Nzembo 129
Banyokoli ngai mingi, kasi nalembi te
1 Nzembo ya mobembo mpo na kokende na Tempelo ya Yawe.
Wuta bolenge na ngai, banyokoli ngai bambala ebele.
Tika ete Isalaele ezongela koloba :
2 « Wuta bolenge na ngai, banyokoli ngai bambala ebele,
kasi batikali kolonga ngai te ! »
3 Bato mabe batimoli mokongo na ngai,
bazokisi ngai bapota ya banzela milayi na mokongo.
4 Kasi lokola Yawe azali sembo,
akati basinga ya bato mabe.
5 Tika ete bato nyonso oyo bayinaka Siona
bakufa soni mpe bazonga sima !
6 Tika ete bakoma lokola matiti
oyo ebotaka na likolo ya ndako
mpe ekawukaka liboso ete balongola yango ;
7 tika ete mobuki bambuma ya bilanga
atondisa na yango te maboko na ye,
tika ete mokangi maboke ya banzete atondisa
na yango te saki na ye.
8 Tika ete baleki nzela baloba na bango te :
« Tika ete Yawe apambola bino ! »
Topamboli bino na Kombo na Yawe !