18
ལུས༌ཏེ༌ ཡོད༌ཁན༌ནི༌ ས༌ཀྱད༌གུན༌ བགོས༌།
18:1-10
1 ཨིས༌ར༌ཨེལ༌པ༌ ཚང༌མ༌ ཤི༌ལོཧའེ༌ ནང༌ང༌ ཇོམས༌ ཡང༌ ཡ༌ཝའ༌ ཐུག༌སའེ༌ ཀུར༌བོ༌ ཏེ༌རུ༌ ཙུགས༌། ཁོང༌གུན༌ནི༌ ཁྱོང༌ཉན༌ཁན༌ནི༌ ས༌ཀྱད༌ ཚང༌མ༌ ཝང༌ངི༌ ཡོག༌ག༌ ཁྱོངས༌ཏེ༌ ཨིན༌ནའང༌
2 ཏ༌རོང༌ ནོར༌སྐལ༌ལི༌ ས༌ཀྱད༌ མ༌ཐོབ༌ཁན༌ མི༌སྡེ༌ རྡུན༌ ལུས༌ཏེ༌ ཡོད༌པིན༌།
3 ཏེ༌ནེ༌ ཡོ༌ཤུའེ༌ ཁོང༌གུན༌ལ༌ ཟེརས༌, “ཡ༌ཝ༌ ཁྱོ༌ཞའེ༌ ཕ༌མེས༌པོ༌གུན༌ནི༌ དཀོན༌མཆོག༌གི༌ ཁྱོ༌ཞའ༌ སལ༌ཁན༌ནི༌ ས༌ཀྱད༌པོ༌ ང༌ཡོག༌ག༌ མ༌ ལེན༌ན༌ ཙམ༌ཞིག༌ སྲུངས༌ཏེ༌ དུག༌ཅེན༌?
4 མི༌སྡེ༌ རེ༌རེ༌ནེ༌ མི༌ སུམ༌སུམ༌ ལྡོམ༌, ཡང༌ ངའེ༌ ཁོང༌གུན༌ ལུས༌ཏེ༌ ཡོད༌ཁན༌ ས༌ཀྱད༌དི༌ སྟ༌སྟོག༌ ཅོ༌ཅེས༌ལ༌ ཀལ༌ཨིན༌ ཡང༌ ཁོང༌གུན༌ནི༌ ཁོང༌རང༌གུན༌ལ༌ ནོར༌སྐལ༌ལ༌ བགོས༌ཁན༌ནི༌ ས༌ཀྱད༌དི༌ སན༌ཚམས༌སི༌ ནག༌ཤ༌ ཅོས༌ཏེ༌ ངའེ༌ཀ༌ ཁྱོང༌གོས༌།
5 ཁྱོ༌ཞ༌གུན༌ནི༌ ས༌ཀྱད༌པོ༌ པོ༌ རྡུན༌ནི༌ ནང༌ང༌ བགོ༌གོས༌ ཀ༌བོའེ༌ ནང༌ང༌ ལྷོ༌ ཆོགས༌ལ༌ ཡོད༌ཁན༌ ཡ༌ཧུ༌དཱའེ༌ ས༌ཀྱད༌ ཡང༌ བྱང༌ ཆོགས༌ལ༌ ཡོད༌ཁན༌ ཡོ༌སེབ༌བི༌ ས༌ཀྱད༌ ཐེ༌མ༌གོས༌།
6 ཁྱོ༌ཞའེ༌ ས༌ཀྱད༌ པོ༌ རྡུན༌ནི༌ ནང༌ང༌ བགོས༌ཁན༌ནི༌ ནག༌ཤ༌ ངའ༌ ཁྱོང༌ ཏེ༌ནེ༌ ངའེ༌ ཡ༌ཝ༌ ང༌དང༌གུན༌ནི༌ དཀོན༌མཆོག༌གི༌ སྐུན༌དུན༌ལ༌ ཏག༌རིལ༌ ཏངས༌ཏེ༌ སྡེ༌ རེ༌རེའ༌ ཐོབ༌ཁན༌ནི༌ ས༌ཀྱད༌དི༌ ཁག༌པོ༌ ཏང༌ཨིན༌།
7 “ལི༌ཝི༌པ༌གུན༌ལ༌ ས༌ཀྱད༌ ནོར༌སྐལ༌ལ༌ མི༌ཐོབ༌ ཅིའ༌ཟེར༌ན༌ ཁོང༌གུན༌ནི༌ བླ༌མའེ༌ ཚུལ༌ལ༌ ཡ༌ཝའ༌ ཞབས༌ཏོག༌ ཞུ༌ཅེས༌པོ༌ ཁོང༌གུན༌ནི༌ ནོར༌སྐལ༌ ཨིན༌ནོག༌། ཡང༌ གཱད༌ དང༌ རུ༌བེན༌ནི༌ མི༌སྡེ༌གུན༌ ཡང༌ མ༌ནས༌ས༌ མི༌སྡེ༌ ཕེད༌པོའ༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ནོར༌སྐལ༌ལི༌ ས༌ཀྱད༌ ཐོབ༌ཚར༌ཏེ༌ ཨིན༌ནོག༌, ཀ༌བོ༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཁོང༌གུན༌ལ༌ སལས༌།”
8 ཏེ༌ནེ༌ ས༌ཀྱད༌དི༌ ནག༌ཤ༌ ཅོའ༌ལ༌ མི༌གུན༌ ཆ༌ཅེས༌ གོ༌ཟུག༌ག༌ཅིག༌ ཡོ༌ཤུའེ༌ ཁོང༌གུན༌ལ༌ ཟེརས༌, “སོང༌ ཡང༌ ས༌ཀྱད༌དི༌ སྟ༌སྟོག༌ ཅོས༌ ཡང༌ ནག༌ཤ༌ ཅོས༌ཏེ༌ ཏེ༌བོའེ༌ སྐོར༌ལ༌ བྲིས༌ ཡང༌ ལོགས༌ཏེ༌ ཡོང༌ང༌ཅིག༌ ཏེ༌གུན༌ ངའེ༌ཀ༌ ཁྱོང༌། ངའེ༌ འི༌རུ༌ ཤི༌ལོཧའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཏག༌རིལ༌ ཏངས༌ཏེ༌ ཏེ༌གུན༌ བགོས༌ཏེ༌ ཏང༌ཨིན༌།”
9 མི༌གུན༌ སོང༌ཏེ༌ ཡུལ༌ གང༌པོ༌ ལྟས༌ ཡང༌ ཤོག༌རིལ༌ལི༌ཀ༌ ཏེ༌བོ༌ ཁག༌ རྡུན༌ནི༌ ནང༌ང༌ བགོས༌ཁན༌ནི༌ ནག༌ཤ༌ ཅོས༌ཏེ༌ གྲོང༌ཁྱེར༌ རེ༌རེ༌ མིང༌གུན༌ བྲིས༌, ཡང༌ ཡོ༌ཤུའ༌ ཡོད༌ས༌ ཤི༌ལོཧ༌ ལོགས༌ཏེ༌ སོང༌།
10 ཏེ༌ནེ༌ ཤི༌ལོཧའེ༌ ནང༌ང༌ ཡོ༌ཤུའེ༌ ཡ༌ཝའེ༌ སྐུན༌དུན༌ལ༌ ཏག༌རིལ༌ ཏངས༌ཏེ༌ སྡེ༌ རེ༌རེའ༌ ཐོབ༌ཁན༌ནི༌ ས༌ཀྱད༌དི༌ ཁག༌པོ༌ ཏངས༌།
བེན༌ཡཱ༌མིན༌ནི༌ སྡེའ༌ ཏང༌ཁན༌ནི༌ ས༌ཀྱད༌།
18:11-20
11 ས༌ཀྱད༌དི༌ ཁག༌ ཏང༌པོ༌ བེན༌ཡཱ༌མིན༌ནི༌ སྡེའེ༌ མི༌རིགས༌གུན༌ལ༌ ཐོབ༌། ཡ༌ཧུ༌དཱ༌ དང༌ ཡོ༌སེབ༌བི༌ སྡེའ༌ ཏང༌ཁན༌ནི༌ ས༌ཀྱད༌དི༌ པར༌ལ༌ ཁོང༌གུན༌ནི༌ ཁག༌པོ༌ ཡོད༌པིན༌།
12 བེན༌ཡཱ༌མིན༌པའེ༌ བྱང༌ ཆོགས༌སི༌ སན༌ཚམས༌པོ༌ ཡོར༌དཱན༌ ལྩངས༌པོ༌ནེ༌ གོ༌ཟུགས༌ཏེ༌ བྱང༌ ཆོགས༌སི༌ ཡེ༌རི༌ཀོའེ༌ ཁྲེད༌ གྱུད༌ཏེ༌ ནུབ༌ ཆོགས༌སི༌ རི༌ ཡུལ༌གུན༌ དང༌ བེཐ༌ ཨེ༌ཝན༌ནི༌ ཐང༌སྟོང༌ ཚག༌པ༌།
13 ཏེ༌ཀ༌ནེ༌ ལྷོ༌ ཆོགས༌ལ༌ ལུཟ༌སི༌ ཁྲེད༌ ༼ཡང༌ན༌ བེ༌ཐེལ༌༽ གྱུད༌ཏེ༌ ཐུར༌ལ༌ རི༌ཀ༌ ཡོད༌ཁན༌ ཨ༌ཏ༌རོཐ༌ ཨད༌དར༌ ཚག༌པ༌ ལེབ༌, ཀ༌བོ༌ ཡོག༌གི༌ བེཐ༌ ཧོ༌རོན༌ནི༌ ལྷོ༌ ཆོགས༌ལ༌ ཨིན༌ནོག༌།
14 ཏེ༌ནེ༌ སན༌ཚམས༌པོ༌ ཀྱོགས༌ཏེ༌ ལྷོ༌ ཆོགས༌ལ༌, བེཐ༌ ཧོ༌རོན༌ ཐོང༌ཁན༌ནི༌ རི༌ ལྷོ༌ ཆོགས༌སི༌ ཟུར༌ གྱུད༌ཏེ༌ ཡ༌ཧུ༌དཱའེ༌ སྡེའེ༌ ཨིན༌ཁན༌ ཀི༌རི༌འཐ༌ བའལ༌ ༼ཡང༌ན༌ ཀི༌རི༌འཐ༌ ཡེ༌རིམ༌༽ གྲོང༌ཁྱེར༌ ཚག༌པ༌ ལེབ༌། འི༌གུན༌ ནུབ༌ ཆོགས༌སི༌ སན༌ཚམས༌ ཨིན༌ནོག༌།
15 ལྷོ༌ ཆོགས༌སི༌ སན༌ཚམས༌, ནུབ༌ ཆོགས༌སི༌ ཀི༌རི༌འཐ༌ ཡེ༌རིམ༌ནེ༌ གོ༌ཟུགས༌ཏེ༌ ནེཕ༌ཏོ༌འཧའེ༌ ཆུ༌མིག༌ ཚོག༌པ༌,
16 ཡང༌ ཐུར༌ལ༌ རི༌ཡོག༌, བེན༌ ཧིན༌ནོམ༌མི༌ ལུང༌པ༌ ལྟས༌ཏེ༌ རེ༌ཕ༌འིམ༌མི༌ ལུང༌པའེ༌ བྱང༌ ཆོགས༌ ཚག༌པ༌, ཏེ༌ནེ༌ ཐུར༌ལ༌ ཧིན༌ནོམ༌མི༌ ལུང༌པ༌ ཆོགས༌ལ༌, ཡེ༌བས༌པ༌གུན༌ནི༌ གྱལ༌སའེ༌ ལྷོ༌ ཆོགས༌སི༌ ཁྲེད༌ གྱུད༌ཏེ༌ ཨེན༌ རོ༌གེལ༌ ཚག༌པ༌ ལེབ༌།
17 ཏེ༌ཀ༌ནེ༌ ཨེན༌ ཤེ༌མེཤ༌, བྱང༌ ཆོགས༌ལ༌ ཀྱོགས༌ཏེ༌ གེ༌ལི༌ལོཐ༌ལ༌ ལེབ༌ ཀ༌བོ༌ ཨ༌དུམ༌མིམ༌ ལའེ༌ འ༌ངོ༌ ཆོགས༌ལ༌ ཨིན༌ནོག༌། ཏེ༌ནེ༌ ཏེ༌བོ༌ ཐུར༌ལ༌ རུ༌བེན༌ནི༌ བུ༌ཚ༌ བོ༌ཧན༌ནི༌ རྡོའ༌ ཚོག༌པ༌ ལེབ༌།
18 ཏེ༌ཀ༌ནེ༌ ཏེ༌བོ༌ བེཐ༌ ཨ༌ར༌བཧའེ༌ བྱང༌ ཆོགས༌སི༌ ཁྲེད༌ གྱུད༌ཏེ༌ ཐུར༌ལ༌ ལུང༌པའེ༌ ནང༌ང༌,
19 ཡང༌ བེཐ༌ ཧོག༌ལཧའེ༌ བྱང༌ ཆོགས༌སི༌ ཁྲེད༌ གྱུད༌ཏེ༌ ཚོ༌རུལ༌ལི༌ བྱང༌ ཆོགས༌སི༌ ཐའ༌མ༌ ཚག༌པ༌ ལེབ༌ ཀ༌བོ༌ ལྷོ༌ ཆོགས༌སི༌ ཡོར༌དཱན༌ ལྩངས༌པོའེ༌ ཁའ༌ ཨིན༌ནོག༌། ཏེ༌གུན༌ ལྷོ༌ ཆོགས༌སི༌ སན༌ཚམས༌གུན༌ ཨིན༌ནོག༌།
20 ཤར༌ ཆོགས༌སི༌ སན༌ཚམས༌ ཡོར༌དཱན༌ ལྩངས༌པོ༌ ཨིན༌ནོག༌།
ཏེ༌གུན༌ བེན༌ཡཱ༌མིན༌ སྡེའེ༌ མི༌རིགས༌གུན༌ལ༌ ཏང༌ཁན༌ནི༌ ས༌ཀྱད༌དི༌ སན༌ཚམས༌གུན༌ ཨིན༌ནོག༌།
བེན༌ཡཱ༌མིན༌པ༌གུན༌ལ༌ ཏང༌ཁན༌ནི༌ གྲོང༌ཁྱེར༌གུན༌།
18:21-28
21 བེན༌ཡཱ༌མིན༌ སྡེའེ༌ མི༌རིགས༌གུན༌ལ༌ ཏང༌ཁན༌ནི༌ གྲོང༌ཁྱེར༌གུན༌ འི༌གུན༌ ཨིན༌།
ཡེ༌རི༌ཀོ༌, བེཐ༌ ཧོག༌ལཧ༌, ཨེ༌མེག༌ ཀེ༌ཟིཟ༌,
22 བེཐ༌ ཨ༌ར༌བཧ༌, ཟེ༌མ༌ར༌འིམ༌, བེ༌ཐེལ༌,
23 ཨཝ༌ཝིམ༌, པ༌རཧ༌, ཨོཕ༌རཧ༌,
24 ཀེ༌ཕར༌ ཨམ༌མོ༌ནི༌, ཨོཕ༌ནི༌ དང༌ གེ༌བ༌, གྲོང༌ཁྱེར༌ རྕུག༌ཉིས༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
25 ཡང༌ གི༌བེ༌འོན༌, ར༌མཧ༌, བེ༌རོཐ༌,
26 མིཟ༌པཧ༌, ཀེ༌ཕི༌རཧ༌, མོ༌ཟཧ༌,
27 རེ༌ཀེམ༌, འིར༌པེལ༌, ཏ༌ར༌ལཧ༌,
28 ཟི༌ལཧ༌, ཧཱའེ༌ལེབ༌, ཡེ༌བས༌པའེ༌ གྱལ༌ས༌ ༼ཡང༌ན༌ ཡེ༌རུ༌ཤ༌ལེམ༌༽, གི༌བེའཧ༌ དང༌ ཀི༌རི༌འཐ༌, གྲོང༌ཁྱེར༌ ཅུབ༌ཞི༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
ཏེ༌གུན༌ བེན༌ཡཱ༌མིན༌ནི༌ སྡེའེ༌ མི༌རིགས༌གུན༌ནི༌ ནོར༌སྐལ༌གུན༌ ཨིན༌ནོག༌།