6
ཡེ༌རི༌ཀོའེ༌ གྱལ༌སའེ༌ གྱང༌སྐོར༌ རྡིབས༌།
6:1-27
1 ཏ༌ ཡེ༌རི༌ཀོའེ༌ གྱལ༌སའེ༌ གྱས༌སྒོ༌ སྟན༌པོ༌ ཅུགས༌ཏེ༌ སུའང༌ གྱལ༌ས༌ནེ༌ ཕི༌ལོག༌ ཡ༌ ནང༌ང༌ ཆ༌ཡོང༌ མ༌ཏངས༌ ཅིའ༌ཟེར༌ན༌ ཁོང༌གུན༌ ཨིས༌ར༌ཨེལ༌པ༌གུན༌ལ༌ ཇིགས༌ཏེ༌ ཡོད༌པིན༌།
2 ཡ༌ཝའེ༌ ཡོ༌ཤུའ༌ མོལས༌, “ངའེ༌ ཡེ༌རི༌ཀོ༌ གྱལ༌ས༌, ཏེ༌བོའེ༌ གྱལ༌པོ༌ དང༌ མག༌མི༌གུན༌ ཁྱོ༌རང༌ངི༌ ལག༌ག༌ སྟད༌ཨིན༌།
3 ཁྱོ༌རང༌ དང༌ ཁྱོ༌རང༌ངི༌ མག༌མི༌ ཚང༌མའེ༌ ཞག༌མ༌ དྲུག༌, གྱལ༌སའ༌ ཞག༌ཏང༌ ལན༌ ཅིག༌ སྐོར༌ར༌ ཏོང༌།
4 བླ༌མ༌ རྡུན༌ལ༌ ར༌ཅོའེ༌ ཏུང༌ ཁུར༌ཏེ༌ ཆད༌དོན༌ནི༌ སྒམ༌མི༌ སྔུན༌ལ༌ གྲུལ༌ཅུག༌། ཞག༌ རྡུན༌པའེ༌ ཞག༌ག༌ བླ༌མ༌གུན༌ནི༌ ཏུང༌ ཕུ༌ཨིན༌ ཁྱོ༌ཞ༌གུན༌ནི༌ གྱལ༌སའ༌ ལན༌ རྡུན༌ སྐོར༌ར༌ ཏང༌གོས༌།
5 བླ༌མ༌གུན༌ནི༌ ཏུང༌སྐད༌ རིང༌མོ༌ ཕུའ༌ ཚོར༌ར༌ཅིག༌ ཁྱོ༌ཞའ༌ ཚང༌མའེ༌ ཀུ༌ཅོ༌ སྲན༌ཏྲེ༌ ཏང༌གོས༌། ཏེ༌ནེ༌ གྱལ༌སའེ༌ རྩིག༌པ༌ རྡིབས༌ཏེ༌ ཁྱོ༌ཞའ༌ ཚང༌མ༌ ནོལ༌ཅེས༌ལ༌ གྱལ༌སའེ༌ ནང༌ང༌ རྒྱུགས༌ཏེ༌ ཆ༌ཉན༌ཨིན༌།”
6 ཡོ༌ཤུའེ༌ བླ༌མ༌གུན༌ བོད༌ཏེ༌ ཁྱོངས༌ ཡང༌ ཟེརས༌, “ཡ༌ཝའེ༌ ཆད༌དོན༌ནི༌ སྒམ༌ ཁུར༌ ཡང༌ བླ༌མ༌ རྡུན༌ལ༌ ར༌ཅོའེ༌ ཏུང༌ ཁུར༌ཏེ༌ སྒམ༌མི༌ སྔུན༌ལ༌ གྲུལ༌ཅུག༌།”
7 ཏེ༌ནེ༌ ཁོའེ༌ མག༌མི༌གུན༌ལ༌ བཀའ༌ ཏངས༌, “ཚོན༌ཆ༌ ཁུར༌ཁན༌ནི༌ མག༌མི༌ ཁ༌ཅིག༌ ཡ༌ཝའེ༌ ཆད༌དོན༌ནི༌ སྒམ༌མི༌ སྔུན༌ལ༌ གྲུལ༌ ཅུག༌ཨིན༌ ཁོང༌གུན༌ནི༌ སྟིང༌རང༌ནེ༌ མག༌མི༌ ཚང༌མ༌ གྱང༌སྐོར༌རི༌ ཕི༌ལོག༌ནེ༌ གྱལ༌སའ༌ སྐོར༌ར༌ ཏང༌ཅུག༌།”
8 ཡོ༌ཤུའེ༌ མི༌གུན༌ལ༌ བཀའ༌ ཏངས༌ ཚར༌ར༌ཅིག༌, ཏུང༌ ཁུར༌ཁན༌ནི༌ བླ༌མ༌ རྡུན༌བོ༌ ཏུང༌ ཕུ༌ཨིན༌ གྲུལ༌ཅེས༌ གོ༌ཟུག༌ ཡང༌ ཡ༌ཝའེ༌ ཆད༌དོན༌ནི༌ སྒམ༌ ཁུར༌ཁན༌གུན༌ ཁོང༌གུན༌ནི༌ སྟིང༌རང༌ནེ༌ སོང༌།
9 ཚོན༌ཆ༌ ཁུར༌ཁན༌ནི༌ མག༌མི༌གུན༌ ཏུང༌ ཕུ༌ཁན༌ནི༌ བླ༌མ༌གུན༌ནི༌ སྔུན༌ལ༌ ཡང༌ ཞན༌ མག༌མི༌གུན༌ ཆད༌དོན༌ནི༌ སྒམ༌མི༌ གྱབ༌ནེ༌ གྲུལས༌། ཏུས༌ གང༌པོ༌ བླ༌མ༌གུན༌ནི༌ ཏུང༌ ཕུའད༌པིན༌།
10 ཡོ༌ཤུའེ༌ བཀའ༌ ཏངས༌, “ཀུ༌ཅོ༌ མ༌ཏང༌, སྤེ༌རའང༌ མ༌ཏང༌, ནམ༌ཚོག༌པ༌ ངའེ༌ ཁྱོ༌ཞ༌གུན༌ལ༌ ཀུ༌ཅོ༌ ཏང༌ཅེས༌ལ༌ མི༌ཟེར༌། ངའེ༌ ཟེར༌རི༌ ཞག༌ག༌ ཁྱོ༌ཞའེ༌ ཀུ༌ཅོ༌ ཏོང༌ཤིག༌།”
11 ཏེ༌ནེ༌ ཡོ༌ཤུའེ༌ ཁོང༌གུན༌ལ༌ ཡ༌ཝའེ༌ ཆད༌དོན༌ནི༌ སྒམ༌ ཁུར༌ཏེ༌ གྱལ༌ས༌ སྐོར༌ར༌ ལན༌ཅིག༌ ཏང༌ཅུགས༌། ཏེ༌ སྟིང༌ནེ༌ ཚན༌ ཕུད༌ད༌ལ༌ ཚང༌མ༌ ཀུར༌ ཙུགས༌ཏེ༌ དུག༌ས༌ སོང༌།
12 ཐོ༌རེ༌ཟུག༌པོ༌ ཡོ༌ཤུའ༌ ང༌མོ༌ནེ༌ ལངས༌ ཡང༌ བླ༌མ༌གུན༌ནི༌ ཡང༌སྐྱར༌ ཡ༌ཝའེ༌ ཆད༌དོན༌ནི༌ སྒམ༌ ཁུརས༌།
13 ཏུང༌ ཁུར༌ཁན༌ བླ༌མ༌ རྡུན༌ཀོ༌ ཏུང༌ ཕུ༌ཨིན༌ ཡ༌ཝའེ༌ ཆད༌དོན༌ནི༌ སྒམ༌མི༌ དུན༌ལ༌ གྲུལས༌། ཡང༌སྐྱར༌ ཚོན༌ཆ༌ ཁུར༌ཁན༌ནི༌ མག༌མི༌གུན༌ ཏུང༌ ཁུར༌ཁན༌ནི༌ བླ༌མ༌གུན༌ནི༌ སྔུན༌ལ༌ ཡང༌ ཞན༌ མག༌མི༌གུན༌ ཡ༌ཝའེ༌ ཆད༌དོན༌ནི༌ སྒམ༌མི༌ གྱབ༌ནེ༌ གྲུལས༌། བླ༌མ༌གུན༌ནི༌ ཏུས༌ གང༌པོ༌ ཏུང༌ ཕུས༌།
14 ཞག༌ ཉིས༌པའེ༌ ཞག༌ག༌ ཁོང༌གུན༌ནི༌ གྱལ༌ས༌ སྐོར༌ར༌ ཏངས༌ ཡང༌ ཁོང༌རང༌གུན༌ དུག༌ས༌ ལོགས༌ཏེ༌ སོང༌། ཏེན༌ན༌ ཙོགས༌ ཁོང༌གུན༌ནི༌ ཞག༌པོ༌ དྲུག༌ ཅོས༌།
15 ཞག༌ རྡུན༌པའེ༌ ཞག༌ག༌ ཨིས༌ར༌ཨེལ༌པ༌གུན༌ ནམ༌ལངས༌ལ༌ ལངས༌ཏེ༌ སྔུན༌ ཙོགས༌ལ༌ གྱལ༌ས༌ སྐོར༌ར༌ ཏངས༌། ཨིན༌ནའང༌ ཏེ༌ ཞག༌ག༌ ཁོང༌གུན༌ནི༌ སྐོར༌ར༌ ལན༌ རྡུན༌ ཏངས༌།
16 ལན༌ རྡུན༌པའེ༌ཀ༌ བླ༌མ༌གུན༌ནི༌ ཏུང༌ རིང༌མོ༌ ཕུའ༌ཅིག༌ ཡོ༌ཤུའེ༌ མི༌གུན༌ལ༌ བཀའ༌ ཏངས༌ཏེ༌ ཟེརས༌, “ཀུ༌ཅོ༌ ཏོང༌ཤིག༌ ཅིའ༌ཟེར༌ན༌ ཡ༌ཝའེ༌ ང༌དང༌གུན༌ལ༌ གྱལ༌ས༌ སལ༌ལ༌ ཛད༌ཏེ༌ ཨིན༌ནོག༌།
17 ཡ༌ཝའ༌ ཆོད༌པའེ༌ ཚུལ༌ལ༌ གྱལ༌ས༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ ཁྲེས༌ཏོར༌ ཅོ༌གོས༌། ཟུགས༌ཙོང༌མ༌ ར༌ཧབ༌ དང༌ ཁོའེ༌ ནང༌ང༌ ཡོད༌ཁན༌ ཚང༌མ༌ སད༌ མ༌གོས༌ ཅིའ༌ཟེར༌ན༌ ཁོའེ༌ ང༌དང༌ངི༌ སང༌ཝའེ༌ ཐོག༌ནེ༌ ལྟའ༌ ཀལ༌ཁན༌ ཉིས༌ཀོ༌ སྐྱོབས༌།
18 ཁྲེས༌ཏོར༌ ཅོས༌ཏེ༌ ཡ༌ཝའ༌ ཕུལ༌ཁན༌ནི༌ ནང༌ནེ༌ ཅའང༌ མི༌ ཁྱེར༌ཅེས༌ ཏན༌ཏན༌ ཅོས༌ ཏེ༌མན༌ན༌ ཁྱོ༌ཞ༌རང༌ དང༌ ཨིས༌ར༌ཨེལ༌པ༌ ཚང༌མའེ༌ཀ༌ རྡུག༌ངལ༌ ཀྲག༌པོ༌ ཁྱོང༌ཨིན༌།
19 མུལ༌ དང༌ སེར༌ ཡང༌ ར༌གན༌ དང༌ ལྕགས༌སི༌ ཅ༌ལག༌ ཚང༌མ༌ ཏམ༌པ༌ ཨིན༌ པ༌སང༌ ཡ༌ཝའེ༌ ཨིན༌ནོག༌། ཏེ༌གུན༌ ཁོང༌ངི༌ བང༌ཛོད༌དི༌ ནང༌ང༌ ཁྱོང༌གོས༌།”
20 ཏུང༌ སྐད༌ རིང༌མོ༌ ཚོར༌ར༌ཅིག༌ མག༌མི༌གུན༌ནི༌ ཀུ༌ཅོ༌ སྲན༌ཏྲེ༌ ཏངས༌, ཧུན༌མེད༌ལ༌ ཡེ༌རི༌ཀོའེ༌ གྱང༌སྐོར༌ རྡིབས༌ཏེ༌ ཨིས༌ར༌ཨེལ༌པ༌ མག༌མི༌གུན༌ གྱལ༌སའེ༌ ནང༌ང༌ རྒྱུགས༌ཏེ༌ སོང༌ ཡང༌ ཏེ༌བོ༌ ང༌ཡོག༌ག༌ ཁྱོངས༌།
21 ཁོང༌གུན༌ནི༌ ར༌འི༌ ཉམ༌པོ༌ ཏེ༌ནང༌ང༌ ཡོད༌ཁན༌ བུ༌ཚ༌ དང༌ བུ༌མོ༌, ཞུ༌ནུ༌ དང༌ རྒད༌པོ༌, བ༌ལང༌, ལུག༌, ར༌མ༌ དང༌ བུང༌བུ༌ ཚང༌མ༌ སད༌ཏེ༌ མེད༌ཁན༌ ཅོས༌།
22 ཏེན༌ན༌ ཟ༌ནེ༌ ཡོ༌ཤུའེ༌ སང༌ཝའེ༌ ཐོག༌ནེ༌ ལྟའ༌ ཀལ༌ཁན༌ མི༌ ཉིས༌ཀོའ༌ ཟེརས༌, “ཁྱོ༌ཞའེ༌ ཁ༌ཆད༌ ནང༌ཞིན༌ ཟུགས༌ཙོང༌མའེ༌ ཁང༌པ༌ སོང༌ཏེ༌ ཁོ༌ དང༌ ཁོའེ༌ ནང༌ཚངས༌ གུན༌ ཕི༌ལོག༌ག༌ ཕིངས༌ཏེ༌ ཁྱོང༌།”
23 ཁོང༌ ཉིས༌ཀོ༌ སོང༌ཏེ༌ ར༌ཧབ༌, ཁོའེ༌ ཨ༌བ༌, ཨ༌མ༌, ཨ༌ཅོ༌ནོ༌ དང༌ ཉེན༌གྲུང༌, ཁོ༌ ཉམ༌པོ༌ ཡོད༌ཁན༌ ཚང༌མ༌ ཕིངས༌ཏེ༌ ཨིས༌ར༌ཨེལ༌པ༌གུན༌ དུགས༌སའེ༌ ཕི༌ལོག༌ག༌ ཁྱོངས༌།
24 ཏེ༌ནེ༌ ཨིས༌ར༌ཨེལ༌པ༌གུན༌ནི༌ གྱལ༌ས༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ མེའ༌ ཏུགས༌། མུལ༌, སེར༌, ར༌གན༌ དང༌ ལྕགས༌སི༌ ཅ༌ལག༌ ཚང༌མ༌ ཡ༌ཝའེ༌ བང༌ཛོད༌དི༌ ནང༌ང༌ བོརས༌།
25 ཨིན༌ནའང༌ ཡོ༌ཤུའེ༌ ཟུགས༌ཙོང༌མ༌ ར༌ཧབ༌ དང༌ ཁོའེ༌ ཉེན༌གྲུང༌གུན༌ མ༌ སདས༌ ཅིའ༌ཟེར༌ན༌ ཁོའེ༌ ཡེ༌རི༌ཀོའེ༌ ནང༌ང༌ སང༌ཝའེ༌ ཐོག༌ནེ༌ ལྟའ༌ ཀལ༌ཁན༌ མི༌གུན༌ སྐྱོབས༌ཏེ༌ ཨིན༌པིན༌ ཡང༌ ཏེ༌ བུ༌མོ༌ དི༌རིང༌ངའང༌ ཨིས༌ར༌ཨེལ༌པ༌གུན༌ནི༌ ཕྲོའ༌ དུག༌ཨིན༌ ཨིན༌ནོག༌།
26 ཏེ༌ཏུས༌ལ༌ ཡོ༌ཤུའེ༌ འི༌ཟུག༌ ཟེར༌ཏེ༌ སྤང༌ པུདས༌, “ཡེ༌རི༌ཀོའེ༌ གྱལ༌ས༌ ཡང༌སྐྱར༌ རྩིག༌ཅེས༌སི༌ རྩོན༌གྲུས༌ ཅོ༌ཁན༌གུན༌ལ༌ ཡ༌ཝའེ༌ ངན༌ ཕོག༌ཤིག༌།”
“ ‘ཁོའེ༌ ཁོ༌རང༌ངི༌ བུ༌ཚ༌ གོ༌བུའི༌ སྲོག༌ རིན༌ ཤལ༌ཏེ༌
ཏེ༌བོའེ༌ མག༌ལྡན༌ ཏང༌ཨིན༌།
ཡང༌ ཁོའེ༌ ཁོ༌རང༌ངི༌ བུ༌ཚ༌ ཆུང༌ཤོག༌གི༌ སྲོག༌ རིན༌ ཤལ༌ཏེ༌
ཏེ༌བོའེ༌ གྱས༌སྒོ༌ ཏག༌ཨིན༌།’ ”
27 ཡ༌ཝ༌ ཡོ༌ཤུའ༌ ཉམ༌པོ༌ ཞུགས༌ཏེ༌ ཡོད༌པིན༌ ཡང༌ ཁོ༌ ཏེ༌ ས༌ཀྱད༌ གང༌པོའེ༌ ནང༌ང༌ མིང༌ཅན༌ གྱུར༌།