4
Mïꞌrï ngwujaꞌri ngwudi gur gïkwüdï
(Mätä 13.1–9; Luka 8.4–8)
1 Oꞌre a Yicu ji ndi enggaci ngwüjü ngwujaꞌri dibirta nono didi yaw yidi Jälïlïng, a ngwüjï ngwonyadu oꞌradi nono, ꞌdi aaꞌti gay ju, ngwüꞌdïꞌrï ngwänï gïbälükänü ngwujalu ating be ondaci ngwüjü ating ji gïbälükä giyaala ati be ngwüjï ji gïmämäng nono.
2 A je Yicu ondaci ngwujaꞌri ngwonyadu ngwuje mïꞌrïcï ngwujaꞌri ngwe ngwüngün ngwari,
3 “Gerajar ngwänï ngaa ꞌdingini, gur gïꞌtüdï ngwele giliburanu ndi kwoy yona yüngün.
4 Na gaji ganni giming ge ji ndi gida, a yon yoko miꞌradalu kayalu a yïꞌrä ila aar je utalu.
5 Na yoko miꞌradalu ngwaalu ngwuru yoꞌrr, ngwaꞌti gu dïyäng onyadu, aar ꞌtüdä puprang ndi ari dïyäng daꞌti olanu.
6 A be anni ma lingen anda, ngwuje obe aar ayi nono aar undi ndi ari dïyäng daꞌti ju danni dadi aar gu ülläjï ngwuuwa.
7 A yoko miꞌradalu ngwügänü a be anni ma aar ꞌtüdä, a je ngwügï gatu aar gwogwornyadi aar ꞌti lïngïtï.
8 A be yon yanni yima miꞌradalu ngwaalu ngwanni ngwätï dïyängü dijaw aar ꞌtüdä aar pe ꞌdi aar linge yuula ati yoko gendadi ꞌdï täꞌrïl (30) na küüꞌrï täꞌrïl (60) na yoko ätï küüꞌrï tudini (100).”
9 A Yicu ari, “Nginde gwanni gwätï ngwänï rom ngwudi ꞌdingini, ngwuꞌdingini.”
Bupi gwudi mïꞌrï ngwujaꞌri
(Mätä 13.10–17; Luka 8.9–10)
10 Anni ma Yicu ji ndi jalu gweꞌte pu, a ngwooꞌra ngwükäjäär je ngwüngün ꞌdï na rom (12) na ngwüjï ngwuꞌter änänü aar otacalu ndi ari ngwujaꞌri ngwuru ange ngwanni ngwümïꞌrïdïng je?
11 A je Yicu ci, “Yujimidi yidi ngwujaꞌri ngwudi yeleny yidi Ngwaalu yima ara je ätädä. A be ngwüjï ngwanni ngwaꞌti giyelenyanu, yiꞌral ꞌdar ya aar je mïꞌrïcï ngwujaꞌri ngwe
12 nunnu,
‘Aar engga enggang aar ꞌti be lïngïdï yiꞌral yere aꞌtur
aar ꞌdingini ꞌdingining, aar ꞌti be bebera aꞌtur.
Ndi ari aadi aar gu ru, ladi joꞌrenyana aar oꞌralu giyiꞌral yegen yiki aar je düdänïjänü ndi ke gwegen.’”
A Yicu inggidi ngwujaꞌri ngwani dïjï dïkwüdï
(Mätä 13.18–23; Luka 8.11–15)
13 A je Yicu ci, “Ngaa laꞌti lïngïdï mïꞌrïcïng ngwudi ngwujaꞌri nggwee ngwani ange? A mine ngwa je lenge ngwuꞌter awa ngwonyadu?
14 Dïjï dïkwüdï ngwujaꞌri ngwudi Ngwaalu.
15 Ngwüjï ngwoko ngwuru nono yon yanni yïꞌdü kayalu, ngwüjï ngwati ꞌdingini ngwujaꞌri aar ꞌti be üllü giyigoranu yegen a be dijegoꞌrr ila ngwuje apada ngwujaꞌri ngwanni ngwükwüdïnä ꞌdenggegenanu.
16 Na ngwüjï ngwoko ru nono yona yanni yïꞌdü ngwaalu ngwuru yoꞌrr, ngwati ꞌdingini ngwujaꞌri aar je määtä puprang lijayanu.
17 A be anaku aaꞌti aar gu dïngädï ngwuuwa gïdïyäng, aar ꞌti ola gajanu. Manari dïrbä na übïnälü gwuma ila gwani ngwujaꞌri ngwoo, aar ïꞌdï puprang.
18 A ngwüjï ngwoko ru nono yon yanni yïꞌdü ngwügänü. Ngwati ꞌdingini ngwujaꞌri.
19 A je be yigor pänü gwani midi gwudi dïdlä ndee a je yeleny yiru ꞌtur ape a je ngwong amiꞌra ngwudi dïdlä, aar je gwogwornyaci ngwujaꞌri aar ꞌti ꞌriꞌru aar ätï ngwäyänü.
20 A ngwüjï ngwoko ngwuru nono yon yanni yïꞌdü gïdïyäng danni dijaw, ngwati ꞌdingini ngwujaꞌri aar je ämnï aar ꞌriꞌri aar ape ngwäy ꞌdï täꞌrïl (30) na ꞌdï nyärläl (60) na ngwoko aar ape küüꞌrï tudini (100) aar onyadani giyon yanni yïkwüdäär je.”
Lamba kudinala
(Luka 8.16–18)
21 A je Yicu ci, “Ngaa lati ape lamba ngaa gwüꞌrübäjälü gimo ge ya ngaa änïjälü ngwombonyano? Lati aang ꞌti manni geꞌta kudinala güngüne?
22 Ndi ari yere yanni yändälü ya aar je ꞌtäjälü na yere yanni yïgwüꞌrübänälü ya aar je ꞌtäjälü gilingenalu.
23 Manari gwere gwätï ngwänï rom ngwudi ꞌdingini, ngwuꞌdingini.”
24 Ngwuje ci, “Gerajar ngwänï mama ngwujaꞌri ngwanni ngwa je ꞌdingini, ndi ari giny ganni gati ge ätä dïjü ga aar ge ätä aang gendani.
25 Na gwanni gwätï gwa aar gendaci, na gwanni gwaꞌti ätï, yanni yätïng je yooko, ya aar je apada.”
Mïꞌrï ngwujaꞌri ngwani yuula yanni yati ꞌtü aar pe
26 A Yicu ari, “Yeleny yidi Ngwaalu yiru nono gwele ma dïjï gatu yona gïdïyäng.
27 Mung ndri dilu de na lingen le manari dati ndri ngwüꞌdïꞌrälü, yuula yati ꞌtüdä aar pe, ngwuye ꞌti lïngïdï yorto ye ngwaalinga.
28 Ndi ari yati je dïyäng ꞌtüyä gwuꞌren, gwerre gwerre aar ꞌtüdä yipuru yïgïlä, aar geꞌte dirꞌda a dirꞌda ꞌtü yona yonyadu.
29 Na manari yon yima ojeme no, ngwapa dabri didi uni ndi ari gaji gidi uni gima räꞌtäjï.”
Mïꞌrï ngwujaꞌri ngwudi läy lidi goꞌta
(Mätä 13.31–32; Luka 13.18–19)
30 A je Yicu ci, “Yeleny yidi Ngwaalu nggwadi ari yiru nono ange na yiru ange yanni yadi ar ye mïꞌrï ngwujaꞌri ngwadi inggidi yelenya yidi Ngwaalu?
31 Garang ganni gadi nje ge übïdänü? Yinje übïdänü läy le looko lidi daꞌri diru doꞌta. Ndi ari lati ïꞌdï gïdïyäng lokana ngwäy ngwudi ngwaꞌri ꞌdar.
32 Ma be ari lima aar kwoy mung ꞌtüdä, ngwüꞌtüdä daaꞌri dipana ngwaꞌri ꞌdar gidaarti ngwïrï yiꞌrina yipa yipa ꞌdi a gu yïꞌrä yidi gere ila aar gu geꞌte ngwüꞌrüꞌtïlä gidil degen.”
33 Mïꞌrïcï gwe ngwujaꞌri gweꞌte gweꞌte nono nggwee gwonyadu, a gwe Yicu ondaci ngwüjü ꞌdar ngwujaꞌri nunnu aar lenge yiꞌral.
34 Ngwuꞌti ondaca ngwüjü ngwujaꞌri ngwere ngwaꞌting je ngwe mïꞌrïcä. A be ma ji ma aar ji ngwooꞌra ngwe ngwüngün jücü, ngwuje be ꞌtäcälü ngwuje enggaci yiꞌralalu ꞌdar aar je lenge.
A Yicu dünäjï dudu
(Mätä 8.23–27; Luka 8.22–25)
35 Gomon nggoo anni ma ngwaalu ru digera, a Yicu ci ngwoꞌra ngwüngün nu, “Ar ele ar dambu dambal.”
36 Aar gatani ngwüjü ngwonyadu gwodan, a ngwooꞌra ape Yicung anaku jung gu gïbälükänü gwanni gwondacing gu ngwüjü aar gwe ele. A ngwübälükä ngwoko ngwuju ꞌto ngwuju gu ngwüjänü aar le ele.
37 A dudu obe bälükä yaw ye ꞌdi aar onyadi bälükä ngwuru gwadi ïꞌdätï.
38 A Yicu ji ndi ndri gïbälükänü gwodan ngwugeꞌte giꞌra giꞌtugurala, a ngwooꞌra ngwüngün ele aar ꞌritiya aar ci, “Gwani Doorta, a gwaꞌti nje gu geꞌtaja ngwäyänü ndi ari nyii la ïꞌdäte?”
39 Ngwüꞌdïꞌrälü ngwugirinya diruna ngwuci dudu, “Dünü! Ädäälü!” Aꞌti dirun dünï a ngwaalu aalu nyimod.
40 Ngwuci ngwoꞌra ngwüngün, “Ngaa larra ara je gu be yedeny eny no? Ngaa gilona lamiꞌratu ämnïng ꞌdünggünye?”
41 A je yedeny eny aar otajidalu aar ari, “Yärü gwuru nggwee? ꞌDi a dirun na dudu ꞌdengenaci!”