92
Úpí rụ́ ịcụ́jó mũkẽ ĩꞌdidrị̂ ꞌbã ị́jọ́ sĩ rĩ.
1 Ĩꞌdi ị́jọ́ múké la sĩ Úpí ịcụ́jó,
ãzíla úngó ngojó Ãdróŋá Ụrụgá Ãndá nĩ rĩ nî.
2 Ĩꞌdi ị́jọ́ múké la sĩ ị́jọ́ ũlũjó lẽtáŋá mídrị́ ukólépi ku rĩ drị̃ gá ụ̃ꞌbụ́tị sĩ,
ãzíla ị́jọ́ sĩ ásị́ tị̃jó ími drị̃ gá rá rĩ ꞌbã drị̃ gá ị́nị́ sĩ.
3 Ĩꞌdi ị́jọ́ múké la úngó ngojó Úpí ní ãꞌdụ́ngụ́ sĩ,
ụ̃ꞌdị́ ụ́ꞌdụ́kọ́ ũnĩ-ambamba rĩ sĩ ãzíla kõyõ sĩ,
4 ãꞌdusĩku Úpí, ífẽ mání uꞌálé ãyĩkõ sĩ ị́jọ́ pírí míní idélé mání ꞌdĩ kí sĩ.
Ma úngó ngo ãyĩkõ sĩ ị́jọ́ míní idélé ꞌdĩ kí sĩ.
5 Úpí, ãzị́ míní ngalé rĩ kí ꞌbã ãmbõgõ ꞌdõ áni yã!
Ũrãtáŋá mídrị̂ kí álị́ ꞌdõ áni yã!
6 ꞌBá ũndũwá kóru rĩ nị̃ kí ị́jọ́ ꞌdĩ ku,
ꞌbá azalépi aza-azâ rĩ vã kí vâ ị́jọ́ ꞌdĩ ku,
7 ꞌbá ũnzí rĩ drĩ kí táni angá cécé ásé áni rá tí
ꞌbá pírí ị́jọ́ ũnzí idélépi rĩ drị̃ kí táni drị̃lẹ́ba ịsụ́ rá tí,
ála kí ị̃lị̃kị̃ kpítã rá.
8 Wó Úpí, ála ími inga ụrụgá jãꞌdâ,
9 ãꞌdusĩku Úpí, mẹ́rọ́ꞌbá mídrị̂ kí ũdrã rá, kí ị̃lị̃kị̃ rá ãndá ãndá ru,
ꞌbá pírí ị́jọ́ ũnzí idélépi rĩ kí ála mụ kí irélé rá.
10 Wó ífẽ mání acájó ũkpó ru cécé ụ̃drụ́ ásé agá rĩ áni,
mí ũsũ áma drị̃ gá ãdu ãlá rĩ rá.
11 Ándre mẹ́rọ́ꞌbá mádrị̂ kí nde agá áma mịfị́ sĩ,
ãzíla má are ꞌbá ũnzí rĩ kí ꞌbã áwáŋá áma bị́lẹ́ sĩ.
12 ꞌBá ãlá rĩ kí zo gãnã rú cécé káci ife áni,
ãzíla kí zo cécé márígó Lébãnõnĩ gá rĩ kí áni.
13 Kí adru cécé ife salé jó Úpí drị̂ andre gá rĩ áni,
kí zo jó Ãdróŋá drị̂ andre gá ãlá ru.
14 Drĩ kí táni de agá rá tí, kí ífí ka rá,
kí adru ãlá ru ãzíla ị̃bị rú,
15 Kí jọ la, “Úpí la ị́jọ́ lị pịrị,
ĩꞌdi ãngũ mání sĩ áma zị̃jó rĩ ãzíla ị́jọ́ ũnzí ĩꞌdi agá ꞌdáyụ.”