22
Ãwú úngó kí úngó Ãdróŋá ịcụ́jó rĩ be
1 Ãdróŋá mádrị̂, Ãdróŋá mádrị̂, mí aꞌbe dó ma rá ãꞌdụ ị́jọ́ sĩ yã?
Íse mi má rụ́ rĩ sĩ rá-rá ru sĩ áma ãzã kojó ku,
ãzíla ị́jọ́ mání sĩ ịyịjó rĩ kí arejó ku la ãꞌdu ị́jọ́ sĩ yã?
2 Ãdróŋá mádrị̂, ma awá ị̃tụ́ sĩ, wó mí umvi ma ku,
ãzíla ị́nị́ ãrã wó má avị́ ku.
3 Wó îri mi úmvúke drị̃ gá, mi Ãdróŋá Ãlá rĩ rú,
mi ꞌbá ꞌbá Ịsịrayị́lị̃ drị̂ ꞌbã kí ịcụ́lé rĩ ꞌi.
4 Ãmã áyị́pịka ꞌbã kí ándrá ĩꞌbã ãꞌĩtáŋá ími drị̃ gá,
tị̃ kí ásị́ ími drị̃ gá ãzíla ípa ándrá kí rá.
5 Awá kí ándrá ími drị̃lẹ́ gá, ípa ándrá kí rá;
ꞌbã kí ándrá ásị́ ími drị̃ gá ãzíla isụ́ kí ándrá drị̃nzá ku.
6 ꞌBá jọ kí ma cécé ụ̃ꞌbụ áni, má adru ꞌbá ku,
kí áma uꞌdá ãzíla ꞌbã kí ma idemará ru.
7 ꞌBá pírí áma ndrelépi rĩ kí áma ide-idê;
kí áma uꞌdá drị̃ yãŋá trũ:
8 Jọ kí “ꞌBã jõ dó ꞌdâ ásị́ Úpî drị̃ gá yã
wó Úpí pa dó ĩꞌdi ku ãꞌdu sĩ?
Úpí drĩ ími lẽ rá,
ko dó ími ãzã ku ãꞌdu sĩ?”
9 Úpí mi ꞌbá fẽlépi la má ãfũ mâ ãndrẽ agâlé múké rĩ ꞌi;
ífẽ átị̃ ásị́ ími drị̃ gá rá sáwã mání mâ ãndrẽ ꞌbã ĩbã ndrujó rĩ gá.
10 Âꞌbe ma ími drị́gá iꞌdójó ãnzị̃rị̃ŋã sĩ,
ãzíla íri adrulé sáwã pírí sĩ Úpí mádrị̂ rú mi ꞌi.
11 Mí adru jõ má rụ́ ꞌdâ rá-rá ru ku fô,
ũcõgõ ꞌbã adrujó má be ãníŋá rĩ sĩ
ãzíla ꞌbá ãzí áma ãzã kolépi la ꞌdáyụ.
12 Mẹ́rọ́ꞌbá mọ́nị̃gọ́ áni wẽwẽ rú la ce kí áma andre rị́;
mọ́nị̃gọ́ Bãsánĩ gá ũmbá rĩ ce kí áma andre trộkị́lịrị,
13 kí cécé kẹ̃mị̃ nulépi ĩzá uceŋá gá rĩ kí áni;
nzị̃ kí mání tị mgbọ.
14 Áma ũkpó ukó rá, ukó cécé ị̃yị́ asulépi vũ gá rĩ ꞌbã nzụjó rĩ áni
ãzíla áma ĩfãkã sị́ unze kí ru rá.
Áma ásị́ aká cécé ísékísé áni;
ra má rụ́ ꞌdâ rĩ sĩ rá.
15 Áma ụ́lị́ ꞌi cécé pụ́trụ́ áni,
ãzíla áma ĩdra ĩbĩ ru áma átrákụ̃lẹ́ gá cí,
mí aꞌbe dó ma pụ́trụ́ drã drị̂ gá ꞌbo.
16 Mẹ́rọ́ꞌbá mádrị̂ ce kí ma ágágá cécé ũcogo ꞌbã kí ꞌbá cejó rĩ áni
ꞌBá ũnzí ũꞌbí ce kí ma ágágá,
ipa kí áma drị́ kí pá kí abe rá.
17 Má icó ĩfãkã áma ụrụꞌbá gá rĩ kí lãlé pírí rá,
Mẹ́rọ́ꞌbá mádrị̂ ꞌbã kí mịfị́ áma drị̃ gá sĩ ụ̃rị̃ fẽjó mání.
18 Awa kí mâ bõngó kí kí drĩdríŋĩ gá,
ãzíla ꞌbe kí mâ bõngó kí jẽgê sĩ.
19 Úpí, mí adru jõ má be rá-rá ru ku fô;
mí amụ́ mbẽlẽ rú sĩ áma ãzãko jó!
20 Ípa mání áma ídri ménéŋá sị́ gá rĩ sĩ,
ípa ídri mádrị́ ãjẹ̃ rú rĩ ũcogo ꞌdĩ kí drị́gá rĩ sĩ.
21 Ípa ma kẹ̃mị̃ kí tị gá rĩ sĩ fô!
ꞌBárĩ ípa mání ma ụ̃drụ́ ꞌbã újé gá rĩ sĩ fô!
22 Ma ími rụ́ iꞌda má ádrị́pịka ꞌbaní;
ma ími ịcụ́ ãngũ ꞌbá ꞌbã kí ru trajó ũꞌbí ru sĩ ími ị̃nzị̃jó rĩ gá.
23 Ĩmi ꞌbá Úpî rulépi ꞌdĩ, ĩmi ịcụ́ ĩꞌdi!
Ĩmi anzị Yãkóꞌbõ ꞌbã drị̃lẹ́ ru ꞌdĩ, ĩmi pírí ꞌbã ru kí ĩꞌdi!
Ĩmi ị̃nzị̃ ĩꞌdi ĩmi anzị Ịsịrayị́lị̃ drị́ ꞌdĩ,
24 ãꞌdusĩku Úpí gã ꞌbá ũkpõ kó ru rĩ kí ku,
ꞌbá drị̃cịlépi ãzíla ị́jọ́ ꞌbã rụlé rĩ kí ku.
Zị̃ ru mẹ́lẹ́tị ĩꞌbaní ku,
wó are áwáŋá ĩꞌbadrị́ sĩ ãzãkoma aꞌị́jó rĩ rá.
25 Ma mụ ími ịcụ́lé ꞌbá ũꞌbí ru tralépi rĩ kí agá;
ꞌbá ími ị̃nzị̃lépi rĩ kí drị̃lẹ́ gá ma ũyõ mání nalé rĩ idé rá.
26 ꞌBá lẽmẽrí rĩ kí mụ ãkónã nalé ãzíla kí aga rá;
ꞌbá Úpî ndrụ̃lépi rĩ kí ĩꞌdi ịcụ́ rá.
Kí ásị́ ꞌba adru kí ãyĩkõ rú jãꞌdâ.
27 ꞌBá pírí ụ̃nọ́kụ́ drị̃ gá ꞌdâ rĩ kí mụ Úpí ꞌbã ị́jọ́ ũrãlé rá,
ãzíla kí mụ ru ujalé ĩꞌdi rụ́,
sụ́rụ́ pírí ụ̃nọ́kụ́ drị̃ gá ꞌdâ rĩ kí mụ ĩꞌdi ị̃nzị̃lé rá.
28 Úpí ĩꞌdi úpí ru nĩ,
ãzíla ĩꞌdi ũpĩ na sụ́rụ́ pírí kí drị̃lẹ́ gá.
29 ꞌBá pírí kụ́rẹ́nị́ ru ụ̃nọ́kụ́ drị̃ gá ꞌdâ rĩ kí mụ ụ̃mụ̃ nalé ãzíla ĩꞌdi ị̃nzị̃lé;
ꞌbá pírí ũdrãlépi rá rĩ kí mụ ãja tị̃lé ĩꞌdi drị̃lẹ́ gá;
ꞌbá ãzí icólépi ru ídri tãmbalépi rá la ꞌdáyụ.
30 Anzị ãmadrị́ drị̃lẹ́ gâlé rĩ kí mụ Úpí ị̃nzị̃lé;
kí mụ ị́jọ́ ũlũlé anzị kí ũngúkú gá rĩ ꞌbaní ĩꞌdi drị̃ gá.
31 Kí mụ ị́jọ́ ĩꞌdidrị́ ãlá ꞌdĩ kí ũlũlé
ꞌbá drĩ tịlé ku rĩ ꞌbanî,
kí jọ la Úpí pa ãma nĩ.