2
Úpí Ãdróŋá ꞌbã pẽlé nĩ rĩ
1 Sụ́rụ́ kí ị́jọ́ itú sĩ mvujó Ãdróŋá rụ́ rá ãꞌdu ị́jọ́ sĩ yã?
ꞌBá kí ị́jọ́ ífí kọ́lị rĩ kí itú ãꞌdu ị́jọ́ sĩ yã?
2 Ũpi ĩꞌbadrị̂ mvu kí rá,
drị̃lẹ́ka ĩꞌbadrị̂ itú kí ị́jọ́ ũnzí ãngũ ãlu gá Úpí ụrụꞌbá gá,
ãzíla ꞌbá Úpí Ãdróŋá ꞌbã ãdu ũsũjó drị̃ la gá rĩ ụrụꞌbá gá.
3 Ũpi drị̃ ũnzí ꞌdĩ jọ kí, “Lẽ ãma ãtrũ kí ãma ũpĩ ĩꞌbadrị̂ agâlé rá,
lẽ ãꞌbe kí Úpí ꞌbã ũpĩ rá.”
4 Úpí la kí gụ úmvúke ĩꞌdidrị́ ꞌbụ̃ gâlé rĩ ꞌbã drị̃ gâlé gụgụ̃,
Ãdróŋá nzụ ị́jọ́ ĩꞌbã kí itúlé rĩ kí sụ́ rá.
5 ꞌDã ꞌbã ũngúkú gá, Ãdróŋá la kí bị́lẹ́ ị̃ndụ́ li ũmbã sĩ,
ãzíla fẽ ĩꞌbaní ụ̃rị̃ ãdrã ĩꞌdidrị̂ sĩ jọ,
6 “Má iri Úpí mání pẽlé rĩ
ꞌbé mádrị́ ãlá Zị̃yọ́nị̃ drị̃ gá ꞌbo.”
7 Ma ãzị́táŋá Úpí drị̂ kí azị:
Úpí jọ mání, “Mi mâ ngọ́pị ꞌi,
ãndrũ má acá dó mî átẹ́pị rú ꞌbo.
8 Ízị ị́jọ́ áma tị gá, ma sụ́rụ́ kí fẽ acálé ími drị́lẹ́ agá rá,
ụ̃nọ́kụ́ la acá pírí ãko mîni la rú.
9 Mi kí ũgbã túré aya rú rĩ sĩ;
Mi kí andi nírí nírí cécé úmvú ꞌbã andilé rĩ ãni.”
10 Ị́jọ́ ꞌdĩ sĩ, ũpî, ĩmi adru ũndũwã trũ;
áli ĩmi bị́lẹ́ ị̃ndụ́, ĩmi drị̃lẹ́ka ụ̃nọ́kụ́ gá ꞌdĩ.
11 Ĩmi ị̃nzị̃ Úpí ꞌi ụ̃rị̃ trũ,
ĩmi ị̃nzị̃ ĩꞌdi ãrútáŋá sĩ;
12 ĩmi ị̃nzị̃ ngọ́pị ꞌi, jõ íni ku adrã ĩꞌdidrị̂ la angá ĩmi drị̃ gá gbõ rú,
ãzíla icó ĩmi ị̃lị̃kị̃lé ꞌdĩ sĩ sáwã ĩminí ũdrãjó rĩ acá drĩ ku rú.
ꞌBá ru tãmbalépi Úpí agá rĩ kí pírí drị̃lẹ́ba rú.