6
A ngwüjï ngwudi Najrang ꞌdonya Yicung
(Mätä 13.53–58; Luka 4.16–30)
1 A Yicu ꞌtüdä ngeno ngwila ꞌdunu kündär güngün gani Najra a ngwooꞌra ngwüngün gwujana.
2 Anni ma gomon ila ganni giru Kwoꞌra täꞌrïl, ngwüꞌdïꞌrï ndi enggaci ngwüjü ngwujaꞌri ngwämrä na lonyadu anni ma aar ꞌdingini ngwujaꞌri ngwüngün, aar dibi. A ngwüjï ari, “Gur nggee gapu yiꞌral ne giyee! Bebere gwapung ne nggwee ꞌdi ating ape yiima yiru ꞌter!
3 Gur nggee gäꞌtüdï mene dooꞌta didi yüꞌre? Gäꞌtüdï mene gïjï gidi Märïyäm, gwenggen gwudi Yagubinga Yüjïb gwe na Yäwüdängä Jamaan gwe? Ngwenggen ngwaꞌti ar le ngene?” A ngindenga obalu aar ꞌdonya ngwujaꞌri ngwüngün.
4 A je Yicu ci, “Dïjïr dati aar ꞌti dïnyädï kündär güngün kïïlü na ngwüjï ngwüngün gïdrü.”
5 Ngwuꞌti apu yiima yiru ꞌter yonyadu ngenone ngwube gatu ngwüjü ngwoko ngwanni ngwümä guy nono ngwuje uꞌriyi nono.
6 A gwe ngwaalu elalu gwani amiꞌrati gwudi ämnï Ngwaalu gwegen.
A Yicu ükäjï ngwoꞌra ngwükäjäär je ꞌdï na rom
(Mätä 10.5–15; Luka 9.1–6)
A be Yicu ele ngwulandalu ngwenggaci ngwüjü ngwuꞌdunanu ꞌdar.
7 A Yicu urnida ngwoꞌra ngwüngün ngwuru ꞌdï na rom ꞌdünggüngün ngwuje ükäjï rom rom ngwuje ätädä yiima yidi ꞌtüyï ngwüꞌrïllänü.
8 Ngwuje olada ngwujaꞌri ngwe ngwee, “Aaꞌti ngaa la apani gony gere gidi guy nga be apani guura ꞌdogo. Aaꞌti ngaa la apani yona na düräd na yibu yidi ngwüꞌrïny.
9 Gennar ngwüdänü aaꞌti be ngaa la gendani direda.
10 Ngwuꞌdun ngwa gu änï, jar gwalu ngeno ꞌdi ngaa ꞌdïꞌrï kündär nggoo.
11 Manari ngwüjï ngwuma je ꞌti gwäꞌrä aar je ꞌti ꞌdengenaca, brütädär dibuꞌralu mbüny giyora yalu ndi inggidi ngwujaꞌri ngwee giyigoꞌro yegen ma je gatani.”
12 Aar ꞌtü aar ele aar ondaci ngwüjü ndi joꞌrenyana giyiꞌral yanni yiki.
13 Aar ꞌtüyï ngwüꞌrïllänü ngwonyadu aar maji ngwüjü yila nono ngwonyadu ngwümä aar je uꞌriyi nono.
Aar üꞌrïdä Yuwanang Almamadan giꞌralu
(Mätä 14.1–12; Luka 9.7–9)
14 A deleny dani Yïrüdïj ꞌdingina yiꞌral ye giyee, ndi ari ngwürïny ngwudi Yicu ngwuma linginni ngwüjï. A loko ari, “Yuwana Almamadan gwuru gwuma ꞌdïꞌrä giyiꞌranyanu, yiru yanni yïgäbïcä ngwube ape yiima giyee.”
15 A loko ari, “Ïlïyä gwuru.” Na mana loko ari, “Nginde gwuru dïjïr deꞌte ngwïjïränü ngwudi gwerreng.”
16 A be anni ma deleny dani Yïrüdïj ꞌdingini yiꞌral giyee, ngwari, “Yuwana gwanni gwuminyi üꞌrïdä giꞌralu, gwuru nggwee gwuma ꞌdïꞌrä giyiꞌranyanu!”
17 Ndi ari nginde gwani Yïrüdïj gwerre gwükäjïdä ndi Yuwana aar määtä aar giki aar geꞌte korkon. Ndi ari Yuwana gwügïrïnyädï delenya dani Yïrüdïj nunnu gwagu dayu dani Yïrüdïyä didi gwenggen gwani Bïlïpüj.
18 Ndi ari gwati Yuwana ondaci ngwuci, “Yaꞌti gu ädï ndi agu dayu didi gwanggalu.”
19 A be Yïrüdïyä ïnïjï ngwujaꞌri ngwee ngwubupi ndi ꞌrinye ngwuꞌti be mbuja gay.
20 Ndi ari Yïrüdïj gwüdïnyädï Yuwanang nggu be etadi ngwulenge ndi ari Yuwana gwuru dïjï dïdünälü ngwujuꞌri. Ati ꞌti ngwujaꞌri ngwudi Yuwana jädï Yïrüdïjïngänü ating be jada ndi ꞌdingini.
21 Gwodanalu a gaji ila a Yïrüdïyä mbuji gay. A Yïrüdïj geꞌte yïꞌrïnyïnä yidi lïngïnï gwüngün ngwügïꞌtïjï ngwoꞌra ngwudi yeleny yüngün na ngwooꞌra na ngwanni ngwuru yiꞌra yidi yiꞌdoonga yidi gwuꞌtulunga gwüngün na lanni liru yiꞌra yidi ngwüjï Jälïl.
22 A be gera ändä gidi Yïrüdïyä ngwuje rïtïjï ngwärä aar jada Yïrüdïjïngänü na ngwïrnü ngwüngün.
A deleny dani Yïrüdïj ci, “Bupa gony gere ganni gïjädängänü ga ang ätädä.”
23 A nginde gwani Yïrüdïj mïꞌrïcï yiꞌrany ngwuci, “Yere yanni yibupa je ya je ätädä ꞌdi ma ru ndi ari ang üꞌrïcï yelenyanu yüny.”
24 A gera ꞌtü ngwuci nanning gwüngün, “Nyi bupi ange?”
A nanni gwüngün ci, “Giꞌra gidi Yuwana Almamadan.”
25 A gera oꞌra ditiꞌrambal gideleny ngwujaꞌri ngwe ngwuci, “Nggwunana gweneno no, nyi ätädä giꞌra gidi Yuwana Almamadan giꞌram ge.”
26 A ligor oda Yïrüdïjïng gwulleny a be anaku mïꞌrïdïng gu yiꞌrany na gwani ngwürnü ngwüngün ngwuꞌti jädï ndi ꞌdonyaci ngwujaꞌri.
27 Puprang no, ngwükäjï guru gidi galal ndi ari ngwapa giꞌra gidi Yuwana. A gur gidi galal ele ngwüꞌrïdädä Yuwanang giꞌralu mbüny korkon,
28 ngwapa giꞌra giꞌram ge. Ngwape ngwätädä gera a gera ape ngwätädä nanning gwüngün.
29 Anni ma ngwooꞌra ngwudi Yuwana ꞌdingina, aar ila aar ape ngwangina ngwüngün aar je gwürï gidimomo.
A Yicu iye ngwüjü ngwüüꞌrï tudini (5000)
(Mätä 14.13–21; Luka 9.10–17; Yuwana 6.1–14)
30 A ngwooꞌra ngwükäjäär je oꞌrada Yicung nono aar ondaci yiꞌral ꞌdar yanni yima aar je ärrä aar je enggaca ngwüjü.
31 A be anni ati ngwüjï ngwonyadu ji ndi ila aar ele, ngindenga aar ꞌti mbuju gay gadi aar ge eny, ngwuje ci, “Ilar nga nga jücü ar ele ngwaalu ngwere ngwaꞌti gu ngwüjï ngaa gu obe düwä de.”
32 No, aar ele jücü bälükä gwe ngwaalu ngwaꞌti gu ngwüjï.
33 A be ngwüjï ngwonyadu ngwanni ngwänggädï je aar ele aar je lenge aar abri yora yalu gïyündär ꞌdar aar je dalmacani aar obani ngenone.
34 Anni ma Yicu üllädälü kïmämü, ngwengga ngwüjü ngwonyadu, aar ïnä ndi ari ngwuru nono ngwangal ngwududu ngwaꞌti ätï doꞌranu. Ngwuje enggaci yiꞌral yonyadu.
35 Gaji ge nggoo, ngwaalu ngwuma be ru digera, no a ngwooꞌra ngwüngün ïlïjä aar ci, “Ngwaalu ngwee ngwuru dïdäny a lingen lima ele.
36 Bädïyä ngwüjü aar ele gïyündäränü giyubanu gito gito aar illa ngwony ngwere aar je eny.”
37 A je be Yicu ci, “Ätädär je nga nga ngwony ngwere aar je eny.”
Aar ci, “Ma yibupa ngwüꞌrïnyä ngwudi yiiru ngwüüwäyü ꞌdübä. Yani ndi ari nyii ele nje ïllïjä yona yidi ngwüꞌrïny ngwee ꞌdar aar enye?”
38 A je Yicu ci, “Ngaa lätï yona ümn? Ïndär ngaa je ombaja.”
Anni ma aar je ombaja, aar ci, “Yiru tudini na ngwuum rom.”
39 Ngwuje be ci aar geꞌte ngwüjälü aar jalu kiꞌdu kiꞌdu giyanyalu yïgïnyä.
40 No ati aar jalu giꞌdu loko küüꞌrï tudini (100) na loko ꞌdï tudini (50).
41 Apeng gu yona giyoo tudini (5) na ngwuuma ngwoo rom (2) ngwüꞌdïꞌrïyï ngwäy ngwombajidi kerala, ngwuci Ngwaalinga yäy ꞌtu ngwüꞌrü yonanu. Ngwuje be ätädä ngwoꞌra ngwüngün aar je gïꞌtïjï ngwüjälü. Ngwoꞌre ngwuje gegenaci ngwuuma ngwoo rom ꞌdar.
42 Aar eny ꞌdar aar pe.
43 A ngwooꞌra uta yiꞌramalu ꞌdï na rom (10) yonyadu yonala na ngwuum ngwanni ngwüꞌrïꞌtänü ngwïꞌdälü.
44 Ngwüjï ngwanni ngwïtï, ngwur ngwuru ngwüüꞌrï tudini (5000).
A Yicu ele giyaala
(Mätä 14.22–23; Yuwana 6.15–21)
45 Ditiꞌrambal no, Yicu büdäjï ngwoꞌra ngwüngün aar allu gïbälükälä aar madini aar ele aar dambu dambal kündär gani Bid Jäyïdä aar gatani ngwuji ndi geꞌte ngwüjü kay.
46 Anni mung je geꞌte kay ngwele ngwallu milli ngwotaci Ngwaalingalu.
47 Anni ma ngwaalu ru digera, a bälükä ji giyaw gidiliganu a nginde ru gweꞌte pu gwuju kïmämü.
48 Ngwengga ngwoꞌra ngwüngün a je bälükä berajanu ndi ruyi ndi ari lïgwümädï je dirunanu. Anni ma gaji ru kwoꞌrongo (4) ngwaalu ngwadi uꞌri, ngwuje ïlïjä yora yalu giyaala. Ngwuru lading je madinalu.
49 A be anni ma aar engga Yicung gwïndï yora yalu giyaala, aar ji ndi ari giboꞌrr giru aar mïꞌrï dula,
50 ndi ari ngindenga ꞌdar gwänggädäär a je yedeny eny. Puprang no, ngwuje ondaca ngwuje ci, “Orꞌtemajar! Äny gwuru. Ara je ꞌti yedeny ïtï.”
51 Ngwümätïnï gïbälükä ngwallu a dirun adatalu. A je le ngwaalu elalu gwulleny,
52 ndi ari, yaꞌti aar ye na lïngïdï yorto ye ngwaalinga yani yon yanni yätädïng je ndi ari yigor yegen yundu.
A Yicu uꞌriyi ngwüjü nono ngwonyadu Jenjerad
(Mätä 14.34–36)
53 Anni ma aar dambu dambal, aar üllälü ngwaalu ngwani Jenjerad aar gu gekaji bälükälü.
54 Anni ma aar ꞌtüdä gïbälükänü no, a ngwüjï lenge Yicung.
55 Aar abri aar badalu pad ngwaalu ngwoo ꞌdar aar üpïnä ngwüjü ngwümä yïlälä ye aar ngwe ila ngwaalu ngwanni ngwujung gu.
56 Mung änï ngwaalu ngwere ngwuꞌdunanu ngwere na gïyündär yere na ngwuburanu ngwere, ati aar äpïjä ngwüjü ngwümä aar je gïꞌtïjälü giyebedalu ngwaalu ngwudi ngwiliny. Aar päcälü ndi ari ngwuje gäbïcï ꞌdogo aar akani ngwurel nono ngwudi ngwured ngwüngün na ꞌdar lanni lima akani nono, aar uꞌri nono.