17
ནུབ༌ ཆོགས༌སི༌ མ༌ནས༌སའེ༌ མི༌སྡེའ༌ ཏང༌ཁན༌ནི༌ ས༌ཀྱད༌།
17:1-18
1 ཡོ༌སེབ༌བི༌ བུ༌ཚ༌ གོ༌བུ༌ མ༌ནས༌སའེ༌ པུར༌གྱུད༌ ཕེད༌པོའ༌ ཏང༌ཁན༌ནི༌ ས༌ཀྱད༌ འི༌གུན༌ ཨིན༌ནོག༌། མ༌ནས༌སའེ༌ གོ༌བུ༌ བུ༌ཚ༌ མ༌ཀིར༌ གི༌ལེད༌པ༌གུན༌ནི༌ ཕ༌མེས༌པོ༌ ཨིན༌པིན༌། ཁོའེ༌ པུར༌གྱུད༌གུན༌ མག༌མི༌ ཐོང༌ངོམས༌ཅན༌ ཀྲག༌པོ༌ ཡོད༌ པ༌སང༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ནས༌ས༌ གི༌ལེད༌ དང༌ བ༌ཤན༌ ཁོང༌གུན༌ལ༌ ཏངས༌ཏེ༌ ཨིན༌པིན༌།
2 མ༌ནས༌སའེ༌ སྡེའེ༌ ནང༌ནེ༌ ལུས༌ཁན༌ ཨ༌བིའེ༌ཟེར༌, ཧེ༌ལེག༌, ཨས༌རི༌འེལ༌, ཤེ༌ཀེམ༌, ཧེ༌ཕེར༌ དང༌ ཤེ༌མི༌ད༌ མི༌རིགས༌གུན༌ལ༌ ཡོར༌དཱན༌ ལྩངས༌པོའེ༌ ནུབ༌ ཆོགས༌སི༌ ས༌ཀྱད༌པོ༌ ཏངས༌། ཁོང༌གུན༌ ཡོ༌སེབ༌བི༌ བུ༌ཚ༌ མ༌ནས༌སའེ༌ ཞན༌ བུ༌ཚ༌གུན༌ནི༌ པུར༌གྱུད༌ ཨིན༌ནོག༌།
3 མ༌ནས༌སའེ༌ བུ༌ཚ༌ མ༌ཀིར༌, མ༌ཀིར༌རི༌ བུ༌ཚ༌ གི༌ལེད༌, གི༌ལེད༌དི༌ བུ༌ཚ༌ ཧེ༌ཕེར༌, ཧེ༌ཕེར༌རི༌ བུ༌ཚ༌ ཟེ༌ལོ༌ཕེ༌ཧད༌ལ༌ ཕྲུ༌གུ༌ བུ༌མོ༌ མན༌ནེ༌ བུ༌ཚ༌ མེད༌པིན༌། ཁོང༌གུན༌ མཧ༌ལཧ༌, ནོ༌འཧ༌, ཧོག༌ལཧ༌, མིལ༌ཀ༌ དང༌ ཏིར༌ཟཧ༌ ཨིན༌པིན༌།
4 འི༌ བུ༌མོ༌ ཚང༌མ༌ བླ༌མ༌ ཨེ༌ལི༌འ༌ཟར༌, ནུན༌ནི༌ བུ༌ཚ༌ ཡོ༌ཤུའ༌ ཡང༌ ཨིས༌ར༌ཨེལ༌པའེ༌ སྤོན༌བོ༌གུན༌ ཡོད༌ས༌ སོང༌ཏེ༌ ཟེརས༌, “ཡ༌ཝའེ༌ མོ༌ཟེས༌ལ༌ ང༌ཞའ༌ ང༌ཞ༌རང༌ངི༌ མི༌སྡེའེ༌ ཕྲོའ༌ ས༌ཀྱད༌ ཏང༌ཅེས༌ལ༌ བཀའ༌ སལ༌ཏེ༌ ཨིན༌པིན༌།” ཏེ༌བོའེ༌ཕིའ༌ ཡོ༌ཤུའེ༌ ཁོང༌གུན༌ལ༌ ས༌ཀྱད༌ ཁོང༌རང༌གུན༌ནི༌ ཉེན༌གྲུང༌གུན༌ ཉམ༌པོ༌ ཏངས༌ ཀ༌ཟུག༌ ཡ༌ཝའེ༌ བཀའ༌ སལ༌ཏེ༌ ཨིན༌པིན༌།
5 མ༌ནས༌སའེ༌ མི༌སྡེའ༌ ཏང༌ཁན༌ནི༌ ས༌ཀྱད༌ ལྡོམས༌ ཁག༌ རྕུ༌ ཡོད༌པིན༌ ཀ༌བོའེ༌ ནང༌ང༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ས༌ཀྱད༌ གི༌ལེད༌ དང༌ བ༌ཤན༌ མ༌ཐེའ༌ ཨིན༌ནོག༌
6 ཅིའ༌ཟེར༌ན༌ མ༌ནས༌སའེ༌ པུར༌གྱུད༌ བུ༌མོ༌གུན༌ལའང༌ བུ༌ཚ༌གུན༌ ཙོགས༌ ནོར༌སྐལ༌ ཐོབ༌། གི༌ལེད༌དི༌ ས༌ཀྱད༌གུན༌ མ༌ནས༌སའེ༌ ལུས༌ཁན༌ནི༌ པུར༌གྱུད༌གུན༌ལ༌ ཏངས༌།
7 མ༌ནས༌སའེ༌ སྡེ༌ ཏང༌ཁན༌ནི༌ ས༌ཀྱད༌ ཤེ༌ཀེམ༌མི༌ གྱལ༌སའེ༌ ཉེ༌མོའ༌ ཨ༌ཤེར༌ དང༌ མིག༌མེ༌ཐཐ༌ གྲོང༌ཁྱེར༌རི༌ པར༌ལ༌ ཡོད༌ཏེ༌ ཨིན༌ནོག༌ ཡང༌ སན༌ཚམས༌པོ༌ ལྷོ༌ ཆོགས༌ལ༌ ཏཔ༌པུ༌འཧའེ༌ ཆུ༌མིག༌ ཚག༌པ༌ ཨིན༌ནོག༌།
8 ༼ཏཔ༌པུ༌འཧའེ༌ ཉེ༌ཁོར༌རི༌ ས༌ཀྱད༌ མ༌ནས༌ས༌པ༌གུན༌ནི༌ ཨིན༌པིན༌ ཨིན༌ནའང༌ མ༌ནས༌ས༌པའེ༌ སན༌ཚམས༌སི༌ཀ༌ ཡོད༌ཁན༌ ཏཔ༌པུ༌འཧའེ༌ གྲོང༌ཁྱེར༌ ཨེཕ༌ར༌ཡིམ༌པ༌གུན༌ནི༌ ཨིན༌ནོག༌།༽
9 ཏཔ༌པུ༌འཧའེ༌ ཆུ༌མིག༌ ནེ༌ མ༌ནས༌སའེ༌ སན༌ཚམས༌ ཀ༌ནཧ༌ ལུང༌པ༌ གྱུད༌ཏེ༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ ཨིན༌ནོག༌། ཨེཕ༌ར༌ཡིམ༌པའེ༌ ཨིན༌ཁན༌ ལུང༌པའེ༌ བྱང༌ ཆོགས༌སི༌ གྲོང༌ཁྱེར༌ མང༌པོ༌ ཞིག༌ མ༌ནས༌ས༌པའེ༌ ཡུལ༌ཇོངས༌སི༌ ནང༌ང༌ ཡོད༌པིན༌།
10 ལུང༌པའེ༌ ལྷོ༌ ཆོགས༌སི༌ ས༌ཀྱད༌ ཨེཕ༌ར༌ཡིམ༌པ༌གུན༌ནི༌ ཡང༌ ལུང༌པའེ༌ བྱང༌ ཆོགས༌སི༌ ས༌ཀྱད༌ མ༌ནས༌ས༌པ༌གུན༌ནི༌ ཨིན༌པིན༌། མ༌ནས༌ས༌པའེ༌ སན༌ཚམས༌ མེ༌གྲི༌ཀྲེ༌རིའན༌ནི༌ ཚོ༌, བྱང༌ ཆོགས༌ལ༌ ཨ༌ཤེར༌རི༌ སན༌ཚམས༌ དང༌ ཤར༌ ཆོགས༌ལ༌ ཨིས༌ས༌ཁར༌རི༌ སན༌ཚམས༌ ཚོག༌པ༌ ལེབ༌བད༌པིན༌།
11 ཨིས༌ས༌ཁར༌ དང༌ ཨ༌ཤེར༌ ཡུལ༌ཇོངས༌སི༌ ནང༌ང༌ ཡོད༌ཁན༌ བེཐ༌ ཤན༌, ཨིབ༌ལེ༌འམ༌, དོར༌ ༼གྱ༌ཚོའེ༌ ཐའ༌མ༌ ཡོད༌ཁན༌༽, ཨེན༌གྲོར༌, ཏའ༌ནག༌ དང༌ མེ༌གིད༌དོ༌ གྱལ༌ས༌གུན༌ དང༌ ཏེ༌གུན༌ནི༌ ཉེ༌ཁོར༌ལ༌ ཚུགས༌ཏེ༌ དུག༌ཁན༌གུན༌ མ༌ནས༌ས༌པ༌གུན༌ནི༌ ཨིན༌པིན༌།
12 ཨིན༌ནའང༌ མ༌ནས༌ས༌པ༌གུན༌ལ༌ ཏེ༌ གྲོང༌ཁྱེར༌གུན༌ནི༌ ནང༌ང༌ དུག༌ཁན༌ ཀེ༌ནན༌པ༌གུན༌ ཕིངས༌ཏེ༌ ཏེ༌བོ༌ ང༌ཡོག༌ག༌ ཁྱོང༌ མ༌ཉན༌།
13 སྟིང༌ནེ༌ ཨིས༌ར༌ཨེལ༌པ༌གུན༌ ཤེད༌ཅན༌ གྱུར༌ར༌ཅིག༌ ཁོང༌གུན༌ནི༌ ཀེ༌ནན༌པ༌གུན༌ ཚེ༌ཡོག༌ ཅོས༌ཏེ༌ བོརས༌ ཨིན༌ནའང༌ ཁོང༌གུན༌ ཏེ༌ ས༌ཀྱད༌ནེ༌ མ༌ ཕིངས༌།
14 ཡོ༌སེབ༌བི༌ པུར༌གྱུད༌གུན༌ནི༌ ཡོ༌ཤུའ༌ ཟེརས༌, “ཅི༌ཕིའ༌ ཉེ༌རང༌ངི༌ ང༌ཞ༌གུན༌ལ༌ ས༌ཀྱད༌དི༌ ཁག༌ཅིག༌ མ༌ནེ༌ མ༌ཏང༌ང༌ ཨིན༌? ཡ༌ཝའེ༌ ང༌ཞའ༌ ཅིན༌ལབས༌ སལ༌ལ༌ ཛད༌ཏེ༌ ང༌ཞ༌གུན༌ མ༌མང༌པོ༌ གྱུར༌ཏེ༌ ཨིན༌ནོག༌།”
15 ཡོ༌ཤུའེ༌ ལན༌ཏངས༌, “ཀལ༌ཏེས༌ ཁྱོ༌ཞའ༌ མང༌པོ༌ ཕེལ༌ཏེ༌ ཨེཕ༌ར༌ཡིམ༌མི༌ རི༌ཡུལ༌ ཁྱོ༌ཞ༌གུན༌ནི༌ ཕིའ༌ ཆུ༌ངུན༌ ཆའད༌ན༌ པེ༌རིཟ༌པ༌ དང༌ རེ༌ཕ༌པ༌ དུག༌སའེ༌ ནག༌ཚོགས༌ ཆད༌ཏེ༌ ཁྱོ༌ཞ༌རང༌ངི༌ ཕིའ༌ ས༌ཀྱད༌ ཅོས༌།”
16 ཡོ༌སེབ༌བི༌ པུར༌གྱུད༌གུན༌ནི༌ ལན༌ཏངས༌, “དེན༌བ༌ ཨེཕ༌ར༌ཡིམ༌མི༌ རི༌ཡུལ༌ ང༌ཞ༌གུན༌ནི༌ ཕིའ༌ ཆུ༌ངུན༌ སོང༌ཏེ༌ ཨིན༌ནོག༌ ཨིན༌ནའང༌ བེཐ༌ ཤན༌ དང༌ ཏེ༌བོའེ༌ ཉེ༌ཁོར༌ལ༌ ཚུགས༌ཏེ༌ དུག༌ཁན༌ ཡང༌ ཡེཟ༌རེ༌འེལ༌ལི༌ ལུང༌པའེ༌ ནང༌ང༌ དུག༌ཁན༌ ཀེ༌ནན༌པ༌ མག༌མི༌གུན༌ལ༌ ལྕགས༌སི༌ རྟ༌རེལ༌ ཡོད༌ པ༌སང༌ ཁོང༌གུན༌ མ༌ ཤེད༌ཅན༌ ཡོད༌ཏེ༌ ཨིན༌ནོག༌།”
17 ཏེ༌ནེ༌ ཡོ༌ཤུའེ༌ ཡོ༌སེབ༌བི༌ པུར༌གྱུད༌ ཨེཕ༌ར༌ཡིམ༌ དང༌ མ༌ནས༌སའེ༌ མི༌སྡེ༌གུན༌ལ༌ ཟེརས༌, “ཁྱོ༌ཞ༌གུན༌ མང༌པོ༌ དང༌ ཤེད༌ཅན༌ ཡོད༌ པ༌སང༌ ངའེ༌ ཁྱོ༌ཞའ༌ ས༌ཀྱད༌ ཁག༌ ཅིག༌གི༌ སང༌ མང༌ང༌ ཏང༌ཨིན༌།
18 རི༌ཡུལ༌ལི༌ ནག༌ཚོགས༌ ཁྱོ༌ཞའེ༌ ཨིན༌, ཙམ༌ཤིག༌ ཉན༌ན༌ ཆད༌ཏེ༌ ཁྱོ༌རང༌གུན༌ནི༌ ཕིའ༌ ས༌ཀྱད༌ ཅོས༌། ཀེ༌ནན༌པ༌གུན༌ལ༌ ལྕགས༌སི༌ རྟ༌རེལ༌ ཡང༌ ཤེད༌ཅན༌ ཡོད༌ནའང༌ ཁྱོ༌ཞའ༌ ཁོང༌གུན༌ ཏེ༌ ས༌ཀྱད༌ནེ༌ ཕིང༌ ཉན༌ཨིན༌།”