26
Ãdróŋá ꞌbá múké rĩ ꞌbã zịlé rĩ
1 Úpí ífẽ ma adru ꞌbá ị́jọ́ kóru la rú
mání ị́jọ́ mgbã rĩ ngajó rĩ sĩ;
áꞌbã áma ásị́ Úpí drị̃ gá, áma ụrụꞌbá icó yãlé ku.
2 Úpí mí ụ̃ꞌbị̃ ma ãzíla mí amá ma,
mí ụ̃ꞌbị̃ áma ásị́ áma ũrãtáŋá be.
3 Lẽtáŋá mídrị́ ãsị̃ŋá kóru rĩ la áma drị̃ ce nĩ,
ma acị́ ị́jọ́ mídrị́ pịrị rĩ agâ sĩ jãꞌdâ.
4 Ári ꞌbá úlétáŋá trũ rĩ kí abe ku,
jõku má icó áma icílé ꞌbá mũlũmbẽ rú ꞌdĩ kí abe ku.
5 Ángụ̃ traŋá ꞌbá ị́jọ́ ũnzí idélépi rĩ ꞌbadrị̂ ũnzí
ãzíla ágã uꞌájó ꞌbá ị́jọ́ ũnzí idélépi rĩ abe rĩ úmgbé.
6 Úpí má ũjĩ áma drị́ kí rá sĩ iꞌdajó la ma ị́jọ́ kó ru,
ãzíla má amụ́ sĩ ími ị̃nzị̃jó ãlĩtárĩ mídrị̂ gá.
7 Ma míní úngó ãwãꞌdĩfô drị̂ ngo ụ́ꞌdụ́kọ́ ụrụgá sĩ
ãzíla ma ị́jọ́ míní idélé ụ̃sụ̃táŋá ru ꞌdĩ kí ũlũ.
8 Úpí álẽ jó míní sĩ uꞌájó rĩ rá,
ꞌdĩ ãngũ dị̃zã mídrị̂ ꞌbã sĩ uꞌájó alagá rĩ ꞌi.
9 Ífẽ ádrã ꞌbá ị́jọ́ ũnzí idélépi rĩ kí abe ku
jõku ꞌbá ꞌbá ãrí asulépi rĩ kí abe ku.
10 Kí ꞌbá ị́jọ́ ũnzí idélépi sáwã pírí sĩ rĩ kî
ãzíla kí bábá sĩ ãko ꞌbá mịfị́ sajó rĩ aꞌị́jó.
11 Wó ma áma ídri tãmba sĩ adrujó ị́jọ́ kó ru,
mí anzé ma ãzíla mí adru má be ásị́ ị̃gbẹ̃ sĩ!
12 Úpí ma pá tu ãngũ ũkpó rĩ drị̃ gá
ꞌbá ũꞌbí ru tralépi ími rụ́ ịcụ́lépi rĩ kí agá, ma ími rụ́ ịcụ́ rá.