84
Jó Úpí drị̂ vị́ tajó
1 Úpí Ãdróŋá Ũkpó ꞌdị́pị,
uꞌájó Jó mídrị̂ agá rĩ ꞌbã ũnĩ ꞌdóni yã!
2 Áma ídri la Jó Úpí drị̂ ꞌbã vị́ ta;
áma ásị́ kí úngó ngo áma ụrụꞌbá be ãyĩkõ sĩ
Ãdróŋá ídri rĩ nî.
3 Átã bãyíbãyíŋá ịsụ́ jó ĩꞌdiní rá,
ãzíla lõpérẽsúka sị ĩꞌdi ꞌbã jõrõvũ rá,
ĩꞌdi dó sĩ ĩꞌdi ꞌbã mvaka kí tãmba
ãlĩtárĩ sĩ ídétáŋá idéjó Úpí Ũkpó ꞌdị́pị drị̂ gá,
Úpí ãzíla Ãdróŋá mádrị̂.
4 Drị̃lẹ́ba ꞌbá uꞌálépi lị́cọ́ mídrị̂ agá rĩ ꞌbanî;
kí ụ́ꞌdụ́ pírí sĩ ími rụ́ ịcụ́.
5 ꞌBá ũkpó ĩꞌbadrị̂ ịsụ́lépi ími agá,
ásị́ fẽlépi sĩ mụjó ãcị̃ ãlá rĩ gá ꞌbé Zị̃yọ́nị̃ drị̂ ꞌbã drị̃ gá ri kí drị̃lẹ́ba rú.
6 Ĩꞌbaní alị agá áꞌbụ ãꞌí Bácã drị̂ agâ sĩ ꞌdĩgá ꞌdâ,
idé kí ĩꞌdi ãngũ ị̃yị́ ní sĩ agájó rĩ rú,
ãndá uzogó áyi drị̃drị̃ rĩ agá rĩ la mụ drị̃lẹ́ba ajílé.
7 Kí ũkpó la zo drị̃ gá drị̃ gá;
ꞌbá ãlu ãlu la mụ ru iꞌdalé Ãdróŋá drị̃lẹ́ gá Zị̃yọ́nị̃ gá.
8 Úpí, Ãdróŋá ũkpó ꞌdị́pị, mí are áma zịtáŋá;
mí are ma fô, Ãdróŋá Yãkóꞌbõ drị̂!
9 Ãdróŋá, íwi sụ̃sụ́ úpí ãmadrị̂ drị̃ gá;
úpí míní pẽlé mi ꞌi rĩ drị̃ gá.
10 Adrujó Jó mídrị̂ agá ụ́ꞌdụ́ ãlu rĩ ndẽ
uꞌájó ụ́ꞌdụ́ álĩfũ ãlu ãngũ ãzí gá rĩ rá.
Mání tá adrujó ꞌbá jó Ãdróŋá drị̂ tị tẽjó rĩ ĩꞌdi múké
ndẽ uꞌájó ꞌbá ũnzí rĩ ꞌbadrị́ lị́cọ́ agá rĩ rá,
11 ãꞌdusĩku Úpí Ãdróŋá ĩꞌdi ꞌbá ãma tãmbalépi rĩ ãzíla ĩꞌdi gọ́bẹ́rẹ́ ãmadrị̂ ꞌi,
Úpí la ãmaní ásị́ ị̃gbẹ̃ fẽ ãrútáŋá be rá.
Uga ãko ãzí múké la
ꞌbá ị́jọ́ múké rĩ ngalépi rĩ ꞌbaní ku.
12 Úpí Ũkpó ꞌdị́pị,
ꞌbá ásị́ tị̃lépi ími drị̃ gá rĩ ĩꞌdi drị̃lẹ́ba rú!