141
Ãdróŋá zịjó sĩ ꞌbá drị̃ cejó
1 Úpí, ma ími umve, mí are ma!
Mí are áma ụ́ꞌdụ́kọ́ ádrĩ ími umve rĩ gá.
2 Ị́jọ́ mání zịlé mídrị́ rĩ ꞌbã adru míní cécé ãdu ãjị́ vĩrĩ rĩ áni;
áma drị́ mání ingalé ụrụgá rĩ ꞌba adru kí cécé ídétáŋá ĩndró sĩ ri áni!
3 Úpí, ífẽ ájọ ị́jọ́ ũnzí la kí áma tị sĩ ku fô,
ímba ãma tị tã!
4 Ífẽ áma ásị́ ꞌbã uja ru ị́jọ́ ũnzí gá ku,
ị́jọ́ ũnzí idéjó
ꞌbá ũnzĩkãnã idélépi rĩ abe ku.
Ífẽ ána ãkónã ĩꞌba abe sáwã ĩꞌbaní ru trajó ãdroŋa ĩꞌbadrị̂ kí ị̃nzị̃jó rĩ kí agá ku.
5 ꞌBá ãlá ri drĩ kí áma co ímbátáŋá ru nĩ, ĩꞌdi adru mání ásị́ ị̃gbẹ̃ rú,
drĩ kí uzá ãma drị̃ gá, ĩꞌdi adru ãdu ũsũjó áma drị̃ gá rĩ áni,
lẽ dó sĩ ágã ị́jọ́ ãdu ũsũjó áma drị̃ gá rĩ ku.
Wó ma mụ drị̃ gá Ãdróŋá zịŋá trũ ꞌbá ị́jọ́ ũnzí ngalépi rĩ ꞌbaní ị́jọ́ ũnzí ĩꞌbadrị̂ kí ị́jọ́ sĩ.
6 Údrĩ ꞌbá ĩꞌbadrị́ drị̃lẹ́ ru rĩ kí aꞌbé ꞌbé sị́ gâlé,
ꞌbá ũnzí rĩ kí dó nị̃la rá ị́jọ́ mání jọlé rĩ kí ị́jọ́ mgbã la.
7 Ála ꞌbá ũnzí rĩ ꞌbã ĩfãkã kí iré ꞌbụ́ tị gá ꞌdãá
cécé ꞌbá ámvụ́ sõlépi rĩ ꞌbã írã iyájó ãmvé rĩ áni.
8 Wó áꞌbã mịfị́ mí rụ́ Úpí ũkpó ꞌdị́pị;
ma áma zị̃ ími ꞌa gá, ífẽ ma drãlé ku.
9 Ímba áma tã ímbá ĩꞌba kí ꞌbelé mání rĩ sĩ,
ãzíla mãtégõ ĩꞌbaní ꞌbãlé mání rĩ sĩ.
10 Lẽ ꞌbá ũnzí rĩ ꞌba ꞌde kí ímbá ĩꞌbaní ꞌbelé rĩ ꞌbã vúŋá gá nĩ,
ma dó sĩ alị ị́jọ́ kọ́lị.