23
ཡོ༌ཤུའེ༌ སྟིང༌ཇུག༌གི༌ ལབ༌ཞ༌།
23:1-16
1 ཡ༌ཝའེ༌ ཨིས༌ར༌ཨེལ༌པ༌གུན༌ལ༌ ཁོང༌གུན༌ནི༌ གྲ༌འོ༌ ཚང༌མའེ༌ ཀ༌ནེ༌ ཞི༌དེ༌ སལ༌ཏེ༌ ལོ༌ མང༌པོའེ༌ སྟིང༌ནེ༌, ཡོ༌ཤུའ༌ མ༌རྒད༌པོ༌ སོང༌ཏེ༌ ཡོད༌པིན༌།
2 ཁོང༌ངི༌ ཨིས༌ར༌ཨེལ༌པའེ༌ སྤོན༌བོ༌, འུ༌སྐྱོང༌, ཁྲིམ༌སྤོན༌ དང༌ མག༌མི༌ སྤོན༌བོ༌ ཚང༌མ༌ བོདས༌ ཡང༌ ཟེརས༌, “ང༌ ལོ༌ མང༌པོ༌ སོང༌ཏེ༌ སྲན༌ཏྲེ༌ སྒས༌ཏེ༌ ཨིན༌ནོག༌
3 ཡ༌ཝའེ༌ ཁྱོ༌ཞ༌གུན༌ནི༌ ཏོན༌ལ༌ གྱལ༌ཁམས༌ ཚང༌མ༌ ཉམ༌པོ༌ ཛད༌ཁན༌བོ༌ ཁྱོ༌ཞ༌གུན༌ནི༌ ཐོང༌ཏེ༌ ཨིན༌ནོག༌། ང༌དང༌ངི༌ གྲ༌འོ༌གུན༌ལ༌ ནོལ༌ལ༌ ཛད༌ཁན༌བོ༌ ཡ༌ཝ༌ ང༌དང༌གུན༌ནི༌ དཀོན༌མཆོག༌ ཞུགས༌ཏེ༌ ཨིན༌།
4 ངའེ༌ ཁྱོ༌ཞ༌གུན༌ལ༌ ནོར༌སྐལ༌ལི༌ ཚུལ༌ལ༌ ཤར༌ ཆོགས༌སི༌ ཡོར༌དཱན༌ ལྩངས༌པོ༌ནེ༌ ཏངས༌ཏེ༌ ནུབ༌ ཆོགས༌ལ༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ བགོས༌ཏེ༌ ཏང༌ཁན༌ནི༌ ས༌ཀྱད༌ ང༌ཡོག༌ག༌ ཁྱོང༌ཁན༌ ཡང༌ མ༌ ཁྱོང༌ཁན༌ ཚང༌མ༌ ལྟོས༌།
5 ཏེ༌ ས༌ཀྱད༌ ཚང༌མ༌ ཁྱོ༌ཞའེ༌ གྱུར༌ཨིན༌ ཅིའ༌ཟེར༌ན༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཏེ༌ ནང༌ང༌ དུག༌ཁན༌ ཚང༌མ༌ ཕིང༌ང༌ ཛད༌ཨིན༌། ཡ༌ཝ༌ ང༌དང༌ངི༌ དཀོན༌མཆོག༌གི༌ ཞལ༌ཆད༌ ཛད༌ཁན༌ ནང༌ཞིན༌ ཁྱོ༌ཞ༌གུན༌ནི༌ ཏེ༌ ས༌ཀྱད༌གུན༌ ལེན༌ཨིན༌།”
6 “མོ༌ཟེས༌སི༌ ཁྲིམས༌སི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཁན༌ ཚང༌མ༌ ཁའ༌ ཉན༌ཅེས༌ ཏན༌ཏན༌ ཅོས༌, ཏེ༌གུན༌ནེ༌ གྱུར༌ཏེ༌ ཡས༌པ༌ ཡ༌ ཡོ༌མ༌ མ༌ཆ༌།
7 འི༌ ས༌ཀྱད༌དི༌ ནང༌ང༌ དུག༌ཁན༌ མི༌གུན༌ ཉམ༌པོ༌ བྲེལ༌ མི༌བོར༌ཅེས༌ ཏན༌ཏན༌ ཅོས༌ཏེ༌ ཁོང༌གུན༌ནི༌ ལྷ༌ལྷ༌མོ༌ གུན༌ནི༌ མིང༌ ཡ༌ ཏེ༌གུན༌ནི༌ མིང༌ངི༌ ནང༌ང༌ ནའ༌ མ༌ཁུར༌ ཡང༌ ཏེ༌གུན༌ལ༌ ཞབས༌ཏོག༌ མ༌ཞུ༌ ཡ༌ ཅོལ༌ མ༌ཅོལ༌།
8 ཨིན༌ནའང༌ ཡ༌ཝ༌ ང༌དང༌ངི༌ དཀོན༌མཆོག༌ག༌ སྟན༌པོ༌ ཐམས༌ཏེ༌ དུག༌ ཀ༌ཟུག༌ ཁྱོ༌ཞ༌གུན༌ནི༌ དག༌ས༌ ཚག༌པ༌ ཅོ༌ཨིན༌ ཨིན༌ནོག༌།”
9 “ཡ༌ཝའེ༌ གྱལ༌ཁག༌ ཝང༌ཅན༌ དང༌ ཤུགས༌ཅན༌ ཚང༌མ༌ ཁྱོ༌ཞ༌གུན༌ནི༌ ཕིའ༌ ཕིངས༌ཏེ༌ ཁྱོ༌ཞའ༌ ཏང༌ང༌ ཛདས༌། དག༌ས༌ ཚག༌པ༌ ཁྱོ༌ཞའེ༌ གྱབ༌གལ༌ལ༌ གྱལ༌ཁམས༌ ཅིག༌གའང༌ ལངས༌ མ༌ཉན༌ན༌ ཨིན༌ནོག༌།
10 མག༌གི༌ ནང༌ང༌ ཁྱོ༌ཞའ༌ རེ༌རེའེ༌ གྲ༌འོ༌ སྟོང༌ ཤོར༌ ཅུག༌ཨིན༌ ཅིའ༌ཟེར༌ན༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌གི༌ ཁྱོ༌ཞའེ༌ ཏོན༌ལ༌ ནོལ༌ལ༌ ཛད༌ཨིན༌ ཀ༌ཟུག༌ ཁོང༌ངི༌ ཞལ༌ཆད༌ ཛད༌ཏེ༌ ཨིན༌པིན༌།
11 ཏེ༌བོའེ༌ཕིའ༌ ཡ༌ཝ༌ ཁྱོ༌ཞ༌རང༌ངི༌ དཀོན༌མཆོག༌ག༌ ཅམས༌པ༌ ཅོ༌ཅེས༌ ཏན༌ཏན༌ ཅོས༌།”
12 “ཨིན༌ནའང༌ ཀལ༌ཏེས༌ ཁྱོ༌ཞའ༌ ཁོང༌ནེ༌ གྱུར༌ཏེ༌ འི༌ གྱལ༌ཁམས༌སི༌ མི༌ མ༌ཕིང༌ང༌ ལུས༌ཁན༌གུན༌ནི༌ ལུག༌སྲོལ༌ ཡང༌ ཁོང༌གུན༌ ཉམ༌པོ༌ ན༌མ༌ ཅོས༌ཏེ༌ བྲེལ༌ བོར༌ན༌,
13 ཏེ༌ནེ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཁྱོ༌ཞའེ༌ ཕིའ༌ ཁོང༌གུན༌ འི༌ ས༌ཀྱད༌དི༌ ནང༌ནེ༌ ཕིང༌ང༌ མི༌ ཛད༌ཅེས༌པོ༌ སལ༌པོ༌ ཧ༌གོ༌གོས༌ མ༌ཚད༌ ཁོང༌གུན༌ ཁྱོ༌ཞའ༌ ཁད༌ཅེས༌སི༌ སྙི༌འུ༌, ཁྱོ༌ཞའེ༌ གྱབ༌བ༌ ཕོག༌ཁན༌ ལྟལ༌ཅགས༌ ཡང༌ ཁྱོ༌ཞའེ༌ མིག༌གི༌ ནང༌ང༌ ཙེར༌མང༌ ཙོགས༌ གྱུར༌ཨིན༌ ཡང༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཁྱོ༌ཞའ༌ སལ༌ཁན༌ནི༌ འི༌ ས༌ཀྱད༌ ཟང༌པོའེ༌ ནང༌ནེ༌ ཁྱོ༌ཞ༌གུན༌ ཕིང༌ང༌ ཛད༌ཨིན༌།”
14 “ཏ༌ ང༌ ཤི༌ཅེས༌སི༌ ཏུས༌ ལེབ༌ཏེ༌ ཨིན༌ནོག༌། ཁྱོ༌ཞ༌གུན༌ལ༌ སྙིང༌ནེ༌ ཧ༌གོ༌ཏེ༌ ཨིན༌ནོག༌ ང༌དང༌ངི༌ དཀོན༌མཆོག༌ ཡ༌ཝའེ༌ ཞལ༌ཆད༌ ཛད༌ཁན༌ ཟང༌པོ༌ ཅིག༌གའང༌ དྲན༌དྲའ༌ མ༌གྲུབ༌བ༌ མ༌ལུས༌། ཚང༌མ༌ དྲན༌དྲའ༌ གྲུབ༌ཏེ༌ ཨིན༌ནོག༌།
15 ཨིན༌ནའང༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌གི༌ ཞལ༌ཆད༌ ཛད༌ཁན༌ ཚང༌མ༌ དྲན༌དྲའ༌ གྲུབ༌བ༌ ཙོགས༌ལ༌ ཁོང༌ངི༌ ཁྱོ༌ཞ༌གུན༌ནི༌ཀ༌ ངན༌པ༌ ཚང༌མ༌ ཇུང༌ཅེས༌སི༌ སྤང༌པུད༌ད༌ ཛད༌ཁན༌གུན༌ནའང༌ དྲན༌དྲའ༌ གྲུབ༌ཨིན༌ ནམ༌ཚག༌པ༌ དཀོན༌མཆོག༌གི༌ ཁྱོ༌ཞའ༌ སལ༌ཁན༌ནི༌ འི༌ ས༌ཀྱད༌ ཟང༌པོའེ༌ ནང༌ནེ༌ ཁྱོ༌ཞ༌གུན༌ མེད༌ཁན༌ མི༌ཛད༌།
16 ཀལ༌ཏེས༌ ཡ༌ཝའེ༌ བཀའ༌ སལ༌ཁན༌གུན༌ ཅགས༌ཏེ༌ ཁྱོ༌ཞ༌གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ ཡ༌ ཞབས༌ཏོག༌ ཞུས༌ཏེ༌ ཁོང༌གུན༌ལ༌ ཆག༌ ཕུལ༌ན༌ ཁོང༌ངི༌ ཐུག༌ སྲོ༌ ཁྱོ༌ཞ༌གུན༌ནི༌ཀ༌ ཀྲག༌པོ༌ མེ༌ བར༌ཁན༌ ཙོགས༌ བབས༌ཨིན༌ ཡང༌ ཁྱོ༌ཞ༌གུན༌ ཁོང༌ངི༌ སལ༌ཁན༌ནི༌ འི༌ ས༌ཀྱད༌ ཟང༌པོ༌ ནང༌ནེ༌ མ༌ གྱོགས༌པ༌ མེད༌ཁན༌ ཆེན༌།”