65
Ãdróŋá ịcụ́jó ãwãꞌdĩfô fẽŋá be
1 Ãdróŋá, ĩꞌdi ị́jọ́ múké la ãmaní ími ịcụ́jó ꞌbé Zị̃yọ́nị̃ drị̃ gá,
ãzíla sĩ ũyõ ãmaní nalé rĩ tãmbajó.
2 Mi ꞌbá zịtáŋá ãmadrị̂ kí arelépi rĩ ꞌi,
ꞌbá pírí kí mụ amụ́lé mí rụ́.
3 Ị́jọ́ ũnzí ãmadrị̂ drĩ kí táni ãma ũkpó ndẽ rá tí,
ítrũ ãmaní kí rá fô!
4 ꞌBá míní pẽlé ãzíla
ajílé ãngũ mídrị́ ãlá rĩ agá rĩ kí drị̃lẹ́ba rú,
míní kí ajíjó uꞌájó jó mídrị̂ agá rĩ sĩ.
Ãma dó aga ãko múké mídrị́ jó
ãlá rĩ agá rĩ kî sĩ.
5 Ãdróŋá ãma palépi rĩ,
mi ị́jọ́ ãmaní zịlé rĩ kí umvi ị́jọ́ ãlá míní idélé ụ̃sụ̃táŋá ru rĩ kî sĩ,
ꞌbá ụ̃nọ́kụ́ drị̃ gá ꞌdâ rĩ ꞌbã kí pírí ásị́ ími drị̃ gá,
ꞌbá mĩrĩ ꞌbã ꞌá ꞌdã sĩ rĩ ꞌbã kí vâ ásị́ ími drị̃ gá.
6 Mí iꞌda ũkpõ mídrị̂
míní ꞌbé ãmbogo rĩ kí ꞌbãjó pá tujó ãngũ ĩꞌbadrị̂ kí agá rĩ sĩ.
7 Mi mĩrĩ kí ꞌbã nuŋá ãzíla
ị̃yị́ umvúlépi tũlã tũlã rĩ kí fẽ ĩyãŋãjó tú,
mi uzáŋá ꞌbá ꞌbã kí uzájó rĩ anụ́ mi ꞌi.
8 Ị́jọ́ ꞌdĩ sĩ ꞌbá pírí ụ̃nọ́kụ́ drị̃ gá rĩ kí dó sĩ
acá ụ̃sụ̃táŋá sĩ ị́jọ́ míní idélé rĩ kí sĩ;
ị́jọ́ míní idélé rĩ kí ꞌbá kí fẽ uzálé ãyĩkõ sĩ
ụ̃nọ́kụ́ ꞌbã wókõ ãlu rĩ gá kpere ãzí rĩ gá.
9 Mi ụ̃nọ́kụ̂ tãmba ãzíla mi uzogó fẽ ꞌdịlé drị̃ la gá;
mi ụ̃nọ́kụ́ fẽ adrulé mụ̃ꞌdụ̃-mụ̃ꞌdụ̃ rú.
Áꞌbụ Ãdróŋá drị̂ ga tré ị̃yị́ sĩ,
mi ãkónã kí fẽ kalé ꞌbá ꞌbaní ãngũ drị̃ gá,
ãꞌdusĩku mí itú ụ̃nọ́kụ̂ sĩ ãkónã kajó.
10 Mi uzogó fẽ tị̃lé amvụ́ ꞌa dãlị̃-dãlị̃ rĩ kí agá,
mi ngõlõ-ngõlõ kí fẽ ụdụ́lé ị̃yị́ sĩ,
mi vũ fẽ aŋmálé uzogó sĩ,
mi sụ̃sụ́ wi ãkónã kí drị̃ gá ĩꞌbaní sĩ zojó.
11 Mũkẽ mídrị̂ sĩ ífẽ ãkónã ꞌbaní kajó kpẽté-kpẽté,
ãngũ pírí míní mụjó rĩ kí agá ãko kí ka kpẽté-kpẽté.
12 Ãngũ kõtórõ rú rĩ kí agá andrẹlị́ká la ka sĩ ị̃rẹ́bị́ fẽjó ãnãkpá ꞌbanî,
túpũ kí pá ga tré ãyĩkõ sĩ,
13 ásé kí ꞌa ga tré kãbĩlõ sĩ,
áꞌbụ kí ꞌa ga tré ãná sĩ;
ãko pírí kí uzá ãzíla úngó ngo ãyĩkõ sĩ.