5
གིལ༌གལ༌ལི༌ ནང༌ང༌ བུ༌ཚ༌གུན༌ལ༌ སུན༌ནད༌ ཅོས༌།
5:1-13
1 ཏ༌ ཡོར༌དཱན༌ནི༌ ནུབ༌ ཆོགས༌ལ༌ ཡོད༌ཁན༌ ཨ༌མོར༌པའེ༌ གྱལ༌པོ༌ ཚང༌མའ༌ ཡང༌ ཚོའེ༌ ཐའ༌མ༌ དུག༌ཁན༌ ཀེ༌ནན༌པ༌ གྱལ༌པོ༌ ཚང༌མའེ༌, ཡ༌ཝའེ༌ ཡོར༌དཱན༌ ལྩངས༌པོ༌ སྐམས༌ཅུག༌ག༌ ཛད༌ཏེ༌ ཨིས༌ར༌ཨེལ༌པ༌གུན༌ རྒལ༌ཏེ༌ ཡོང༌ཁན༌བོ༌ ཚོར༌ར༌ཅིག༌ ཁོང༌གུན༌ མ༌ སྲན༌ཏྲེ༌ ཇིགས༌ ཡང༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ནོལ༌ཅེས༌སི༌ སྤོས༌པ༌ ཆགས༌།
2 ཏེན༌ན༌ ཏུས༌ལ༌ ཡ༌ཝའེ༌ ཡོ༌ཤུའ༌ མོལས༌, “རྡོའ༌ སྲ༌མོའེ༌ ཀྲི༌གུན༌ ཅོས༌ཏེ༌ ཨིས༌ར༌ཨེལ༌པ༌ མི༌རབས༌ ཉིས༌པའེ༌ བུ༌ཚ༌གུན༌ལ༌ སུན༌ནད༌ ཅོས༌།”
3 ཏེན༌ན༌བོའེ༌ཕིའ༌ ཡོ༌ཤུའེ༌ རྡོའ༌ སྲ༌མོའེ༌ ཀྲི༌གུན༌ ཅོས༌ཏེ༌ གི༌བེ༌འད༌ ཧ༌ར༌ལོད༌དི༌ ནང༌ང༌ ཨིས༌ར༌ཨེལ༌པ༌ བུ༌ཚ༌ ཚང༌མའ༌ སུན༌ནད༌ ཅོས༌།
4 ཁོང༌གུན༌ལ༌ སུན༌ནད༌ ཅོ༌ ཅུགས༌ ཅིའ༌ཟེར༌ན༌ ཨི༌ཇིབ༌ནེ༌ བིངས༌ཏེ༌ ཡོངས༌ཏེ༌ སྟིང༌ནེ༌ མག༌གི༌ ནང༌ང༌ ནོལ༌ ཉན༌ཅེས༌ཅན༌ བུ༌ཚ༌ ཚང༌མ༌ ཐང༌སྟོང༌ངི༌ ནང༌ང༌ ཤི༌ཏེ༌ ཨིན༌པིན༌།
5 ཨི༌ཇིབ༌ནེ༌ ཡོངས༌ཁན༌ བུ༌ཚ༌ ཚང༌མའ༌ སུན༌ནད༌ ཅོས༌ཏེ༌ ཨིན༌ནའང༌ ཐང༌སྟོང༌ང༌ བེས༌སི༌ ནང༌ང༌ ཡོད༌ཏུས༌ སྐྱེས༌ཁན༌ བུ༌ཚ༌ ཚང༌མའ༌ སུན༌ནད༌ མ༌ཅོའ༌ ཨིན༌པིན༌།
6 ཨིས༌ར༌ཨེལ༌པ༌གུན༌ ཐང༌སྟོང༌ངི༌ ནང༌ང༌ ལོ༌ ཞིབ༌ཅུ༌ ཁོར༌ཨིན༌ ལུས༌ ཡང༌ ཨི༌ཇིབ༌ནེ༌ བིངས༌ཏེ༌ ཡོང༌ཁན༌ མག༌གི༌ ནང༌ང༌ ནོལ༌ ཉན༌ཅེས༌ཅན༌ བུ༌ཚ༌ ཚང༌མ༌ ཡ༌ཝའེ༌ ཁའ༌ མི༌ཉན༌ཅེས༌པའེ༌ ཤི༌ ཅིའ༌ཟེར༌ན༌ ཡ༌ཝའེ༌ ང༌དང༌ངི༌ ཕ༌མེས༌པོ༌གུན༌ལ༌ འོ༌མ༌ དང༌ རང༌རྩི༌ གྱུག༌ཁན༌ནི༌ ས༌ཆའ༌ ང༌དང༌ང༌ སལ༌ཨིན༌ མོལ༌ཏེ༌ ཆད༌དོན༌ ཛད༌ཁན༌ནི༌ ཏེ༌ ས༌ཆའ༌, ཁོང༌གུན༌ལ༌ མི༌ཐོང༌ མོལ༌ཏེ༌ ཡ༌ཝའེ༌ ནའ༌ ཁུར༌ར༌ ཛདས༌།
7 ཏེ༌ ཁའ༌ མ༌ཉན༌ཁན༌གུན༌ནི༌ བུ༌ཚ༌གུན༌ལ༌ ཡོ༌ཤུའེ༌ སུན༌ནད༌ ཅོ༌ཅུགས༌། ཐང༌སྟོང༌ངི༌ ནང༌ང༌ བེས༌ལ༌ ཡོད༌ཏུས༌ ཁོང༌གུན༌ལ༌ སུན༌ནད༌ མ༌ཅོའ༌ ཨིན༌པིན༌།
8 བུ༌ཚ༌ ཚང༌མའ༌ སུན༌ནད༌ ཅོས༌ཏེ༌ སྟིང༌ནེ༌ ཁོང༌ ཚང༌མ༌ ཕན༌ཕན༌, ཏེན༌ན༌ ནས༌སའེ༌ཀ༌ ངལ༌ཚོས༌ཏེ༌ དུགས༌།
9 ཏེ༌ནེ༌ ཡ༌ཝའེ༌ ཡོ༌ཤུའ༌ མོལས༌, “ཨི༌ཇིབ༌བི༌ ནང༌ང༌ ཚེ༌ཡོག༌ག༌ དུག༌གོས༌ཁན༌ནི༌ ཁྲེལ༌བ༌བོ༌ དི༌རིང༌ ངའེ༌ ཁྱོ༌ཞའེ༌ ཀ༌ནེ༌ ཐེན༌ནད༌།” ཏེ༌བོའེ༌ཕིའ༌ ཏེ༌ ས༌ཀྱད༌པོའ༌ དག༌སའང༌ གིལ༌གལ༌ ཟེར༌ར༌ནོག༌།
10 ཏེན༌ན༌ ཟླ༌ཝའེ༌ ཞག༌ 14 པའེ༌ ཕི༌ཏོག༌ ཀུར༌ ཙུགས༌ཏེ༌ དུག༌ས༌ ཡེ༌རི༌ཀོའེ༌ སྤང༌ཐང༌ངི༌ གིལ༌གལ༌ ནས༌སའེ༌ ནང༌ང༌ ཨིས༌ར༌ཨེལ༌པ༌གུན༌ནི༌ པེ༌སག༌གི༌ ཏུས༌ཆེན༌ རྩིས༌།
11 སྟིང༌མ༌ ཞག༌ག༌ ཁོང༌གུན༌ནི༌ ཏེན༌ན༌ ས༌ཀྱད༌ནེ༌ སྨིན༌ཁན༌ སྙེ༌མ༌ སྲགས༌ཁན༌ དང༌ སྐྱུར༌ མེད༌ཁན༌ནི༌ ཏ༌གི༌ ཟོས༌།
12 ཨིས༌ར༌ཨེལ༌པ༌གུན༌ནི༌ ཏེ༌ ནས༌སའེ༌ སྟོན༌ཐོག༌ ཟའེ༌ ཞག༌ནེ༌ ཕར༌ལ༌ ནམ༌ཁའ༌ནེ༌ མན༌ན༌ མ༌བབས༌, ཁོང༌གུན༌ནི༌ ཏེ༌བོ༌ ཡང༌སྐྱར༌ མ༌ནེ༌ མ༌ཟོས༌། ཁོང༌གུན༌ནི༌ ཏེན༌ན༌ ས༌ཀྱད༌དི༌ ནང༌ང༌ སྨིན༌ཁན༌ སྟོན༌ཐོག༌ ཟོས༌།
ཡོ༌ཤུའ༌ དང༌ ཡ༌ཝའེ༌ མག༌མི༌ སྤོན༌བོ༌།
5:13-15
13 ཡོ༌ཤུའ༌ ཡེ༌རི༌ཀོའེ༌ གྱལ༌སའེ༌ ཉེ༌མོའ༌ ཡོད༌ ཟ༌ནེ༌ ཁོའེ༌ ཀེན༌ལ༌ ལྟས༌པ༌ ཁོའ༌, ལག༌པའེ༌ ནང༌ང༌ ར༌འི༌ ཁུར༌ཁན༌ མི༌ཞིག༌ ཁོའེ༌ དུན༌ལ༌ ལངས༌ཏེ༌ ཐོང༌། ཡོ༌ཤུའ༌ ཁོ༌ ཡོད༌ས༌ སོང༌ཏེ༌ ཏྲིས༌, “ཁྱོ༌རང༌ ང༌ཞའེ༌ ཆོགས༌ལ༌ ཨིན༌ན༌ ཡ༌ གྲ༌འོའེ༌?”
14 མི༌བོའེ༌ ལན༌ཏངས༌, “སུའི༌ ཆོགས༌ལའང༌ མན༌། ང༌ ཡ༌ཝའེ༌ མག༌མི༌གུན༌ནི༌ སྤོན༌བོ༌ ཨིན༌།” ཏེ༌ནེ༌ ཡོ༌ཤུའེ༌ སྐུས༌པ༌ སྟན༌ཏེ༌ ཁོང༌ངི༌ ཞབས༌སི༌ དུན༌ལ༌ ཆག༌ཕུལས༌ ཡང༌ ཟེརས༌, “ངའེ༌ སྤོན༌བོ༌, ཉེ༌རང༌ངི༌ ཡོག༌པོའེ༌ ཕིའ༌ ཅི༌ ལོན༌ ཁྱོང༌ང༌ ཛད༌ཏེ༌ ཨིན༌?”
15 ཡ༌ཝའེ༌ མག༌མི༌ སྤོན༌བོའེ༌ ལན༌སལས༌, “ཁྱོ༌རང༌ངི༌ པ༌བུ༌ ཕུད༌ ཅིའ༌ཟེར༌ན༌ ཁྱོ༌རང༌ ལངས༌ཏེ༌ ཡོད༌སའེ༌ ནས༌ས༌ ཏམ༌པ༌ ཨིན༌།” ཡོ༌ཤུའེ༌ ཁོང༌ངི༌ མོལ༌ཁན༌བོ༌ ཅོས༌།