2
རུཐ༌ལ༌ བོ༌འཟ༌ ཐུག༌།
2:1-23
1 ཏ༌ བེད༌ལེ༌ཧེམ༌མི༌ ནང༌ང༌ ཆུག༌པོ༌ རྩི༌ཝ༌ཅན༌ བོ༌འཟ༌ ཟེར༌ཁན༌ མི༌ཞིག༌ ཡོད༌པིན༌, ཁོ༌ ནཱའོ༌མིའི༌ མག༌པ༌ ཨེ༌ལི༌མེ༌ལེག༌གི༌ ཉེན༌གྲུང༌ ཨིན༌པིན༌།
2 ཞག༌ཤིག༌ མོ༌འབ༌པ༌ རུཐ༌ཐི༌ ནཱའོ༌མིའ༌ ཟེརས༌, “ཀའ༌ཀྲིན༌ སྟན༌ཏེ༌ ཏུ༌ཅུག༌ཁན༌ནི༌ མི༌ ཞིང༌ངི༌ཀ༌, ལུས༌ཏེ༌ ཡོད༌ཁན༌ནི༌ སྟོན༌ཐོག༌ ཏུས༌ཏེ༌ ཁྱོང༌ང༌ལ༌ ང༌ ཆ༌ཅུག༌ག༌ ཛད༌།”
ནཱའོ༌མིའི༌ ལན༌ཏངས༌, “ངའེ༌ བུ༌མོ༌ སོང༌།”
3 ཏེ༌ནེ༌ རུཐ༌, སྟོན༌ཐོག༌ རྔ༌ཁན༌གུན༌ནི༌ གྱབ༌ནེ༌ སོང༌ཏེ༌ ལུས༌ཁན༌ནི༌ སྟོན༌ཐོག༌ ཏུ༌ཅེས༌ གོ༌ཟུག༌། ཏེ༌ ཞིང༌ ཁོའེ༌ མག༌པའེ༌ ཨ༌བ༌ ཨེ༌ལི༌མེ༌ལེག༌གི༌ ཉེན༌གྲུང༌ བོ༌འཟ༌སི༌ ཨིན༌ཁན༌བོ༌ ཁོའ༌ གྱུས༌མེད༌པིན༌།
4 ཁོ༌ ཏེ༌རུ༌ ཡོད༌ ཟ༌ནེ༌ བོ༌འཟ༌ བེད༌ལེ༌ཧེམ༌ནེ༌ ལེབ༌ ཡང༌ སྟོན༌ཐོག༌ རྔ༌ཁན༌གུན༌ལ༌ ལོན༌སྲུལ༌ཏེ༌ ཟེརས༌, “ཡ༌ཝ༌ དཀོན༌མཆོག༌ ཁྱོ༌ཞའ༌ ཉམ༌པོ༌ ཞུགས༌ཤིག༌།”
ཁོང༌གུན༌ནི༌ ལན༌ཏངས༌, “ཡ༌ཝའེ༌ ཉེ༌རང༌ང༌ ཅིན༌ལབས༌ སལ༌ཤིག༌།”
5 ཏེ༌ནེ༌ བོ༌འཟ༌སི༌ ཞིང༌ རྔ༌ཁན༌གུན༌ནི༌ ཁག༌ཁུར༌པ༌ བོད༌ཏེ༌ ཏྲིས༌, “འ༌ ན༌ཆུང༌བོ༌ སུའི༌ བུ༌མོ༌ ཨིན༌ནོག༌?”
6 ཁག༌ཁུར༌པ༌བོའེ༌ ལན༌ཏངས༌, “མོ༌འབ༌ནེ༌ ནཱའོ༌མི༌ ལོགས༌ཏེ༌ ཡོང༌ ཟ༌ནེ༌ འི༌ ན༌ཆུང༌བོ༌ ཁོ༌ ཉམ༌པོ༌ ཡོངས༌།
7 ‘ཞིང༌ རྔ༌ཁན༌གུན༌ནི༌ གྱབ༌ནེ༌ སོང༌ཏེ༌ སྟོན༌ཐོག༌ ལུས༌ཁན༌གུན༌ ཏུ༌ཅུག༌ག༌ཛད༌’ ཟེར༌ཏེ༌ ཁོའེ༌ ངའ༌ ཏྲིའ༌རག༌། ཁོ༌ ང༌མོ༌ནེ༌ ཕར༌ལ༌ ལས༌ ཅོ༌ཨིན༌ དུགས༌ཏེ༌ སིལ༌ལི༌ ནང༌ང༌ ངལ༌ སྲིབ༌ཅིག༌ མ༌ནེ༌ མ༌ ཚོས༌།”
8 ཏེ༌ནེ༌ བོ༌འཟ༌སི༌ རུཐ༌ལ༌ ཟེརས༌, “ཉོན༌ ངའེ༌ བུ༌མོ༌, ཁྱོ༌རང༌ སྟོན༌ཐོག༌ ལུས༌ཁན༌ ཏུའ༌ལ༌ ཞན༌མའེ༌ ཞིང༌ངི༌ཀ༌ མ༌ཆ༌, འིན༌ནེ༌ཀ༌ ང༌ཞ༌གུན༌ ཡོད༌ས༌ དུག༌། ངའེ༌ ལས༌ ཅོ༌ཁན༌ ན༌ཆུང༌གུན༌ ཉམ༌པོ༌ དུག༌།
9 བུ༌ཚ༌གུན༌ནི༌ ཞིང༌ངི༌ ཀ༌ཁག༌པོ༌ རྔ༌རུག༌ ལྟོས༌ ཡང༌ ཁོང༌གུན༌ནི༌ སྟིང༌རང༌ནེ༌ ན༌ཆུང༌གུན༌ ཉམ༌པོ༌ སོང༌། ཁྱོ༌རང༌ང༌ ལག༌པ༌ རྩེས༌ཏེ༌ ངན༌པ༌ མི༌ཅོ༌ཅེས༌ལ༌ ངའེ༌ བུ༌ཚ༌གུན༌ལ༌ བཀའ༌ ཏངས༌པིན༌། ཡང༌ ཁྱོ༌རང༌ སྐོམས༌ ཟ༌ནེ༌ ལས༌ ཅོ༌ཁན༌གུན༌ནི༌ སྐངས༌ཁན༌ནི༌ རྫའ༌མེ༌ ནང༌ནེ༌ ཆུ༌ ཕིངས༌ཏེ༌ ཐུང༌།”
10 ཏེ༌ནེ༌ རུཐ༌ ཁོའེ༌ རྐང༌པའེ༌ དུན༌ལ༌ གྱེལ༌ཏེ༌ ཟེརས༌, “ང༌ ཞན༌ཡུལ༌ལི༌ མིའ༌ འི༌ཟམ༌ ཐུག༌རྗེ༌ སྟན༌ན༌ ཛད༌ཏེ༌ ངའེ༌ ཉེ༌རང༌ང༌ ཕིའ༌ ཅི༌ ཅོས༌?”
11 བོ༌འཟ༌སི༌ ལན༌ཏངས༌, “ཁྱོ༌རང༌ངི༌ མག༌པ༌ ཀྲོངས༌པ༌ ནེ༌ ཕར༌ལ༌ ཁྱོ༌རང༌ངི༌ རང༌ངི༌ མག༌པའེ༌ ཨ༌མའེ༌ ཕིའ༌ ཅོ༌ཁན༌ ཚང༌མ༌ ངའ༌ གྱུས༌སོང༌, ཁྱོ༌རང༌ རང༌ངི༌ ཨ༌བ༌, ཨ༌མ༌ དང༌ རང༌ཡུལ༌ ཕངས༌ཏེ༌ འི༌རུ༌ མི༌ མ༌ཤེས༌ཁན༌གུན༌ ཉམ༌པོ༌ དུག༌ག༌ ཡོངས༌།
12 ཁྱོ༌རང༌ངི༌ ཅོས༌ཁན༌ ལས༌གུན༌ནི༌ ཕིའ༌ ཡ༌ཝའེ༌ ཁྱོ༌རང༌ང༌ ཅིན༌ལབས༌ སལ༌ཤིག༌། ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ ནང༌ང༌ ཁྱོ༌རང༌ངི༌ སྲུང༌སྐྱོབ༌ ལེན༌ པ༌སང༌ ཁྱོ༌རང༌ང༌ ཁོང༌ངི༌ སོལ༌རས༌ སལ༌ལ༌ ཛད༌ཤིག༌།”
13 ཁོའེ༌ ལན༌ཏངས༌, “སྤོན༌བོ༌ལེ༌, ཉེ༌རང༌ངི༌ ཆོགས༌སྐྱོར༌ ང༌ ཉམ༌པོ༌ ཏ༌རུང༌ངའང༌ ལུས༌ཤིག༌། ངའ༌ ཉེ༌རང༌ངི༌ ལས༌ ཅོ༌ཁན༌ མན༌ནའང༌ ཉེ༌རང༌ངི༌ ངའ༌ ཉམ༌པོ༌ སྤེ༌ར༌ ཟང༌པོ༌ ཏངས༌ཏེ༌ ང༌ ཞི༌དེ༌ སལས༌།”
14 ཁར༌ཇི༌ ཟའ༌ཅེས༌སི༌ ཏུས༌ ལེབ༌བ༌ཅིག༌ བོ༌འཟ༌སི༌ རུཐ༌ལ༌ བོད༌ཏེ༌ ཟེརས༌, “འི༌རུ༌ ཡོང༌ ཡང༌ ཏ༌གི༌ ལེན༌ཏེ༌ རྒུན༌ཆང༌ སྐྱུར༌མོའེ༌ ནང༌ང༌ སྤགས༌ཏེ༌ ཟོ༌།”
ཏེ༌ནེ༌ ཁོ༌ སྟོན༌ཐོག༌ རྔོ༌ཁན༌གུན༌ ཉམ༌པོ༌ དུགས༌ ཡང༌ བོ༌འཟ༌སི༌ ཁོའ༌ རྔོ༌ཁན༌ནི༌ གྲུ༌ ཟའ༌ལ༌ ཏངས༌། ཁོ༌ ཟའ༌ ཉན༌ཁན༌བོ༌ ཟོས༌ ཡང༌ ལག༌མ༌ ལུས༌ཁན༌བོ༌ ཐེན༌ཏེ༌ བོརས༌།
15 རུཐ༌ སྟོན༌ཐོག༌ ཏུའ༌ལ༌ ཆའ༌ཅིག༌ བོ༌འཟ༌སི༌ ཁོ༌རང༌ངི༌ མི༌གུན༌ལ༌ ཟེརས༌, “ཁོའེ༌ སྟོན༌ཐོག༌ རྔ༌ཁན༌ནི༌ དུན༌ནེ༌ ཏུ༌ནའང༌ ཁོའ༌ ཅའང༌ མ༌ཟེར༌ཤིག༌།
16 མ༌ཚད༌ ལྡམས༌ཁན༌ནི༌ སྟོན༌ཐོག༌གི༌ ནང༌ནེ༌ ཁག༌རིག༌ བིངས༌ཏེ༌ ཁོའ༌ ཏུ༌ཅེས༌ལ༌ བོར༌ཤིག༌, ཁོའ༌ ཁའ༌ མ༌ སྐྱེའ༌ ཏེ༌ ཚང༌མ༌ ཏུ༌ཅུག༌།”
17 ཏེ༌བོའེ༌ཕིའ༌ རུཐ༌ཐི༌ ཏེ༌རུ༌ ཕི༌ཏོག༌ ཚག༌པ༌ སྟོན༌ཐོག༌ ཏུས༌ ཡང༌ གྲུ༌ ཕིང༌ཅེས༌ལ༌ ཏེ༌གུན༌ རྡུང༌ང༌ཅིག༌ ཧ༌ལམ༌ ཀི༌ལོ༌ རྕུག༌ཤིག༌གི༌ གྲུ༌ བིང༌།
18 ཏེ༌བོ༌ ཁུར༌ཏེ༌ ཁོ༌ གྲོང༌ཁྱེར༌ལ༌ ལོགས༌ཏེ༌ སོང༌ ཡང༌ ཁོ༌རང༌ངི༌ མག༌པའེ༌ ཨ༌མའ༌ སྟནས༌། རྔོ༌ཁན༌ནི༌ གྲུ༌ ཟོས༌ཏེ༌ ལུས༌ཁན༌ ཐེན༌ཏེ༌ བོར༌ཁན༌བོ༌ རུཐ༌ཐི༌ ཁོ༌རང༌ངི༌ མག༌པའེ༌ ཨ༌མའ༌ ཏངས༌།
19 ནཱའོ༌མིའི༌ ཁོའ༌ ཏྲིས༌, “དི༌རིང༌ ཁྱོ༌རང༌ངི༌ སྟོན༌ཐོག༌ ལུས༌ཁན༌ སུའི༌ ཞིང༌ངི༌ཀ༌ ཏུས༌པིན༌? ཁྱོ༌རང༌ངི༌ ཀ༌རུ༌ ལས༌ ཅོས༌པིན༌? ཁྱོ༌རང༌ང༌ ཀའ༌ཀྲིན༌ སྟན༌ཁན༌ མི༌བོའ༌ ཡ༌ཝའེ༌ ཅིན༌ལབས༌ སལ༌ལ༌ ཛད༌ཤིག༌།”
ཏེ༌ནེ༌ རུཐ༌ཐི༌ ཁོ༌རང༌ངི༌ མག༌པའེ༌ ཨ༌མའ༌ ཁོའེ༌ སྟོན༌ཐོག༌ ཏུ༌ཁན༌ དག༌པོའེ༌ སྐོར༌ལ༌ ཤདས༌, “དི༌རིང༌ ངའེ༌ ལས༌ ཅོ༌ཁན༌ དག༌པོའེ༌ མིང༌ང༌ བོ༌འཟ༌ ཟེར༌དུག༌།”
20 ནཱའོ༌མིའི༌ ཁོ༌རང༌ངི༌ བུ༌ཚའེ༌ ན༌མ༌ ཟེརས༌, “ཡ༌ཝའེ༌ ཁོའ༌ ཅིན༌ལབས༌ སལ༌ཤིག༌། ཁོའེ༌ ང༌དང༌ སོན༌ཏེའ༌ ཡོད༌ཁན༌ དང༌ ཤི༌ཁན༌ ཚང༌མའ༌ ཐུག༌རྗེ༌ སྟན༌ཏེ༌ ཨིན༌ནོག༌། ཏེ༌ མི༌བོ༌ ཀགས༌པོའེ༌ ཏུས༌ལ༌ ང༌དང༌ངི༌ ནང༌ཚངས༌ལ༌ སྟ༌སྟོག༌ ཅོ༌ཁན༌ ང༌དང༌ངི༌ ཉེན༌གྲུང༌ ཉེ༌མོ༌ཞིག༌ ཨིན༌ནོག༌།”
21 ཏེ༌ནེ༌ རུཐ༌ཐི༌ ཟེརས༌, “ཁོང༌ངི༌ ངའ༌ ཟེར༌ར༌རག༌, ‘ངའེ༌ སྟོན༌ཐོག༌ ཚང༌མ༌ རྔ༌ ཚར༌ཚར༌ ཁྱོ༌རང༌ ངའེ༌ སྟོན༌ཐོག༌ རྔོ༌ཁན༌གུན༌ ཉམ༌པོ༌ དུག༌།’ ”
22 ནཱའོ༌མི༌ རུཐ༌ལ༌ ཟེརས༌, “ངའེ༌ བུ༌མོ༌, ཁོའེ༌ ཟེར༌ཁན༌བོ༌ ཅོས༌། ཁོའེ༌ ལས༌ ཅོ༌ཁན༌ བུ༌མོ༌གུན༌ ཉམ༌པོ༌ ཁོའེ༌ ཞིང༌ངི༌ཀ༌ དུག༌, ཏེ༌མན༌ན༌ ཞན༌མའེ༌ ཞིང༌ངི༌ཀ༌ ལས༌ ཅོ༌ཁན༌གུན༌ནི༌ ཁྱོ༌རང༌ང༌ ལག༌པ༌ རྩེས༌ཏེ༌ ངན༌པ༌ ཅོ༌སྲིད༌ཅེས༌ ཨིན༌ནོག༌།”
23 ཏེ༌བོའེ༌ཕིའ༌ རུཐ༌ བོ༌འཟ༌སི༌ ཞིང༌ངི༌ཀ༌ བུ༌མོ༌གུན༌ ཉམ༌པོ༌ ཀྲོ༌ནས༌ ཉིས༌ཀོའེ༌ སྟོན༌ཐོག༌ རྔ༌ ཚར༌ཚར༌ སྟོན༌ཐོག༌ ལུས༌ཁན༌གུན༌ ཏུས༌ ཡང༌ ཏེ༌ཏུས༌ གང༌པོ༌ ཁོ༌ ཁོ༌རང༌ངི༌ མག༌པའེ༌ ཨ༌མ༌ ཉམ༌པོ༌ དུགས༌།