5
A Yicu uꞌriyi guru nono gätïnä dïꞌrïllä nono
(Mätä 8.28–34; Luka 8.26–39)
1 A Yicunga ngwooꞌra ngwe ngwüngün ꞌdïꞌrï aar ele giyaanu ꞌdi aar ꞌtü dambal ngwaalu ngwani Jädïrïn.
2 Anni ma aar üllädälü gïbälükälä, a gur geꞌte gïꞌtüdï ngwumomanu gätïnä dïꞌrïllä nono ila ꞌdünggüngün.
3 Gur nggee gati ji ngwumomanu aar ꞌti ba be burna ndi giki ꞌdi yuꞌrung ye.
4 Ndi ari gati aar gekaji ngwuyalu na yora yuꞌrung ye, ating üꞌrïꞌtïyï yuꞌrunganu ngwuy ngwukiyi ngwaba giyora yüngün. A dïjï erne danni dätï yiima ndi määtä ngwugekajalu.
5 Ating ji ngenone dilu de na lingen le ating elellalu ngwumomanu na giyenala ating ürrï dulalu ating üꞌrïꞌtïnï nono ngwaginya ngwe.
6 Anni mung engga Yicung ꞌtuꞌtu ngwaalu ngwolanu ngwugwalajanu ꞌdi ngwadacalu yirku ye giyoranu yüngün.
7 Ngwürrï dula gwulleny ngwuci, “Garang ganni gïmïnängä ꞌdünggüny gwani Yicu Gïjï gidi Ngwaalu ngwupa ngwudi gerala? Nggwa ang pïcï yiꞌrany Ngwaalu ngwe aaꞌti a gwuny ïcï dïrbä.”
8 Ndi ari gwuca Yicu nu, “Dïꞌrïllä ndee ꞌtüdï gïdïjänü ndee.”
9 A be Yicu otacalu ngwuci, “Ngwürïny ngwunga ngwani yärü?”
Ngwuci, “Ngwürïny ngwüny ngwani Gwuꞌtulunga ndi ari änyängä lonyadu.”
10 Ngwüpäcï Yicungalu kwoꞌto kwoꞌto nunnu aaꞌti ling je linynyi ngwaalu ngwoo.
11 Giꞌdu gidi ngwüdr giju aar je ji ndi iye geno nono gito gito.
12 A ngwüꞌrïllä päcï Yicungalu aar ci, “Gäbïcï nje nyii ele ngwüdr nyii gu änänü.”
13 A je Yicu gäbïcï, a ngwüꞌrïllä ꞌtüdä kuranu, aar ele aar änï ngwüdränü. A giꞌdu gidi ngwüdr ngwuru ngwüüꞌrï rom (2000) abri ꞌdar geno nono aar bälädï giyaw aar ïꞌdätï ꞌdar.
14 A ngwooꞌra ngwanni ngwiya ngwüdrä abri aar ondaca ngwüjü kündär na ngwuꞌdunanu yiꞌral ye giyee a ngwüjï ꞌtüdä aar ila ndi ombaji yiꞌral yanni yima ji.
15 Anni ma aar ila ndi Yicu, aar mbuji guru ganni gätïnä ngwüꞌrïllä nono gijalu gigenna ngwureda guꞌru kiꞌranu, a yedeny eny ngwüjü.
16 A ngwüjï ngwanni ngwänggädï gwerre aar ondaci ngwüjü ndi ari yiru ange yanni yima mbuji ꞌdi a ngwüꞌrïllä ꞌtü aar gatani aar je ondaci ꞌto ngwüdr ngwe.
17 Aꞌti ngwüjï päcï Yicungalu nunnu ngwugatani ngwaalinga ngwegen ngwele.
18 Anni ma Yicu ji ndi änï gïbälükänü, a gur nggoo gätïnä dïꞌrïllä nono päcï Yicungalu ndi aar gwe ele.
19 Aaꞌti Yicu ämnäcä ndi ari gwe ele ngwube ci, “Ïndï ꞌdunu ngwüjï ngwunga nga je ondaci yiꞌral yanni yima ara je Ngwaalu ärrïjï ndi ari ngwïnädä je.”
20 A gur ꞌdïꞌrï ngwele ngwondaci ngwüjü Gïyündär yanni yiru ꞌdï (10) ndi ari awa gwuma Yicu apa yiima yipa, a ngwaalu elalu ngwüjï ngwe ꞌdar giyiꞌral giyee.
Gera ganni gayu na daw danni dümä
(Mätä 9.18–26; Luka 8.40–56)
21 Anni ma Yicu üꞌrü yaanu bälükä gwe ngwudambu dambal gidibirta didi yaw, a ngwüjï ngwonyadu oꞌrada nono.
22 A be deleny deꞌte didi ngwämrä dani Yaruj ila ngenone, anni mung engga Yicung, ngwadacalu giyoranu.
23 Ngwüpäcälü kwoꞌto kwoꞌto ngwuci, “Gïjï güny giru gera gadi ayi, ila nga alliji guy nono nunnu ngwuꞌri nono ngwumidi.”
24 A Yicu ꞌdïꞌrï aar gwe ele.
A ngwüjï ngwonyadu ꞌdïꞌrï aar gwujani aar änänü.
25 A daw deꞌte ji dümä dati ꞌderce yïnälü ngwätï ngwüdläyü ꞌdï na rom.
26 Nginde dilandadu ngwuma ꞌdar anaku rar gu nunnu daadi mbuji uꞌring nono aar iye yiꞌrendenya yonyadu ngwumedaji ngwonyalu ꞌdar ngwüngün ngwuꞌti mbuju uꞌring nono ngwukani dümdï.
27 Anni mung ꞌdingina Yicu gwe, ngwila ngwele giluꞌranu lidi Yicu ngwüjänü ꞌdi ngwakani direda nono didi Yicu.
28 Ndi ari daru giligoranu lüngün, “Minyi akani direda nono düngün ꞌdogo, nggwa uꞌri nono.”
29 Puprang no, a yïn dünädä ngwuye ïcïnänü ndi ari dima jayi ngwangina ngwanni ngwati eny nono.
30 A Yicu ïcïnänü yiima ye yanni yima ꞌtü ꞌdünggüngün, ngwugwurlalu ngwüjänü ngwonyadu ngwutalu ndi ari, “Yärü gwuru gwanni gwakana direda nono düny?”
31 A ngwooꞌra ngwüngün ci, “Nga gwaꞌti änggädï ngwüjü ngwuromadanga nono awa? Nga be ari, ‘Yärü gwakaniny nono?’ ”
32 A be Yicu ji ndi ombaji dïjälü danni dakana nono nunnu ngwulenge.
33 A be daw dïlïngïdï ndi ari yiru ange yanni yima ärrïnï ngwanginanu ngwüngün, ngwila didiꞌru yedenyo ngwadaci Yicungalu giyoranu ngwari ngwenggaci yiꞌralalu ꞌdar yanni yiju yätï ngwäyänü.
34 A Yicu ci dayu, “Gwani gera güny, ämnï Ngwaalu gwunga gwuma ang uꞌriyi nono, ïndï gwadatalu nga gatu linginalu gïdïrbä dunga.”
35 Anni ma Yicu jina ndi ondaci dayu, a ngwüjï ngwükäjäär je ngwïndï ngwuꞌdun ngwudi deleny didi ngwämrä dani Yaruj aar ila aar ci, “Gera gunga gima ayi ange gwuru nga be äbïngïnï dortanu mana?”
36 A Yicu ci aaꞌti nga gwa geꞌtaji ngwujaꞌri ngwudi ngwüjï ngwäyänü ngwuci delenya didi ngwämrä, “Aar ang ꞌti yedeny ïtï ämnä Ngwaalu ꞌdogo.”
37 Ngwuꞌti gäbïcä dïjü dere ndi aar de ele, a be Butruj ru ꞌdogo gweꞌte pu gwanni gwugwujana na Yagub na Yuwana gwenggen gwudi Yagubinga.
38 Anni ma aar ꞌdïꞌrï aar ele ngwuꞌdun ngwudi deleny ndoo didi ngwämrä, aar mbuji ngwüjï ngwulagadanu brüny ndi ari aar ürrï dula.
39 Ngwele ngwänï gïdrü ngwuje ci, “Ngaa larra ma aang lagadanu brüny aang ürrï dula? Gera gaꞌti ayu gindru ꞌdogo.”
40 A ngwüjï ärï Yicung ngwïmä a je Yicu ꞌtüyï ꞌdar poor, ngwube ape ꞌdogo papang gwudi gera na nanni gwüngün na ngwoꞌra ngwüngün ngwanni ngwujaar ngwe, aar le änï ngwaalu ngwanni ngwuju gu gera gayu.
41 A Yicu määtä gïjü kuy ngwube ci, “Tälïtä kwum!” (Yärmïyängä ngwani, “Gera nggee gooko, nggwucanga, ꞌdïꞌrälü.”)
42 Puprang no a gera ꞌdïꞌrälü ngwüdünälä ngwelalu. (Gätï ngwüdläyü ꞌdï na rom). A yiꞌral giyee gäbïcï ngwüjü aar dibi.
43 A Yicu ondaci ngwüjü ngwuje girinya gwulleny ndi ari aaꞌti dïjü dere da gu lenge yiꞌral giyee ngwuje ci ätädär ngwonyalu ngwere ngwuje eny.