24
Úpí dị̃zã drị̂
1 Ụ̃nọ́kụ́ ĩꞌdi ãko pírí ala gá rĩ kí abe,
ãngũ ãzíla ꞌbá ala gá rĩ kí abe kí pírí Úpí ãni,
2 ãꞌdusĩku ũꞌbã ụ̃nọ́kụ̂ ꞌbã ị̃ndụ́ mĩrĩ drị̃ gá;
ãzíla fẽ ĩꞌdiní pá tujó ũkpó ru ị̃yị́ kị́rị́ rĩ drị̃ gá nĩ.
3 Ãꞌdi la icó tụlé ꞌbé Úpí drị̂ ꞌbã sị́ gâlé cụ̃ rá la nĩ yã?
Ãꞌdi la icó filé jó ĩꞌdidrị́ ãlá rĩ agá rá la nĩ yã?
4 ꞌBá drị́ ãndị́ kóru ãzíla ásị́ ãlá rĩ kí,
ꞌbá ãdroŋa ĩnzõ rú rĩ kí ị̃nzị̃lépi ku rĩ kí,
ãzíla ꞌbá ĩnzõ jọlépi ku rĩ kî.
5 Úpí la ĩꞌbaní sụ̃sụ́ wi rá ãzíla ĩꞌdi kí pa rá;
Ãdróŋá la kí ꞌbã ꞌbá ị́jọ́ kó ru la kî rú.
6 ꞌBá ꞌdĩ áni rĩ kí ꞌbá Ãdróŋâ ndrụ̃lépi rĩ kí,
ꞌbá Ãdróŋá Yãkóꞌbõ drị̂ ndrụ̃lépi rĩ kî.
7 Kẹ̃jị́tị ꞌdĩ, lẽ ị̃nzị̃ ĩmi tị mgbọ,
ị̃nzị̃ kẹ̃jị́tị ídu rĩ kí,
Úpí dị̃zã drị̂ la dó sĩ afí.
8 Úpí dị̃zã drị́ ꞌdĩ dó ãꞌdi ꞌi?
ꞌDĩ Úpí ũkpó ãzíla ũkpó ꞌdị́pị rú rĩ ꞌi,
Úpí ũkpó ꞌdị́pị ãꞌdị́ gá ndẽlépi nĩ rĩ ꞌi.
9 Kẹ̃jị́tị ꞌdĩ ị̃nzị̃ ĩmi tị mgbọ
ị̃nzị̃ kẹ̃jị́tị ídu rĩ kí,
Úpí dị̃zã drị̂ la dó sĩ afí.
10 Úpí dị̃zã drị́ ꞌdĩ dó ãꞌdi ꞌi?
Úpí ũkpó ꞌdị́pị rú rĩ ꞌi,
ĩꞌdi Úpí dị̃zã drị́ rĩ ꞌi.