5
A diwengga diru dïjïn äbrïnï kiꞌdoonganu gidi Ngwaalu
1 Londaja na ꞌdünggüny yiru nono ma ru ꞌdid ndi ari yïjïn giyo ꞌdanggalanu! ꞌDi ati dïjï ru dïjïn gidaw didi mbumbu gwüngün! Ngwüjï ngwanni ngwaꞌti lïngïdï Ngwaalinga, ngwati ꞌti ärrü yiꞌral giyee yiru gu no.
2 Ngaa be ïrïngïnï! Ngaa laadi manni runi gwulleny giyiꞌral giyee ꞌdi a dïjï äbrïnï ndoo därrü yiꞌral giyee gidiliganu ꞌdanggalu.
3 A be äny gwaꞌti gito ꞌdanggalu gilingeno ar be ji gïlïgïꞌrïm. Äny gwuma ari ngwujaꞌri ngwüny gïdïjï ndee därrü yiꞌral giyee ndi ari diminyi de obalu nono aadi nyi ji gito ꞌdanggalu.
4 Manari ngaa lima oꞌrajidalu ngwürïny ngwe ngwudi Deleny dege dani Yicu ar ji gïlïgïꞌrïm, a yiima ji yidi Deleny dege dani Yicu gidiliganu ꞌdengge,
5 Gätïjär dijegoꞌro dïjü ndee ngwape a gu yiꞌral dudi giyee yüngün yiki drü nunnu aji a lïgïꞌrïm lüngün gïlängïdïnï komon gidi Deleny.
6 Yaꞌti gu ädï ndi ari ngaa ïrïngïnï yiꞌral ye yiru gu no. Ngaa laꞌti lïngïdï ndi ari ma ang ape ngwüꞌrüdü ngwooko, ngwati gwürlï ngwülä ꞌdar aar uule?
7 Yäy gu no, gätär ngwüꞌrüdü mbüny ngwanni ngwuꞌrin nunnu ngaa ru ngwülä ngwanni ngwuyang. Ngaa ru ngwüjü ngwujuꞌru, ndi ari liminje mïꞌrï nono girany ge gani Kirictu gidi Dambdani gwege.
8 Yäy gu no ar ape yïꞌrïnyïnä aaꞌti ya ar je ape ngwüꞌrüd ngwe ngwanni ngwuꞌrin ngwani ngwüꞌrüd ngwudi yiꞌrinya na ke, ar je be ape yïꞌrïnyïnä yidi ligiꞌra le laꞌti ngwüꞌrüdänü lani juꞌri na ꞌdidanu.
9 Ngwujaꞌri ngwüny ngwanni ngwüllïjä je, ngwüllïjä je ndi ari aaꞌti ngaa la acajidi ngwïjïn ngwe.
10 Nggwaꞌti geꞌtaja ndi ari ngwüjü ꞌdar ngwanni ngwuki gïdïdlä ndee yani yïjïn, ngwuban, ngwuꞌram, na lati äpïjï dïdülä yobo. Adinari nggwaru gu no, yaadi be ru ndi ari ngaa ꞌtü ngaa gatani ngwüjü ngwümnä gïdïdlä ꞌdar.
11 Ngaa je be üllïjä gweneno ndi ari aaꞌti ngaa la acajidi ngwüjïngä le ngwanni ngwaru ngwuru ngwïkïrïjïn aar be ru ngwïjïn na aar ru ngwuban, na aar ru ngwudi yobo yidi dïdülä, ngwaru ngwulem, ngwati rlälï na aar ru ngwuꞌram. Ngwüjï ngwanni ngwuru gu no, aaꞌti ngwa ngwe jalu ndi eny.
12 Na äny gwaꞌti ätï yeleny ndi nyi pïcï ngwüjü yelenya ngwuju kiꞌdoonga poor ngwaꞌti kiꞌdoonganu gidi Kirictu. A be lanni gilo kiꞌdoonganu ngwanni ngwati ape gwuki, ngaa lätï gu ndi a je pïcï yelenya.
13 Ndi ari lanni gilo kulu poor, Ngwaalu ngwuru ngwadi je pïcï yelenya. Gitab garu, “Äbrär gwanni gwuki ꞌdanggalanu.”