149
Úngó ịcụ́ŋá drị̂
1 Ĩmi ịcụ́ Úpí ꞌi!
Ĩngo úngó úꞌdí la Úpí ní,
ĩmi ịcụ́ ĩꞌdi ꞌbá ĩꞌdidrị́ ị́jọ́ pịrị ngalépi ru tralépi ãngũ ãlu gá ri kí drĩdríŋĩ gá!
2 Ĩmi ꞌbá Ịsịrayị́lị̃ drị́ ꞌdĩ, lẽ ĩmi uꞌá ãyĩkõ sĩ ꞌbá ĩmi ũꞌbãlépi rĩ sĩ;
lẽ ꞌbá Zị̃yọ́nị̃ drị̂ ꞌbã uꞌá kí ãyĩkõ sĩ úpí ĩꞌbadrị̂ sĩ!
3 Ĩmi ịcụ́ rụ́ ĩꞌdidrị̂ úngó tuŋá sĩ;
ĩco árị́ kí ụ̃ꞌdị́ kí abe sĩ ĩꞌdi ị̃nzị̃jó,
4 ãꞌdusĩku Úpí la uꞌá ãyĩkõ ꞌbá ĩꞌdidrị̂ kí sĩ;
ĩꞌdi ꞌbá ru irilépi vụ̃rụ́ ri kí fẽ ị́jọ́ kí ndẽlé rá.
5 Lẽ ꞌbá ãlá rĩ ꞌbã uꞌá kí ãyĩkõ sĩ ĩꞌbaní ị́jọ́ ndẽjó rĩ sĩ;
ꞌbã ngo kí úngó ãyĩkõ sĩ gbọ́lọ́ ĩꞌbadrị̂ kí sị́gá ị́nị́ ãrã.
6 Lẽ ꞌbã ngo kí úngó sĩ Ãdróŋá ịcụ́jó rĩ kí ụ́ꞌdụ́kọ́ ụrụgá sĩ,
lẽ ménéŋá sị́ ị̃rị̃ rĩ ꞌbã adru kí drị́gá cí,
7 sĩ ãrígọ́tị ũfẽjó sụ́rụ́ kí ụrụꞌbá gá
ãzíla drị̃rịma fẽjó ꞌbá ꞌbanî.
8 Kí dó sĩ ũpi ĩꞌbadrị̂ kí umbé nõrórõ sĩ,
ãzíla ãmbogo ĩꞌbadrị̂ kí umbé nõrórõ aya rú rĩ kí sĩ,
9 sĩ ĩꞌbaní drị̃rịma sĩlé kí ụrụꞌbá gá rĩ fẽjó!
ꞌDĩ ị́jọ́ ãrútáŋá ajílépi ꞌbá Ãdróŋá drị̂ ꞌbaní rĩ ꞌi.
Ĩmi ịcụ́ Úpí ꞌi!