89
Sáwã sụ́rụ́ ꞌbã ũcõgõ ịsụ́jó rĩ
1 Úpí, ma mụ úngó ngolé lẽtáŋá mídrị́ ukólépi ku rĩ ꞌbã drị̃ gá jãꞌdâ;
ma mụ ị́jọ́ míní adrujó ásị́ mgbã trũ rĩ ꞌbã ị́jọ́ ũlũlé áꞌbị́ anzị ꞌbaní jãꞌdâ,
2 ãꞌdusĩku ánị̃ rá lẽtáŋá mídrị́ ukólépi ku rĩ la adru jãꞌdâ,
ị́jọ́ míní adrujó ásị́ mgbã trũ rĩ la adru ꞌbụ̃ kí agâlé jãꞌdâ.
3 Úpí íjọ, “Má idé tị icíma ꞌbá mání pẽlé rĩ be ꞌbo;
ásõ ũyõ la ãtíꞌbó mádrị́ Dãwụ́dị̃ be ꞌbo.
4 ‘ꞌBá ãfũlépi mí rụ́ rĩ la mụ adrulé úpí ru sáwã pírí agá nĩ;
ma mụ úmvúke mídrị́ ũpĩ drị̂ tãmbalé jãꞌdâ.’ ”
5 Úpí, ꞌbụ̃ kí ími ịcụ́ ị́jọ́ ụ̃sụ̃táŋá ru míní idélé ri kí sĩ,
mãlãyíkã kí ꞌbụ̃ gâlé úngó ngo ị́jọ́ míní adrujó ásị́ mgbã trũ rĩ ꞌbã ị́jọ́ sĩ,
6 ãꞌdusĩku ꞌbá ãzí ꞌbụ̃ gâlé icólé ụ̃ꞌbị̃lé Úpí mí be rá la ꞌdáyụ,
mãlãyíkã mídrị́ ꞌbụ̃ gâlé ri kí ꞌbã ãzí icólé ụ̃ꞌbị̃lé mí be rá la ꞌdáyụ,
7 Ãngũ mãlãyíkã ꞌbã kí ru trajó rĩ gá, kí Ãdróŋá ími ị̃nzị̃,
ãzíla kí pírí adru ụ̃rị̃ sĩ mî sĩ.
8 Úpí Ãdróŋá Ũkpó Pírí ꞌDị́pị, ꞌbá ãzí cécé mî áni la cí yã?
Úpí, mi ũkpó ꞌdị́pị ꞌi ãzíla ásị́ ị̃gbẹ̃ mídrị̂ ce mi ágágá.
9 Ị̃yị́ mĩrĩ drị́ umvúlépi rĩ ꞌbã ũkpó mídrị́,
Mi ĩꞌdi ꞌbã uváŋá ụrụgâlé ru rĩ ịgbẹ rá.
10 Ígbã Rãhábụ̃ káyĩ cécé ꞌbá ꞌdịlé rá rĩ áni;
drị́ ũkpó mídrị̂ sĩ mí iré mẹ́rọ́ꞌbá mídrị̂ kí rá.
11 ꞌBụ̃ ĩꞌdi mî ãni ãzíla ụ̃nọ́kụ̂ vâ mî ãni;
mí idé ụ̃nọ́kụ̂ ãko alagá ꞌdĩ kí abe pírí mi ꞌi.
12 Mí ũꞌbã ãngũ ụ́rụ́ kí ándrá rĩ be mi ꞌi,
ꞌbé Tãbọ́rị̃ kí ꞌbé Hẹ̃rị̃mọ́nị̃ be kí úngó ngo ími rụ́ sĩ ãyĩkõ sĩ.
13 Ũkpõ mídrị̂ ãmbógó ru
ãzíla ãvẹ̃vị̃ mídrị̂ vâ ãmbógó ru.
14 Ũpĩ mídrị̂ iꞌdó ru ũnĩ sĩ ãzíla ị́jọ́ lịŋá pịrị rĩ sĩ,
lẽtáŋá kí ị́jọ́ sĩ ásị́ tị̃jó ími drị̃ gá rĩ be kí ru iꞌda ị́jọ́ míní idélé rĩ kí sĩ.
15 Úpí, ꞌbá ími ị̃nzị̃lépi úngó sĩ rĩ kí,
ꞌbá acị́lépi dị̃zã mídrị̂ agâsĩ rĩ kí abe drị̃lẹ́ba rú!
16 Kí uꞌá ãyĩkõ sĩ ị̃tụ̂rụ̃ rụ́ mídrị̂ sĩ,
ãzíla kí ími ịcụ́ ị́jọ́ pịrị mídrị̂ sĩ,
17 ãꞌdusĩku mi dị̃zã ãzíla ũkpõ ĩꞌbadrị̂ ꞌi
Mi uꞌá ãyĩkõ sĩ míní ãma ꞌbãjó ũkpó ru rĩ sĩ.
18 Úpí, mi ãma tãmba mi ꞌi,
ãzíla Ãdróŋá Ãlá Ịsịrayị́lị̃ drị̂ fẽ ãmaní úpí ãmadrị̂ ꞌbo.
Ị́jọ́ Ãdróŋá ꞌbã azịlé Dãwụ́dị̃ ní rĩ
19 Ándrá ídu rĩ sĩ Úpí, mí iꞌda mi
ãtiꞌbo mídrị́ ãꞌị̃táŋá trũ ꞌdĩ ꞌbaní ãzíla íjọ,
“Áfẽ ãzãkoma ãsĩkárĩ rụ́ kụlépi rĩ ní ꞌbo;
áfẽ úmvúkê ꞌbá ãlu mání pẽlé angájó ꞌbá kí agá ꞌdâ rĩ drị́.
20 Áꞌbã ãtíꞌbó mádrị́ Dãwụ́dị̃ úpí ru,
átị̃ drị́ drị̃ la gá ãdu mádrị́ ãlá rĩ sĩ.
21 Ũkpó mádrị̂ la mụ adrulé ĩꞌdi drị̃ gá sáwã pírí sĩ,
Ma mụ ĩꞌdi fẽlé adrulé ũkpó ru.
22 Mẹ́rọ́ꞌbá ãzí icó kí ĩꞌdi ndẽlé ku;
ꞌbá ũnzí rĩ icó kí ĩꞌdi ndẽlé ku.
23 Ma mụ mẹ́rọ́ꞌbá ĩꞌdidrị̂ kí ị̃lị̃kị̃lé ĩꞌdi drị̃ gâsĩ
ꞌbá ĩꞌdi ngụ̃lépi ũnzí rĩ kí ma kí ụ́ꞌdị́ rá.
24 Ma mụ ĩꞌdi lẽlé ãzíla ĩꞌdiní lẽtáŋá ukólépi ku rĩ iꞌdalé;
ma mụ ĩꞌdi ꞌbãlé sáwã pírí sĩ ꞌbá ị́jọ́ ndẽlépi rá rĩ rú.
25 Ma mụ sụ́rụ́ ĩꞌdidrị̂ nzãlé
iꞌdójó Mẹ̃dị̃tẹ̃rẹ́nị̃yãnị̃ gá kpere mĩrĩ Ũfũrátĩ gá.
26 Ĩꞌdi mụ áma umvelé, ‘Mi mâ átẹ́pị,
Ãdróŋá mádrị̂ ꞌi ãzíla ꞌbá áma palépi rĩ ꞌi.’
27 Ma ĩꞌdi ꞌbã adrulé mâ ngọ́pị kãjãní rĩ rú,
úpí ũpi kí ndẽlépi ãmbõgõ sĩ pírí rá rĩ rú.
28 Ma mụ ị́jọ́ mání azịlé ĩꞌdi be rĩ tãmbalé rá,
ãzíla tị icíma ãmadrị́ ĩꞌdi be rĩ la mụ adrulé jãꞌdâ.
29 Ma ũri ĩꞌdidrị̂ kí fẽ adrulé jãꞌdâ cécé ꞌbụ̃ ꞌbã adrujó rĩ áni;
ngọ́tị́ŋá ĩꞌdi ꞌbã drị̃lẹ́ ru rĩ la sáwã pírí sĩ adru ũpĩ gá nĩ.
30 “Wó anzị ĩꞌdidrị̂ drĩ kí ãzị́táŋá mádrị̂ kí aꞌbe rá,
drĩ kí kí vú ũbĩ ku,
31 drĩ kí ãzị́táŋá mádrị̂ kí ꞌbã idemará ru
ãzíla drĩ kí ị́jọ́ mání azịlé ĩꞌbaní rĩ kí vú ũbĩ ku,
32 ꞌdã ꞌbã ũngúkú gá ũnzĩkãnã ĩꞌbadrị̂ sĩ ma dó drị̃rịma fẽ ĩꞌbaní kẹ̃lị́ká sĩ,
ma kí fẽ colé ị́jọ́ ũnzí ĩꞌbadrị̂ kí sĩ rá.
33 Wó má icó lẽtáŋá mání sĩ Dãwụ́dị̃ lẽjó rĩ atrịlé ku,
jõku má icó ị́jọ́ mání azịlé ĩꞌdiní rĩ aꞌbelé ku.
34 Má icó tị icíma ãmadrị́ Dãwụ́dị̃ be rĩ andilé ku,
jõku má icó ị́jọ́ ãfũlépi áma tị gá rĩ ujalé ku.
35 Ána úyó rụ́ mádrị́ ãlá rĩ ꞌbã ị́jọ́ sĩ pâlé ãlu
má icó ĩnzõ alị́lé Dãwụ́dị̃ ní ku.
36 Ũri ãfũlépi ĩꞌdi rụ́ rĩ kí mụ ũpĩ nalé jãꞌdâ;
ma ũpĩ ĩꞌdidrị̂ fẽ adrulé jãꞌdâ cécé ị̃tụ́ áni.
37 Ma ĩꞌdi ꞌbã adrulé jãꞌdâ cécé ĩmbá,
ꞌbã adrujó sãdínĩ rú ꞌbụ̃ agá ágágá ꞌdâ rĩ áni.”
38 Wó ũmbã rụ dó mi úpí míní ãdu ũsũjó drị̃ la gá rĩ nĩ rá
mí aꞌbe ĩꞌdi rá ãzíla ígã dó ĩꞌdi úmgbé.
39 Mí andi tị icíma ãtíꞌbó mídrị̂ be rĩ rá,
ãzíla íꞌbe dó kõfíyã ĩꞌdidrị́ ũpĩ drị̂ pụ́trụ́ agá ꞌbo.
40 Mí anu bõrõ táwụ̃nị̃ ĩꞌdidrị̂ andre cejó rĩ rá
ãzíla mí andi bõrõ ĩꞌdidrị́ ũkpó rĩ kpékpé.
41 ꞌBá pírí alịlépi ꞌdã sĩ rĩ ra kí ãko Yẹ̃rụ́sãlẹ́mụ̃ gá rĩ kí ũkpó sĩ,
jĩránĩ pírí ri kí gụlé Yẹ̃rụ́sãlẹ́mụ̃ sĩ gụgụ̃.
42 Ífẽ mẹ́rọ́ꞌbá ĩꞌdidrị̂ ꞌbaní ãꞌdị́ ndẽlé rá,
ãzíla ífẽ ĩꞌbaní uꞌájó pírí ãyĩkõ sĩ.
43 Ífẽ ãko ĩꞌdidrị́ ãꞌdị́drị̂ acá kí ãzị́ kóru
ãzíla ífẽ úndẽ ĩꞌdi ãꞌdị́ gâlé rá.
44 Íꞌdụ túré ũpĩ drị̂ ĩꞌdidrị́ ꞌdâ rá
ãzíla úmvúke ĩꞌdidrị̂ aꞌdé vụ̃rụ́.
45 Ífẽ ĩꞌdi delé ꞌdĩ sĩ sáwã ĩꞌdidrị́ dejó rĩ ca drĩ ku rú
ãzíla ífẽ ĩꞌdiní drị̃nzá ũꞌbí kí agá.
46 Úpí, mi dó ími zị̃ ụ́ꞌdụ́ íngõpí yã?
Ũmbã mídrị̂ la ve ãcí áni ụ́ꞌdụ́ íngõpí yã?
47 Mí agá drĩ ị́jọ́ ídri mádrị̂ ãlị́ŋá ru íngoní yã rĩ drị̃ gá,
mí ũrã drĩ ị́jọ́ míní ãma ũꞌbãjó ꞌbá ru rĩ drị̃ gá!
48 Ãꞌdi la uꞌá ídri ãzíla drã ku rĩ gá nĩ?
ꞌBá kí icó ru unálé ị̃nádrị̃ sĩ íngoní ru?
49 Úpí Ãdróŋá, lẽtáŋá mídrị́ ukólépi ku rĩ dó íngõlé?
Lẽtáŋá mgbã mídrị́ míní ándrá ũyõ la najó Dãwụ́dị̃ ní ásị́ pírí sĩ rĩ dó íngõlé?
50 Úpí mí agá drĩ ị́jọ́ ãtíꞌbó mídrị̂ uꞌdájó rĩ,
ị́jọ́ sụ́rụ́ pírí ꞌbã kí áma idejó rĩ kí tajó rĩ ꞌi.
51 Úpí, mẹ́rọ́ꞌbá mídrị̂ uꞌdá kí dó úpí míní sĩ ãdu ũsũjó drị̃ la gá rĩ ꞌbo!
Ãngũ cí ĩꞌdiní mụjó rĩ gá uꞌdá kí ĩꞌdi rá.
52 Ícụ́ Úpî rụ́ jãꞌdâ!
Ámĩnã ãzíla Ámĩnã.