Bụ́kụ̃ 4.
90
Ídri ꞌbá drị̂ ĩꞌdi ãlị́ŋá ru
1 Úpí, mí ábị́ adrulé ꞌbá ãma tã mbalépi
ílí pírí kí agá rĩ ꞌi.
2 Mí ũꞌbã drĩ ꞌbé kí ku rú
jõku íꞌbã drĩ ꞌbụ̃ kí ụ̃nọ́kụ́ be ku rú,
mi mî ngá Ãdróŋá ru jãꞌdâ.
3 Mi ꞌbá kí uja vúlé acájó ụ̃nọ́kụ́ ru,
ãzíla mi jọ la, “Ũri ꞌbádrị̂, ĩgõ vúlé ụ̃nọ́kụ́ gá!”
4 Ílí álĩfũ ãlu rĩ la iꞌdá ími mịfị́ gá
cécé ụ́ꞌdụ́ ãlu áni,
jõku cécé sáwã ní acị́jó mbẽlẽ mbẽlẽ rĩ áni.
5 Mi ꞌbá kí ídri ụꞌdụ ị̃yị́ galépi tré rĩ ꞌbã ꞌbá ụꞌdụjó rĩ áni,
ãma iꞌdá ị̃dị́ ku cécé urobí gárĩ áni. Ãma cécé ásé angálépi ụ̃ꞌbụ́tị sĩ rĩ áni,
6 drĩ táni ángá ụ̃ꞌbụ́tị sĩ ị̃bị rú,
ĩꞌdi jõ ca ĩndró sĩ ĩꞌdi nu ãzíla ĩꞌdi ꞌi rá.
7 Ãma ị̃lị̃kị̃ adrã mídrị̂ sĩ,
ụ̃rị̃ la ãma rụ ũmbã mídrị̂ sĩ.
8 Ínị̃ ị́jọ́ ũnzí ãmadrị̂ kí pírí cé,
ãdrĩ táni kí idé ũní-ũní ru.
9 Ídri ãmadrị̂ kí ãsị̃ ãlị́ŋá ru ũmbã mídrị̂ sĩ,
ílí ãmadrị̂ kí ru de mị́ndrẹ mvụŋá sĩ.
10 Ílí ãmaní uꞌájó ídri rú ambamba rĩ kãlị́ ázírĩ
ꞌbá ũkpó rĩ la icó calé ílí kãlị́ ãrõ gá nĩ,
ị́jọ́ alagá ambamba rĩ kí ũcõgõ kí drị̃cị́rị̃ be,
ílí ꞌda kí alị gbõrú ãzíla ãma dó ãvĩ rá.
11 Ãꞌdi nị̃ adrã mídrị̂ ꞌbã ũkpõ rá rĩ gá nĩ yã?
Ãꞌdusĩku adrã mídrị̂ ãmbógó ru ãrútáŋá fẽlé míní rĩ be.
12 Ị́jọ́ ꞌdĩ sĩ mí imbá ãma sĩ nị̃jó la ụ́ꞌdụ́ ãmadrị̂ kí ꞌbã kãlãfe were rú,
ãma dó sĩ uꞌá ũndũwá sĩ.
13 Úpí, ũmbã la dó ími na ụ́ꞌdụ́ íngõpí?
Ãtiꞌbo mídrị̂ ꞌbã ízákĩzã ꞌba agá drĩ míní.
14 Ífẽ ãmaní ụ̃ꞌbụ́tị sĩ agalé lẽtáŋá mídrị́ ukólépi ku rĩ sĩ,
ị́jọ́ ꞌdĩ sĩ ãma dó sĩ úngó ngo ãyĩkõ sĩ ụ́ꞌdụ́ ãmadrị̂ kí agá pírí.
15 Ífẽ ãmaní uꞌálé ãyĩkõ sĩ ụ́ꞌdụ́ ũꞌbí ru cécé míní ãmaní ũcõgõ fẽjó rĩ áni,
ãꞌdusĩku ãma isụ́ ũcõgõ ílí ũꞌbí rú.
16 Ífẽ ị́jọ́ míní idelé rĩ bã iꞌda kí ru ãtiꞌbo mídrị̂ ꞌbanî,
dị̃zã mídrị̂ ꞌba iꞌda ru anzị ĩꞌbadrị̂ ꞌbanî.
17 Úpí Ãdróŋá ãmadrị̂, lẽtáŋá mídrị̂ ꞌbã ri ãma drị̃ gá;
Ífẽ ãzị́ ãmaní ngalé rĩ ꞌba adru kí drị̃lẹ́ba rú,
ãndá ãzị́ ãmadrị̂ ꞌbã adru kí múké.