚམས༌ ཤར༌ ཆོགས༌སི༌ ཨ༌ཏ༌རོཐ༌ ཨད༌དར༌ ནེ༌ གོ༌ཟུགས༌ཏེ༌ ཀེན༌ལ༌ བེཐ༌ ཧོ༌རོན༌ ཆོགས༌ལ༌
6 མེ༌གྲི༌ཀྲེ༌རིའན༌ནི༌ ཚོ༌ ཚག༌པ༌, བྱང༌ ཆོགས༌སི༌ མིག༌མེ༌ཐཐ༌ནེ༌ ཤར༌ ཆོགས༌ལ༌ ཏའ༌ནཐ༌ ཤི༌ལོཧ༌ ཆོགས༌ལ༌ ཀྱོགས༌ཏེ༌ ཤར༌ ཆོགས༌སི༌ ཡ༌ནོ༌འཧ༌ ཚག༌པ༌,
7 ཡ༌ནོ༌འཧ༌ནེ༌ ཐུར༌ལ༌ ཨ༌ཏ༌རོཐ༌ དང༌ ནའ༌རཧ༌ ཆོགས༌ལ༌ ཡེ༌རི༌ཀོའ༌ ཐུགས༌ཏེ༌ ཡོར༌དཱན༌ ལྩངས༌པོ༌ ཚག༌པ༌,
8 སན༌ཚམས༌པོ༌ ཏཔ༌པུ༌འཧ༌ནེ༌ ནུབ༌ ཆོགས༌སི༌ ཀ༌ནཧ༌ ལུང༌པ༌ ཆོགས༌ལ༌ ཀྱོགས༌ཏེ༌ མེ༌གྲི༌ཀྲེ༌རིའན༌ནི༌ ཚོ༌ ཚག༌པ༌ ཨིན༌ནོག༌། ཏེ༌བོ༌ ཨེཕ༌ར༌ཡིམ༌མི༌ སྡེའེ༌ མི༌རིགས༌གུན༌ལ༌ ཏངས༌ཁན༌ནི༌ ནོར༌སྐལ༌ ཨིན༌ནོག༌།
9 ཏེ༌བོའེ༌ཀ༌ ནན༌མ༌ མ༌ནས༌ས༌ མི༌སྡེ༌ ནོར༌སྐལ༌ལི༌ ཕྲོའ༌ ཨེཕ༌ར༌ཡིམ༌ མི༌སྡེ༌ ཕིའ༌ ཐེན༌ཏེ༌ བོར༌ཁན༌ གྲོང༌ཁྱེར༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
10 ཁོང༌གུན༌ནི༌ གེ༌ཟེར༌རི༌ ནང༌ང༌ དུག༌ཁན༌ ཀེ༌ནན༌པ༌གུན༌ མ༌ ཕིངས༌། ཏེ༌བོའེ༌ཕིའ༌ ཀེ༌ནན༌པ༌གུན༌ དག༌སའང༌ ཨེཕ༌ར༌ཡིམ༌པ༌གུན༌ནི༌ ཕྲོའ༌ ཚེ༌ཡོག༌གི༌ ཚུལ༌ལ༌ དུག༌ཨིན༌ ཨིན༌ནོག༌།