66
Ãdróŋá ịcụ́jó ãzíla ãwãꞌdĩfô fẽjó
1 Ĩmi uzá ãyĩkõ sĩ Ãdróŋá ní ĩmi ꞌbá pírí ụ̃nọ́kụ́ drị̃ gá ꞌdĩ;
2 ĩngo úngó ꞌdị̃zã drị̂ rụ́ ĩꞌdidrị̂ nî;
ĩfẽ úngó ĩꞌdi ịcụ́jó rĩ ꞌbã adru kí dị̃zã rú.
3 Ĩjọ Ãdróŋá ní, “Ãzị́ míní ngalé rĩ kí ụ̃sụ̃táŋá ru ꞌdĩ ꞌbã áni yã?
Ũkpõ mídrị́ ãmbógó rĩ sĩ
mẹ́rọ́ꞌbá mídrị̂ kí ru aꞌbe pírí ími drị́gá.
4 ꞌBá pírí ụ̃nọ́kụ́ drị̃ gá rĩ kí ími ị̃nzị̃;
kí úngó ngo sĩ ími ịcụ́jó,
kí úngó ngo sĩ ími rụ́ ị̃nzị̃jó.”
5 Ĩmi amụ́ ị́jọ́ Ãdróŋá ꞌbã idélé rĩ kí ndrelé:
ị́jọ́ ĩꞌdiní idélé ꞌbá ꞌbaní rĩ kí ụ̃sụ̃táŋá ru.
6 Uja mĩrĩ ãngũ ãꞌí la rú;
ãmã áyị́pịka za kí ị̃yị́ agâ sĩ pá sĩ.
Ãma uꞌá dó sĩ ꞌdãá ãyĩkõ sĩ.
7 Ũkpó ĩꞌdidrị̂ sĩ, ĩꞌdi ũpĩ na ãngũ drị̃ gá ꞌdâ jãꞌdâ,
mịfị́ ĩꞌdidrị̂ la sụ́rụ́ kí undré,
ꞌbá ãzí ꞌbã mvu kí ĩꞌdi rụ́ ꞌdâ rĩ sĩ ãmvé ku.
8 Ĩmi ꞌbá pírí ụ̃nọ́kụ́ drị̃ gá ꞌdĩ, ãfẽ kí ãwãꞌdĩfô Ãdróŋá ãmadrị̂ nî,
lẽ âre ụ́ꞌdụ́kọ́ ĩminí ĩꞌdi rụ́ ịcụ́jó rĩ rá,
9 ĩꞌdi Ãdróŋá ãma tãmbalépi ídri rĩ,
aꞌbe ãma pá ní ĩtrĩlé ku.
10 Ãdróŋá mí ụ̃ꞌbị̃ ãma ꞌbo,
mí uꞌdi ãma cécé sílĩvã uꞌdijó rĩ áni.
11 Mí aꞌbe ãma aꞌdéjó ímbá agá rá,
ãzíla íꞌbã tẹ́rị́ ãnzị la ãma ũngúkú gá.
12 Ífẽ mẹ́rọ́ꞌbá ãmadrị̂ acị́ kí ãma drị̃ gâsĩ ꞌbo;
ãma acị́ ãcí agâ sĩ ãzíla ị̃yị́ galépi tré rĩ agâ sĩ,
wó mí ají ãma ꞌbãlé ãngũ málĩ trũ rĩ gá.
13 Ma amụ́ mídrị́ jó agá ídétáŋá ivélé ivé-ivé rĩ trũ;
ãzíla ma ũyõ mání nalé rĩ ꞌbã ãzị́ nga rá,
14 ꞌdĩ ũyõ mání nalé áma tị sĩ
sáwã ị́jọ́ ꞌbã ándrá áma ịsụ́jó rĩ sĩ rĩ ꞌi.
15 Ma míní ãnãkpá use rĩ kí ivé ídétáŋá ru,
ma kãbĩlõ ágó kí fẽ ídétáŋá ru;
ma mọ́nị̃gọ́ kí fẽ ị̃ndrị́ kí abe míní ãwãꞌdĩfô rú.
16 Ĩmi ꞌbá pírí Ãdróŋá rulépi ꞌdĩ, ĩmi amụ́ ãzíla ĩmi are;
ĩmi ají álũ drĩ ĩminí ị́jọ́ ĩꞌdiní idélé mání rĩ kî.
17 Má awá ĩꞌdi rụ́ áma tị sĩ;
má ịcụ́ ĩꞌdi úngó sĩ.
18 Ádrĩ tá ị́jọ́ ũnzí mádrị̂ kí zị̃ áma ásị́ gá,
Úpí icó tá áma arelé ku.
19 Wó Ãdróŋá are má rá ãndá-ãndá ru;
are ị́jọ́ mání zịlé rĩ rá.
20 Ma Ãdróŋá ịcụ́,
ãꞌdusĩku gã ị́jọ́ mání ĩꞌdi zịjó rĩ ku,
jõku aꞌbe lẽtáŋá ĩꞌdiní áma lẽjó rĩ ku!