64
Ãdróŋá zịjó ꞌbá tãmbajó
1 Ãdróŋá mí are áma ụ́ꞌdụ́kọ́ mání unu agá ími bị́lẹ́ gá ị́jọ́ áma ịsụ́lépi rĩ kí sĩ;
ímba áma ídri tã gbọ́rọ́kọ̃ mẹ́rọ́ꞌbá ꞌbadrị́ áma ụrụꞌbá gá rĩ sĩ.
2 Ímba ámatã ị́jọ́ ꞌbá ũnzí rĩ ꞌbã kí itúlé má rụ́ rĩ kî sĩ;
ízị̃ ma ꞌbá ũꞌbí ũnzí uzálépi rĩ kî sĩ.
3 Kí ĩdra ci cécé ménéŋá sị́ ãcí rĩ áni,
ị́jọ́ ũnzí la ãfũ kí tị gá cécé ꞌé gbẹjó rĩ áni,
4 kí dó sĩ ꞌbá ị́jọ́ kọ́lị rĩ gbẹ angájó ãngũ ĩꞌbã kí sĩ ru zị̃jó sĩ ꞌbá ũtẽjó rĩ gá,
kí ĩꞌdi gbẹ ĩꞌdi ꞌbã nị̃ŋá kóru ãzíla ụ̃rị̃ kọ́lị.
5 Kí ru ásị́ imbá kí drĩdríŋĩ gá sĩ ị́jọ́ ũnzí itújó;
kí ị́jọ́ itú sĩ ĩꞌbã mãtégõ kí ꞌbãjó ũní ũní ru,
kí zị la, “Ãꞌdi la dó icó kí ndrelé rá rĩ gá nĩ yã?”
6 Kí ị́jọ́ ũnzí itú ãzíla
kí jọ la, “Ãma itú dó ị́jọ́ pịrị la ꞌbo!”
Ãndá ãndá ru ásị́ ꞌbádrị̂ kí ũrãtáŋá ꞌbádrị̂ be ꞌbá ãzí icó kí nị̃lé ku.
7 Wó Ãdróŋá la kí gbẹ ꞌé ĩꞌdidrị̂ kí sĩ,
kí ꞌébí ịsụ́ nị̃ŋá kóru.
8 Ĩꞌdi ị́jọ́ ĩꞌbã kí itúlé rĩ kí uja kí ụrụꞌbá gá,
ĩꞌdi lị́kị̃ ají kí drị̃ gá;
ꞌbá pírí kí ndrelépi rĩ kí ru drị̃kã aya ayâ.
9 ꞌDã ꞌbã ũngúkú gá, ꞌbá pírí kí drụ́zị́ idé ụ̃rị̃ sĩ;
kí ị́jọ́ Ãdróŋá ꞌbã ngalé ri kí ũlũ,
ãzíla kí ị́jọ́ ũrã ãko ĩꞌdiní idélé rĩ kí drị̃ gá.
10 Lẽ ꞌbá ị́jọ́ pịrị rĩ idélépi rĩ ꞌbã uꞌá kí pírí ãyĩkõ sĩ Úpí agá,
ãzíla ꞌbã zị̃ kí ru ĩꞌdi agá!
Lẽ ꞌbá ásị́ ãlá rĩ ꞌbã ịcụ́ kí pírí ĩꞌdi.