85
Ãdróŋá zịjó sụ́rụ́ ꞌbã adru sĩ múké
1 Úpí, mi ándrá ásị́ ị̃gbẹ́ trũ ãngũ mídrị̂ sĩ;
ífẽ ándrá Yãkóꞌbõ ní drị̃lẹ́ba úꞌdí ru.
2 Ítrũ ꞌbá mídrị̂ kí ꞌbã ị́jọ́ ũnzí kí rá
ãzíla mí aku ị́jọ́ ũnzí ĩꞌbadrị̂ kí pírí rá.
3 Mí aꞌbe ándrá míní uꞌájó ĩꞌbaní ũmbã sĩ rĩ rá
ãzíla ũmbã mídrị́ ãcí ru rĩ ukó rá.
4 Ãdróŋá mi ꞌbá ãma palépi rĩ, mí uja ãma vúlé fô!
Mí aꞌbe uꞌájó ãmaní ũmbã sĩ rĩ cã.
5 Mí dó adru ãmaní ũmbã sĩ jãꞌdâ yã?
Mi dó mụ adrulé ũmbã sĩ kpere anzị ãmadrị́ mụlé tịlé drị̃lẹ́ gâlé rĩ ꞌbaní pírí yã?
Ũmbã mídrị̂ la dó ca áꞌbị́ anzị tịlé drị̃lẹ́ gâlé rĩ ꞌba rụ́ pírí yã?
6 Mí icó ãma ꞌbãlé ũkpó ru ị̃dị́,
ꞌbá mídrị̂ ꞌba ịsụ́ kí dó sĩ ãyĩkõ rĩ gá rá yã?
7 Úpí, mí iꞌda ãmaní lẽtáŋá mídrị́ ukólépi ku rĩ
ãzíla ífẽ ãmaní patáŋá mídrị̂.
8 Ma mụ ị́jọ́ Ãdróŋá Úpí ꞌbã mụlé jọlé rĩ arelé,
azị ásị́ ị̃gbẹ̃ fẽjó ꞌbá ĩꞌdidrị̂ ꞌbaní, ꞌbá ãlá ĩꞌdidrị́ ãꞌị̃táŋá agá rĩ ꞌbaní;
wó lẽ ãma uja kí ãma ị́jọ́ aza rú rĩ kí idejó ku.
9 Ãndá-ãndá ru ĩꞌdi bábá sĩ ꞌbá ĩꞌdiní ãrútáŋá fẽlépi rĩ kí pajó;
dị̃zã ĩꞌdidrị̂ la dó sĩ dị̃ ãngũ ãmadrị̂ agá ꞌdâ.
10 Lẽtáŋá ukólépi ku rĩ kí ị́jọ́ sĩ ásị́ tị̃jó ꞌbá drị̃ gá rá rĩ be icí kí ru ãngũ ãlu gá;
ị́jọ́ ãlá rĩ kí ásị́ ị̃gbẹ̃ be kí ru zị ãvá sĩ.
11 Ị́jọ́ sĩ ásị́ tị̃jó ꞌbá drị̃ gá rĩ la zo ụ̃nọ́kụ́ drị̃ gá;
ãzíla ị́jọ́ ãlá rĩ la ãngũ andré vụ̃rụ́ ꞌdõlé angájó ꞌbụ̃ gâlé.
12 Ãndá-ãndá ru Úpí la ãko múké la kí fẽ rá
ãzíla ụ̃nọ́kụ́ ãmadrị̂ la ãkónã ũfũ rá.
13 Ị́jọ́ ãlá rĩ la alị Ãdróŋá drị̃lẹ́ gá cécé ꞌbá ꞌbá tãmbalépi rĩ áni;
ãzíla ĩmi itú gẹ̃rị̃ ĩꞌdiní.