22
ཤར༌ ཆོགས༌སི༌ མི༌སྡེ༌གུན༌ ལོགས༌ཏེ༌ ཁོང༌རང༌གུན༌ནི༌ ནས༌ས༌ སོང༌།
22:1-34
1 ཏེ༌ནེ༌ ཡོ༌ཤུའེ༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌པོའ༌ བོད༌ཏེ༌
2 ཁོང༌གུན༌ལ༌ ཟེརས༌, “ཁྱོ༌ཞ༌གུན༌ནི༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ བཀའ༌ སལ༌ཁན༌ ཚང༌མ༌ ཅོས༌ ཡང༌ ངའེ༌ ཟེར༌ཁན༌ ཚང༌མ༌ ཁའ༌ཉནས༌།
3 ཏུས༌ མ༌ རིང༌མོ༌ དི༌རིང༌ ཚོག༌པ༌ ཁྱོ༌ཞའེ༌ ཁྱོ༌ཞ༌རང༌ངི༌ སྤུན༌གུན༌ལ༌ རོགས༌ ཅོས༌ཏེ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ བཀའ༌ སལ༌ཁན༌གུན༌ ཁའ༌ཉནས༌།
4 ཏ༌ ང༌དང༌གུན༌ནི༌ དཀོན༌མཆོག༌ ཡ༌ཝའེ༌ ཞལ༌ཆད༌ ནང༌ཞིན༌ ཁྱོ༌ཞའེ༌ སྤུན༌གུན༌ལ༌ ཞི༌དེ༌ སལ༌ པ༌སང༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཁྱོ༌ཞའ༌ སལ༌ཁན༌ ནས༌ས༌, ཁྱོ༌ཞ༌རང༌ངི༌ ཁང༌པ༌ ལོགས༌ཏེ༌ སོང༌།
5 ཨིན༌ནའང༌ མོ༌ཟེས༌སི༌ སལ༌ཁན༌ནི༌ བཀའ༌ཁྲིམས༌གུན༌ དང༌ བཀའ༌རྒྱ༌གུན༌ལ༌ སྲུང༌ཅེས༌ ཏན༌ཏན༌ ཅོས༌། ང༌དང༌གུན༌ནི༌ དཀོན༌མཆོག༌ ཡ༌ཝའ༌ ཅམས༌པ༌ ཅོ༌, ཁོང༌ངི༌ སྟན༌ན༌ ཛད༌ཁན༌ནི༌ ལམ༌མི༌ཀ༌ གྲུལ༌, ཁོང༌ངི༌ བཀའ༌གུན༌ལ༌ ཁའ༌ ཉོན༌, ཁོང༌ང༌ སྟན༌པོ༌ ཐམས༌ཏེ༌ དུག༌ ཡང༌ སྙིང༌ གང༌པོ༌ དང༌ སེམས༌ གང༌པོ༌ནེ༌ ཁྱོ༌ཞའེ༌ ཁོང༌ང༌ ཞབས༌ཏོག༌ ཞུས༌།”
6 ཏེ༌ནེ༌ ཡོ༌ཤུའེ༌ ཁོང༌གུན༌ལ༌ ཅིན༌ལབས༌ སལ༌ཏེ༌ ཁོང༌གུན༌ ལམ༌ཅུགས༌ ཡང༌ ཁོང༌གུན༌ ཁང༌པ༌ ལོགས༌ཏེ༌ སོང༌།
7 ༼མོ༌ཟེས༌སི༌ མ༌ནས༌སའེ༌ མི༌སྡེ༌ ཕེད༌པོའ༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཡོད༌ཁན༌ བ༌ཤན༌ནི༌ ས༌ཀྱད༌ ཡང༌ ཞན༌ ཕེད༌པོའ༌ ཡོར༌དཱན༌ནི༌ ནུབ༌ ཆོགས༌ལ༌ ས༌ཀྱད༌ ཏངས༌ཏེ༌ ཨིན༌པིན༌༽ ཡོ༌ཤུའེ༌ ཁོང༌གུན༌ ལོགས༌ཏེ༌ ལམ༌ཅུག༌ ཟ༌ནེ༌ ཁོང༌གུན༌ལ༌ ཅིན༌ལབས༌ སལ༌ཏེ༌
8 ཟེརས༌, “ཁྱོ༌ཞ༌གུན༌ ཁང༌པ༌ གྱུ༌ནོར༌ མང༌པོ༌ ཉམ༌པོ༌ ལོགས༌ཏེ༌ སོང༌, སེམས༌ཅན༌ནི༌ ཁྱུ༌ མང༌པོ༌, མུལ༌, སེར༌, ར༌གན༌, ལྕགས༌ ཡང༌ ཀོས༌ལག༌ མང༌པོ༌, གྲ༌འོ༌གུན༌ནི༌ ཀ༌ནེ༌ ཅོམས༌ཏེ༌ ཁྱོང༌ཁན༌ནི༌ གྱུ༌ནོར༌གུན༌ ཁྱོ༌ཞའེ༌ ཉེན༌གྲུང༌གུན༌ ཉམ༌པོ༌ བགོས༌།”
9 ཏེ༌ནེ༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌པོའ༌ ཞན༌ ཨིས༌ར༌ཨེལ༌པ༌གུན༌ ཀེ༌ནན༌ནི༌ ནས༌ས༌ ཤི༌ལོཧའ༌ བོར༌ཏེ༌ ཁོང༌རང༌གུན༌ནི༌ ས༌ཀྱད༌ གི༌ལེད༌ལ༌ ལོགས༌ཏེ༌ སོང༌ ཀ༌བོ༌ མོ༌ཟེས༌ གྱུད༌ཏེ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཁོང༌གུན༌ལ༌ ཐོབ༌ཏེ༌ ཨིན༌པིན༌།
10 ཁོང༌གུན༌ ཀེ༌ནན༌ནི༌ ནང༌ང༌ ཡོར༌དཱན༌ ལྩངས༌པོའེ༌ ཉེ༌མོའ༌ ཡོད༌ཁན༌ གེ༌ལི༌ལོཐ༌ ནས༌སའེ༌ཀ༌ ལེབ༌བ༌ཅིག༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌ གུན༌ནི༌ ཡོར༌དཱན༌ ལྩངས༌པོའེ༌ དུན༌ལ༌ ཆོད༌ཁྲི༌ ཆེན༌མོ༌ ཞིག༌ རྩིགས༌།
11 ཏེ༌ནེ༌ ཞན༌ ཨིས༌ར༌ཨེལ༌པ༌གུན༌ལ༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌ གུན༌ནི༌ ཡོར༌དཱན༌ ལྩངས༌པོའེ༌ ནུབ༌ ཆོགས༌ ཀེ༌ནན༌ནི༌ ས༌ཀྱད༌དི༌ ཐའ༌མ༌ གེ༌ལི༌ལོཐ༌ཐི༌ ནང༌ང༌ ཆོད༌ཁྲི༌ རྩིགས༌ཁན༌བོ༌ ཚོར༌ར༌ཅིག༌
12 ཨིས༌ར༌ཨེལ༌པ༌ ཚང༌མ༌ ཤི༌ལོཧའེ༌ ནང༌ང༌ ཛོམས༌ཏེ༌ ཁོང༌གུན༌ནི༌ གྱབ༌གལ༌ལ༌ མག༌ ཏང༌ཅེས༌སི༌ གྲལ༌གྲིག༌ ཅོས༌།
13 ཁོང༌གུན༌ནི༌ བླ༌མ༌ ཨེ༌ལི༌འ༌ཟར༌རི༌ བུ༌ཚ༌ ཕི༌ནི༌ཧས༌སི༌ གོ༌ཁྲིད༌ ཅོས༌ཏེ༌ ཐུས༌མི༌གུན༌ རུ༌བེན༌, གཱད༌ དང༌ མ༌ནས༌སའེ༌ མི༌སྡེ༌ ཕེད༌ གུན༌ལ༌ སྤེ༌ར༌ ཏང༌ང༌ ལམ༌ཅུགས༌།
14 འི༌ ཐུས༌མི༌གུན༌ནི༌ ནང༌ང༌ ཨིས༌ར༌ཨེལ༌པའེ༌ སྤོན༌བོ༌ རྕུ༌, མི༌སྡེ༌ རེ༌རེ༌ ནེ༌ མི༌ རེ༌རེ༌, ཁོང༌གུན༌ རང༌རང༌ངི༌ མི༌རིགས༌སི༌ ནང༌ང༌ ནང༌ཚངས༌སི༌ གོ༌སྐྱོང༌ ཨིན༌པིན༌།
15 ཁོང༌གུན༌ གི༌ལེད༌དི༌ ནས༌ས༌ ལེབས༌ཏེ༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌ གུན༌ལ༌ ཟེརས༌,
16 “ཡ༌ཝའེ༌ ཆོས༌ཚོགས༌ ཚང༌མའེ༌ ཏྲི༌དུག༌, ‘ཁྱོ༌ཞའེ༌ ཨིས༌ར༌ཨེལ༌ལི༌ དཀོན༌མཆོག༌གི༌ཀ༌ ཏད༌པ༌ ཕངས༌ཏེ༌ ཁོང༌ང༌ གྱབ༌གལ༌ ཅོས༌ཏེ༌ འི༌ ཆོད༌ཁྲི༌ ཅིའ༌ རྩིགས༌ཏེ༌ ཨིན༌?
17 པེ༌འོར༌རི༌ ནང༌ང༌ ང༌དང༌གུན༌ནི༌ ཅོ༌ཁན༌ནི༌ སྡིག༌པ༌ ཐའ༌ཐད༌ མ༌ནོག༌ག༌? ཡ༌ཝའེ༌ མི༌གུན༌ནི༌ཀ༌ ཏེ༌ ནད༌པོ༌ ཡོངས༌ཏེའང༌, དི༌རིང༌ ཚག༌པ༌ ང༌དང༌གུན༌ ཏེ༌ སྡིག༌པ༌ནེ༌ ལག༌མོ༌ མ༌ཆ༌ ཨིན༌ནོག༌།
18 ཁྱོ༌ཞ༌གུན༌ དི༌རིང༌ ཡ༌ཝ༌ ནེ༌ ཐག༌རིང༌ང༌ ཤོར༌ཏེ༌ ཨིན༌ན༌?’ ”
“དི༌རིང༌ ཁྱོ༌ཞ༌གུན༌ནི༌ ཡ༌ཝའེ༌ གྱབ༌གལ༌ ཅོ༌ན༌ ཐོ༌རེ༌ ཁོང༌ ང༌དང༌ ཚང༌མའེ༌ཀ༌ ཐུག༌སྲོ༌ སྐྱོད༌ཨིན༌།
19 ཁྱོ༌ཞའ༌ ཐོབ༌ཁན༌ནི༌ ས༌ཀྱད༌ ཏམ༌པ༌ མན༌ན༌ ཡ༌ཝའེ༌ ཀུར༌ ཡོད༌སའེ༌ ཁོང༌ངི༌ ས༌ཀྱད༌ ཆོགས༌ལ༌ ཡོང༌ ཡང༌ ང༌ཞའེ༌ ཕྲོའ༌ ཁྱོ༌ཞའེ༌ སྐལ༌ལའེ༌ ས༌ཀྱད༌ ལེན༌། ཨིན༌ནའང༌ ཡ༌ཝ༌ ང༌དང༌ངི༌ དཀོན༌མཆོག༌ ཅིག༌པོའེ༌ ཆོད༌ཁྲི༌ མན༌པ༌ ཞན༌ ཡང༌ ཆོད༌ཁྲི༌ རྩིགས༌ཏེ༌ ཡ༌ཝ༌ ཡ༌ ང༌ཞ༌གུན༌ནི༌ གྱབ༌གལ༌ མ༌ཅོ༌།
20 ཟེ༌རཧའེ༌ བུ༌ཚ༌ ཨ༌ཀེན༌ནི༌ ཡ༌ཝའ༌ ཕུལ༌ཅེས༌སི༌ ཅ༌ལག༌གུན༌ནི༌ ནང༌ནེ༌ སྐུས༌ཏེ༌ སྡིག༌པ༌ ཅོ༌ཅེས༌པའེ༌ ཡ༌ཝའེ༌ ཐུག༌སྲོ༌ ཨིས༌ར༌ཨེལ༌ གང༌པོའེ༌ཀ༌ མ༌བབས༌ས༌? ཁོའེ༌ སྡིག༌པའེ༌ ཞས༌ཏེ༌ ཁོ༌རང༌ ཅིག༌པོ༌ མན༌པ༌ ཞན༌ ཨིས༌ར༌ཨེལ༌པ༌གུན༌ནའང༌ ཤི༌།”
21 ཏེ༌ནེ༌ རུ༌བེན༌, གཱད༌ དང༌ མ༌ནས༌སའེ༌ མི༌སྡེ༌ ཕེད༌པོའེ༌ ཨིས༌ར༌ཨེལ༌པའེ༌ མི༌རིགས༌གུན༌ནི༌ གོ༌སྐྱོང༌གུན༌ལ༌ ལན༌ཏངས༌,
22 “ཡ༌ཝ༌, དཀོན༌མཆོག༌ ཀུན༌ཝང༌། ཡ༌ཝ༌, དཀོན༌མཆོག༌ ཀུན༌ཝང༌། ཁོང༌ངི༌ ཁྱེན༌ན༌ ཛད༌ད༌ནོག༌ ཡང༌ ཨིས༌ར༌ཨེལ༌པ༌གུན༌ལའང༌ གྱུས༌ ཆ༌གོས༌། ང༌ཞ༌གུན༌ནི༌ འི༌ ཆོད༌ཁྲི༌ རྩིགས༌ཏེ༌ ཡ༌ཝའེ༌ གྱབ༌གལ༌ ཅོས༌ཏེ༌ ཨིན༌ན༌ ང༌ཞ༌གུན༌ སད༌ནའང༌ གྲིག༌།
23 ཀལ༌ཏེས༌ ང༌ཞའེ༌ ཡ༌ཝ༌ ནེ༌ ཐག༌རིང༌ང༌ ཆ༌ཅེས༌ལ༌ ང༌ཞ༌རང༌ངི༌ ཕིའ༌ མེའ༌ སྲག༌ཅེས༌ ཡ༌ གྲུའི༌ ཡ༌ ཞི༌དེ༌ ཆོད༌པ༌ ཕུལ༌ཅེས༌སི༌ ཕིའ༌ འི༌ ཆོད༌ཁྲི༌ རྩིགས༌ཏེ༌ ཨིན༌ན༌ ཡ༌ཝ༌ ཁོང༌རང༌ངི༌ ང༌ཞ༌གུན༌ལ༌ ཆད༌པ༌ སལ༌ལ༌ ཛད༌ཤིག༌།
24 མན༌། ང༌ཞའེ༌ ཏེ༌བོ༌ ཅོས༌པིན༌ ཅིའ༌ཟེར༌ན༌ ང༌ཞ༌གུན༌ ཇིགས༌ས༌ རག༌, ཞག༌ཤིག༌ ཁྱོ༌ཞའེ༌ པུར༌གྱུད༌གུན༌ནི༌ ཟེར༌ སྲིད༌ཅེས༌ ཨིན༌ནོག༌, ‘ང༌ཞའེ༌ ཅོལ༌ཁན༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའ༌ ཁྱོ༌ཞ༌གུན༌ནི༌ ཆོད༌པ༌ ཕུལ༌ མི༌ ཆོགས༌།
25 ཡ༌ཝའེ༌ ཡོར༌དཱན༌ ལྩངས༌པོ༌ ང༌ཞ༌གུན༌ དང༌ ཁྱོ༌ཞའ༌ རུ༌བེན༌ དང༌ གཱད༌དི༌ མིར༌གྱུད༌གུན༌ནི༌ པར༌ལ༌ སན༌ཚམས༌ ཅོའ༌ཛདས༌, ཁྱོ༌ཞ༌གུན༌ནི༌ ཡ༌ཝའ༌ ཅོལ༌ མི༌ ཆོགས༌།’ ཏེ༌ཟུག༌ ཟེར༌ཏེ༌ ཁྱོ༌ཞའེ༌ པུར༌གྱུད༌གུན༌ནི༌ ང༌ཞའེ༌ པུར༌གྱུད༌གུན༌ལ༌ ཡ༌ཝའ༌ ཅོལ༌ཅེས༌ སྒག༌ སྲིད༌ཅེས༌ ཨིན༌ནོག༌།”
26 “ཏེ༌ གྱུན༌ཚན༌ནི༌ ཕིའ༌ ང༌ཞ༌གུན༌ནི༌ ཆོད༌ཁྲི༌ རྩིགས༌པིན༌། ཆོད༌པ༌ མེའ༌ སྲག༌ཅེས༌ ཡ༌ སྲོག༌ཆོད༌ ཕུལ༌ཅེས༌སི༌ ཕིའ༌ མ༌རྩིགས༌པིན༌།
27 འི༌བོ༌ ང༌ཞའ༌ དང༌ ཁྱོ༌ཞའ༌ ཡང༌ ང༌དང༌གུན༌ནི༌ པུར༌གྱུད༌ གུན༌ནི༌ ཕིའ༌, ང༌ཞ༌གུན༌ནི༌ མེའ༌ སྲག༌ཅེས༌, སྲོག༌ཆོད༌ དང༌ ཞི༌དེའེ༌ ཆོད༌པ༌ གུན༌ ཡ༌ཝའེ༌ ཏམ༌པ༌ ཀུར༌ ཡོད༌ས༌ ཅིག༌པོའེ༌ཀ༌ ཕུལ༌ཏེ༌ ཁོང༌ང༌ ཅོལ༌ཅེས༌སི༌ སྤང༌པོ༌ཞིག༌ ཨིན༌ནོག༌། ཏེ༌ནེ༌ ཁྱོ༌ཞའེ༌ པུར༌གྱུད༌གུན༌ནི༌ ང༌ཞའེ༌ པུར༌གྱུད༌གུན༌ལ༌, ‘ཁྱོ༌ཞའ༌ ཡ༌ཝའེ༌ མི༌གུན༌ མན༌’ ཟེར༌ མི༌ཉན༌།”
28 “ཀལ༌ཏེས༌ ཁོང༌གུན༌ནི༌ ཏེ༌ཟུག༌ ཟེར༌ན༌ ང༌ཞའེ༌ པུར༌གྱུད༌གུན༌ནི༌ ཟེར༌ཉན༌ཨིན༌, ‘ལྟོས༌, ང༌ཞའེ༌ ཕ༌མེས༌པོ༌གུན༌ནི༌ རྩིགས༌ཁན༌ནི༌ ཆོད༌ཁྲི༌ ཡ༌ཝའེ༌ ཆོད༌ཁྲི༌ ཙོགས༌ དུག༌, ཡང༌ ཏེ༌བོ༌ སྲག༌ཅེས༌ ཡ༌ སྲོག༌ཆོད༌དི༌ ཆོད༌པ༌ ཕུལ༌ལ༌ མན༌པ༌ ང༌ཞའ༌ དང༌ ཁྱོ༌ཞའ༌ ཉིས༌ཀོ༌ ཡ༌ཝའེ༌ ཨིན༌ཁན༌ནི༌ སྤང༌པོ༌ ཏང༌ང༌ནོག༌།’
29 ཡ༌ཝའེ༌ གྱབ༌གལ༌ ང༌ཞ༌གུན༌ནི༌ མན༌ནེ༌ མི༌ཅོ༌ ཡང༌ མེའ༌ སྲག༌ཅེས༌, སྲོག༌ཆོད༌ དང༌ ཞི༌དེའེ༌ ཆོད༌པ༌ གུན༌ ཕུལ༌ཅེས༌སི༌ ཆོད༌ཁྲི༌ རྩིགས༌ཏེ༌ ང༌ཞའ༌ ཁོང༌ནེ༌ ཐག༌རིང༌ང༌ མན༌ནེ༌ མི༌ཆ༌། ཏེ༌གུན༌ ཕུལ༌སའེ༌ ནས༌ས༌ ཡ༌ཝའེ༌ ཏམ༌པ༌ ཀུར༌རི༌ དུན༌ལ༌ ཡོད༌ཁན༌ནི༌ ཆོད༌ཁྲི༌ ཅིག༌པོ༌ ཨིན༌ནོག༌།”
30 རུ༌བེན༌, གཱད༌ དང༌ མ༌ནས༌ས༌ མི༌སྡེ༌ ཕེད༌ གུན༌ནི༌ ཟེར༌ཁན༌བོ༌ བླ༌མ༌ ཕི༌ནི༌ཧས༌ དང༌ ཨིས༌ར༌ཨེལ༌པའེ༌ སྤོན༌བོ༌གུན༌ནི༌ ཚོར༌ར༌ཅིག༌ ཁོང༌གུན༌ ཐད༌པོ༌ སོང༌།
31 ཨེ༌ལི༌འ༌ཟར༌རི༌ བུ༌ཚ༌ བླ༌མ༌ ཕི༌ནི༌ཧས༌སི༌ ཁོང༌གུན༌ལ༌ ལན༌ཏངས༌, “ཡ༌ཝ༌ ང༌དང༌གུན༌ནི༌ ཕྲོའ༌ ཞུགས༌ཏེ༌ ཨིན༌ཁན༌བོ༌ དི༌རིང༌ ང༌དང༌གུན༌ལ༌ ཧ༌གོ༌ ཅིའ༌ཟེར༌ན༌ ཁྱོ༌ཞའེ༌ ཡ༌ཝའེ༌ གྱབ༌གལ༌ལ༌ འི༌ ལས༌པོ༌ མ༌ཅོའ༌ ཨིན༌ནོག༌ ཀ༌ཟུག༌ ང༌ཞའེ༌ སམ༌། ཁྱོ༌ཞའེ༌ དཀོན༌མཆོག༌གི༌ ཆད༌པ༌ནེ༌ ཨིས༌ར༌ཨེལ༌པ༌གུན༌ སྐྱོབས༌ཏེ༌ ཨིན༌ནོག༌།”
32 ཏེ༌ནེ༌ བླ༌མ༌ ཕི༌ནི༌ཧས༌ དང༌ སྤོན༌བོ༌གུན༌ རུ༌བེན༌ དང༌ གཱད༌དི༌ མི༌སྡེ༌གུན༌ གི༌ལེད༌དི༌ ནང༌ང༌ བོར༌ཏེ༌ ཀེ༌ནན༌ནི༌ ས༌ཀྱད༌ལ༌ ལོགས༌ཏེ༌ སོང༌ ཡང༌ ཨིས༌ར༌ཨེལ༌པ༌གུན༌ལ༌ ཇུང༌ཁན༌གུན༌ ཤདས༌།
33 ཨིས༌ར༌ཨེལ༌པ༌ ཚང༌མ༌ ཐད༌པོ༌ སོང༌ཏེ༌ དཀོན༌མཆོག༌ག༌ སྟོད༌པ༌ ཕུལས༌ ཡང༌ རུ༌བེན༌ དང༌ གཱད༌པ༌གུན༌ནི༌ གྱབ༌གལ༌ལ༌ མག༌ ཏངས༌ཏེ༌ ཁོང༌གུན༌ནི༌ ནས༌ས༌ མེད༌ཁན༌ ཅོ༌ཅེས༌སི༌ སྤེ༌ར༌ མ༌ཏངས༌།
34 རུ༌བེན༌ དང༌ གཱད༌པ༌གུན༌ནི༌ ཆོད༌ཁྲི༌བོའ༌ “སྤང༌པོ༌” མིང༌ ཏགས༌ཏེ༌ ཟེརས༌, “འི༌བོ༌ ང༌ཞའ༌ དང༌ ཁོང༌གུན༌ནི༌ པར༌ལ༌ ཡ༌ཝ༌ ང༌ཞ༌གུན༌ནི༌ དཀོན༌མཆོག༌ ཞུགས༌ཁན༌ནི༌ སྤང༌པོ༌ ཨིན༌།”