23
Úpí ĩꞌdi ꞌbá áma tãmbalépi rĩ
1 Úpí ĩꞌdi ꞌbá áma tãmbalépi nĩ rĩ, ãko ãzí mání lẽlé la ꞌdáyụ.
2 Ĩꞌdi fẽ mání áma lalé vụ̃rụ́ ị̃rẹ́bị́ kpãcĩ rĩ agá,
ĩꞌdi áma drị̃ ꞌde ị̃yị́ ãlá dịlépi lĩ rĩ ꞌbã tị gâsĩ.
3 Ĩꞌdi mání ũkpõ fẽ úꞌdí ru nĩ,
Ĩꞌdi áma drị̃ ꞌde gẹ̃rị̃ ãlá rĩ gá
rụ́ ĩꞌdi drị̂ sĩ.
4 Ádrĩ táni acị́ áꞌbụ ꞌa drã drị̂ agâsĩ rá tí
má icó idélé ụ̃rị̃ sĩ ku
ãꞌdusĩku mi má be cí,
nángí ãzíla túré mídrị̂ kí sĩ
mi áma ásị́ ũŋmĩ.
5 Mi mání ãkónã idé
mẹ́rọ́ꞌbá mádrị̂ kí drị̃gâsĩ;
mi ãdu ũsũ áma drị̃ gá
ãyĩkõ ga áma ásị́ gá tré drị̃ la ayi vũgâsĩ.
6 Ãndá ãndá ru mũkẽ mídrị̂ kí lẽtáŋá mídrị̂ be kí áma vú ũbĩ
ụ́ꞌdụ́ mání adrujó ídri rú rĩ kí sĩ pírí,
ãzíla ma mụ adrulé jó Úpí drị̂ agá
jãꞌdâ.