9
གི༌བེ༌འོན༌པ༌གུན༌ནི༌ ཨིས༌ར༌ཨེལ༌པ༌གུན༌ལ༌ གོབ༌སྐོར༌ ཏངས༌།
9:1-27
1 ཏ༌ ཡོར༌དཱན༌ ལྩངས༌པོའེ༌ ནུབ༌ ཆོགས༌སི༌ གྱལ༌པོ༌ ཚང༌མའེ༌ ཏེ༌ ཇུང༌ཁན༌གུན༌ ཚོར༌། ཁོང༌གུན༌ རི༌ ཡུལ༌གུན༌, ནུབ༌ ཆོགས༌སི༌ རི༌ ཡོག༌གི༌ ཡུལ༌ ཡང༌ མེ༌གྲི༌ཀྲེ༌རིའན༌ ཚོའེ༌ ཐའ༌མ༌, ལེ༌བ༌ནོན༌ནི༌ རི༌ ཚོག༌པ༌ དུག༌ཁན༌ ཧེད༌པ༌, ཨ༌མོར༌པ༌, ཀེ༌ནན༌པ༌, པེ༌རིཟ༌པ༌, ཧིཝ༌པ༌ དང༌ ཡེ༌བས༌པའེ༌ གྱལ༌པོ༌གུན༌ ཨིན༌ནོག༌།
2 ཏེ༌ གྱལ༌པོ༌ ཚང༌མ༌ ཡོ༌ཤུའ༌ དང༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ཅིག༌གྲིལ༌ སོང༌ཏེ༌ ནོལ༌ཅེས༌ལ༌ ཛོམས༌།
3 ཨིན༌ནའང༌ གི༌བེ༌འོན༌པ༌གུན༌ནི༌ ཡོ༌ཤུའེ༌ ཡེ༌རི༌ཀོ༌ དང༌ ཨའི༌ གྱལ༌ས༌གུན༌ལ༌ ཅོ༌ཁན༌བོ༌ ཚོར༌ར༌ཅིག༌
4 ཁོ༌རང༌གུན༌ སྐྱོབ༌ཅེས༌ལ༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ལ༌ གོབ༌སྐོར༌ ཏང༌ཅེས༌ ཐག༌ཅདས༌། ཁོང༌གུན༌ནི༌ ཡོ༌ཤུའེ༌ ཡོད༌ས༌ ཐུས༌མི༌གུན༌ ལམ༌ཅུགས༌, བུང༌བུ༌གུན༌ནི༌ཀ༌ གལ༌ ཉིང༌པ༌ དང༌ ཆང༌ངི༌ པགས༌པ༌ ལན༌བ༌ ཏབ༌ཁན༌གུན༌ ཀལས༌།
5 ཐུས༌མི༌གུན༌ནི༌ ལན༌བ༌ ཏབ༌ཁན༌ནི༌ པ༌བུ༌ དང༌ ཀོས༌ལག༌ ཆད༌ཁན༌ གོནས༌ ཡང༌ སྐམས༌ཏེ༌ ཧམ༌བོར༌ ཆགས༌ཁན༌ནི༌ ཏ༌གི༌གུན༌ ཁུརས༌།
6 ཁོང༌གུན༌ ཨིས༌ར༌ཨེལ༌པ༌གུན༌ ཀུར༌ ཙུགས༌ཏེ༌ དུག༌ས༌ གིལ༌གལ༌ལ༌ ལེབས༌ཏེ༌ ཡོ༌ཤུའ༌ དང༌ ཨིས༌ར༌ཨེལ༌པ༌གུན༌ལ༌ ཟེརས༌, “ང༌ཞ༌གུན༌ ས༌ཆ༌ མའ༌ ཐག༌རིང༌ནེ༌ ཉེ༌ཞ༌གུན༌ ཉམ༌པོ༌ ཞི༌དེའེ༌ ཆད༌དོན༌ ཅོ༌ཅེས༌ལ༌ ཞུ༌ཝ༌ ཁུར༌ཏེ༌ ཡོངས༌པིན༌།”
7 ཨིས༌ར༌ཨེལ༌པ༌གུན༌ནི༌ ཧིཝ༌པ༌ ཡང༌ན༌ གི༌བེ༌འོན༌པ༌གུན༌ལ༌ ཟེརས༌, “ཅི༌ གྱུས༌ ཁྱོ༌ཞ༌གུན༌ ང༌ཞའེ༌ ཉེ༌མོའ༌ དུག༌གད༌ གྲོ༌, ཏེ༌ནེ༌ ང༌ཞའེ༌ ཁྱོ༌ཞའ༌ ཉམ༌པོ༌ ཞི༌དེ༌ ཆད༌དོན༌ ཀ༌ཟུག༌གི༌ ཅོ༌ཨིན༌?”
8 ཁོང༌གུན༌ནི༌ ཟེརས༌, “ང༌ཞ༌གུན༌ ཁྱོ༌ཞའེ༌ ཡོག༌པོ༌ ཨིན༌།”
ཨིན༌ནའང༌ ཡོ༌ཤུའེ༌ ཏྲིས༌, “ཁྱོ༌ཞ༌གུན༌ སུ༌ ཨིན༌ ཡང༌ ཀ༌ནེ༌ ཡོངས༌ཏེ༌ ཨིན༌?”
9 ཁོང༌གུན༌ནི༌ ལན༌ཏངས༌, “ཡ༌ཝའ༌ ཁྱོ༌ཞའེ༌ དཀོན༌མཆོག༌གི༌ གང༌ཤན༌ ཆག༌ལས༌ ཛད༌ཁན༌གུན༌ ཚོར༌ཏེ༌ ང༌ཞའ༌ ཉེ༌རང༌ངི༌ ཡོག༌པོ༌གུན༌ ས༌ཆ༌ མའ༌ ཐག༌རིང༌ནེ༌ ཡོངས༌ཏེ༌ ཨིན༌། ཡ༌ཝའེ༌ ཨི༌ཇིབ༌བི༌ ནང༌ང༌ ཁྱོ༌ཞའེ༌ ཕིའ༌ ཛད༌ཁན༌ ཚང༌མ༌ ང༌ཞ༌གུན༌ནི༌ ཚོར༌,
10 ཏེ༌ མ༌ཛད༌ ང༌ཞ༌གུན༌ནི༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ཨ༌མོར༌པའེ༌ གྱལ༌པོ༌, ཧེཤ༌བོན༌ནི༌ གྱལ༌པོ༌ སི༌ཧོན༌ དང༌ ཨཤ༌ཏ༌རོཐ༌ ནང༌ང༌ དུག༌ཁན༌ བ༌ཤན༌ནི༌ གྱལ༌པོ༌ ཨོག༌ ཉིས༌ཀོའ༌ ཛདས༌ཁན༌ ཚང༌མ༌ ཚོར༌།
11 ང༌ཞའེ༌ འུ༌སྐྱོང༌ དང༌ མི༌ཚང༌མའེ༌ ང༌ཞ༌གུན༌ལ༌ ཟེརས༌, ‘བེས༌སི༌ ཕིའ༌ ཟ༌གྱུ༌ ཁུར༌ཏེ༌ ཨིས༌ར༌ཨེལ༌པ༌གུན༌ལ༌ ཐུག༌ག༌ སོང༌ཏེ༌ ཟེར༌, “ང༌ཞའ༌ ཉེ༌རང༌ངི༌ ཡོག༌པོ༌གུན༌ ཨིན༌, ཇུ༌ཇུ༌ ང༌ཞའ༌ ཉམ༌པོ༌ ཞི༌དེའེ༌ ཆད༌དོན༌ ཅོའ༌ ཛད༌།” ’
12 ང༌ཞ༌གུན༌ ཉེ༌རང༌ང༌ ཐུག༌ག༌ ཁང༌པ༌ནེ༌ བིང༌ ཟ༌ནེ༌ འི༌ ཏ༌གི༌གུན༌ ཚན༌ཏེ༌ ཡོད༌པིན༌ ཨིན༌ནའང༌ ཏ༌ ཟིགས༌སའང༌ འི༌གུན༌ སྐམས༌ཏེ༌ ཧམ༌བོར༌ ཆགས༌ཏེ༌ དུག༌།
13 ང༌ཞའེ༌ རྒུན༌ཆང༌ སྐང༌ ཟ༌ནེ༌ འི༌ སྐྱ༌པ༌གུན༌ སོ༌མ༌ ཡོད༌པིན༌ ཨིན༌ནའང༌ ཏ༌ འི༌གུན༌ ཉིང༌པ༌ སོང༌ཏེ༌ ཆད༌དུག༌ ཡང༌ ང༌ཞ༌གུན༌ནི༌ ཀོས༌ལག༌ དང༌ པ༌བུ༌ གུན༌ བེས༌ རིང༌མོའེ༌ ཞས༌ཏེ༌ ཆད༌ཏེ༌ ཨིན༌ནོག༌།”
14 ཨིས༌ར༌ཨེལ༌པ༌གུན༌ནི༌ ཁོང༌གུན༌ ཉམ༌པོ༌ ཞི༌དེའེ༌ ཆད༌དོན༌ ཅོ༌ཁན༌ནི༌ སྟགས༌ སྟན༌ཅེས༌ལ༌ ཏ༌གི༌ ཟོས༌ ཨིན༌ནའང༌ ཡ༌ཝའེ༌ ཐུག༌གོངས༌ ཏྲིའ༌ མ༌ ཛདས༌།
15 ཏེ༌ནེ༌ ཡོ༌ཤུའེ༌ ཁོང༌གུན༌ ཉམ༌པོ༌ ཞི༌དེའེ༌ ཆད༌དོན༌ ཅོས༌ཏེ༌ ཁོང༌གུན༌ མི༌ སད༌ཅེས༌ ཏན༌ཏན༌ ཅོས༌ ཡང༌ ཨིས༌ར༌ཨེལ༌པའེ༌ སྤོན༌བོ༌གུན༌ནི༌ ཏེན༌ན༌ ཙོགས༌ ཅོ༌ཅེས༌ལ༌ ནའ༌ ཁུརས༌།
16 ཆད༌དོན༌ ཅོས༌ཏེ༌ ཞག༌པོ༌ སུམ༌མི༌ སྟིང༌ནེ༌ ཁོང༌གུན༌ལ༌ ཏེ༌ མི༌གུན༌ ཁོང༌གུན༌ནི༌ ཉེ༌མོའ༌ དུག༌ཁན༌བོ༌ གྱུས༌སོང༌།
17 ཏེ༌བོ༌ ཏན༌ཏན༌ ཅོའ༌ལ༌ ཨིས༌ར༌ཨེལ༌པ༌གུན༌ ཏེན༌ན༌མལ༌ལ༌ བིང༌ ཡང༌ ཞག༌པོ༌ སུམ༌མི༌ ནང༌ང༌ ཁོང༌གུན༌ནི༌ གྱལ༌ས༌གུན༌ལ༌ ལེབ༌། ཏེ༌གུན༌ གི༌བེ༌འོན༌, ཀེ༌ཕི༌རཧ༌, བེ༌རོཐ༌ དང༌ ཀི༌རི༌འཐ༌ ཡེ༌རིམ༌ གྱལ༌ས༌གུན༌ ཨིན༌པིན༌།
18 ཨིན༌ནའང༌ ཨིས༌ར༌ཨེལ༌པ༌གུན༌ནི༌ ཁོང༌གུན༌ནི༌ཀ༌ སྤུང༌གོལ༌ མ༌ཅོས༌ ཅིའ༌ཟེར༌ན༌ ཨིས༌ར༌ཨེལ༌ལི༌ སྤོན༌བོ༌གུན༌ནི༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ནའ༌ ཁུར༌ཏེ༌ ཨིན༌པིན༌།
ཏེ༌ནེ༌ ཨིས༌ར༌ཨེལ༌པ༌ ཚང༌མའེ༌, འུ༌སྐྱོང༌གུན༌ནི༌ གྱབ༌གལ༌ལ༌ ཟེར༌གྱུ༌ ཏངས༌།
19 སྤོན༌བོ༌གུན༌ནི༌ ཟེརས༌, “ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ང༌དང༌གུན༌ནི༌ ནའ༌ ཁུར༌ པ༌སང༌ ང༌དང༌ངི༌ ཁོང༌གུན༌ལ༌ ལག༌པ༌ རྩེ༌ མི༌ཉན༌།
20 ཨིན༌ནའང༌ ང༌དང༌གུན༌ནི༌ ནའ༌ ཁུར༌ཅེས༌པོའེ༌ དཀོན༌མཆོག༌གི༌ ཐུག༌སྲོ༌ ང༌དང༌གུན༌ནི༌ཀ༌ མི༌བབས༌ཤེས༌ལ༌ ང༌དང༌གུན༌ནི༌ ཁོང༌གུན༌ སོན༌ཏེའ༌ བོར༌གོས༌།
21 ཁོང༌གུན༌ སོན༌ཏེའ༌ བོར༌གོས༌།” ཏེ༌ནེ༌ ཨིས༌ར༌ཨེལ༌པ༌ ཚང༌མའེ༌ ཕིའ༌ ཁོང༌གུན༌ ཤིང༌ཅད༌ཁན༌ དང༌ ཆུ༌སྐྱེ༌ཁན༌ གུན༌ ཅོས༌། ཏེན༌ན༌ ཟུག༌གི༌ ཨིས༌ར༌ཨེལ༌པའེ༌ སྤོན༌བོ༌གུན༌ནི༌ ནའ༌ ཁུར༌ཁན༌བོ༌ མ༌ཅགས༌།
22 ཡོ༌ཤུའེ༌ གི༌བེ༌འོན༌པ༌གུན༌ བོད༌ཏེ༌ ཁྱོངས༌ ཡང༌ ཏྲིས༌, “ཅི༌ཕིའ༌ ཁྱོ༌ཞ༌གུན༌ནི༌ ཁྱོ༌ཞའ༌ ཐག༌རིང༌ ཡུལ༌ནེ༌ ཨིན༌ ཟེར༌ཏེ༌ ཟུན༌ ཏངས༌ཏེ༌ ང༌ཞའ༌ གོབ༌སྐོར༌པིན༌ ནམ༌ ཁྱོ༌ཞ༌གུན༌ ང༌ཞའེ༌ ཉེ༌མོའ༌ དུག༌ཨིན༌ ཨིན༌ནོག༌?
23 ཏ༌ ཁྱོ༌ཞ༌གུན༌ལ༌ ངན༌ ཕོགས༌ཏེ༌ ཁྱོ༌ཞ༌གུན༌ ང༌ཞའེ༌ ཚེ༌ཡོག༌ གྱུར༌ཏེ༌ ཏུས༌གྱུན༌ དཀོན༌མཆོག༌ག༌ ཅོལ༌སའེ༌ ཁང༌པའེ༌ ཕིའ༌ ཤིང༌ ཅད༌ཅེས༌ དང༌ ཆུ༌ སྐྱེ༌ཅེས༌སི༌ ལས༌གུན༌ ཅོ༌གོས༌ཨིན༌།”
24 ཁོང༌གུན༌ནི༌ ཡོ༌ཤུའ༌ ཟེརས༌, “ཡ༌ཝ༌ ཁྱོ༌ཞའེ༌ དཀོན༌མཆོག༌གི༌ ཁོང༌ངི༌ ཡོག༌པོ༌ མོ༌ཟེས༌ལ༌ འི༌ ས༌ཀྱད༌ གང༌པོ༌ ཁྱོ༌ཞའ༌ ཏང༌ཅེས༌ ཡང༌ ཏེ༌ ནང༌ང༌ དུག༌ཁན༌ མི༌ ཚང༌མ༌ སད༌ཅེས༌ལ༌ བཀའ༌ སལ༌ཏེ༌ ཡོད༌ཁན༌བོ༌ ཚོར༌ཏེ༌ ང༌ཞའ༌ མ༌སྲན༌ཏྲེ༌ ཇིགས༌ པ༌སང༌ ང༌ཞ༌རང༌ངི༌ སྲོག༌ སྐྱོབ༌ཅེས༌ལ༌ ང༌ཞའེ༌ ཏེ༌བོ༌ ཅོས༌པིན༌།
25 ཏ༌ ང༌ཞ༌གུན༌ ཁྱོ༌ཞ༌གུན༌ནི༌ ལག༌ག༌ ཨིན༌ནོག༌, ཁྱོ༌ཞའེ༌ འོས༌པ༌ སམ༌ཁན༌བོ༌ ང༌ཞ༌གུན༌ ཉམ༌པོ༌ ཅོའ༌ ཛད༌།”
26 ཏེ༌ནེ༌ ཡོ༌ཤུའེ༌ ཨིས༌ར༌ཨེལ༌པ༌གུན༌ལ༌ ཁོང༌གུན༌ སད༌ མ༌ཅུགས༌།
27 ཨིན༌ནའང༌ ཏེན༌ན༌ ཞག༌ག༌ ཁོའེ༌ གི༌བེ༌འོན༌པ༌གུན༌ ཡ༌ཝའེ༌ ལྡམ༌མ༌ ཛད༌ཅེས༌ཅན༌ནི༌ ནས༌སའེ༌ཀ༌ ཆོད༌ཁྲིའི༌ ཕིའ༌ ཡང༌ ཨིས༌ར༌ཨེལ༌པ༌གུན༌ནི༌ ཕིའ༌ ཤིང༌ཅད༌ཁན༌ དང༌ ཆུ༌སྐྱེ༌ཁན༌ གུན༌ ཅོས༌། ཁོང༌གུན༌ནི༌ ཏེན༌ན༌ ལས༌པོ༌ དི༌རིང༌ངའང༌ ཅོ༌ཨིན༌ ཨིན༌ནོག༌།