4
དྲན༌སོའེ༌ ཕིའ༌ རྡོའ༌ རྩིགས༌།
4:1-24
1 མི༌ཚང༌མ༌ ཡོར༌དཱན༌ ལྩངས༌པོ༌ རྒལ༌ ཚར༌ར༌ཅིག༌ ཡ༌ཝའེ༌ ཡོ༌ཤུའ༌ མོལས༌,
2 “ཏ༌ མི༌ རྕུག༌ཉིས༌ ལྡོམ༌, སྡེ༌ རེ༌རེ༌ནེ༌ མི༌ རེ༌རེ༌,
3 ཡང༌ ཁོང༌གུན༌ལ༌, ‘བླ༌མ༌གུན༌ ལངས༌ཏེ༌ ཡོད༌སའེ༌ ཡོར༌དཱན༌ ལྩངས༌པོའེ༌ སྐྱིལ༌ནེ༌ རྡོའ༌ རྕུག༌ཉིས༌ ཁུར༌ཏེ༌ ང༌དང༌གུན༌ དི༌རིང༌ ཚན༌ལ༌ དུག༌སའེ༌ ནས༌སའེ༌ཀ༌ ཁྱོང༌’ ཟེར༌།”
4 ཏེ༌ནེ༌ ཡོ༌ཤུའེ༌ མི༌ རྕུག༌ཉིས༌, སྡེ༌ རེ༌རེ༌ནེ༌ མི༌ རེ༌རེ༌ ལྡམས༌ཁན༌གུན༌ བོད༌ཏེ༌ ཁྱོངས༌།
5 ཁོའེ༌ ཁོང༌གུན༌ལ༌ ཟེརས༌, “ཡོར༌དཱན༌ནི༌ སྐྱིལ༌ལ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཆད༌དོན༌ནི༌ སྒམ༌ ཡོད༌ས༌ སོང༌ཏེ༌ ཁྱོ༌ཞའ༌ རེ༌རེ༌ རྡོའ༌ རེ༌རེ༌ སྤུང༌པའེ༌ཀ༌ ཁུར༌ཏེ༌ ཁྱོང༌། ཨིས༌ར༌ཨེལ༌ལི༌ སྡེའེ༌ རེ༌རེའེ༌ ཕིའ༌ རྡའ༌ རེ༌རེ༌།
6 འི༌ རྡོའ༌གུན༌ནི༌ ཡ༌ཝའེ༌ ང༌དང༌ངི༌ ཕིའ༌ ཛད༌ཁན༌ ཚང༌མ༌ ཨིད༌ཏུ༌ སྐུལ༌ཨིན༌། མ༌ཡོངས༌པའེ༌ ཏུས༌སི༌ ནང༌ང༌ ནམ༌ ང༌དང༌ངི༌ ཕྲུ༌གུ༌གུན༌ནི༌, ‘འི༌ རྡོའ༌གུན༌ནི༌ ཏོན༌ ཅི༌ ཨིན༌ནོག༌?’ ཟེར༌ཏེ༌ ཏྲི༌ན༌,
7 ཁྱོ༌ཞའེ༌ ཁོང༌གུན༌ལ༌ ཟེར༌, ‘ཡ༌ཝའེ༌ ཆད༌དོན༌ནི༌ སྒམ༌མི༌ དུན༌ལ༌ ཡོར༌དཱན༌ ལྩངས༌པོ༌ གྱུག༌མ༌གྱུག༌ག༌ དུགས༌། བླ༌མ༌གུན༌ནི༌ ཆད༌དོན༌ནི༌ སྒམ༌ ཁུར༌ཏེ༌ ཆའ༌ཅིག༌ ལྩངས༌པོའེ༌ ཆུ༌ གྱུག༌མ༌གྱུག༌ག༌ དུགས༌། ཨིས༌ར༌ཨེལ༌པ༌གུན༌ནི༌ ཕིའ༌ འི༌ རྡོའ༌གུན༌ ཏུས༌གྱུན༌ ལུས༌ཤེས༌སི༌ དྲན༌སོའེ༌ སྟགས༌ཤིག༌ ཨིན༌ནོག༌།’ ”
8 ཡ༌ཝའེ༌ ཡོ༌ཤུའ༌ བཀའ༌ ཏང༌ཁན༌ ནང༌ཞིན༌ ཏེ༌ མི༌གུན༌ནི༌ ཡོར༌དཱན༌ ལྩངས༌པོའེ༌ སྐྱིལ༌ནེ༌ རྡོའ༌ རྕུག༌ཉིས༌, སྡེ༌ རེ༌རེ༌ ཕིའ༌ རྡའ༌ རེ༌རེ༌ ཁུར༌ཏེ༌ ཁོང༌གུན༌ ཚན༌ལ༌ དུག༌སའེ༌ ནས༌སའེ༌ཀ༌ ཁྱོངས༌ ཡང༌ ཏེ༌གུན༌ རྩིགས༌ཏེ༌ དྲན༌སོའེ༌ སྟགས༌ ཅོས༌།
9 ཡོར༌དཱན༌ ལྩངས༌པོའེ༌ སྐྱིལ༌ལ༌ ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ ལངས༌ཏེ༌ དུག༌སའེ༌ཀ༌ ཡོ༌ཤུའེ༌ ཞན༌ རྡོའ༌ རྕུག༌ཉིས༌ སྤུངས༌། དག༌སའང༌ ཏེ༌གུན༌ ཏེན༌ན༌ ནས༌སའེ༌ཀ༌ ཡོད༌ཏེ༌ ཨིན༌ནོག༌།
10 ཡ༌ཝའེ༌ མོ༌ཟེས༌ གྱུད༌ཏེ༌ ཡོ༌ཤུའ༌ སལ༌ཁན༌ བཀའ༌ ཚང༌མ༌ གྲུབ༌གྲུབ༌ ཚག༌པ༌ ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ ཡོར༌དཱན༌ ལྩངས༌པོའེ༌ སྐྱིལ༌ལ༌ ལངས༌ཏེ༌ དུགས༌། ཏེན༌ན༌ ཏུས༌ལ༌ མི༌གུན༌ ས༌སྐམ༌པོའེ༌ ཀ༌ནེ༌ གྱོགས༌པ༌ ལྩངས༌པོ༌ རྒལ༌ཏེ༌ སོང༌།
11 མི༌ ཚང༌མ༌ འ༌ངོ༌ ཆོགས༌ལ༌ ཁམ༌ཟང༌ ལེབས༌ཏེ༌ ལྟེན༌ཡོད༌ ཟ༌ནེ༌ ཡ༌ཝའེ༌ སྒམ༌ ཁུར༌ཁན༌ བླ༌མ༌གུན༌ནའང༌ འ༌ངོ༌ ཆོགས༌ལ༌ བིང༌ཏེ༌ ཡོངས༌།
12 མོ༌ཟེས༌སི༌ བཀའ༌ ནང༌ཞིན༌ རུ༌བེན༌ དང༌ གཱད༌ སྡེ༌ ཡང༌ མ༌ནས༌སའེ༌ སྡེ༌ ཕེད༌དི༌ མག༌མི༌གུན༌ མག༌ཆ༌ ཁུར༌ཏེ༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ཅོས༌ཏེ༌ ཡོར༌དཱན༌ ལྩངས༌པོ༌ རྒལ༌ཏེ༌ འ༌ངོ༌ ཆོགས༌ལ༌ ཡོངས༌།
13 མག༌ཆ༌ ཁུར༌ཁན༌ནི༌ མག༌མི༌ ནོལ༌ ཆོག༌ཆོག༌ ཡོད༌ཁན༌ ཧ༌ལམ༌ 40,000 ལྩངས༌པོ༌ རྒལ༌ཏེ༌ འ༌ངོ༌ ཆོགས༌ལ༌ ཡེ༌རི༌ཀོའེ༌ ཐང༌ང༌ སོང༌ ཡང༌ ཁོང༌གུན༌ ཉམ༌པོ༌ ཡ༌ཝ༌ ཞུགས༌ཏེ༌ ཡོད༌པིན༌།
14 ཏེན༌ན༌ ཞག༌ག༌ ཡ༌ཝའེ༌ ཨིས༌ར༌ཨེལ༌པ༌གུན༌ནི༌ དུན༌ལ༌ ཡོ༌ཤུའ༌ སྤལ༌ ཐོབ༌ཅུག༌ག༌ ཛདས༌། ཡང༌ ཁོང༌གུན༌ནི༌ ཡོ༌ཤུའ༌, མི༌ཚེའེ༌ གང༌པོ༌ རྩི༌ཝ༌ སྟནས༌ ཀ༌ཟུག༌ ཁོང༌གུན༌ནི༌ མོ༌ཟེས༌ལ༌ སྟན༌ཏེ༌ ཨིན༌པིན༌།
15 ཡ༌ཝའེ༌ ཡོ༌ཤུའ༌ མོལས༌,
16 “ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ལ༌ ལྩངས༌པོའེ༌ ནང༌ནེ༌ བིང༌ཏེ༌ ཡོང༌ཅེས༌ལ༌ བཀའ༌ ཏོང༌།”
17 ཏེ༌ནེ༌ ཡོ༌ཤུའེ༌ བླ༌མ༌གུན༌ལ༌ བིང༌ཏེ༌ ཡོང༌ཅེས༌ལ༌ བཀའ༌ ཏངས༌།
18 ཡ༌ཝའེ༌ ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ ལྩངས༌པོ༌ ནང༌ནེ༌ ཕི༌ལོག༌ག༌ བིང༌ཏེ༌ ཡོངས༌ ཡང༌ ཁོང༌གུན༌ནི༌ རྐང༌པ༌ ལྩངས༌པོའེ༌ ཐའ༌མའེ༌ ས༌ཀྱད༌དི༌ཀ༌ བོར༌ར༌ཅིག༌ ཡོར༌དཱན༌ ལྩངས༌པོ༌ སྔུན༌མ༌ ཙོགས༌ལ༌ གྱུགས༌ ཡང༌ ཆུ༌ ཐའ༌མ༌ནེ༌ ཐལ༌ཏེ༌ སོང༌།
19 ཟླ༌ཝ༌ ཏང༌པོའེ༌ ཞག༌ 10 པའེ༌ ཞག༌ག༌ མི༌ཚང༌མ༌ ཡོར༌དཱན༌ནེ༌ སོང༌ཏེ༌ ཡེ༌རི༌ཀོའེ༌ ཤར༌ ཆོགས༌ལ༌ ཡོད༌ཁན༌ གིལ༌གལ༌ ནས༌སའེ༌ ནང༌ང༌ ཀུར༌ ཙུགས༌ཏེ༌ དུགས༌།
20 ཡོ༌ཤུའེ༌ ཡོར༌དཱན༌ ལྩངས༌པོའེ༌ ནང༌ནེ༌ ཁྱོང༌ཁན༌ རྡོའ༌ རྕུག༌ཉིས༌པོ༌ འིན༌ན༌ གིལ༌གལ༌ལི༌ ནས༌སའེ༌ཀ༌ རྩིགས༌ཏེ༌ བོརས༌།
21 ཏེ༌ནེ༌ ཡོ༌ཤུའེ༌ ཨིས༌ར༌ཨེལ༌པ༌གུན༌ལ༌ ཟེརས༌, “མ༌ཡོངས༌པའེ༌ ཏུས༌སི༌ ནང༌ང༌ ཁྱོ༌ཞའེ༌ ཕྲུ༌གུ༌གུན༌ནི༌ ‘འི༌ རྡོའ༌ རྩིགས༌ཁན༌བོའེ༌ ཏོན༌ ཅི༌ ཨིན༌ནོག༌?’ ཟེར༌ཏེ༌ ཏྲི༌ན༌
22 ཁོང༌གུན༌ལ༌ ཨིས༌ར༌ཨེལ༌པ༌གུན༌ ས༌སྐམ༌པོའེ༌ ཀ༌ནེ༌ ཡོར༌དཱན༌ ལྩངས༌པོ༌ རྒལ༌ཏེ༌ ཡོངས༌ཁན༌བོ༌ ཤོད༌།
23 ང༌དང༌ ཚང༌མ༌ རྒལ༌ཏེ༌ ཆ༌ ཚར༌ཚར༌ ཚག༌པ༌ ང༌དང༌ངི༌ མིག༌གི༌ དུན༌ལ༌ ང༌དང༌གུན༌ནི༌ དཀོན༌མཆོག༌ ཡ༌ཝའེ༌ ལྩངས༌པོ༌ སྐམ༌པོ༌ བོར༌ར༌ ཛདས༌། ཡ༌ཝའེ༌ ཡོར༌དཱན༌ ལྩངས༌པོ༌ སྐམ༌ ཤུག༌ག༌ ཛདས༌ ཀ༌ཟུག༌ ང༌དང༌ངི༌ ཕ༌མ༌གུན༌ནི༌ མིག༌གི༌ དུན༌ལ༌ ཁོང༌གུན༌ རྒལ༌ཏེ༌ ཆ༌ ཚར༌ཚར༌ ཡ༌ཝའེ༌ ཚོ༌ མར༌པོ༌ སྐམས༌ ཤུག༌ག༌ ཛདས༌།
24 ཇིག༌རྟེན༌པ༌ ཚང༌མའེ༌ ཁོང༌ སྟོབས༌ཤུགས༌ཅན༌ ཨིན༌ཁན༌བོ༌ ཧ༌གོ༌ཅེས༌ ཡང༌ ཏུས༌གྱུན༌ ཁྱོ༌ཞའེ༌ ཁོང༌ངི༌ ཇིགས༌སི༌ ནང༌ང༌ མི༌ཚེའེ༌ པུད༌ཅེས༌ལ༌ ཡ༌ཝའེ༌ ཏེ༌བོ༌ ཅོའ༌ ཛདས༌།”