25
Ãdróŋá zịjó andre tẽŋá sĩ
1 Úpí, áfẽ áma ídri mídrị́.
2 Ãdróŋá mádrị̂ átị̃ ásị́ ími drị̃ gá.
Ífẽ má ịsụ́ drị̃nzá ku,
ífẽ mẹ́rọ́ꞌbá mádrị̂ ꞌbã idé kí ãyĩkõ ĩꞌbã kí áma ndẽjó rĩ sĩ ku.
3 ꞌBá ásị́ ꞌbãlépi ími drị̃ gá rĩ icó drị̃nzá ịsụ́lé ku,
wó ꞌbá ꞌbá kí ngụ̃lépi ị́jọ́ ãzí kóru rĩ kí drị̃nzá ịsụ́ rá.
4 Úpí, mí iꞌda mání gẹ̃rị̃ mídrị̂ kî;
mí imbá ma sĩ acị́jó gẹ̃rị̃ míní iꞌdalé rĩ kí agâsĩ.
5 Íce áma drị̃ ị́jọ́ mídrị́ mgbã rĩ gá ãzíla mí imbá ma,
ãꞌdusĩku mi Ãdróŋá mádrị́ áma palépi rĩ ꞌi;
ụ́ꞌdụ́ pírí sĩ ma ásị́ ꞌbã ími drị̃ gá.
6 Úpí, mí agá drĩ ị́jọ́ ásị́ ị̃gbẹ́ mídrị̂ kí drị̃ gá lẽtáŋá mídrị́ ukólépi ku rĩ be
ãꞌdusĩku mí iꞌdó ándrá kí iꞌdalé ãmaní ídu.
7 Mí agá jõ ị́jọ́ ị́jọ́ ũnzí mání idélé kãrị̃lẹ̃ sĩ rĩ kí drị̃ gá
jõku ị́jọ́ mání izalé rĩ kí drị̃ gá ku;
lẽtáŋá mídrị́ ukólépi ku rĩ sĩ,
ãꞌdusĩku Úpí mi múké.
8 Úpí ĩꞌdi múké ãzíla ĩꞌdi pịrị;
ị́jọ́ ꞌdĩ sĩ ĩꞌdi ꞌbá ũnzí rĩ kí imbá gẹ̃rị̃ ĩꞌdidrị̂ kí sĩ.
9 Ĩꞌdi ꞌbá ru irilépi vụ̃rụ́ rĩ drị̃ ce ị́jọ́ pịrị rĩ gá
ãzíla ĩꞌdi kí imbá gẹ̃rị̃ ĩꞌdidrị̂ sĩ.
10 Gẹ̃rị̃ Úpí drị̂ kí pírí pịrị ãzíla lẽtáŋá ru
ꞌbá ãzị́táŋá tị icíma ĩꞌdidrị̂ drị̂ kí tãmbalépi rĩ nî.
11 Úpí rụ́ mídrị̂ sĩ, ítrũ ị́jọ́ ũnzí mádrị̂ kí rá,
ị́jọ́ ũnzí mádrị̂ ꞌbã ãmbõgõ drĩ kí táni adru íngõpí tí ítrũ kí rá.
12 ꞌBá Úpí ní ãrútáŋá fẽlépi rá rĩ dó ãꞌdi ꞌi?
Úpí la ĩꞌdi imbá ị́jọ́ ĩꞌdi ꞌbã lẽlé ꞌbã ũbĩ kí vú rĩ kî sĩ.
13 ꞌBá ꞌdĩ la ụ́ꞌdụ́ pírí sĩ adru málĩ trũ
ãzíla anzị ĩꞌdidrị̂ kí ãngũ ꞌdụ ĩꞌbaní ãwítã rú.
14 Úpí ĩꞌdi wọ̃rị́ ꞌbá ĩꞌdi rulépi rá rĩ ꞌbãni
ĩꞌdi kí igá ãzị́táŋá tị icíma drị́ ĩꞌdidrị̂ kí sĩ.
15 Ma ãngũ ndre sáwã pírí sĩ Úpí rụ́,
ĩꞌdi lú áma pa mẹ́rọ́ꞌbá kí drị́gá nĩ.
16 Úpí mí ajá tị má rụ́ ꞌdõlé ãzíla ími ásị́ ꞌba adru mání ị̃gbẹ́ ru
ãꞌdusĩku ma áꞌdụ̂sĩ ãzíla ũcõgõ agá.
17 Cãndí áma ásị́ gá rĩ ꞌbã úmgbó tụ kí rá,
mí anzé ma ásị́ mvuŋá mádrị̂ kí agá fô!
18 Mí andré cãndí mádrị̂ kí drị̃cịŋá mádrị̂ be
ãzíla ítrũ ị́jọ́ ũnzí mádrị̂ kí pírí rá fô!
19 Índre mẹ́rọ́ꞌbá mádrị̂ kí íngõpí yã rĩ rá;
ínị̃ ngụ̃ kí ma ũnzí trẹ̃yị́ rĩ gá rá.
20 Ímba ídri mádrị̂ tã ãzíla ípa ma!
Ífẽ má ịsụ́ drị̃nzá ku;
ãꞌdusĩku ma áma zị̃ ími agá.
21 Ífẽ ị́jọ́ pịrị rĩ ꞌbã mba kí áma tã ị́jọ́ ãlá rĩ be nĩ,
ãꞌdusĩku áꞌbã ásị́ ími drị̃ gá.
22 Ãdróŋá, mí unze ꞌbá Ịsịrayị́lị̃ drị̂ kí
cãndí ĩꞌbadrị̂ kí agá rá fô!