86
Ãdróŋá zịjó sĩ ãzãkoma aꞌị́jó
1 Úpí, mí are drĩ ị́jọ́ áma tị gá rĩ ãzíla mí umvi ma fô,
ãꞌdusĩku ma lẽmẽrí ãzíla ꞌbá ãzãkoma lẽlépi la.
2 Ímba áma ídri tã, ãꞌdusĩku áfẽ ma pírí mínî.
Mi Ãdróŋá mádrị̂ ꞌi;
ípa ãtíꞌbó mídrị́ ásị́ ꞌbãlépi ími drị̃ gá rĩ ꞌi.
3 Úpí, mí adru mání ásị́ ị̃gbẹ́ sĩ,
ãꞌdusĩku ma ị́jọ́ zị ími tị gá sáwã pírí sĩ.
4 Úpí, ífẽ ãyĩkõ ãtíꞌbó mídrị̂ nî;
ãꞌdusĩku ị́jọ́ mání zịlé ími tị gá rĩ la ca kpere mí rụ̂lé rá.
5 Úpí, mi múké ãzíla mi ꞌbá ꞌbá trũlépi trũ-trũ rĩ ꞌi,
lẽtáŋá ukólépi ku rĩ ga ími ásị́ gá tré ꞌbá pírí ãzãkoma aꞌị́lépi mídrị́ rĩ ꞌbanî.
6 Úpí, mí are zịtáŋá mádrị̂ fô;
mí are áwáŋá mádrị́ sĩ ãzãkoma aꞌị́jó rĩ ꞌi.
7 Ma ími umve sáwã ũcõgõ drị̂ sĩ la,
ãꞌdusĩku mi áma umvi rá.
8 Úpí, ãdroŋa kí agá ꞌbá ãzí cécé mî áni la ꞌdáyụ,
kí ãzí icólépi ị́jọ́ míní ngalé rĩ kí ngalépi rá la ꞌdáyụ.
9 ꞌBá sụ́rụ́ pírí míní ũꞌbãlé rĩ agá rĩ kí amụ́ rá,
kí ãja tị̃ Úpí ími drị̃lẹ́ gá sĩ ími ị̃nzị̃jó;
ãzíla kí ãrútáŋá fẽ rụ́ mídrị́ ãlá rĩ ní rá,
10 ãꞌdusĩku mi ãmbógó ru ãzíla mi ị́jọ́ ũnĩ-ambamba rĩ kí nga;
mi lú Ãdróŋâ rú mi ꞌi áꞌdụ̂sĩ.
11 Úpí, mí imbá mání gẹ̃rị̃ mídrị̂ ꞌi,
ma dó sĩ acị́ gẹ̃rị̃ mídrị́ mgbã rĩ agâ sĩ;
ífẽ mání ásị́ ãlá rĩ ꞌi,
ị́jọ́ ꞌdĩ sĩ ma dó sĩ ãrútáŋá fẽ míní benĩ.
12 Úpí Ãdróŋá mádrị̂, ma ími rụ́ ícụ́ ámã ásị́ pírí sĩ;
ãzíla ma dị̃zã fẽ rụ́ mídrị̂ ní jãꞌdâ,
13 ãꞌdusĩku lẽtáŋá mídrị́ mání rĩ ĩꞌdi ãmbógó ru;
mí apá ma ꞌbụ́ tị gá.
14 Ãdróŋá, ꞌbá ãfó ru rĩ angá kí áma drị̃ gá;
ꞌbá ũꞌbí ásị́ ũnzí rĩ kí áma ndrụ̃ ꞌdịlé,
kí ꞌbá ásị́ ꞌbãlépi ími drị̃ gá ku rĩ kî.
15 Wó Úpí, mi Ãdróŋá ásị́ ãlá ãzíla lẽtáŋá ru íni la,
ũmbã rụ mi gbõrú ku, ími ásị́ ị̃gbẹ́ ru ãzíla mi ꞌbá ị́jọ́ mgbã rĩ kí ngalépi rĩ ꞌi.
16 Mí ajá drĩ ími tị má rụ́ ꞌdõlé ãzíla ími ásị́ ꞌbã adru drĩ mání ị̃gbẹ́ ru;
ífẽ ãtíꞌbó mídrị̂ ní ũkpó mídrị̂ ꞌi,
ãzíla ípa ãtíꞌbó mídrị́ ĩzóŋá ru rĩ ꞌbã ngọ́pị ꞌi.
17 Mí iꞌda mání ícétáŋá sĩ icejó la ílẽ ma rá rĩ,
ꞌbá áma ngụ̃lépi ũnzí rĩ kí dó sĩ ndre la ãzíla kí dó sĩ drị̃nzá isụ́,
ãꞌdusĩku Úpí, íko ámã ãzã rá ãzíla mí ũmŋĩ áma ásị́ rá.