122
Yẹ̃rụ́sãlẹ́mụ̃ ịcụ́jó rĩ
1 Má uꞌá ándrá ãyĩkõ sĩ mâ wọ̃rị́ka ꞌbaní jọjóla mání,
“Ãmụ kí jó Úpí drị̂ agâlé rĩ sĩ.”
2 Táwụ̃nị̃ Yẹ̃rụ́sãlẹ́mụ̃;
úꞌdîꞌda ãtu dó pá kẹ̃jị́tị mídrị̂ gá ꞌa gâsĩ.
3 Yẹ̃rụ́sãlẹ́mụ̃ ĩꞌdi táwụ̃nị̃ ãmbógó la,
jó sịlé alagá rĩ icí kí ru ãlu ũnĩ-ambamba rú.
4 ꞌDĩ táwụ̃nị̃ sụ́rụ́ ꞌbã kí sĩ mụjó ala gá rĩ ꞌi,
sụ́rụ́ Úpí drị̂ kí mụ ala gâlé
ãzị́táŋá la ꞌbãjó ꞌbá Ịsịrayị́lị̃ drị̂ ꞌbaní rĩ áni,
sĩ ãwãꞌdĩfô fẽjó rụ́ Úpí drị̂ní.
5 Yẹ̃rụ́sãlémũ ĩꞌdi táwụ̃nị̃ ũpi ꞌbã kí sĩ rijó úmvúke ĩꞌbadrị̂ kí drị̃ gá sĩ ị́jọ́ múké rĩ lịjó rĩ ꞌi,
ꞌdĩ kí úmvúke ꞌbãlé jó Dãwụ́dị̃ drị̂ agá rĩ kî.
6 Ĩzị Ãdróŋá, ꞌbã ají sĩ ásị́ ị̃gbẹ̃ táwụ̃nị̃ Yẹ̃rụ́sãlẹ́mụ̃ drị̂ agá.
ꞌBá pírí Yẹ̃rụ́sãlẹ́mụ̃ lẽlépi rá rĩ kí drị̃lẹ́ba ịsụ́ rá.
7 Ásị́ ị̃gbẹ̃ ꞌbã adru bõrõ táwụ̃nị̃ Yẹ̃rụ́sãlẹ́mụ̃ drị̂ kí agá,
ásị́ ị̃gbẹ̃ ꞌbã adru ꞌbá lị́cọ́ úpí drị̂ agá rĩ kí drị̃ gá.
8 Ma Ãdróŋá zị má ádrị́pịka ãzíla mâ wọ̃rị́ka kí ị́jọ́ sĩ
ma jọ la, “Ásị́ ị̃gbẹ̃ ꞌba adru mí be!”
9 Jó Úpí Ãdróŋá ãmadrị̂ drị̂ ꞌbã ị́jọ́ sĩ,
álẽ drị̃lẹ́ba ꞌbã ca mí rụ̂lé rá.