107
Ãdróŋá la ãmaní ãzãkoma fẽ nĩ
1 “Ĩfẽ ãwãꞌdĩfô Úpí ní ãꞌdusĩku ĩꞌdi múké,
Lẽtáŋá ĩꞌdidrị̂ la adru jãꞌdâ.”
2 Ĩmi ꞌbá pírí Úpí ꞌbã palé rá ꞌdĩ,
ĩmi ịcụ́ ĩꞌdi. Apá ĩmi mẹ́rọ́ꞌbá kí drị́lẹ́ gá rá.
3 Ají ĩmi vúlé angájó ãmị́yọ́ŋá ãngũ gâlé,
angájó ị̃tụ́ ꞌbã ãfũ agá ãzíla ị̃tụ́ ꞌbã ꞌde agá, ãngũ ụ́rụ́ ãzíla ándrá rĩ kí agâlé.
4 ꞌBá ãzí rĩ ri kí wãyá colé kõtórõ agâ sĩ gẹ̃rị̃ kóru,
ãzíla ịsụ́ kí gẹ̃rị̃ sĩ cajó táwụ̃nị̃ ĩꞌbaní sĩ icójó uꞌájó rĩ agá ku.
5 Ãbị́rị́ fụ kí, ị̃yị́vị́ ndẽ kí,
ãzíla ꞌbá pírí ꞌbã ásị́ tị̃ŋá ukó rá.
6 Sáwã ꞌdã sĩ ũcõgõ ĩꞌbadrị̂ agá awá kí Úpí rụ́ sĩ ãzãkoma aꞌị́jó
ãzíla Úpí pa kí ũcõgõ ĩꞌbadrị̂ kí agá rá.
7 ꞌDe kí drị̃ gẹ̃rị̃ pịrị rĩ agâ sĩ
cajó kpere táwụ̃nị̃ ĩꞌbaní sĩ mụjó uꞌájó rĩ agá.
8 Lẽ ĩfẽ ãwãꞌdĩfô Úpí ní lẽtáŋá ĩꞌdidrị́ ãmbógó rĩ sĩ,
ãzíla ị́jọ́ ụ̃sụ̃táŋá ru ĩꞌdiní idélé ꞌbá ꞌbaní rĩ kí sĩ.
9 Fẽ ꞌbá ị̃yị́vị́ ꞌbã ndẽlé rá rĩ kí ꞌbã ị̃yị́vị́ ukó rá,
ãzíla ꞌbá ãbị́rị́ ru rĩ ní agajó ị́jọ́ múké rĩ sĩ.
10 ꞌBá ãzí rĩ ri kí ándrá adrulé ãngũ ịnị agá ãzíla drã ꞌbã índréléndri agá,
ãzíla úmbé ándrá kí mãbụ́sụ̃ gâlé nõrórõ sĩ,
11 ãꞌdusĩku mvu kí ándrá ãzị́táŋá Ãdróŋá Ụrụgá Ãndânĩ rĩ drị̂ kí agá rĩ sĩ rá,
ãzíla gã kí ãzị́táŋá ĩꞌdidrị̂ kí úmgbé.
12 Kí ũkpõ ukó ándrá dó ru rá ãzị́ ũkpó ĩꞌbã kí ngalé rĩ kí sĩ,
uꞌde kí vũ gá ãzíla ꞌbá ãzí ándrá ãlu icólépi kí ãzã kolépi rá la ꞌdá yụ.
13 Sáwã ꞌdã sĩ ũcõgõ ĩꞌbadrị̂ agá awá kí Úpí rụ́ sĩ ãzãkoma aꞌị́jó
ãzíla pa dó sĩ kí ũcõgõ ĩꞌbadrị̂ agá rá.
14 Anzé dó kí angájó ãngũ ịnị ĩꞌbã kí ándrá adrujó drã ꞌbã índréléndri gá rĩ gá,
ãzíla anu nõrórõ sĩ kí umbéjó rĩ kí rá.
15 Lẽ ꞌbã ị̃nzị̃ kí Úpí ꞌi lẽtáŋá ĩꞌdidrị́ ãmbógó rĩ sĩ,
ãzíla ị́jọ́ ụ̃sụ̃táŋá ru ĩꞌdi ꞌbã idélé ĩꞌbaní rĩ kí sĩ.
16 Anu kẹ̃jị́tị bũrônzĩ rú rĩ kí rá
ãzíla ụlị́ aya la kí rá.
17 ꞌBá ãzí rĩ aza kí ándrá aza zã, acá kí ándrá drị̃ ũnzí ru,
cị kí dó sĩ drị̃ ị́jọ́ ũnzí ĩꞌbadrị̂ kí sĩ.
18 Ãkónã pírí kí vị́ fũ ándrá ĩꞌbaní rá
kí ándrá dó sĩ ãnirú drãjó.
19 Sáwã ꞌdã sĩ ũcõgõ ĩꞌbadrị̂ agá awá kí Úpí rụ́ sĩ ãzãkoma aꞌị́jó
ãzíla pa dó sĩ kí ũcõgõ ĩꞌbadrị̂ agá rá.
20 Adrí kí ị́jọ́ ĩꞌdi ꞌbã jọlé rĩ sĩ,
ãzíla pa kí drã agá rĩ sĩ rá.
21 Lẽ ꞌbã ị̃nzị̃ kí Úpí ꞌi lẽtáŋá ĩꞌdidrị́ ãmbógó rĩ sĩ,
ãzíla ị́jọ́ ụ̃sụ̃táŋá ru ĩꞌdi ꞌbã idélé ĩꞌbaní rĩ kí sĩ.
22 Lẽ ꞌbã fẽ kí ídétáŋá ãwãꞌdĩfô rú rĩ kí
ãzíla ꞌbã ngo kí úngó ãyĩkõ drị̂ kí sĩ ãzị́ ĩꞌdiní ngalé rĩ kí vú nzejó.
23 ꞌBá ãzí rĩ ri kí ándrá acị́lé ị̃yị́ mĩrĩ drị̂ drị̃ gâsĩ mẹ́lị̃ kî sĩ,
ri kí ãko ĩꞌbadrị̂ kí ịsụ́lé ị̃yị́ drị̃ gá.
24 Ndre kí ị́jọ́ Úpí ꞌbã idélé rĩ kí,
ãzíla ị́jọ́ ụ̃sụ̃táŋá ru ĩꞌdi ꞌbã idélé mĩrĩ agá ꞌdãá rĩ kí rá,
25 ãꞌdusĩku fẽ ándrá ãzị́táŋá ãzíla ãlụ́kụ́kụ̃ ũkpó la iꞌdó dó lilé,
ãzíla ãlụ́kụ́kụ̃ lilépi rĩ fẽ mĩrĩ ní umvújó tũlãtũlã.
26 Înga ándrá mẹ́lị̃ ĩꞌbadrị̂ kí ụrụgá ãlụ́kụ́kụ̃ agá
ãzíla ꞌde kí ándrá vũ gá ị̃yị́ ị̃ndụ́ gâlé.
Ị́jọ́ drị̃lẹ́ ũnzí ru ꞌdĩ agá ꞌbá mẹ́lị̃ agá rĩ kí ásị́ mvu rá,
27 kí ru ụ̃sị̃ ãzíla kí acị́ pãrã-pãrã ꞌbá ĩmẽrãlépi rá rĩ kí áni
ãlị̃gọ̃ ĩꞌbadrị̂ acá kí ãzị́ kóru.
28 Sáwã ꞌdã sĩ ũcõgõ ĩꞌbadrị̂ agá awá kí Úpí rụ́ sĩ ãzãkoma aꞌị́jó
ãzíla anzé kí ũcõgõ ĩꞌbadrị̂ kí agá rá.
29 Fẽ ándrá ãlụ́kụ́kụ̃ ũkpó rĩ ní pá tujó rá,
ãzíla ị̃yị́ umvúlépi tũlãtũlã rĩ ní pá tujó rá.
30 Uꞌá kí ándrá ãyĩkõ sĩ ị̃yị́ umvúlépi rĩ ꞌbã pá tujó rĩ sĩ,
ãzíla agụ kí ị̃yị́tị ĩꞌbã kí lẽjó mụjó rĩ gá.
31 Lẽ ĩfẽ ãwãꞌdĩfô Úpí ní lẽtáŋá ĩꞌdidrị́ ãmbógó rĩ sĩ,
ãzíla ị́jọ́ ụ̃sụ̃táŋá ru ĩꞌdiní idélé ꞌbá ꞌbaní rĩ kí sĩ.
32 Lẽ ꞌbã ịcụ́ kí ĩꞌdi rụ́ ãngũ ꞌbá ꞌbã kí ru trajó rĩ gá,
ãzíla ꞌbã ị̃nzị̃ kí ĩꞌdi ꞌbá ĩyõ ru tralépi rĩ kí drị̃lẹ́ gá.
33 Úpí fẽ mĩrĩ ꞌbaní nzụlé kpítã rá,
ãzíla atrị ị̃yị́ kídí ru rĩ ꞌbaní dịŋá cí.
34 Fẽ ãngũ mụ̃ꞌdụ̃mụ̃ꞌdụ̃ rĩ ꞌbaní acájó ãngũ ãꞌị́ ru rĩ rú,
ꞌbá ũnzĩkãnã ngalépi rĩ ꞌbã kí uꞌájó alagá ꞌdãá rĩ sĩ.
35 Uja ándrá ãngũ kõtórõ rú rĩ kí ãngũ ị̃yị́ ꞌbá sĩ agájó rĩ rú,
ãzíla ãngũ ãꞌí rĩ kí ãngũ ị̃yị́ kídí ru rĩ ꞌbã sĩ dịjó rĩ rú.
36 Fẽ ꞌbá ãbị́rị́ ru rĩ ꞌbã kí adrujó ꞌdãá,
ãzíla sị kí táwụ̃nị̃ sĩ uꞌájó alagá.
37 Sõ kí ándrá ãngũ la kí ámvụ́ ru, sa kí zãbíbũ,
ãzíla tra kí ãka la calépi rĩ sĩ.
38 Wi dó sụ̃sụ́ ꞌbá ĩꞌdidrị̂ ꞌbaní, tị kí dó sĩ anzị kí wẽwẽ rú,
mba tị́ ĩꞌbadrị̂ kí tã rá, icó kí dó sĩ ukólé ku.
39 Ála dó mụ ꞌbá Ãdróŋá drị̂ kí ndẽlé ãzíla kí ĩcõcõŋãlé ꞌbo,
kãlãfe ĩꞌbadrị̂ ásị́ dó rá kí ĩkpãjó rĩ sĩ, lị́kị̃ aꞌdélépi kí drị̃ gá rĩ sĩ ãzíla ũcõgõ ĩꞌbaní ịsụ́lé rĩ sĩ,
40 ꞌbã ándrá ꞌbá drị̃lẹ́ rú rĩ kí idemará ru
ãzíla fẽ ĩꞌbaní wãyá colé ãngũ gẹ̃rị̃ kóru kõtórõ rú rĩ agâ sĩ.
41 Wó inga ꞌbá ãko kóru rĩ kí ꞌbãlé ụrụgá angájó ũcõgõ ĩꞌbadrị̂ kí agá rĩ sĩ,
ãzíla fẽ anzị ĩꞌbadrị̂ acá kí ũꞌbí ru cécé kãbĩlõ ũꞌbí rĩ kí áni.
42 ꞌBá ãlá rĩ ndre kí ị́jọ́ ꞌdĩ rá ãzíla acá kí dó sĩ ãyĩkõ sĩ,
wó ụ̃pị̃ dó ꞌbá pírí ũnzí rĩ kí tị cí.
43 ꞌBá ũndũwá ru rĩ ꞌbã ꞌbã ásị́ ị́jọ́ ꞌdĩ kí drị̃ gá,
ãzíla lẽ ꞌbã ꞌbã kí ásị́ lẽtáŋá Úpí drị́ ãmbógó rĩ drị̃ gá.