Zãbụ́rị̃
Dãwụ́dị̃ ꞌbã ngolé rĩ
1
ꞌBá múké rĩ kí ꞌbá ũnzí rĩ abe
1 ꞌBá ímbátáŋá ꞌbá ũnzí rĩ ꞌbadrị̂ ãꞌị̃lépi ku,
ꞌbá ị́jọ́ ũnzí idélépi rĩ kí ũngúkú ãtị̃lépi ku,
jõku ị́jọ́ ꞌbá Ãdróŋâ ꞌbãlépi idemará rú
rĩ ꞌbadrị̂ kí ãꞌị̃lépi ku rĩ ĩꞌdi drị̃lẹ́ba rú.
2 Wó ĩꞌdi uꞌá ãyĩkõ sĩ rá la ãzị́táŋá Úpí drị̂ kí sĩ,
ãzíla ĩꞌdi ị́jọ́ ũrã ãzị́táŋá ꞌdĩ kí drị̃ gá ị̃tụ́ kí ị́nị́ be.
3 Ĩꞌdi adru cécé ife salé ị̃yị́ tị gá rĩ áni,
ĩꞌdi ífí ka áyi mgbã rĩ agá.
Bị́ la icó kí nụlé ku.
Ị́jọ́ ãlu-ãlu ĩꞌdiní idélé rĩ kí ífí ka rá.
4 Wó ꞌbá ị́jọ́ ũnzí idélépi rĩ adru kí ꞌdĩ ꞌbã áni ku,
kí cécé drẹ̃jị́kọ̃ áni, ãlụ́kụ́kụ̃ la kí vu, kí dó sĩ nga rá.
5 Ị́jọ́ ꞌdĩ sĩ Ãdróŋá la ꞌbá ị́jọ́ ũnzí idélépi rĩ kí ị́jọ́ lị rá,
ãzíla ála kí ĩsélé co ꞌbá Ãdróŋá drị́ ãla ꞌdĩ kí abe ndú ndú.
6 ꞌBá Ãdróŋá drị́ ãlá rĩ kí Úpí la kí tãmba ãzíla kí drị̃ ce gẹ̃rị̃ ĩꞌdi drị̂ gá nĩ,
wó ꞌbá ị́jọ́ ũnzí idélépi rĩ kí mụ ị̃lị̃kị̃lé rá.