91
Ãdróŋá ĩꞌdi ꞌbá ãma tãmbalépi rĩ
1 ꞌBá ãlu ãlu mụlépi tãmbaŋá ịsụ́lépi Úpí rụ́ rĩ,
ĩꞌdi mụ avị́lé Ãdróŋá Ũkpó Pírí ꞌDị́pị ꞌbã índríkã gá rá.
2 Ma jọ la Úpí ní, “Mi ãngũ mání sĩ áma zị̃jó ãzíla bõrõ mání sĩ áma tã mbajó rĩ ꞌi,
Ãdróŋá mádrị́ mání sĩ ásị́ ꞌbãjó drị̃ la gá rĩ ꞌi.”
3 Ãndá-ãndá ru ĩꞌdi ími pa ímbá ꞌbá ũnzí rĩ ꞌbã kí ꞌbelé rĩ agá
ãzíla jụ́wẹ̃ ũkpó rĩ kí agá.
4 Ĩꞌdi ími aku ụ́pụ́pị́ ĩꞌdidrị̂ sĩ,
mi dó sĩ ími zị̃ ụ̃rị̃ kóru;
ị́jọ́ sĩ ásị́ tị̃jó ĩꞌdi drị̃ gá rá rĩ la mụ adrulé míní gọ́bẹ́rẹ́ ru sĩ ími tãmbajó.
5 Mí icó idélé ụ̃rị̃ sĩ úríndí ũnzí ị́nị́ sĩ rĩ kí sĩ ku,
jõku ꞌé agbẹ́lé ị̃tụ́ sĩ rĩ kí sĩ ku,
6 jõku jụ́wẹ̃ ꞌbá rụlépi ũní ũní ru ị́nị́ sĩ rĩ kí sĩ ku,
jõku jụ́wẹ̃ ꞌbá kí sĩ ũdrãjó ị̃tụ́kã íríkírí sĩ rĩ kí sĩ ku.
7 ꞌBá álĩfũ ãlu kí uꞌde ími andre gá ꞌdâ,
álĩfũ mụdrị́ rĩ kí uꞌde ími drị́ ãndá gá rĩ gá,
wó icó kí ími adrálé ku.
8 Mi lú kí ndre ími mịfị́ sĩ
ãzíla mi drị̃rịma fẽlé ꞌbá ũnzí ꞌbaní rĩ kí ndre rá.
9 Ídrĩ Ãdróŋá Ụrụgá Ãndânĩ rĩ ꞌbã ãngũ míní sĩ uꞌájó rĩ rú,
Úpí drị̃ adru ãngũ míní sĩ ími zị̃jó rĩ ꞌi,
10 ị́jọ́ ũnzí icó dó sĩ ími rụlé ku,
lị́kị̃ icó amụ́lé ãni rú lị́cọ́ mídrị̂ gá ku.
11 Ãdróŋá la ími ị́jọ́ azị mãlãyíkã ĩꞌdidrị̂ ꞌbaní sĩ
ími tã mbajó ãngũ míní sĩ acị́jó rĩ kí agá.
12 Kí ími rụ drị́ ĩꞌbadrị̂ kí sĩ ụrụgá ꞌdâ
mí icó dó sĩ ími pá sị̃lé írã gá ku.
13 Mi mụ kẹ̃mị̃ kí uꞌdilé ị̃nị̃ galaꞌbá ru rĩ kí abe,
kẹ̃mị̃ ũmbá rĩ kí ị̃nị̃ ũjũ trũ ambamba rĩ kí abe.
14 Úpí jọ, “Ma ꞌbá áma lẽlépi rĩ pa rá
ãzíla ma ꞌbá ásị́ ꞌbãlépi áma drị̃ gá rĩ kí tãmba rá.
15 Drĩ kí áma umve rá, ma kí tị ãꞌị̃ rá,
drĩ kí adru ũcõgõ agá, ma adru ĩꞌba abe.
Ma mụ kí palé ãzíla ma ĩꞌbaní ãrútáŋá fẽ rá.
16 Ma mụ kí fẽlé uꞌálé ílí ãzo rú
ma kí fẽ patáŋá mádrị̂ ndrelé rá.”