Nzembo 113
Moko te akokani na Nzambe
1 Bokumisa Yawe !
Bino basali ya Yawe, bokumisa Ye ;
bokumisa Yawe !
2 Tika ete Kombo ya Yawe epambolama
kobanda sik’oyo kino libela na libela !
3 Longwa na este kino na weste,
tika ete Kombo ya Yawe epambolama !
4 Yawe azali na likolo ya bikolo nyonso,
nkembo na Ye ezali na likolo koleka Lola.
5 Nani akokani na Yawe, Nzambe na biso,
oyo avandi na Kiti ya Bokonzi
kati na bisika oyo eleki likolo ?
6 Agumbamaka mpo na kotala
likolo mpe mokili.
7 Wuta na putulu, atombolaka
moto oyo akelela ;
wuta na fulu ya matiti,
abimisaka mobola
8 mpo na kovandisa ye esika moko na bakambi,
na bankumu ya bato na Ye.
9 Avandisaka mwasi ekomba kati na ndako na ye,
lokola mama ya esengo kati na bana na ye.
Bokumisa Yawe !