140
Úpî zịjó tãmbaŋá ị́jọ́ sĩ
1 Úpí, ípa ma ꞌbá ũnzĩkãnã ngalépi rĩ kí drị́lẹ́ gá,
ímba áma tã ꞌbá ũmbã rú rĩ kí ị́jọ́ sĩ.
2 Kí ụ́ꞌdụ́ pírí sĩ ị́jọ́ ũnzí itú kí ásị́ gá áma ụrụꞌbá gá,
ụ́ꞌdụ́ pírí sĩ kí lẽ ãꞌdị́ tị nzị̃lé ꞌbá kí abe.
3 Kí ĩdra ĩꞌdi cécé ị̃nị̃ ũmbá rĩ ꞌbã ĩdra áni,
ị́jọ́ ãfũlépi kí tị gá rĩ la ꞌbá idé ũnzí cécé galaꞌbá ꞌbã ũjũ áni.
4 Úpí, ímba áma tã ꞌbá ũnzí rĩ kí drị́lẹ́ gá,
ímba áma tã ꞌbá ũmbã rú
ꞌbá ị́jọ́ itúlépi má ị̃lị̃kị̃ rú sĩ rá rĩ kí drị́lẹ́ gá.
5 ꞌBá ãfó ru rĩ ũgĩ kí mání ĩbáká sĩ lẽjó áma rụjó,
ꞌbe kí mání ímbá
ãzíla ꞌbã kí mání mãtégõ gẹ̃rị̃ gá sĩ áma rụjó.
6 Ájọ Úpí ní, “Mi Ãdróŋá mádrị̂ ꞌi.”
Úpí, mí are áma áwáŋá mání sĩ ãzãkoma aꞌị́jó mídrị́ rĩ ꞌi!
7 Úpí ũkpó ꞌdị́pị, mi ꞌbá ũkpó trũ áma palépi rĩ,
ímba áma tã ụ́ꞌdụ́ ãꞌdị́drị̂ sĩ rá.
8 Úpí, ífẽ ꞌbá ũnzí rĩ ꞌbaní ãko ĩꞌbã kí vị́ talé rĩ kí ku fô,
ífẽ ị́jọ́ ĩꞌbã kí itúlé rĩ ꞌbã ị̃kụ̃lẹ̃nị̃ kí ku, jõ íni ku kí mụ acálé ãfó ru rá.
9 Mí aꞌbe jõ mẹ́rọ́ꞌbá mádrị̂ kí áma ndẽlé ku,
ífẽ ị́jọ́ ũnzí ĩꞌbã kí itúlé áma drị̃ gá rĩ ꞌbã vúŋá ꞌbã ị̃lị̃kị̃ kí nĩ.
10 Lẽ ãcíkúlú ꞌba asu kí drị̃ gá,
lẽ úꞌbé kí ãcí gá
jõku ꞌbụ́ álị́ la agá, ꞌbã ãfũ kí dó sĩ ãmvé ꞌdõlé ị̃dị́ ku.
11 Lẽ ífẽ ꞌbá ĩnzó rĩ ꞌbã ịsụ́ kí drị̃lẹ́ba ãngũ ãmadrị̂ agá ꞌdâ ku,
ífẽ ị́jọ́ ũnzí ꞌbã aꞌdé ꞌbá ũnzí rĩ kí drị̃ gá ĩmgbátrátrá ãzíla ꞌbã andi kí rá.
12 Ánị̃ rá Úpí la ị́jọ́ ꞌbá ĩkpãlé ĩkpã-ĩkpã rĩ ꞌbadrị̂ lị pịrị rá,
ãzíla ĩꞌdi ꞌbá lẽmẽrí rĩ kí ꞌbã hákĩ fẽ rá.
13 Ãndá-ãndá ru ꞌbá ãlá rĩ kí mụ ími ịcụ́lé rá,
ãꞌdusĩku kí mụ adrulé ími drị̃lẹ́ gá.