88
Awájó sĩ ãzãkoma aꞌị́jó
1 Úpí, Ãdróŋá mi ꞌbá áma palépi rĩ ꞌi,
ma awá ími drị̃lẹ́ gá ị̃tụ́ kí ị́nị́ be sĩ ãzãkoma aꞌị́jó.
2 Mí are zịtáŋá mádrị̂ ꞌi;
mí are áma áwáŋá mání sĩ ãzãkoma aꞌị́jó rĩ ꞌi fô!
3 Ãꞌdusĩku áma ídri ga tré ũcõgõ sĩ,
ãzíla drã asé ru áma andre gá ãni rú.
4 Úlã dó ma ꞌbá drãlépi rá ri kí ꞌbã ãzí ru;
ma cécé ꞌbá ũkpó kóru rĩ áni.
5 Âꞌbe ma yã ꞌbá drãlépi rá rĩ kí drĩdríŋĩ gá,
ma cécé ꞌbá ụlị́lé rá ꞌbelé ꞌbụ́gá rĩ kí áni,
ꞌbá míní icójó ị́jọ́ agájó kí drị̃ gá ị̃dị́ ku rĩ kí ani
ãꞌdusĩku kí ꞌbá míní sĩ ãzãkoma fẽjó ĩꞌbaní ku ri kî.
6 Íꞌbã ma ꞌbụ́ kị́rị́ la agá,
ꞌbụ́ ꞌa ịnị ãzíla mgbi rĩ agá.
7 Ũmbã mídrị́ áma drị̃ gá rĩ ĩꞌdi ãnzị rú;
ãzíla iti ma ị̃yị́ umvúlépi umvú-umvú rĩ áni.
8 Ífẽ mâ wọ̃rị́ka aꞌbe kí ma rá;
ífẽ má acá ĩꞌbaní ãko ãzí ngụ̃lé ũnzí la rú.
Ma ãngũ ãzí mání sĩ icójó ãfũjó ala gá ku la agá.
9 Áma mịfị́ acá kí dó ũkpó kóru ũcõgõ drị́,
Úpí, ma ími umve ụ́ꞌdụ́ pírí sĩ;
ma áma drị́ kí aja ími drị̃lẹ́ mání ími zị agâ.
10 Mi tálí kí idé ꞌbá ũdrãlépi rá rĩ ꞌbaní rá yã?
ꞌBá ũdrãlépi rá rĩ kí icó angálé sĩ ími rụ́ ịcụ́jó rá yã?
11 Ála lẽtáŋá mídrị́ ukólépi ku rĩ ꞌbã ị́jọ́ ũlũ ĩnádrị̃ drị̃ gá rá yã?
Jõku ála ị́jọ́ sĩ ásị́ tị̃jó ími drị̃ gá rĩ ꞌbã ị́jọ́ ũlũ ãngũ ꞌbá ũdrãlépi rá rĩ ꞌbadrị̂ gá rá yã?
12 Ála ị́jọ́ mídrị́ ụ̃sụ̃táŋá ru rĩ kí ndre ãngũ ịnị agá rá yã;
jõku ála ị́jọ́ mídrị́ ãlá ri kí ndre ãngũ sĩ ị́jọ́ ãvĩjó kí drị̃ gá rá rĩ gá rá yã?
13 Wó Úpí, ma ími umve sĩ ãzãkoma aꞌị́jó mídrị́;
ụ̃ꞌbụ́tị ãlu-ãlu sĩ ma ími zị.
14 Úpí, ígã dó ma úmgbé,
ãzíla mí uja dó ími tị mání bụ́lụ́ gá ãꞌdu sĩ?
15 Iꞌdójó ãnzị̃rị̃ŋã sĩ, má ịsụ́ ũcõgõ ãnirú drã tị gá,
áma ũkpó ukó rá tẹ́rị́ mídrị́ drị̃rịma drị̂ sĩ.
16 Adrã mídrị̂ aku ru pírí áma drị̃ gá;
ụ̃rị̃ míní fẽlé rĩ ꞌdị ma ꞌbo.
17 Ị̃tụ̂rụ̃ kí áma ce cécé ị̃yị́ tịlépi tị̃-tị̃ rĩ ani;
ce kí ma ágágá.
18 Ífẽ mâ wọ̃rị́ka kí ꞌbá áma lẽlépi rĩ kí abe aꞌbe kí ma rá;
ị́nị́ áca dó mâ wọ̃rị́ ãníyágágá rĩ rú.