7
ཨའི༌པ༌གུན༌ནི༌ ཨིས༌ར༌ཨེལ༌པ༌གུན༌ལ༌ ཕམ༌ཀལས༌།
7:1-15
1 ནོར༌ ཏམ༌པ༌གུན༌ ཡ༌ཝའ༌ ཕུལ༌ཅེས༌སི༌ བཀའ༌ ཏང༌ཁན༌བོ༌ ཁའ༌ ཉན༌ཅེས༌ལ༌ ཨིས༌ར༌ཨེལ༌པ༌གུན༌ ཁྲངས༌པོ༌ མ༌ལུས༌། ཟིམ༌རིའི༌ ཚ༌འོ༌, ཀར༌མི༌ བུ༌ཚ༌ ཨ༌ཀེན༌ནི༌ ཏེ༌ ཏམ༌པ༌ ནོར༌གུན༌ནི༌ ནང༌ནེ༌ ཁ༌ཅིག༌ རྐུས༌ཏེ༌ ཁྱེརས༌། ཏེ༌བོའེ༌ཕིའ༌ ཡ༌ཝའ༌ ཨིས༌ར༌ཨེལ༌པ༌གུན༌ནི༌ཀ༌ མ༌སྲན༌ཏྲེ༌ ཐུག༌སྲོ༌ སྐྱོདས༌། ཟིམ༌རི༌ ཟེ༌རཧའེ༌ པུར༌གྱུད༌ ཨིན༌པིན༌ ཡང༌ ཁོང༌གུན༌ ཡ༌ཧུ༌དཱའེ༌ མི༌སྡེ༌ནེ༌ ཨིན༌པིན༌།
2 ཡོ༌ཤུའེ༌ ཡེ༌རི༌ཀོ༌ནེ༌ མི༌ ཁ༌ཅིག༌ བེ༌ཐེལ༌ལི༌ ཤར༌ ཆོགས༌, བེཐ༌ ཨ༌ཝིན༌ནི༌ ཉེ༌མོའ༌ ཡོད༌ཁན༌ ཨའི༌ གྱལ༌སའེ༌ སྲུང༌སྐྱོབ༌གུན༌ གྱུས༌ ཅོའ༌ལ༌ སང༌ཝའེ༌ ཐོག༌ནེ༌ ལམ༌ཅུགས༌། ཏེ༌ནེ༌ ཁོང༌གུན༌ སོང༌།
3 ཁོང༌གུན༌ ལོགས༌ཏེ༌ ཡོངས༌ཏེ༌ ཡོ༌ཤུའ༌ ཟེརས༌, “ཨའི༌ གྱལ༌ས༌ སྤུང༌གོལ༌ ཅོ༌ཅེས༌ལ༌, མག༌མི༌ ཚང༌མ༌ ཀལ༌ཅེས༌སི༌ སྒོས༌དོམ༌ མི༌དུག༌། མག༌མི༌ ཚང༌མ༌ བར༌དོ༌ མ༌སྟན༌ན༌, སྟོང༌ ཉིས༌ ཡ༌ སུམ༌ ནོལ༌ལ༌ ཀལ༌ན༌ གྲིག༌ཅེས༌ དུག༌ ཅིའ༌ཟེར༌ན༌ ཏེ༌རུ༌ མི༌ ཉུ༌ངུན༌ཞིག༌ མ༌ནེ༌ མི༌དུག༌།”
4 ཏེ༌ནེ༌ མག༌མི༌ སྟོང༌སུམ༌ ནོལ༌ལ༌ སོང༌ ཨིན༌ནའང༌ ཨའི༌པ༌གུན༌ནི༌ ཁོང༌གུན༌ལ༌ ཕམ༌ སྲན༌ཏྲེ༌ ཀལས༌ ཡང༌ ཁོང༌གུན༌ ཏེ༌ཀ༌ནེ༌ ཤོར༌གོས༌།
5 ཁོང༌གུན༌ནི༌ གྱལ༌སའེ༌ གྱས༌སྒོའེ༌ ཕི༌ལོག༌ག༌ ཨིས༌ར༌ཨེལ༌པའེ༌ མག༌མི༌གུན༌ལ༌ རི༌ནེ༌ ཐུར༌ལ༌ ལུང༌པའེ༌ ནང༌ང༌ ཏེད༌ཏེ༌ ཁྱེརས༌ ཡང༌ མག༌མི༌ 36 སདས༌། ཏེ༌བོ༌ ཐོང༌ཏེ༌ ཨིས༌ར༌ཨེལ༌པ༌གུན༌ སྲན༌ཏྲེ༌ ཇིགས༌ ཡང༌ ཁོང༌གུན༌ནི༌ ནོལ༌ཅེས༌སི༌ སྤོས༌པ༌ ཆགས༌།
6 ཡོ༌ཤུའེ༌ ཁོང༌རང༌ངི༌ ཀོས༌ ཤགས༌ ཡང༌ ཁོང༌ དང༌ ཨིས༌ར༌ཨེལ༌པའེ༌ འུ༌སྐྱོང༌གུན༌ ཡ༌ཝའེ༌ ཆད༌དོན༌ནི༌ སྒམ༌མི༌ དུན༌ལ༌ སའེ༌ཀ༌ གྱེལ༌ཏེ༌ ཕི༌ཏོག༌ ཚོག༌པ༌ དུགས༌ ཡང༌ ཁོང༌རང༌གུན༌ནི༌ གོའེ༌ཀ༌ ཐལ༌བ༌ ཡོགས༌།
7 ཏེ༌ནེ༌ ཡོ༌ཤུའེ༌ ཟེརས༌, “ཡ༌ཝ༌ ཀུན༌ཝང༌ལེ༌, ཉེ༌རང༌ངི༌ ང༌ཞའ༌ ཨ༌མོར༌པ༌གུན༌ནི༌ ལག༌ག༌ སྟད༌ཏེ༌ སད༌ ཅུག༌ཅེས༌ལ༌ ང༌ཞ༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ ཁྱོང༌ང༌ ཛད༌ཏེ༌ ཨིན༌ན༌? ང༌ཞའ༌ འ༌ངོ༌ ཆོགས༌ལ༌ དུགས༌པིན༌ན༌ འི༌ཟུག༌ སོང༌ཏེ༌ མེད༌གྲོ༌།
8 ཡ༌ཝ༌ལེ༌ ང༌ཞའ༌ ཨིས༌ར༌ཨེལ༌པ༌གུན༌ གྲ༌འོ༌གུན༌ནི༌ ཀ༌ནེ༌ ཤོར༌ པ༌སང༌ ཏ༌ ངའེ༌ ཅི༌ ཟེར༌གོས༌?
9 ཀེ༌ནན༌པ༌གུན༌ དང༌ ཞན༌ འི༌རུ༌ དུག༌ཁན༌གུན༌ནི༌ འི༌བོ༌ ཚོར༌ར༌ཅིག༌, ཁོང༌གུན༌ནི༌ ང༌ཞ༌གུན༌ལ༌ ནོལ༌ཏེ༌ ང༌ཞའེ༌ མིང༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོ༌ཨིན༌། ཏེ༌ནེ༌ ཉེ༌རང༌ སྤལ༌ཅན༌ དང༌ སྟོབས༌ཅན༌ དཀོན༌མཆོག༌ ཞུགས༌ཁན༌ སྟན༌ན༌ ཛད༌ཅེས༌ལ༌ ཉེ༌རང༌ངི༌ ཅི༌ ཛད༌ཨིན༌?”
10 ཡ༌ཝའེ༌ ཡོ༌ཤུའ༌ མོལས༌, “ལོངས༌། ཁྱོ༌རང༌ སའེ༌ཀ༌ གྱེལ༌ཏེ༌ རྡུག༌པོ༌ ཅི༌ ཅོའད༌?
11 ཨིས༌ར༌ཨེལ༌པ༌གུན༌ནི༌ སྡིག༌པ༌ ཅོས༌ཏེ༌ ཨིན༌ནོག༌། ཁོང༌གུན༌ནི༌ ངའེ༌ ཟེར༌ཁན༌བོ༌ མ༌ཅོའ༌ ངའེ༌ ཆད༌དོན༌བོ༌ ཅགས༌། ཁོང༌གུན༌ནི༌ ངའ༌ ཕུལ༌ཁན༌ནི༌ ཏམ༌པ༌ ནོར༌ ཁ༌ཅིག༌ རྐུས༌ཏེ༌ ཁྱེརས༌ ཡང༌ ཏེ༌གུན༌ རྐུ༌ཅེས༌ མ༌ཚད༌ ཟུན༌ ཏངས༌ཏེ༌ ཁོང༌རང༌གུན༌ནི༌ གྱུ༌ནོར༌རི༌ ཕྲོའ༌ སྦས༌ཏེ༌ ཨིན༌ནོག༌།
12 ཏེན༌ན༌བོའེ༌ཕིའ༌ ཨིས༌ར༌ཨེལ༌པ༌གུན༌ གྲ༌འོ༌གུན༌ནི༌ ཀ༌ནེ༌ ཕམས༌ཏེ༌ ཤོར༌གོས༌། ཏ༌ ཨིས༌ར༌ཨེལ༌པ༌གུན༌ནི༌ ཁོང༌རང༌གུན༌ ཁྲེས༌ཏོར༌ ཆ༌ཅེས༌སི༌ ཕིའ༌ ལྡམས༌ཏེ༌ ཨིན༌ནོག༌། ནམ༌ཚོག༌པ༌ ཁྱོ༌རང༌ངི༌, ཁྱོ༌ཞའ༌ ཚི༌ཏུ༌ གྱུར༌ ཅུག༌ཁན༌གུན༌ ཁྲེས༌ཏོར༌ མི༌ཅོ༌ ང༌ ཁྱོ༌ཞ༌གུན༌ ཉམ༌པོ༌ མི༌དུག༌།”
13 “ལོངས༌, མི༌གུན༌ རྩང༌མ༌ ཅོས༌། ཁོང༌གུན༌ལ༌ ཁོང༌རང༌གུན༌ རྩང༌མ༌ ཅོ༌ཅེས༌ལ༌ བཀའ༌ ཏངས༌ཏེ༌ ཟེར༌, ‘ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌གི༌ མོལས༌, “ཝ༌ ཨིས༌ར༌ཨེལ༌པ༌གུན༌, ཁྱོ༌ཞའེ༌ ཕྲོའ༌ ངའ༌ ཕུལ༌གོ༌ཤེས༌ཅན༌ནི༌ ནོར༌གུན༌ དུག༌། ནམ༌ཚོག༌པ༌ ཏེ༌གུན༌ མེད༌ཁན༌ མི༌ ཅོ༌ ཁྱོ༌ཞའེ༌ ཁྱོ༌ཞ༌རང༌ངི༌ གྲ༌འོ༌གུན༌ལ༌ ཕམ༌ཀལ༌ མི༌ཉན༌།” ’ ”
14 “ཐོ༌རེའེ༌ ང༌མོ༌ ཁྱོ༌ཞ༌གུན༌ རང༌རང༌ངི༌ མི༌སྡེ༌གུན༌ ཉམ༌པོ༌ ང༌ ཡོད༌ས༌ ཡོང༌གོས༌, ཡང༌ ངའེ༌ བོད༌ད༌ཅིག༌ མི༌སྡེ༌ ནང༌ནེ༌ མི༌རིགས༌ རེ༌རེ༌ དུན༌ལ༌ ཡོང༌གོས༌། ཡང༌ མི༌རིགས༌ ལྡམ༌ཁན༌བོའེ༌ ནང༌ནེ༌ ནང༌ཚངས༌ རེ༌རེ༌ དུན༌ལ༌ ཡོང༌གོས༌ ཡང༌ ནང༌ཚངས༌ ལྡམ༌ཁན༌བོའེ༌ ནང༌ནེ༌ མི༌ རེ༌རེ༌ དུན༌ལ༌ ཡོང༌གོས༌།
15 ང༌ ཕུལ༌ཁན༌ནི༌ ཏམ༌པ༌ ནོར༌ རྐུ༌ཁན༌ནི༌ མི༌ ཟུམ༌ཁན༌ ཡང༌ ཁོའེ༌ ཨིན༌ཁན༌ ཚང༌མ༌ མེའེ༌ ནང༌ང༌ སྲག༌གོས༌ ཅིའ༌ཟེར༌ན༌ ཁོའེ༌ ངའེ༌ ཆད༌དོན༌བོ༌ ཅགས༌ཏེ༌ ཨིས༌ར༌ཨེལ༌ལི༌ ནང༌ང༌ ཁྲེལ༌མེད༌དི༌ ལས༌ ཅོས༌ཏེ༌ ཨིན༌ནོག༌།”
ཨ༌ཀེན༌ནི༌ སྡིག༌པ༌།
7:16-26
16 ཐོ༌རེ༌ཟུག༌པོ༌ མ༌ ང༌མོ༌ནེ༌ ཡོ༌ཤུའེ༌ ཡ༌ཝའེ༌ སྐུན༌དུན༌ལ༌ ཨིས༌ར༌ཨེལ༌པ༌ ཚང༌མ༌ མི༌སྡེ༌ རེ༌རེ༌ ཅོས༌ཏེ༌ ཡོང༌ཅུགས༌ ཡང༌ ཡ༌ཧུ༌དཱའེ༌ སྡེ༌ ལྡམ༌མ༌ ཛདས༌།
17 ཏེ༌ནེ༌ ཡ༌ཧུ༌དཱའེ༌ སྡེའེ༌ ནང༌ནེ༌ མི༌རིགས༌ རེ༌རེ༌ དུན༌ལ༌ ཡོངས༌ ཡང༌ ཟེ༌རཧའེ༌ མི༌རིགས༌ ལྡམ༌མ༌ ཛདས༌། ཏེ༌ནེ༌ ཟེ༌རཧའེ༌ མི༌རིགས༌སི༌ ནང༌ཚངས༌ རེ༌རེ༌ དུན༌ལ༌ ཡོངས༌ ཡང༌ ཟིམ༌རིའི༌ ནང༌ཚངས༌ ལྡམ༌མ༌ ཛདས༌།
18 ཏེ༌ནེ༌ ཟིམ༌རིའི༌ ནང༌ཚངས༌སི༌ མི༌ རེ༌རེ༌ དུན༌ལ༌ ཡོངས༌ ཡང༌ ཨ༌ཀེན༌ ལྡམ༌མ༌ ཛདས༌།
19 ཏེ༌ནེ༌ ཡོ༌ཤུའེ༌ ཨ༌ཀེན༌ལ༌ ཟེརས༌, “ངའེ༌ བུ༌ཚ༌, རང༌ངི༌ སྡིག༌པ༌ ཅོ༌ཁན༌བོ༌ ཤད༌ཏེ༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའ༌ སྤལ༌ ཁྱོང༌། ཁྱོ༌རང༌ངི༌ ཅོས༌ཁན༌བོ༌ སྦས༌ཏེ༌ མ༌བོར༌ར༌ ངའ༌ ཀྲང༌པོ༌ ཤོད༌།”
20 ཨ༌ཀེན༌ནི༌ ལན༌ཏངས༌, “འི༌བོ༌ དེན༌བ༌ ཨིན༌། ངའེ༌ ཡ༌ཝའ༌ ཨིས༌ར༌ཨེལ༌པའེ༌ དཀོན༌མཆོག༌གི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌།
21 ཅོམས༌ཏེ༌ ཁྱོང༌ཁན༌ནི༌ ནོར༌གུན༌ནི༌ ཕྲོའ༌ ངའེ༌ མུལ༌ ཀི༌ལོ༌ 2 སང༌ མང༌ང༌ ཞིག༌, ཀི༌ལོ༌ ཕེད༌དི༌ སེར༌རི༌ པག༌བུ༌ དང༌ བ༌བེ༌ལོན༌ནེ༌ ཨིན༌ཁན༌ ཀོས༌ ལྡེ༌མོ༌ ཐོང༌ང༌ཅིག༌, ངའ༌ ཏེ༌གུན༌ནི༌ དོད༌པ༌ ཡོངས༌པ༌ ངའེ༌ རྐུས༌པིན༌། ཏེ༌གུན༌ ངའེ༌ ང༌རང༌ངི༌ ཀུར༌རི༌ ནང༌ང༌ སའེ༌ ཐིལ༌ལ༌ སྦས༌ཏེ༌ ཡོད༌, ཚང༌མའེ༌ སང༌ ཐིལ༌ལ༌ མུལ༌།”
22 ཏེ༌ནེ༌ ཡོ༌ཤུའེ༌ མི༌ ཁ༌ཅིག༌ ཏེ༌གུན༌ ཙལ༌ལ༌ ལམ༌ཅུགས༌། ཁོང༌གུན༌ ཀུར༌རི༌ ནང༌ང༌ བང༌ཏངས༌ཏེ༌ སོང༌ ཡང༌ ཨ༌ཀེན༌ནི༌ ཟེར༌ཁན༌ ནང༌ཞིན༌ ཏེ༌རུ༌ སྦས༌ཏེ༌ ཡོད༌ཁན༌ནི༌ ནོར༌ ཚང༌མ༌ ཐོབ༌།
23 ཁོང༌གུན༌ནི༌ ཀུར༌རི༌ ནང༌ནེ༌ ཏེ༌ ནོར༌གུན༌ ཁྱོངས༌ ཡང༌ ཡོ༌ཤུའ༌ དང༌ ཨིས༌ར༌ཨེལ༌པ༌ ཚང༌མ༌ ཡོད༌ས༌ ཡ༌ཝའེ༌ སྐུན༌དུན༌ལ༌ སའེ༌ཀ༌ ཏིངས༌།
24 ཏེ༌ནེ༌ ཡོ༌ཤུའ༌ དང༌ ཨིས༌ར༌ཨེལ༌པ༌ ཚང༌མའེ༌ ཨ༌ཀེན༌, ཀོས༌, མུལ༌, སེར༌, ཁོའེ༌ བུ༌ཚ༌ དང༌ བུ༌མོ༌ གུན༌, བ༌ལང༌གུན༌, བུང༌བུ༌གུན༌, ལུག༌གུན༌, ར༌མ༌གུན༌, ཀུར༌ དང༌ ཁོའ༌ ཡོད༌ཁན༌ ཚང༌མ༌ ཨ༌ཁོར༌རི༌ ལུང༌པའེ༌ ནང༌ང༌ ཁྱེརས༌།
25 ཡོ༌ཤུའེ༌ ཨ༌ཀེན༌ལ༌ ཟེརས༌, “ཅིའ༌ ཁྱོ༌རང༌ངི༌ ང༌ཞ༌གུན༌ནི༌ཀ༌ རྡུག༌ངལ༌ ཁྱོངས༌པིན༌། ཏ༌ ཡ༌ཝའེ༌ ཁྱོ༌རང༌ངི༌ཀ༌ རྡུག༌ངལ༌ ཁྱོང༌ང༌ ཛད༌ཨིན༌།”
ཏེ༌ནེ༌ ཨིས༌ར༌ཨེལ༌པ༌ ཚང༌མའེ༌ ཁོང༌ ཚང༌མ༌ལ༌ རྡོའ༌ གྱབས༌ཏེ༌ སདས༌ ཡང༌ ཏེ༌ ཚང༌མ༌ མེའ༌ སྲགས༌།
26 ཨིས༌ར༌ཨེལ༌པ༌གུན༌ནི༌ སྲགས༌ཁན༌ནི༌ སོལ༌ལེ༌ ཁེ༌ཐོག༌ག༌ རྡོའ༌ སྤུངས༌ ཀ༌བོ༌ དི༌རིང༌ངའང༌ ལུས༌ཏེ༌ ཡོད༌ཏེ༌ ཨིན༌ནོག༌། ཏེན༌ན༌བོའེ༌ ཕིའ༌ ཏེ༌ ས༌ཀྱད༌པོའ༌ རྡུག༌ངལ༌ལི༌ ལུང༌པ༌ ཟེར༌ར༌ནོག༌། ཏེ༌ནེ༌ ཡ༌ཝའེ༌ ཐུག༌སྲོ༌ ཁོང༌གུན༌ནི༌ཀ༌ བབས༌ཁན༌བོ༌ མེད༌ཁན༌ ཛདས༌།